৩৮. তেভাতিকমধুৱাণিজকানং ৱত্থুম্হি অযমানুপুব্বীকথা

অতীতে কিৰ বাৰাণসিযং তে ভাতিকা একতো হুত্ৱা মধুং ৱিক্কিণন্তা পুত্তদাৰে পোসেন্তি. ততো তেসু একো পচ্চন্তং গন্ত্ৱা মলযৱাসীনং [মলৱাসীনং ইতিপিকত্থচি] হত্থতো মধুং কিণিত্ৱা [ৱক্কিণিত্ৱা ইতিসব্বত্থ] গণ্হাতি, একো গহিতগহিতমধুং নগৰং আহৰতি. একো তেন আহটাহটমধূনি বাৰাণসিযং নিসীদিত্ৱা ৱিক্কিণাতি. তস্মিং সমযে গন্ধমাদনপব্বতে একো পচ্চেকবুদ্ধো ৱণৰোগেনা তুৰো অহোসি. অথঞ্ঞতৰো পচ্চেকবুদ্ধো তস্স মধুনা ফাসু ভৱিস্সতীতি ঞত্ৱা গন্ধমাদনপব্বতেযেৱ ঠিতো চীৱৰং পাৰুপিত্ৱা আকাসেনা গন্ত্ৱা নগৰদ্ৱাৰে ওতৰিত্ৱা কত্থ মধুং লভামীতি [লব্ভতি ইতিসব্বত্থ] ওলোকেন্তো অট্ঠাসী, তদা তস্মিংপৰকুলে ভতিং কত্ৱা জীৱমানা একা চেটিকা ঘটমাদায উদকত্থং তিত্থং গচ্ছন্তী মগ্গা ওক্কম্ম ঘটং ঠপেত্ৱা ৱন্দিত্ৱা একমন্তং অট্ঠাসি, তদা পচ্চেকবুদ্ধো ভগিনী এত্থ ভিক্খায চৰন্তানং কতৰস্মিং ঠানে মধু লব্ভতীতি পুচ্ছি. সা তস্স কথং সুত্ৱা মধুআপণস্স পঞ্ঞাযনট্ঠানে ঠত্ৱা হত্থং পসাৰেত্ৱা এস ভন্তে মধুআপণোতি দস্সেত্ৱা যজ্জাযং পচ্চেকবুদ্ধো আপণতো মধুং ন লভতি. মম নিৱত্থৱত্থকং দত্ৱাপি মধুং দস্সামীতি চিন্তেত্ৱা ওলোকেন্তী তত্থেৱ অট্ঠাসি, অথ পচ্চেকবুদ্ধো অনুপুব্বেন ৱিচৰন্তো [চৰন্তো ইতিপিকত্থচি] মধুআপণং সম্পাপুণি, ততো কুটিম্বিকো [কুটিম্ব কো ইতিপিকত্থচি] তং দিস্ৱা হত্থতো পত্তং গহেত্ৱা আধাৰকে ঠপেত্ৱা মধুঘটং আদায পত্তস্স উপনামেন্তো সহসা নিক্কুজ্জি. ততো মধু পত্তং পূৰেত্ৱা উত্তৰন্তো পুন ভূমিযং পগ্ঘৰি. তং দিস্ৱা সোমনস্সো ৱাণিজো এৱং পত্থনমকাসি.

ৱুত্তঞ্হি মহাৱংসে.

১. তত্থ পত্তস্স বুদ্ধস্স, ৱাণিজো সো পসাদৱা;

ৱিস্সন্দযন্তো মুখতো, পত্তপূৰং মধুং অদা.

২. পুণ্ণঞ্চ উপ্পতীতঞ্চ, পতিতঞ্চ মহীতলে;

দিস্ৱা মধুং পসন্নো সো, এৱং পণিদহী তদা.

৩. জম্বুদীপে একৰজ্জং, দানেনানেন হোতু মে;

আকাসে যোজনে আণা, ভূমিযং যোজনেপিতি.

এৱঞ্চ পন ৱত্ৱা পত্তং অদাসি, পচ্চেকবুদ্ধো পত্তং পটিগ্গহেত্ৱা তত্থেৱ ঠিতো.

