৪০. কুণ্ডলিযা ৱত্থুম্হি অযমানুপুব্বীকথা

লঙ্কাদীপে ৰোহণজপদে মহাগামো নাম অহোসি, তত্থ তিস্সৱিহাৰং নাম অনেকসতভিক্খূহি সমাকিণ্ণং অনেকপৰিৱেণপতিমণ্ডিতং ৱিহাৰং অহোসি. তত্থেকো তিস্সো নাম সামণেৰো পটিৱসতি. সো একস্মিংসমযে জনপদচাৰিকং চৰন্তো পাসাণৱাপিগামে ভিক্খং চৰিত্ৱা যাপনমত্তং ভত্তং সপ্পিনা সদ্ধিং লভিত্ৱা নিক্খম্ম গামদ্ৱাৰং পত্ৱা মহাগামাভিমুখো গচ্ছন্তো মনুস্সে উদকফাসুকট্ঠানং পুচ্ছি. তেহি ভন্তে তুম্হাকং অভিমুখে অৱিদূৰট্ঠানে ককুবন্দকন্দৰং নাম সন্দমানসীতলোদকং ধৱলৱালুকাতলং তত্থ তুম্হে গন্ত্ৱা নহাত্ৱা সীতলচ্ছাযায ৱালুকাতলে নিসিন্নো ভত্তকিচ্চং কত্ৱা গচ্ছথাতি ৱুত্তে সামণেৰো সাধূতি ৱত্ৱা তত্থ গন্ত্ৱা ফাসুকট্ঠানে নিসিন্নো ভত্তং ভুঞ্জিতুমাৰভি. তদা একেন ৱনকম্মিকেন সদ্ধিংঅৰঞ্ঞং গতা একা সুনখী তস্মিং কন্দৰে একস্মিং পব্ভাৰট্ঠানে দাৰকে ৱিজাযিত্ৱা ছাতজ্ঝত্তা পৱেধমানগত্তা দাৰকানং সমীপেনিপন্না সামণেৰস্স পত্তে আহাৰগন্ধং ঘাযিত্ৱা নিপন্নট্ঠানতো ৱুট্ঠায পৱেধমানা তস্স সমীপং আগম্ম নঙ্গুট্ঠং চালেন্তী অট্ঠাসি, সামণেৰো তং দিস্ৱা কম্পিতমানসো অত্তনো ভোজনত্থায ৱট্টিতং পথমালোপং তস্সা পুৰতো ঠপেসি, ততো সা সোমনস্সা তং ভুঞ্জি. তং দিস্ৱা তুট্ঠো পুনপ্পুনং আলোপং কৰোন্তো তস্সা ভত্তং দত্ৱা পত্তং ধোৱিত্ৱা থৱিকায পক্খিপিত্ৱা অগমাসি. ততো সা সুনখী সামণেৰগতেন পসাদেন ততো চুতা জম্বুদীপে দেৱপুত্তনগৰে ৰাজানং পটিচ্চ তস্স মহেসিযা কুচ্ছিম্হি পটিসন্ধিং গণ্হিত্ৱা দসমাসচ্চযেন মাতুকুচ্ছিতো নিক্খমি, অথস্সা সিখামঙ্গলদিৱসে সম্পত্তে মাতাপিতৰো পনস্সা কুণ্ডলাৱট্টকেসত্তা কুণ্ডলাতি নাম মকংসু. সা অনুক্কমেন সোড়সৱস্সুদ্দেসিকা অহোসি, তস্মিং কিৰ সমযে তিস্সো সামণেৰো মহাবোধিং ৱন্দিস্সামীতি নাৱং অভিৰুয্হ জম্বুদীপং গন্ত্ৱা অনুপুব্বেন দেৱপুত্তনগৰং পত্ৱা সুনিৱত্থো সুপাৰুতো যুগমত্তদসো ভিক্খায চৰন্তো মহাৱীথিং সম্পাপুণি. ৰাজধীতা সীহপঞ্জৰং উগ্ঘাটেত্ৱা অন্তৰৱীথিং ওলোকেন্তী ভিক্খন্তং সামণেৰং দিস্ৱা পুব্বসিনেহং পটিলভি, তস্মিংখণে তস্সা জাতিস্সৰঞাণং অহোসি. সা কিৰ পুব্বে ভিক্খুণী হুত্ৱা পণ্ণসূচিযা সদ্ধিং পোত্থকঞ্চ পদীপিযতেলঞ্চ দত্ৱা জাতিস্সৰা ভৱেয্যংতি পত্থনং ঠপেসি, ততো সাজাতিং অনুস্সৰন্তী সামণেৰেন অত্তনো কতূপকাৰং দিত্ৱা সোমনস্সা নং পক্কোসাপেত্ৱা ৰাজগেহে আসনং পঞ্ঞাপেত্ৱা তত্থ নিসিন্নং নানগ্গৰস ভোজনেন পৰিৱিসিত্ৱা ওনীতপত্তপাণিং সামণেৰং উপসঙ্কমিত্ৱা ৱন্দিত্ৱা একমন্তং নিসিন্না তেন সদ্ধিং সল্লপন্তী এৱমাহ.

