২. আযতনং

২২. চক্খাযতনং কতিহি খন্ধেহি কতিহাযতনেহি কতিহি ধাতূহি সঙ্গহিতং? চক্খাযতনং একেন খন্ধেন একেনাযতনেন একায ধাতুযা সঙ্গহিতং. কতিহি অসঙ্গহিতং? চতূহি খন্ধেহি একাদসহাযতনেহি সত্তৰসহি ধাতূহি অসঙ্গহিতং.

২৩. সোতাযতনং … ঘানাযতনং… জিৱ্হাযতনং… কাযাযতনং… ৰূপাযতনং… সদ্দাযতনং… গন্ধাযতনং… ৰসাযতনং… ফোট্ঠব্বাযতনং…পে… একেন খন্ধেন একেনাযতনেন একায ধাতুযা সঙ্গহিতং. কতিহি অসঙ্গহিতং? চতূহি খন্ধেহি একাদসহাযতনেহি সত্তৰসহি ধাতূহি অসঙ্গহিতং.

২৪. মনাযতনং একেন খন্ধেন একেনাযতনেন সত্তহি ধাতূহি সঙ্গহিতং. কতিহি অসঙ্গহিতং? চতূহি খন্ধেহি একাদসহাযতনেহি একাদসহি ধাতূহি অসঙ্গহিতং.

২৫. ধম্মাযতনং অসঙ্খতং খন্ধতো ঠপেত্ৱা চতূহি খন্ধেহি একেনাযতনেন একায ধাতুযা সঙ্গহিতং. কতিহি অসঙ্গহিতং? একেন খন্ধেন একাদসহাযতনেহি সত্তৰসহি ধাতূহি অসঙ্গহিতং.

(একমূলকং.)

২৬. চক্খাযতনঞ্চ সোতাযতনঞ্চ একেন খন্ধেন দ্ৱীহাযতনেহি দ্ৱীহি ধাতূহি সঙ্গহিতা. কতিহি অসঙ্গহিতা? চতূহি খন্ধেহি দসহাযতনেহি সোড়সহি ধাতূহি অসঙ্গহিতা.

২৭. চক্খাযতনঞ্চ ঘানাযতনঞ্চ… চক্খাযতনঞ্চ জিৱ্হাযতনঞ্চ… চক্খাযতনঞ্চ কাযাযতনঞ্চ… চক্খাযতনঞ্চ ৰূপাযতনঞ্চ… চক্খাযতনঞ্চ সদ্দাযতনঞ্চ… চক্খাযতনঞ্চ গন্ধাযতনঞ্চ… চক্খাযতনঞ্চ ৰসাযতনঞ্চ… চক্খাযতনঞ্চ ফোট্ঠব্বাযতনঞ্চ একেন খন্ধেন দ্ৱীহাযতনেহি দ্ৱীহি ধাতূহি সঙ্গহিতা. কতিহি অসঙ্গহিতা? চতূহি খন্ধেহি দসহাযতনেহি সোড়সহি ধাতূহি অসঙ্গহিতা.

২৮. চক্খাযতনঞ্চ মনাযতনঞ্চ দ্ৱীহি খন্ধেহি দ্ৱীহাযতনেহি অট্ঠহি ধাতূহি সঙ্গহিতা. কতিহি অসঙ্গহিতা? তীহি খন্ধেহি দসহাযতনেহি দসহি ধাতূহি অসঙ্গহিতা.

২৯. চক্খাযতনঞ্চ ধম্মাযতনঞ্চ অসঙ্খতং খন্ধতো ঠপেত্ৱা চতূহি খন্ধেহি দ্ৱীহাযতনেহি দ্ৱীহি ধাতূহি সঙ্গহিতা. কতিহি অসঙ্গহিতা? একেন খন্ধেন দসহাযতনেহি সোড়সহি ধাতূহি অসঙ্গহিতা.

(দুকমূলকং.)

৩০. দ্ৱাদসাযতনানি কতিহি খন্ধেহি কতিহাযতনেহি কতিহি ধাতূহি সঙ্গহিতা? দ্ৱাদসাযতনানি অসঙ্খতং খন্ধতো ঠপেত্ৱা পঞ্চহি খন্ধেহি দ্ৱাদসহাযতনেহি অট্ঠাৰসহি ধাতূহি সঙ্গহিতা. কতিহি অসঙ্গহিতা? ন কেহিচি খন্ধেহি ন কেহিচি আযতনেহি ন কাহিচি ধাতূহি অসঙ্গহিতা.

(দ্ৱাদসকং.)