৪. ইচ্ছিতং পত্থিতং তুয্হং, খিপ্পমেৱ সমিজ্ঝতু;

পূৰেন্তু চিত্থসংকপ্পা, চন্দো পণ্ণৰসো যথা.

৫. ইচ্ছিতং পত্থিতং তুয্হং, সব্বমেৱ সমিজ্ঝতু;

পূৰেন্তু চিত্তসংকপ্পা, মণিজোতিৰসো যথাতি.

ৱত্ৱা মঙ্গলং ৱড্ঢেত্ৱা অগমাসি. অথন্তৰামগ্গে ঠিতা ঘটচেটিকা পচ্চেকবুদ্ধাভিমুখং গন্ত্ৱা মধুং লভিত্থ ভন্তেতি পুচ্ছি. তেন লদ্ধং ভগিনীতি ৱুত্তে কিং ৱত্ৱা সো অদাসীতি পুচ্ছি. পচ্চেকবুদ্ধো সব্বং কথেসি. সা তং সুত্ৱা থোকং ভন্তে ইধেৱ হোথ দাসিযা অনুগ্গহত্থাযাতি সীঘং গেহং গন্ত্ৱা নিৱত্থপিড়োতিকা অত্তনো সাটকং ধোৱিত্ৱা আহৰিত্ৱা চুম্বটকং কত্ৱা পচ্চেকবুদ্ধস্স অদাসি, যদা সো ভন্তে মধুদাযকো সকলজম্বুদীপে একৰজ্জং কাৰেতি. তদাহং তস্স অগ্গমহেসী ভৱেয্যংতি ৱত্ৱা পত্থনং কৰোন্তীএৱমাহ.

৬. যদা তে মধুদো ভন্তে, ভূভুজো হোতি ভূতলে;

তস্স হেস্সং তদা ভন্তে, পিযা অগ্গমহেসিকা.

৭. সুৰূপাচ সুৱাণীচ, সুযসা সুব্বতা সুভা;

অস্সং তস্স পিযাচাথ, মনাপা ইচ্ছদা [ইচ্ছিদা ইতিপিকত্থচি] সদাতি.

তস্সাপি তদা পচ্চেকবুদ্ধো তথেৱ হোতূতি মঙ্গলং ৱত্ৱা আকাসেন গন্ধমাদনমেৱ অগমাসি, অথাপৰভাগে তে তযোপি একতো হুত্ৱা মধুলোকনং কৰোন্তা তং মধুঘটং কুহিংতি পুচ্ছিংসু, সো তেনত্তনা কতকম্মং ৱত্ৱা সচে তুম্হে তস্মিং পত্তিং অনুমোদেয্যাথ, তং সাধু. নো চে. মধুঅগ্ঘনকং মম হত্থতো গণ্হথাতি ৱত্ৱা তেহি ততো ন নো অত্থো [ননোহত্থো ইতিসব্বত্থ] মধুনা, কীদিসস্সেতং অদাসীতি ৱুত্তে তং সুত্ৱা ইতৰো পচ্চেকবুদ্ধা নামে তে গন্ধমাদনে ৱসন্তি কাসাৱং পাৰুপিত্ৱা কুলে কুলে ভিক্খং চৰন্তি, সন্তো এতে সীলৱন্তাতি কথেসি, অথ তেসু জেট্ঠো ব্ৰাহ্মণচণ্ডালকাপি কাসাৱং পৰিদহিত্ৱা চৰন্তি. নূনাযং চণ্ডালকোতি মঞ্ঞামীতি আহ, মজ্ঝিমো কুজ্ঝিত্ৱা তৱ পচ্চেকবুদ্ধং পৰসমুদ্দে খিপাহীতি অৱোচ, অথ তেসং কথং সুত্ৱা মধুদাযকো মা ভো তুম্হে অৰিযানং মহেসক্খানং মহানুভাৱানং পচ্চেকবুদ্ধানং ফৰুসং কথেথ. নিৰযদুক্খা ন ভাযথাতিআদিনা অনেকা কাৰেন নিৱাৰেত্ৱা তেসং গুণং পকাসেসি, তং সুত্ৱা তে উভোপি সাধূতি পসন্নাচিত্তা অনুমোদিংসু, অপৰভাগে তে কালং কত্ৱা দেৱমনুস্সেসু সংসৰন্তা তত্থ তত্থ মহাসম্পত্তিযো অনুভৱিত্ৱা অম্হাকং সত্থু পৰিনিব্বাণতো দ্ৱিন্নং ৱস্সসতানং অচ্চযেন অত্তনো অত্তনো সম্পত্তট্ঠানে নিব্বত্তিংসু. তেন ৱুত্তং.