১. ন সঞ্জানাসি মং ধীৰ, পুব্বেহং তৱ দাসিকা;

তেনাহং সুখিতা আসিং, তস্মা ত্ৱমসি ইস্সৰোতি.

তং সুত্ৱা সামণেৰো আহ.

২. নত্থি মে তাদিসী দাসী, ন সঞ্জানামি তং অহং;

কাসি ত্ৱং কস্স ৱা ধীতা, তং মে অক্খাহি পুচ্ছিতাতি.

ততো সা তং সাৰাপেন্তী আহ.

৩. সাৰাপেমি তুৱং অজ্জ, যথা জানাসিমং ইসে;

বুজ্ঝস্সু বোধিতো দানি, মযা জাতিংসৰন্তিযা.

৪. পাসাণৱাপিগামম্হি, তম্বপণ্ণিম্হি ৰোহণে;

ভিক্খিত্ৱান তুৱং ভন্তে, যদা ককুবন্দকন্দৰে.

৫. নিসীদিত্ৱান ত্ৱং ভত্তং, ভুত্তকালং সৰিস্সসি;

তদাহং সুনখী আসিং, ৱিজাতা লদ্ধগোচৰা.

৬. দাৰকে খাদিতুং ময্হ, মাসন্না খুদপীড়িতা;

পৱেধমানসব্বঙ্গা, অট্ঠাসিং তৱ সন্তিকে.

৭. দিস্ৱা তং মং তদা ভন্তে, ৱেধমানং বুভুক্খিতং;

ছিন্নভত্তো তুৱং হুত্ৱা, মমং ভত্তেন তোসযী.

৮. তদাহং মুদুচিত্তেন, চিত্তং তযি পসাদযিং;

তেনাহং পুঞ্ঞকম্মেন, দুতিযে অত্তসম্ভৱে.

৯. ইধ ৰাজকুলে জাতা, সব্বকামসমিদ্ধিনী;

চিত্তপ্পসাদমত্তেন, লোকনাথস্স সাসনে.

১০. তদহুপব্বজিতস্সাপি, ঈদিসা হোন্তি সম্পদা;

কীদিসং হোতি সম্বুদ্ধে, পসাদেন ফলং অহো.

১১. অঞ্ঞানি পন কিচ্চানি, পহাযাত্তহিতে ৰতো;

অতন্দিতো দিৱাৰত্তিং, সৰাতু ৰতনত্তযংতি.

এৱং সামণেৰেন কতূপকাৰং সাৰাপেত্ৱা ভন্তে তৱ দাসিযা অনুগ্গহং পটিচ্চ ইধেৱ ৱসথাতি নিমন্তিত্ৱা তেন সম্পটিচ্ছিতে মহন্তং ৱিহাৰং কাৰাপেত্ৱা সামণেৰং আদিং কত্ৱা অনেকভিক্খুসতে নিমন্তেত্ৱা ৱিহাৰে ৱসাপেত্ৱা সুলভং কত্ৱা চতুপচ্চযেহি উপট্ঠাসি. সামণেৰোপি সুনখিযা দিন্নদানং অনুস্সৰিত্ৱা তুট্ঠো বুদ্ধানুস্সতিং মনসিকৰোন্তো ন চিৰেনৱ অৰহত্তং পত্ৱা তস্মিংযেৱ ৱিহাৰে ৱসন্তো আযুপৰিযোসানে তত্থেৱ পৰিনিব্বাযীতি.

১২. তিযদ্ধেসু তিলোকস্মিং, নত্থি ৱত্থুত্তযং ৱিনা;

সত্তান মঞ্ঞ মিচ্ছত্থ, দাযকং সুৰপাদপং.

কুণ্ডলিযা ৱত্থুং দসমং.

মহাসেনৱগ্গো চতুত্থো.

এত্তাৱতা জম্বুদীপুপ্পত্তিকথা সমত্তা.