নমো তস্স ভগৱতো অৰহতো সম্মাসম্বুদ্ধস্স

কমলাঞ্জলি

১. কমলাসন কমলাপতি পমথাধিপ ৱজিৰা,

যুধদানৱ মনুজোৰগ ভুজগাসন পতিনং;

মকুটাহিত মনিদীধিতি ভমৰাৱলি ভজিতং,

পণমা’মহং অনঘং মুনি চৰণামল কমলং.

২. কমলালয সদি’সঙ্কিত কলমঙ্গল ৰুচিৰং,

জুতিৰঞ্জিতং অভিনিজ্জিত সুভকঞ্চন নলিনং;

জনিতা চিৰ সমযে নিজ পিতু ভূপতি নমিতং,

পণমা’মহং অনঘং মুনি চৰণামল কমলং.

৩. সৰণাগত ৰজনীপতি দিনসেখৰ নমিতং,

ভজিতাখিল জনপাৱনং অভিকঙ্খিত সুখদং;

ৱসুধাতল সযমুগ্গত সৰসীৰুহ মহিতং,

পণমা’মহং অনঘং মুনি চৰণামল কমলং.

৪. দিৰদাসন তৰুপন্তিক ঘটিতাসনং অভযং,

ৱিজযাসন সমধিট্ঠিত চতুৰঙ্গিক ৱিৰিযং;

ধৰমানক সুৰিযেহনি ৱিজিতন্তক ধজিনিং,

পণমা’মহং অভিপাতিত নমুচিদ্ধজ ৱিভৱং.

৫. সদযোদিত পিযভাৰতি ৱিজিতন্তক সমৰং,

দসপাৰমি বলকম্পিত সধৰাধৰ ধৰনিং;

গিৰিমেখল ৱৰৱাৰন সিৰসানত চৰণং,

পণমা’মহং অভিনন্দিত সনৰামৰ ভুৱনং.

৬. নিখিলাসৱ ৱিগমে’নতিৱিমলীকত হদযং,

তদনন্তৰ ৱিদিতাখিল মতিগোচৰ ৱিসযং;

ৱিসযীকত ভুৱনত্তযং অতিলোকিয চৰিতং,

পণমা’মহং অপৰাজিতং অৰহং মুনিং অসমং.

৭. মুদুভাৰতি মধুপাসিত নলিনোপম ৱদনং,

ৰুচিৰাযত নলিনীদল নিভ লোচন যুগলং;

উদযোদিত ৰৱিমণ্ডল জলিতামল নিটিলং,

পণমা’মহ অকুতোভযং অনঘং মুনি পমুখং.

৮. অসিতম্বুদ ৰুচিকুঞ্চিত মুদু কুন্তল ললিতং,

ভুৱনোদৰ ৱিততামিত জুতিসঞ্চয জলিতং;

মদমোদিত দিৰদোপম গতিৱিব্ভম ৰুচিৰং,

পণমা’মহং অমতন্দদ মুনিপুঙ্গৱং অসমং.

৯. কৰুণাৰস পৰিভাৱিত সৱণামত ৱচনং,

ৱিৰুদাৱলি সতঘোসিত যসপূৰিত ভুৱনং;

সুমনোহৰ ৱৰলক্খণ সিৰিসঞ্চয সদনং,

পণমা’মহং উদিতামল সসিমণ্ডল ৱদনং.

১০. ৱিনযাৰহ জনমানস কুমুদাকৰ সসিনং,

তসিনাপগ পৰিসোসন সতদীধিতি তুলিতং;

তমনাসৱ মুনিসেৱিতং অপলোকিত সুখদং,

পণমা’মহং অনিকেতনং অখিলাগতি ৱিগতং.

১১. সহিতাখিল ভযভেৰৱং অভযাগত সৰনং,

অজৰামৰ সুখদাযকং অনিৰাকত কৰুণং;

তমুপাসক জনসেৱিত সুপতিট্ঠিত চৰণং,

পণমা’মহং অহিতাপহং অনঘুত্তম চৰণং.

১২. কৰুণামত ৰসপুৰিত ৱীমলাখিল হদযং,

ৱিহিতামিত জনতাহিতং অনুকম্পিত ভুৱনং;

ভুৱনে সুতং অৱনীপতি সত সেৱিত চৰণং,

পণমা’মহং অনঘং মুনিং অঘনাসন চতুৰং.