৮. অসোকো মধুদো সন্ধি, মিত্তাদেৱী তু চেটিকা;

চণ্ডালৱাদী নিগ্ৰোধো, তিস্সো সো পাৰৱাদিকোতি.

তেসু চণ্ডালৱাদী জেট্ঠৱাণিজো বিন্দুসাৰৰঞ্ঞো জেট্ঠপুত্তস্স সুমনৰাজকুমাৰস্স পুত্তো হুত্ৱা নিব্বত্তি. তস্সাযমানুপুব্বীকথা. বিন্দুসাৰৰঞ্ঞো কিৰ দুব্বলকালেযেৱ অসোককুমাৰো অত্তনা লদ্ধং উজ্জেনিযা ৰজ্জং পহায আগন্ত্ৱা সব্বনগৰং অত্তনো হত্থগতং কত্ৱা সুমনৰাজকুমাৰং অগ্গহেসি. তং দিৱসমেৱ সুমনস্স ৰাজকুমাৰস্স সুমনা নাম দেৱী পৰিপুণ্ণগব্ভা অহোসি. সা অঞ্ঞাতকৱেসেন নিক্খমিত্ৱা অৱিদূৰে অঞ্ঞতৰং চণ্ডালগামং সন্ধায গচ্ছন্তী জেট্ঠকচণ্ডালস্স গেহতো অৱিদূৰে নিগ্ৰোধো অত্থি, তস্মিং ৰুক্খে অধিৱত্থায দেৱতায ইতো এহি সুমনেতি ৱদন্তিযা সদ্দং সুত্ৱা তস্সা সমীপং গতা, দেৱতা অত্তনো আনুভাৱেন একং সালং নিম্মিণিত্ৱা এত্থ ৱসাহীতি পাদাসি. সা তং সালং পাৱিসি, গতদিৱসেযেৱ সা পুত্তং ৱিজাযি. সা তস্স নিগ্ৰোধদেৱতায পৰিগ্গহিতত্তা নিগ্ৰোধোত্ৱেৱ নামং অকাসি. জেট্ঠকচণ্ডালো দিট্ঠদিৱসতোপ্পভুতি তং অত্তনো সামিধীতৰং ৱিয মঞ্ঞমানো নিবদ্ধৱত্তং পট্ঠপেসি. ৰাজধীতা তত্থ সত্তৱস্সানি ৱসি, নিগ্ৰোধকুমাৰোপি সত্তৱস্সিকো জাতো, তদা মহাৱৰুণত্থেৰো নাম একো অৰহা দাৰকস্স হেতুসম্পদং দিস্ৱা ৱিহৰমানো সত্তৱস্সিকো দানি দাৰকো. কালো নং পব্বাজেতুংতি চিন্তেত্ৱা ৰাজধীতায আৰোচাপেত্ৱা নিগ্ৰোধকুমাৰং পব্বাজেসি, কুমাৰো খুৰগ্গেযেৱ অৰহত্তং পাপুণি. তেন ৱুত্তং মহাৱংসে.

৯. তং মহাৱৰুণো থেৰো, তদা দিস্ৱা কুমাৰকং;

উপনিস্সযসম্পন্নং, অৰহা পুচ্ছি মাতৰং;

পব্বাজেসি খুৰগ্গে সো, অৰহত্তমপাপুণীতি.

