নমো তস্স ভগৱতো অৰহতো সম্মাসম্বুদ্ধস্স

সুত্তৱন্দনা

১. ধম্মত্থ দেসনা ৱেধ,

চতুগম্ভীৰ দুদ্দসং;

ধম্মং লোকস্স দেসেন্তং,

ধম্মৰাজং নমামহং;

২. বুদ্ধো পচ্চেকবুদ্ধো চ,

অৰহা চক্কৱত্তীতি;

থূপাথূপাৰহং ৱন্দে,

চতুথূপাৰহেসু তং;

৩. পেতসেয্যো কামভোগী,

সীহসেয্যো তথাগতো;

সযন্তং চতুসেয্যেসু,

চতুত্থেন নমে জিনং;

৪. অণ্ডজা জলাবুজা চ;

সংসেদজো পপাতিকা;

চতুযোনি পৰিচ্ছেদ,

ঞাণৱন্তং নমে জিনং;

৫. সুতবুদ্ধোনুবুদ্ধো চ,

পচ্চেকো জিনবুদ্ধোতি;

চতুত্থং চতুবুদ্ধেসু,

ৱন্দামি লোকনাযকং;

৬. ৰাহুগ্গং অত্তভাগীনং,

মন্ধাতা কামভোগীনং;

মাৰো অধিপতেয্যানং,

বুদ্ধো লোকে সদেৱকে;

চতুঅগ্গ পঞ্ঞত্তীনং,

অগ্গপত্তং নমে জিনং.

৭. দানং পিযকথা অত্থ,

চৰিযা সদিসত্ততা;

চতুসঙ্গহ ৱত্থূহি,

অসঙ্খিযেসু জাতিসু;

লোকস্স সঙ্গহেতাৰং,

ৱন্দামি লোকনাযকং;

৮. লোভো দোসো চ মোহোতি,

অন্তো পচ্চত্থিকে তযো;

দুজ্জযে সব্বৱেৰীহি,

সঞ্জিতংপি সুধিং নমে;

৯. জাতি পুঞ্ঞ মহত্তানি,

গুণমহত্তমুত্তমং;

তিমহত্থেহি সম্পন্নং,

ৱন্দামি লোকনাযকং;

১০. হেতু ফল সম্পদাযো,

সত্তুপকাৰসম্পদা;

তিসম্পদাহি সম্পন্নং,

ৱন্দামি লোকনাযকং.

১১. ঞাণপ্পহানানুভাৱ,

সুৰূপকাৰসম্পদা;

চতুফল সম্পদাহি,

তং সম্পন্নং নমে জিনং.

১২. আসযো চ পযোগোতি,

সত্তুপকাৰ সম্পদা;

দুৱিধা যস্স সম্পন্না,

সম্মা মং পাতু সো জিনো.

১৩. মহোসধে ৱেস্সন্তৰে,

পচ্ছিমভৱিকে তথা;

তিজাতীসু নমে ৱাচং,

ভাসেন্তং জাযনক্খণে.

১৪. নেমিম্হি সাধিনে চেৱ,

মন্ধাতৰি চ গুত্তিলে;

চতূসু মনুজত্তেন,

দেৱলোকং গতং নমে.

১৫. সঙ্খাৰো ৰূপৱিকাৰো,

লক্খণং ৱাননিস্সটং;

নিব্বানং পঞ্ঞত্তিচেতি,

পঞ্চ ঞেয্যন্তগুং নমে.

১৬. পুত্ত দাৰ পৰিচ্চাগা,

ৰজ্জঙ্গং জীৱ চাগীতি;

পঞ্চ মহাপৰিচ্চাগে,

কৰং সুদুক্কৰে নমে.

১৭. ৰূপঞ্চ ৱেদনা সঞ্ঞা,

সঙ্খাৰা ৱিঞ্ঞাণন্তিমে;

পঞ্চক্খন্ধে পৰিজানং,

তিপৰিঞ্ঞাহি তং নমে.

