৩৯. বোধিৰাজধীতুযা [বোধিৰাজধীতায ইতিসব্বত্থ] ৱত্থুম্হি অযমানুপুব্বীকথা

ভগৱতি পৰিনিব্বুতে লঙ্কাযং সাসনে সুপ্পতিট্ঠিতে তত্থ হকুৰেড়ীতি একো গামো অহোসি, তত্থেকা দাৰিকা গামাদাৰিকাহি সদ্ধিং তত্থ তত্থ কীড়ন্তী ৱিহৰতি, তদা গামসমীপে মহাসোব্ভং হোতি. তত্থেকো মৰুত্থৰুক্খো সব্বদা পাড়িফুল্লোৱ তিট্ঠতি. মনুস্সা বুদ্ধপূজনত্থং পুপ্ফানি ৱিচিণন্তা উদকং ওগহেত্ৱা ৰুক্খমভিৰুয্হ পুপ্ফানি ওচিণন্তি, কুমাৰিকা তে দিস্ৱা মনুস্সা সুখেন গন্ত্ৱা পুপ্ফানি ওচিণন্তূতি একং সুক্খপালিভদ্দদণ্ডকং আহৰিত্ৱা সেতুং কত্ৱা ঠপেসি, ততো পট্ঠায মনুস্সা তেনগন্ত্ৱা পুপ্ফানি ওচিণন্তি. অথ সা ততো চুতা তেনেৱ কুসলকম্মেন জম্বুদীপে পাটলিপুত্তনগৰে সোমদত্তৰঞ্ঞো ধীতা হুত্ৱা নিব্বত্তি, উত্তমৰূপধৰা দেৱচ্ছৰপটিভাগা অহোসি. মাতাপিতৰো পনস্সা বোধিৰাজকুমাৰিকাতি ৱোহৰিংসু. পুব্বে কতসেতুআনুভাৱেন তস্সা সুৱীৰকো নামেকো আকাসগামী সিন্ধৱপোতকো নিব্বত্তি. ৰাজধীতুযা পন পিতা বুদ্ধমামকো ধম্মমামকো সঙ্ঘমামকো হুত্ৱা মহন্তং পুঞ্ঞং পসৱন্তো সিন্ধৱপোতকং দিস্ৱা পুঞ্ঞকৰণস্স মে সহাযো লদ্ধোতি তুট্ঠমানসো অস্সং অভিৰুহিত্ৱা দিৱসস্স তিক্খত্তুং গন্ত্ৱা মহাবোধিং ৱন্দতি. ৰাজধীতা নং দিস্ৱা পিতুসন্তিকং গন্ত্ৱা অভিণ্হং তাত কুহিং গচ্ছসীতি পুচ্ছি. ৰাজা ন কিঞ্চি কথেসি, অথ সা পুনপ্পুনং পিতৰং নিবন্ধন্তী পুচ্ছি. ততো ৰাজা তস্সাৱি কৰোন্তো এৱমাহ.

১. অম্হাকং ভগৱা পুব্বে, পূৰেন্তো দসপাৰমী;

অদাসি সীসৰত্তক্খি, মংসং জীৱিতমেৱ চ.

২. পুত্তদাৰে চ ৰজ্জে চ, পত্ৱা [দত্ৱা ইতিপিকত্থচি] পাৰমিমত্থকং;

অনপ্পকপ্পকোটীনং, খেপেত্ৱা কপিলৱুযে.

৩. সক্কৰাজকুলে জাতো, লোকে অপ্পটিপুগ্গলো;

সম্পত্তচক্কৱত্তিত্তং, পহন্ত্ৱান নৰাধিপো.

৪. দিস্ৱা নিমিত্তে চতুৰো, নিক্খম্ম অভিনিক্খমং;

বোধিমূলমুপাগম্ম, নিসিন্নো ৱজিৰাসনে.

৫. সহস্সবাহুং মাপেত্ৱা, নানাযুধসমাকুলং [নানাৱুধসমাকুলং-ইতিসব্বত্থ];

মহাভীতিকৰং ৱেসং, কাড়পব্বতসাদিসং.

৬. মাপেত্ৱান সমাৰুয্হ, গিৰিমেখলৱাৰণং;

মাৰসেনং সমানেত্ৱা, আগতং মকৰদ্ধজং.

৭. পাৰমিতাবলেন তং, মাৰসেনং পলাপিয;

যত্থাসীনো কিলেসাৰি, সহস্সং ঘাতযী জিনো.

৮. নযনং সুজলসেকেহি, সত্তাহং জিনসেৱিতং;

পূজিতং দেৱব্ৰহ্মেহি, সিদ্ধোৰগনৰাদিহি;

ৱন্দিতুং জযবোধিংতং, গচ্ছামি সততং অহং.

৯. উপাসতি সদা গন্ত্ৱা, যো নৰো বোধিপাদপং;

গন্ধোদদীপধূপাদি, নানাপূজাহি সাধুকং.

১০. স নৰো নিৰামযো হোতি, পচ্চত্তে চ পৰত্থ চ;

পূজিতো মানিতো হোতি, দীঘাযু বলৱা সুখী.

১১. তদত্থং পত্থযন্তেন, অত্থকামেন জন্তুনা;

উপাসনীযং সদ্ধায, নিচ্চং তং বোধিপাদপংতি.