সো কিৰ একদিৱসং পাতোৱ সৰীৰং পটিজগ্গিত্ৱা আচৰিযুপজ্ঝাযৱত্তং কত্ৱা পত্তচীৱৰ মাদায মাতুউপাসিকায গেহদ্ৱাৰং গচ্ছামীতি নিক্খমি. মাতুনিৱাসট্ঠানঞ্চস্স দক্খিণদ্ৱাৰেন নগৰং পৱিসিত্ৱা নগৰমজ্ঝেন গন্ত্ৱা পাচীনদ্ৱাৰেন নিক্খমিত্ৱা গন্তব্বং হোতি. তেন চ সমযেন অসোকো ধম্মৰাজা পাচীনদিসাভিমুখো সীহপঞ্জৰে চঙ্কমতি. তং খণংযেৱ নিগ্ৰোধো ৰাজঙ্গণং সম্পাপুণি সন্তিন্দ্ৰিযো সন্তমানসো যুগমত্তং পেক্খমানো, তেন ৱুত্তং একদিৱসং সীহপঞ্জৰে ঠিতো অদ্দস নিগ্ৰোধং সামণেৰং ৰাজঙ্গণেন গচ্ছন্তং দন্তং গুত্তং সন্তিন্দ্ৰিযং ইৰিযাপথসম্পন্নন্তি. দিস্ৱা পনস্স এতদহোসি. অযং জনো সব্বোপি ৱিক্খিত্তচিত্তো ভন্তমিগপটিভাগো. অযং পন দহৰকো অৱিক্খিত্তো অতিৱিযস্স আলোকিতৱিলোকিতং সম্মিঞ্জনপসাৰণঞ্চ সোভতি. অদ্ধা এতস্সব্ভন্তৰে লোকুত্তৰধম্মো ভৱিস্সতীতি ৰঞ্ঞো সহ দস্সনেনেৱ সামণেৰে চিত্তং পসীদি, পেমং সণ্ঠহি, কস্মা. পুব্বে কিৰ পুঞ্ঞকৰণকালে ৰঞ্ঞো জেট্ঠকভাতা ৱাণিজকোযং.

১০. পুব্বেৱ [পুব্বেন ইতিকত্থচি] সন্নিৱাসেন, পচ্চুপ্পন্নহিতেন ৱা;

এৱং তং জাযতে পেমং, উপ্পলংৱ যথোদকেতি.