১৮. মনুস্স দেৱ গতিযো,

পেতো চ নিৰযো তথা;

তিৰচ্ছানোতি পঞ্চেতা,

ছিন্দন্তং গতিযো নমে;

১৯. দেৱপুত্তো কিলেসো চ,

অভিসঙ্খাৰ মাৰকো;

খন্ধো মচ্চূতি পঞ্চেতে,

মাৰে ৱিজিতৱং নমে.

২০. পুৰেভত্তং পচ্ছাভত্তং,

পুৰিমঞ্চেৱ মজ্ঝিমং;

পচ্ছিমন্তি সদা পঞ্চ,

বুদ্ধকিচ্চং কৰং নমে.

২১. ৰূপা সদ্দা গন্ধা ৰসা,

ফোট্ঠব্বা চ মনোৰমা;

পঞ্চ কামগুণে হিত্ৱা,

খেড়ংৱ নিগ্গতং নমে.

২২. ৰাগসল্লং দোসসল্লং,

মোহা মানো চ দিট্ঠীতি;

ৱন্দে ৱজ্জাতিৱজ্জন্তং,

পঞ্চসল্লপনূদনং.

২৩. দীঘো মজ্ঝিম সংযুত্তা,

অঙ্গুত্তৰো চ খুদ্দকো;

ইতি পঞ্চ নিকাযেহি,

সুৱিনেন্তং পজং নমে.

২৪. ইস্সৰিযং যসো ধম্মো,

কামো সিৰী পযত্তীতি;

ভগ্যেহি ছহি সম্পন্নং,

ৱন্দামি লোকনাযকং.

২৫. পিযাপিযং ভূতাভূতং,

অত্থানত্থং যথাৰহং;

মিস্সা ছসু সুৱাচংৱ,

ভাসন্তং অত্থকং নমে.

২৬. অলসো চ পমাদো চ,

অনুট্ঠানং অসংযমো;

নিদ্দা তন্তীতি ছিদ্দেহি,

ছহি মুত্তং সদা নমে.

২৭. মহাকৰুণাসমাপত্তি,

যমকপ্পাটিহাৰিযং;

আসযানুসযে ঞাণং,

ইন্দ্ৰিযান পৰোপৰে;

সব্বঞ্ঞুতা নাৱৰণং,

ছা সাধাৰণিকং নমে.

২৮. কামচ্ছন্দো চ ব্যাপাদো,

থিনমিদ্ধঞ্চ সংসযো;

অৱিজ্জুদ্ধচ্চ কুক্কুচ্চং,

ছৱিনীৱৰণং নমে.

২৯. ইদ্ধিৱিধং দিব্বসোতং,

পৰচিত্ত ৱিজাননা;

পুব্বেনিৱাসানুস্সতি,

দিব্বচক্খাসৱক্খযো;

ছড়ভিঞ্ঞাহি সম্পন্নং,

ৱন্দামি পুৰিসুত্তমং.

৩০. নীল পীতা চ ওদাতা,

মঞ্জিট্ঠা চ পভস্সৰা;

লোহিতাতি ছ ৰংসীহী,

ৱিজ্জোতন্তং সদা নমে.

৩১. অস্সাদাদীনৱো চেৱ,

নিস্সৰণফলং তথা;

উপাযাণত্তীতি ছধা,

সদ্ধম্মদেসকং নমে.

৩২. ৰাগো দোসো চ মোহো চ,

ৱিতক্কচৰিযা তথা;

সদ্ধা বুদ্ধীতি ভাজেন্তং,

তা ছড়েচৰিযা নমে.

৩৩. ৰজতং কনকং মুত্তা,

মণি ৱেড়ুৰিযানি চ;

ৱজিৰঞ্চ পৱাড়ন্তি,

সেট্ঠি সত্তধনো ৱিয.

৩৪. সদ্ধাসীলং সুতংচাগো,

হিৰী ওত্তপ্পিযং ধনং,

পঞ্ঞাধনন্তি সম্বুদ্ধং,

ৱন্দে সত্তমহাধনং.

৩৫. চক্কং হত্থি অস্সো মণি,

গহপতিত্থিযো তথা;

সুপৰিণাযকোচাতি,

সত্তৰতনো চক্কৱত্তীৱ.