১. সঞ্ঞাপৰিভাসানিদ্দেস-পঠমপৰিচ্ছেদ

১. নম’ত্থু জন সন্তান, তম সন্তান ভেদিনো;

ধম্মু’জ্জলন্ত ৰুচিনো, মুনিন্দো’দাত ৰোচিনো.

২. পিঙ্গলা’চৰিযাদীহি, ছন্দং য মুদিতং পুৰা;

সুদ্ধমাগধিকানং তং, ন সাধেতি যথিচ্ছিতং [য’দিচ্ছিতং যতি’চ্ছিতং (ক.)].

৩. ততো মাগধভাসায, মত্তা,ৱণ্ণ,ৱিভেদনং;

লক্খ্য লক্খণ সংযুত্তং, পসন্ন’ত্থ,পদ,ক্কমং.

৪. ইদং ৱুত্তোদযং নাম, লোকিয’চ্ছন্দনিস্সিতং;

আৰভিস্স’মহং দানি, তেসং সুখৱিবুদ্ধিযা.

৫. সব্বগ্লা ম্না,’দিগলহূ, ভ্যা’,মজ্ঝ’ন্ত গৰূ জসা;

মজ্ঝ’ন্তলা ৰ,তে’তে’ট্ঠ, গণা গো গৰু,লো লহু.

৬. ভ,জ,সা সব্বগ,লহূ, পঞ্চি’মে সণ্ঠিতা গণা;

অৰিযাদিম্হি ৱিঞ্ঞেয্যা, গণো ইধ চতু’ক্কলো.

৭. সংযোগা’দি চ, দীঘো চ, নিগ্গহীতপৰো চ, যো;

গৰু, ৱঙ্কো, পাদন্তো,ৱা, ৰস্সো’ঞ্ঞো মত্তিকো লু’জু.

৮. পৰে পাদাদিসংযোগে, যো পুব্বো গৰুক’ক্খৰো;

লহু স ক্ৱচি ৱিঞ্ঞেয্যো, তদুদাহৰণং যথা.

৯. দস্সনৰসা’নুভাৱনে, নিবদ্ধগেধা জিনস্স’যং জনতা;

ৱিম্হযজননী সঞ্ঞত, ক্ৰিযা নু কং না’নুৰঞ্জযতি.

১০. ৱিঞ্ঞেয্যা লোকতো সঞ্ঞা, সমুদ্দো,সু,ৰসাদিনং;

পাদোঞেয্যো চতুত্থং’সো, পদচ্ছেদো যতী ভৱে.

১১. সম,মড্ঢসমং, ৱুত্তং, ৱিসমং চা’পৰং তিধা;

সমা লক্খণতো পাদা, চত্তাৰো যস্স তং সমং.

১২. যস্স’ন্তিমেন দুতিযো, ততিযেনা’দিমো সমো;

ত’দড্ঢসম, মঞ্ঞং তু, ভিন্ন লক্খণ পাদিকং.

১৩. পাদ’মেকক্খৰা’ৰব্ভ, যাৱ ছব্বীসত’ক্খৰা;

ভৱে পাদেহি তং ছন্দং, নানানামো’দিতং ততো.

১৪. দণ্ডকা চণ্ডৱুট্ঠ্যা’দি, পাদেহি ছহি, তীহি তু;

‘গাথা’তি চ পৰত্থে’ৱং, ছন্দো সঞ্ঞা পকাসিতা.

১৫. অনন্তৰো’দিতং চ’ঞ্ঞ, মেতং সামঞ্ঞ নামতো;

‘গাথা’ইচ্চেৱ নিদ্দিট্ঠং, মুনিন্দৱচনে পন.

১৬. ৱিসেসনামতো কিঞ্চি, গহেত্ৱা সব্বথো’চিতং;

দস্সযিস্সাম’হং তে’ত্থ, নামানা’ৱি ভৱিস্সৰে.

ইতি ৱুত্তোদযে ছন্দসি সঞ্ঞাপৰিভাসা নিদ্দেসো নাম

পঠমো পৰিচ্ছেদো.