অথ ৰাজা সঞ্জাতপেমো সবহুমানো সামণেৰং পক্কোসথাতি অমচ্চে পেসেসি, তে অতিচিৰাযন্তীতি পুন দ্ৱে তযো পেসেসি তুৰিতং আগচ্ছতূতি. সামণেৰো অত্তনো পকতিযা এৱ অগমাসি. ৰাজা পতিৰূপাসনং ঞত্ৱা নিসীদথাতি আহ. সো ইতোচিতো চ ৱিলোকেত্ৱা নত্থি দানি অঞ্ঞো ভিক্খূতি সমুস্সিতসেতচ্ছত্তং ৰাজপল্লঙ্কং উপসঙ্কমিত্ৱা পত্তং গণ্হনত্থায ৰঞ্ঞো আকাৰং দস্সেসি. ৰাজা তং পল্লঙ্কসমীপং গচ্ছন্তং এৱ দিস্ৱা চিন্তেসি অজ্জেৱ দানি অযং সামণেৰো ইমস্স গেহস্স সামিকো ভৱিস্সতীতি, সামণেৰো ৰঞ্ঞো হত্থে পত্তং দত্ৱা পল্লঙ্কং অভিৰুহিত্ৱা নিসীদি. ৰাজা অত্তনো অত্থায সম্পাদিতং সব্বং যাগুখজ্জকভত্তৱিকতিং উপনামেসি. সামণেৰো অত্তনো যাপনমত্তমেৱ সম্পটিচ্ছি. ভত্তকিচ্চাৱসানে ৰাজা আহ সত্থাৰা তুম্হাকং দিন্নওৱাদং জানাথাতি. জানামি মহাৰাজ একদেসেনাতি. তাত ময্হম্পী নং কথেহীতি. সাধু মহাৰাজাতি ৰঞ্ঞো অনুৰূপং ধম্মপএদ অপ্পমাদৱগ্গং অনুমোদনত্থায অভাসি. ৰাজা পন অপ্পমাদো অমতপদং, পমাদো মচ্চুনো পদংতি সুত্ৱাৱ অঞ্ঞাতং তাত, পৰিযোসাপেহীতি আহ. সামণেৰো অনুমোদনা ৱসানে দ্ৱত্তিংসধুৱভত্তানি [দ্ৱিত্তিংসধুৰভত্তানি ইতিসব্বত্থ] লভিত্ৱা পুন দিৱসে দ্ৱত্তিংসভিক্খূ গহেত্ৱা ৰাজন্তোপুৰং পৱিসিত্ৱা ভত্তকিচ্চ মকাসি. ৰাজা অঞ্ঞেপি দ্ৱত্তিংসভিক্খূ তুম্হেহি সদ্ধিংস্ৱে ভিক্খং গণ্হন্তূতি এতেনেৱ উপাযেন দিৱসে দিৱসে ৱড্ঢাপেন্তো সট্ঠিসহস্সানং ব্ৰাহ্মণপৰিব্বাজকানং ভত্তং উপচ্ছিন্দিত্ৱা অন্তোনিৱেসনে সট্ঠিসহস্সানং ভিক্খূনং নিচ্চভত্তং পট্ঠপেসি নিগ্ৰোধত্থেৰগতেনেৱ পসাদেন. নিগ্ৰোধত্থেৰোপি ৰাজানং সপৰিসং তীসু সৰণেসু পঞ্চসু সীলেসু পতিট্ঠাপেত্ৱা বুদ্ধসাসনে পোথুজ্জনিকেন পসাদেন অচলপ্পসাদং কত্ৱা পতিট্ঠাপেসি. ৰাজাপি অসোকাৰামং নাম মহাৱিহাৰং কাৰাপেত্ৱা সট্ঠিসহস্সানং ভিক্খূনং নিচ্চভত্তং পট্ঠপেসি. সকলজম্বুদীপে চতুৰাসীতিযা নগৰসহস্সেসু চতুৰাসীতিৱিহাৰসহস্সানি কাৰাপেসি. তেন ৱুত্তং.

১১. চণ্ডালৱাদিদোসেন,

জাতো চণ্ডালগামকে;

পত্তানুমোদনা পাকা,

আসে সো [অসেসো ইতিপিকত্থচি] হি অনাসৱোতি.

অযং নিগ্ৰোধত্থেৰস্স কথানযো.

মধুদাযকো পন ৱাণিজো দেৱলোকতো চৱিত্ৱা পুপ্ফপুৰে ৰাজকুলে উপ্পজ্জিত্ৱা পিযদাসো নাম কুমাৰো হুত্ৱা ছত্তং উস্সাপেত্ৱা সকলজম্বুদীপে একৰজ্জং অকাসি. কথং.