১৩. অৰতীৰতি পৰিপীলিত যতিমানস দমনং,

নিজসাসন ৱিনিৱাৰিত পুথুতিত্থিয সমণং;

পৰৱাদিক জনতাকত পৰিভাসিত খমনং,

পণমা’মহং অতিদেৱত ৱৰ গোতম সমণং.

১৪. সৰণাগত ভযনাসন ৱজিৰালয পণিভং,

ভৱসাগৰ পতিতামিত জনতাৰন নিৰতং;

সিৰসাৱহং অমলঞ্জলি পুটপঙ্কজ মকুলং,

পণমা’মহং অখিললায ৱিগতং মুনিং অতুলং.

১৫. ৱিমলীকত জনমানস ৱিগতাসৱ ভগৱং,

ভৱপাৰগ ৱিভৱামত সুখদাযক সততং;

পৰমাদৰ গৰুগাৰৱ ৱিনতং জিন পযতং,

পদপঙ্কজ ৰজসা মম সমলঙ্কুৰু সিৰসং.

১৬. পৱনাহত দুমপল্লৱং ইৱ নাৰত চপলং,

ভৱলালস মলিনীকতং অজিতিন্দ্ৰিয নিৱহং;

চিৰ সঞ্চিত দুৰিতাহতং অনিৱাৰিত তিমিসং,

ৱিমলীকুৰু কৰুণাভৰ সুতৰং মম হদযং.

১৭. অদযে দযং অনযে নযং অপি যো গুণং অগুণে,

অহিতে হিতং অকৰো ক্ৱচিদ অপি কেনচি নকতং;

সদযে জিন সুনযে গুণসদনে তযি নিতৰং,

সুহিতে হিতচৰিতে’নঘ ৰমতে মম হদযং.

১৮. ভৱসঙ্কট পতিতেনপি ভৱতা চিৰ চৰিতং,

ৱিসমে সম চৰণং খলু দসপাৰমি ভৰণং;

সৰতো’হনি সৰতো নিসি সুপিনেনপি সততং,

ৰমতে জিন সুমতে ত্ৱযি সদযং মম হদযং.

১৯. অতিদুদ্দদং অদদী ভৱং অতিদুক্কৰং অকৰী;

অতিদুক্খমং অখমী ৱত কৰুণানিধি’ৰসমো,

ইতি তে গুণং অনঘং মুনি সৰতো মম হদযং,

ৰমতে’হনি ৰমতে নিসি ৰমতে ত্ৱযি সততং.

২০. অতিদুচ্চৰং অচৰী ভৱং অতিদুদ্দমং অদমী,

অতিদুদ্দযং অদযী ৱত সদযাপৰ হদযো;

ইতি তে গুণং অনঘং মুনি সৰতো মম হদযং,

ৰমতে’হনি ৰমতে নিসি ৰমতে ত্ৱযি সততং.

২১. অতিদুগ্গমং অগমী ভৱং অতিদুজ্জযং অজযী,

অতিদুস্সহং অসহী ৱত সমুপেক্খিত মনসো;

ইতি তে গুণং অনঘং মুনি সৰতো মম হদযং,

ৰমতে’হনি ৰমতে নিসি ৰমতে ত্ৱযি সততং.

২২. অতিদাৰুন পলযানল সদিসানল জলিতে,

নিৰযে ৱিনিপতিতো চিৰং অঘতাপিত মনসো;

ন সৰিং সকিদ অপি তে পিত ভজিতুং পদনলিনং,

খম গোতম নৰসাৰথি তমিদং মম খলিতং.

২৩. তিৰিযগ্গত-গতিযং চিৰং অনৱট্ঠিত চৰিতো,

অতিনিট্ঠুৰ ৱধতজ্জিত ভযকম্পিত হদযো;

ন সৰিং সকিদপি তে পিত ভজিতুং পদনলিনং,

খম গোতম পুৰিসুত্তম তমিদং মম খলিতং.

২৪. পৰিদেৱন নিৰতো চিৰং অথ পেত্তিয ৱিসযে,

সুজিঘচ্ছিত সুপিপাসিত পৰিসোসিত জঠৰে;

ন সৰিং সকিদপি তে পিত ভজিতুং পদনলিনং,

খম গোতম দিপদুত্তম তমিদং মম খলিতং.

২৫. ৱিৱসো ভুসং অঘদূসিত মনসাসুৰ ৱিসযে,

জনিতো ঘনতিমিৰে চিৰং অতিদুক্খিত হদযো;

ন সৰিং সকিদপি তে পিত ভজিতুং পদনলিনং,

খম গোতম ৱসিসত্তম তমিদং মম খলিতং.