তং সুত্ৱা কুমাৰিকা পীতিযা ফুটসৰীৰা পিতৰং ৱন্দিত্ৱা অহম্পি তাত গচ্ছামীতি আহ. ৰাজা পনস্সা উপদ্দৱভযেন গমনং ন ইচ্ছি. ততো সা যাৱততিযং পিতৰং যাচিত্ৱা ৰঞ্ঞা অনুঞ্ঞাতা. ততো পট্ঠায পিতৰা সদ্ধিং সিন্ধৱমাৰুয্হ বোধিং ৱন্দিতুং সততং গচ্ছতি. অথাপৰভাগে ৰাজা মৰণমঞ্চে নিপন্নো চিন্তেসি. ধীতা মে নিৰন্তৰং বোধিউপট্ঠানংগচ্ছতি, এতিস্সা অনাগতে যংকিঞ্চি ভযং উপ্পজ্জমানং ততো উপ্পজ্জতি. তত্থ মে কিং কাতব্বন্তি. ততো সিন্ধৱং পক্কোসাপেত্ৱা তস্স কণ্ণমূলে মন্তেন্তো এৱমাহ, তাত মম ধীতা অভিণ্হং তৱ সহাযং কত্ৱা বোধিং ৱন্দিতুং গচ্ছতি. তত্থস্সা যংকিঞ্চি ভযং ভৱেয্য. তং নপ্পতিৰূপং. তত্থ গমনাগমনে মম ধীতৰং ৰক্খেয্যাসীতি তস্স ধীতৰং পটিপাদেত্ৱা কালমকাসি. ততো ৰাজধীতা পিতুসৰীৰকিচ্চং কাৰেত্ৱা দিৱসস্স তিক্খত্তুং অস্সমভিৰুয্হ বোধিউপট্ঠানং গচ্ছতি. মনুস্সা পনস্সা ৰূপসম্পত্তিং দিস্ৱা ৱিম্হিতমানসা ৰাজাৰহং ৱত নো ইদং পণ্ণাকাৰং দিট্ঠং. গন্ত্ৱা ৰঞ্ঞো আচিক্খিস্সাম. অপ্পেৱ নাম ৰাজা সো কিঞ্চি নো দদেয্যাতি চিন্তেত্ৱা ৰঞ্ঞো সন্তিকং গন্ত্ৱা ৱন্দিত্ৱা ঠিতা এৱমাহংসু.

১২. বোধিমণ্ডং সমাগম্ম, অভিণ্হং তুট্ঠমানসা;

ৱন্দন্তী যাতি কঞ্ঞেকা, ৱিজ্জূৱ সিৰিযা জলং.

১৩. নীলধম্পিল্লভাৰা সা, ৱিসালাযতলোচনা;

সোণ্ণদোলাভসৱণা, সামা সুভপযোধৰা.

১৪. সতৰংসীহি সম্মিস্স, সঞ্চ্যাম্বুদসমাধৰা;

তুঙ্গনাসা নীলভমু, হাসভাসা মনোৰমা.

১৫. ঈদিসং নো মহাৰাজা [মহাৰাজদিট্ঠপুব্ব ইতিপিকত্থচি], দিট্ঠপুব্বং কুদাচনং;

এহি তস্সা সিৰিংদেৱ, বোধিমণ্ডম্হি দক্খসীতি.

তং সুত্ৱা ৰাজা সৱণসংসগ্গেনেৱ তায পটিবদ্ধচিত্তো চতুৰঙ্গিনিংসেনং গহেত্ৱা ৰাজধীতৰং বোধিৱন্দনত্থায আগতকালে বহিপাকাৰে সেনং পৰিক্খিপাপেত্ৱা গণ্হথেতন্তি মনুস্সে নিযোজেসি. ততো সেনাপি তং গহণসজ্জা অট্ঠাসি. ৰাজধীতা তে দিস্ৱা সীঘং সিন্ধৱং উপসঙ্কমিত্ৱা তস্স পিট্ঠিযং নিসিন্না পণ্হিযা সঞ্ঞং অদাসি. সো তং গহেত্ৱা ৱেগেন আকাসং পক্খন্দি. সা পন দুন্নিসিন্নভাৱেন অস্সস্স ৱেগং সন্ধাৰেতুমসক্কোন্তী অস্সপিট্ঠিতো পৰিগলি. সিন্ধৱো ৰাজধীতৰং পতমানং দিস্ৱা ৰাজোৱাদং সৰমানো ৱেগেনাগন্ত্ৱা তস্সা কেসে ডংসিত্ৱা উক্খিপিত্ৱা পতমানায তস্সা পিট্ঠিংদত্ৱা নিসীদাপেত্ৱা আকাসেন তং নেত্ৱা পাটলিপুত্তনগৰেযেৱ পতিট্ঠাপেসি [পাতলিপুত্তনগৰেযেৱতং পৱিঠাপেসিইতিপিকত্থচি].

১৬. তিৰচ্ছানগতাপেৱং, সৰন্তা উপকাৰকং;

ন জহন্তীতি মন্ত্ৱান, কতঞ্ঞূ হোন্তু [হোন্তিপাণিনো-ইতিপিকত্থচি] পাণিনোতি.

ততো পট্ঠায সা পুঞ্ঞকম্মং কত্ৱা সগ্গপৰাযনা অহোসীতি.

১৭. যো যং দুমিন্দংযতিনন্দনেন;

সম্পূজিতং পূজযতে স পঞ্ঞো;

স ভোগৱা হোতি অনীতিকো চ,

সব্বত্থ সো হোতি পসত্থৰূপো.

বোধিৰাজধীতুযা ৱত্থুং নৱমং.