বিন্দুসাৰৰাজস্স একসতপুত্তা অহেসুং. তে সব্বে অসোকো অত্তনা সদ্ধিং একমাতিকং তিস্সকুমাৰং ঠপেত্ৱা ঘাতেসি. ঘাতেন্তো চত্তাৰি ৱস্সানি অনভিসিত্তোৱ ৰজ্জং কাৰেত্ৱা চতুন্নং ৱস্সানং অচ্চযেন তথাগতস্স পৰিনিব্বাণতো দ্ৱিন্নং ৱস্সসতনং উপৰি অট্ঠাৰসমে ৱস্সে সকলজম্বুদীপে একৰজ্জাভিসেকং পাপুণি. অথ তং সকলজম্বুদীপে চতুৰাসীতিনগৰসহস্সে ৰাজানো আগন্ত্ৱা উপট্ঠহিস্সন্তি. তিণ্ণং উতূনং অনুচ্ছৱিকা তযো পাসাদা অহেসুং. একো মহাসপ্পিকো, একো মোৰগীৱো, একো মঙ্গলো নাম, তেসু নেকনাটকসহস্সপৰিৱুতো পটিৱসতি. যাস্স মধুআপণং দস্সেসি, সা অসন্ধিমিত্তা নাম দেৱচ্ছৰপৰিভাগা ৰাজধীতা হুত্ৱা সট্ঠিসহস্সানং ইত্থীনং জেট্ঠিকা ধম্মাসোকৰঞ্ঞো অগ্গমহেসী অহোসি. অভিসেকানন্তৰং তস্স ইমা ৰাজিদ্ধিযো আগতা, পথৱিযা চ হেট্ঠা যোজনপ্পমাণে আণা পৱত্ততি. তথা উপৰি আকাসে. অনোতত্তদহতো অট্ঠহি কাজেহি সোড়সপানীযঘটে দিৱসে দিৱসে দেৱতা আহৰন্তি. যতো সাসনে উপ্পন্নসদ্ধো হুত্ৱা অট্ঠঘটে ভিক্খুসঙ্ঘস্স অদাসি. দ্ৱে ঘটে সট্ঠিমত্তানং তেপিটকভিক্খূনং দ্ৱে ঘটে অগ্গমহেসিযা অসন্ধিমিত্তায. চত্তাৰো ঘটে অত্তনা পৰিভুঞ্চি দেৱতা [দেৱতাএৱং ইতিসব্বত্থ], এৱ হিমৱন্ততো নাগলতাদন্তকট্ঠং সিনিদ্ধং মুদুকং ৰসৱন্তং দিৱসে দিৱসে আহৰন্তি, তেন ৰঞ্ঞো চ মহেসিযা চ সোড়সন্নং নাটকসহস্সানঞ্চ সট্ঠিমত্তানঞ্চ ভিক্খুসহস্সানং দেৱসিকং দন্তপোণকিচ্চং নিপ্ফজ্জতি. দেৱসিকমেৱস্স দেৱতা অগদামলকং অগদহৰীটকং সুৱণ্ণৱণ্ণঞ্চ গন্ধৰসসম্পন্নং অম্বপক্কং আহৰন্তি. ছদ্দন্তদহতো পঞ্চৱণ্ণং নিৱাসনপাৰুপনং পীতকৱণ্ণং হত্থপুঞ্ছনকপটং [হত্থপুচ্ছনকপট্টং ইতিসব্বত্থ] দিব্বঞ্চ পানং আহৰন্তি. দেৱসিকমেৱস্স অনুলেপনগন্ধং পাৰুপনত্থায অসুত্তমযিকং সুমনপুপ্ফপটং মহাৰহঞ্জ অঞ্জনং নাগভৱনতো নাগৰাজানো আহৰন্তি. ছদ্দন্তদহতোযেৱ উট্ঠিতস্স সালিনো নৱৱাহসহস্সনি দিৱসে দিৱসে সুৱা আহৰন্তি. তে মূসিকা নিত্থুসকানি কৰোন্তি. একোপি খণ্ডতণ্ডুলো নাহোসি. ৰঞ্ঞো সব্বট্ঠানেসু অযমেৱ তণ্ডুলো পৰিভোগং গচ্ছতি. মধুমক্খিকা মধুং কৰোন্তি. কম্মাৰসালাসু অচ্ছা কূটং পহৰন্তি. কৰৱীকসকুণা আগন্ত্ৱা মধুৰস্সৰং ৱিকূজেন্তা ৰঞ্ঞো বলিকম্মং কৰোন্তি. ইমাহি