৯. মহাৰট্ঠসাসনৱংসকথামগ্গো

৯. ইতো পৰং মহাৰট্ঠসাসনৱংসকথামগ্গং কথযিস্সামি যথাৱুত্তমাতিকাৱসেন.

ততিযসঙ্গীতাৱসানে হি মহামোগ্গলিপুত্ততিস্সত্থেৰো মহাধম্মৰক্খিত্থেৰং মহাৰট্ঠং পেসেসি,-ত্ৱং এতং ৰট্ঠং গন্ত্ৱা এত্থ সাসনং পতিট্ঠাপেসীতি.

মহাধম্মৰক্খিতত্থেৰোচ অত্তপঞ্চমো হুত্ৱা মহাৰট্ঠং গন্ত্ৱা মহানাৰদকস্সপজাতককথায মহাৰট্ঠকে পসাদেত্ৱা চতুৰাসীতিপাণসহস্সানি মগ্গফলেসু পতিট্ঠাপেসি. তেৰসসহস্সানি পব্বজিংসু. এৱং সো তত্থ সাসনং পতিট্ঠাপেসি.

মহাৰট্ঠং ইসি গন্ত্ৱা, সো মহা ধম্মৰক্খিতো;

জাতকং কথযিত্ৱান, পসাদেসি মহাজনন্তি.

তত্থ কিৰ মনুস্সা পুব্বে অগ্গিহুতাদিমিচ্ছাকম্মং যেভুয্যেন অকংসু. তেনেৱ থেৰো মহানাৰদকস্সপজাতককথং দেসেসি. ততো পট্ঠায তত্থ মনুস্সা জাতক কথং যেভুয্যেন সোতুং অতিৱিয ইচ্ছন্তি. ভিক্খূচ যেভুয্যেন গহট্ঠানং জাতককথংযেৱ দেসেন্তি. ৱিসেসতো পন ৱস্সন্তৰজাতককথং তে মনুস্সা বহূহি দাতব্বৱত্থূহি পূজেত্ৱা সুণন্তি.

তঞ্চ মহাৰট্ঠং নাম স্যামৰট্ঠসমীপে ঠিতং, তেনেৱ স্যামৰট্ঠৱাসিনোপি ভিক্খূ গহট্ঠাচ যেভুয্যেন সোতুং ইচ্ছন্তীতি. মহাধম্মৰক্খিতত্থেৰোপি মহাৰট্ঠৱাসীহি সদ্ধিং সকলস্যামৰট্ঠৱাসীনং ধম্মং দেসেসি, অমতৰসং পাযেসি, যথা যোনকধম্মৰক্খিতত্থেৰো অপৰন্তৰট্ঠং গন্ত্ৱা সকলমৰম্মৰট্ঠৱাসীনন্তি.

যং পন যোনকৰট্ঠসাসনৱংসকথাযং ৱুত্তং, তম্পি সব্বং এত্থাপি দট্ঠব্বংযেৱ, তেহি তস্স একসদিসত্তেন ঠিতত্তাতি. তথা হি নাগসেনত্থেৰোপি যোনকৰট্ঠে ৱসিত্ৱা স্যামৰট্ঠাদীসুপি সাসনং পতিট্ঠাপেসি. যোনকৰট্ঠৱাসিনো মহাধম্মগম্ভীৰত্থেৰমহামেধঙ্কৰত্থেৰাচ সদ্ধিং বহূহি ভিক্খূহি সীহড়দীপং গন্ত্ৱা ততো পুনাগন্ত্ৱা স্যামৰট্ঠে সোক্কতযনগৰং পত্ৱা তত্থ নিসীদিত্ৱা সাসনং পগ্গণ্হিত্ৱা পচ্ছা লকুন্ননগৰে নিসীদিত্ৱা সাসনং পগ্গণ্হি. এৱং যোনকৰট্ঠে সাসনং ঠিতং স্যামাদীসুপি ঠিতংযেৱাতি দট্ঠব্বং.

বুদ্ধস্স ভগৱতো পৰিনিব্বানতো দ্ৱিসতাধিকানং দ্ৱিন্নং ৱস্সসহস্সানং উপৰি নৱুতিমে ৱস্স সীহড়দীপে ৰজ্জং পত্তস্স কিত্তিস্সিৰিৰাজসীহমহাৰাজস্স অভিসেকতো ততিযে ৱস্সে তেনেৱ কিত্তিস্সিৰিৰাজসীহমহাৰঞ্ঞা পহিতপণ্ণাকাৰসাসনং আগম্ম সৰামাধিপতিধম্মিকমহাৰাজাধিৰাজেনাণত্তেহি লঙ্কাদীপং আগতেহি উপালিত্থে ৰাদীহি পতিট্ঠাপিতো ৱংসো উপালিৱংসোতি পাকটো. সোচ দুৱিধো পুব্বাৰামৱিহাৰৱাসীঅভযগিৰিৱিহাৰৱাসীৱসেনাতি. এৱং মহানগৰযোনকল্যামৰট্ঠেসু সাসনং থিৰং হুত্ৱা তিট্ঠতীতি ৱেদিতব্বন্তি.

ইতি সাসনৱংসে মহাৰট্ঠসাসনৱংসকথামগ্গো নাম

নৱমো পৰিচ্ছেদো.