২৬. মনসা চিৰ ৱিহিতং সৰং অতিকিব্বিস চৰিতং,

সমথেনথ সুৱিৰাজিয তং অসঞ্ঞিতং উপগো;

ন সৰিং সকিদ অপি তে পিত ভজিতুং পদ নলিনং,

খম গোতম ৱসিপুঙ্গৱ তমিদং মম খলিতং.

২৭. ৱিজিগুচ্ছিয দুৰিতং নিজ ৱপুসা কতং অমিতং,

তনু ৱজ্জিতং উপগো ভৱং ইহ ভাৱিত সমথো;

ন সৰিং সকিদপি তে পিত ভজিতুং পদনলিনং,

খম গোতম যতিকুঞ্জৰ তমিদং মম খলিতং.

২৮. ৰতনত্তয ৰহিতে ভুস বহুলীকত দুৰিতে,

জনিতো পৰৱিসযে বুধজন নিন্দিয চৰিতে;

ন সৰিং সকিদপি তে পিত ভজিতুং পদনলিনং,

খম গোতম কৰুণানিধি তমিদং মম খলিতং.

২৯. জনিতো যদি মনুজেসুপি ৱিকলিন্দ্ৰিয নিৱহো,

তনুনা কৰচৰণাদিহি ৱিকতে’নিহ দুখিতো;

ন সৰিং সকিদপি তে পিত ভজিতুং পদনলিনং,

খম গোতম মতিসাগৰ তমিদং মম খলিতং.

৩০. ৱিধিনাহিত মতিভাৱন ৰহিতো তমপিহিতো,

ৱিসদেসুপি কুসলাদিসু তথদস্সন ৱিমুখো;

ন সৰিং সকিদপি তে পিত ভজিতুং পদনলিনং,

খম গোতম নৰকেসৰি তমিদং মম খলিতং.

৩১. সুচিৰেনপি ভুৱি দুল্লভং অসমং খণং অলভং,

সনৰামৰ জনতাহিত সুখদং মুনি জননং;

ন সৰিং সকিদপি তে পিত ভজিতুং পদনলিনং,

খম গোতম ৱদতংৱৰ তমিদং মম খলিতং.

৩২. নিসিতাযুধ ৱধসজ্জিত খড়নিদ্দয হদযো,

পৰহিংসন ৰুচি ভিংসন যমসোদৰ সদিসো;

ন সৰিং সকিদপি তে পিত ভজিতুং পদনলিনং,

খম গোতম মুনিসত্তম তমিদং মম খলিতং.

৩৩. পৰসন্তক হৰণে কতমতি বঞ্চন বহুলো,

ঘৰসন্ধিক পৰিপন্থিক সহসাকতি নিৰতো;

ন সৰিং সকিদপি তে পিত ভজিতুং পদনলিনং,

খম গোতম মুনিপুঙ্গৱ তমিদং মম খলিতং.

৩৪. নৱযোব্বন মদগব্বিত পৰিমুচ্ছিত হদযো,

সুচিসজ্জন ৱিজিগুচ্ছিয পৰদাৰিক নিৰতো;

ন সৰিং সকিদপি তে পিত ভজিতুং পদনলিনং,

খম গোতম কৰুণাভৰ তমিদং মম খলিতং.

৩৫. মদিৰাসৱৰত নাগৰজন সন্তত ভজিতো,

গৰুগাৰৱ হিৰিদূৰিত তিৰিযগ্গত চৰিতো;

ন সৰিং সকিদপি তে পিত ভজিতুং পদনলিনং,

খম গোতম ৱিহতাসৱ তমিদং মম খলিতং.

৩৬. সপিতামহ পপিতামহ নিচিতং ধনং অমিতং,

পিতুসঞ্চিতমপি নাসিয কিতৱো হতৱিভৱো;

ন সৰিং সকিদপি তে পিত ভজিতুং পদনলিনং,

খম গোতম ৱিজিতন্তক তমিদং মম খলিতং.

৩৭. ৱিতথালিক ৱচনো পৰপিযসুঞ্ঞত কৰণো,

ফৰুসং ভণং অতিনিপ্ফল বহুভাসন নিপুণো;

ন সৰিং সকিদপি তে পিত ভজিতুং পদনলিনং,

খম গোতম ভুৱনেসুত তমিদং মম খলিতং.