ইদ্ধীহি সমন্নাগতো ৰাজা একদিৱসং সুৱণ্ণসঙ্খলিকবন্ধনং পেসেত্ৱা চতুন্নং বুদ্ধানং অধিগতৰূপদস্সনং কপ্পা যুকং মহাকালনাগৰাজানং আনযিত্ৱা সেতচ্ছত্তস্স হেট্ঠা মহাৰহে পল্লঙ্কে নিসীদাপেত্ৱা অনেকসত ৱণ্ণেহি জলজথলজপুপ্ফেহি সুৱণ্ণপুপ্ফেহি চ পূজং কত্ৱা সব্বা লঙ্কাৰপতিমণ্ডিতেহি সোড়সহি নাটকসহস্সেহি সমন্ততো পৰিক্খিপিত্ৱা অনন্তঞাণস্স তাৱ মে সদ্ধম্মৱৰচক্কৱত্তিনো সম্মাসম্বুদ্ধস্স [সম্মাসম্বুদ্ধৰূপং ইতিসব্বত্থ] ৰূপং ইমেসং অক্খীনং আপাথং কৰোহীতি ৱত্ৱা তেন নিম্মিতং সকলসৰীৰে ৱিপ্পকিণ্ণপুঞ্ঞপ্পভাৱনিব্বত্তাসীতি অনুব্যঞ্জনপতিমণ্ডিত দ্ৱত্তিংস মহাপুৰিসলক্খণ সস্সিৰীকতায ৱিকচকমলুপ্পলপুণ্ডৰীকপতিমণ্ডিতমিৱ সলিলতলং তাৰাগণৰংসিজালৱিসৰৱিপ্ফুৰিতসোভাসমুজ্জলমিৱ গগনতলং নীলপীতলোহিতা দিভেদং ৱিচিত্তৱণ্ণৰংসিৱিনদ্ধব্যামপ্পভাপৰিক্খেপৱিলাসিতায সঞ্চ্যাপ্পভানুৰাগইন্দধনুৱিজ্জুল্লতাপৰিক্খিত্তমিৱ কণকগিৰিসিখৰং নানাৱিৰাগৱিমলকেতুমালাসমুজ্জলিতচাৰুমত্থকসোভনং নযনৰসাযনমিৱ চ ব্ৰহ্মদেৱমনুজনাগযক্খগণানং বুদ্ধৰূপং পস্সন্তো সত্তদিৱসানি অক্খিপূজং নাম অকাসি. ৰাজা কিৰ অভিসেকং পাপুণিত্ৱা তীণিযেৱ সংৱচ্ছৰানি বাহিৰকপাসণ্ডং পৰিগণ্হি, চতুত্থে সংৱচ্ছৰে বুদ্ধসাসনে পসীদি, তস্স পন পিতা বিন্দুসাৰো ব্ৰাহ্মণভত্তো অহোসি. সো ব্ৰাহ্মণানঞ্চ ব্ৰাহ্মণজাতিপাসণ্ডানং পণ্ডৰঙ্গপৰিব্বাজকানঞ্চ সট্ঠিসহস্সমত্তানং নিচ্চভত্তং পট্ঠপেসি. অসোকোপি পিতৰা পৱত্তিতং দানং অত্তনো অন্তোপুৰে [অন্তেপুৰে ইতিসব্বত্থ] তথেৱ দদমানো একদিৱসং সীহপঞ্জৰে ঠিতো তে উপসমপৰিবাহিৰেন আচাৰেন ভুঞ্জমানে অসংযতিন্দ্ৰিযে অৱিনীতইৰিযাপথে দিস্ৱা চিন্তেসি, ঈদিসং দানং উপপৰিক্খিত্ৱা যুত্তট্ঠানে দাতুং ৱট্টতীতি. এৱং চিন্তেত্ৱা অমচ্চে আহ, গচ্ছথ ভণে অত্তনো অত্তনো সাধুসম্মতে সমণব্ৰাহ্মণে অন্তোপুৰং অভিহৰথ দানং দস্সামীতি, অমচ্চা সাধু দেৱাতি ৰঞ্ঞো পটিস্সুত্ৱা তে তে পণ্ডৰঙ্গপৰিব্বাজকা জীৱক নিগণ্ঠাদযো আনেত্ৱা ইমে মহাৰাজ অম্হাকং অৰহন্তোতি আহংসু, অথ ৰাজা অন্তোপুৰে উচ্চাৱচানি আসনানি পঞ্ঞাপেত্ৱা আগচ্ছন্তূতি ৱত্ৱা আগতাগতে আহ অত্তনো অনুৰূপে আসনে নিসীদথাতি, একচ্চে ভদ্দপীঠকেসু একচ্চে ফলকপীঠকেসু নিসীদিংসু, তং দিস্ৱা ৰাজা নত্থি এতেসং অন্তো সাৰোতি ঞত্ৱা তেসং অনুৰূপং খাদনীযভোজনীযং দত্ৱা উয্যোজেসি. এৱং গচ্ছন্তে কালে একদিৱসং সীহপঞ্জৰে ঠিতো নিগ্ৰোধসামণেৰং দিস্ৱা তস্মিং গতেন পসাদেন বুদ্ধসাসনে পসন্নো সট্ঠিসহস্সমত্তে পাসণ্ডিযে অপনেত্ৱা সট্ঠিসহস্সমত্তে ভিক্খূ ভোজেন্তো বুদ্ধসাসনে পসীদিত্ৱা অসোকাৰামং কাৰেত্ৱা তত্থ তে ৱসাপেন্তো একদিৱসং অসোকাৰামে সট্ঠিসহস্সভিক্খূনং দানং দত্ৱা তেসং মজ্ঝে নিসজ্জ সঙ্ঘং চতূহি পচ্চযেহি পৱাৰেত্ৱা ইমং পঞ্হং পুচ্ছি, ভন্তে ভগৱতা দেসিতধম্মো নাম কিত্তকো হোতীতি, মহাৰাজ নৱ অঙ্গানি, খন্ধতো চতুৰাসীতিধম্মক্খন্ধসহস্সানীতি. ৰাজা ধম্মে পসীদিত্ৱা একেকং ধম্মক্খন্ধং একেকৱিহাৰেন পূজেস্সামীতি একদিৱসমেৱ ছন্নৱুতিকোটিখনং ৱিস্সজ্জেত্ৱা অমচ্চে আণাপেসি, একমেকস্মিং নগৰে একমেকং ৱিহাৰং কাৰেন্তা চতুৰাসীতিযা নগৰসহস্সেসু চতুৰাসীতিৱিহাৰসহস্সানি কাৰাপেথাতি, সযঞ্চ অসোকাৰামে অসোকমহাৱিহাৰত্থায [সযংচঅসোকহোৱিহাৰত্থায ইতিপিকত্থচি] কম্মং পট্ঠপেসি, সঙ্ঘো ইন্দগুত্তত্থেৰং নাম মহিদ্ধিকং মহানুভাৱং খীণাসৱং নৱকম্মাধিট্ঠাযকং অদাসি, থেৰো যং যং ন নিট্ঠাতি, তং তং অত্তনো আনুভাৱেন নিট্ঠাপেসি, এৱংপিতীহি সংৱচ্ছৰেহি ৱিহাৰকম্মং নিট্ঠাপেসি, একদিৱসমেৱ সব্বনগৰেহি পণ্ণানি আগমিংসু, অমচ্চা ৰঞ্ঞো আৰোচেসুং নিট্ঠিতানি দেৱ চতুৰাসীতিমহাৱিহাৰসহস্সানীতি. অথ ৰাজা ভিক্খুসঙ্ঘং উপসঙ্কমিত্ৱা ভন্তে মযা চতুৰাসীতিৱিহাৰসহস্সানি কাৰিতানি, ধাতুযো কুতো লচ্ছামীতি পুচ্ছি, মহাৰাজ ধাতুনিধানং নাম অত্থীতি সুণোম, ন পন পঞ্ঞাযতি অসুকট্ঠানেতি. ৰাজা ৰাজগহে চেতিযং ভিন্দাপেত্ৱা ধাতুং অপস্সন্তো পটিপাকতিকং কাৰাপেত্ৱা ভিক্খুভিক্খুণিযো উপাসকউপাসিকাযোতি চতস্সো পৰিসা গহেত্ৱা ৱেসালিযং গতো. তত্ৰাপি অলভিত্ৱা কপিলৱত্থুং গতো, তত্ৰাপি অলভিত্ৱা ৰামগামং গতো, ৰামগামে নাগা চেতিযং ভিন্দিতুং নাদংসু. চেতিযে নিপতিতকুদ্দালো খণ্ডাৱণ্ডং হোতি, এৱং তত্ৰাপি অলভিত্ৱা অল্লকপ্পং পাৱং কুসিনাৰংতি সব্বচেতিযানি ভিন্দিত্ৱা ধাতুং অলভিত্ৱা পটিপাকতিকানি কত্ৱা ৰাজগহং গন্ত্ৱা চতস্সো পৰিসা সন্নিপাতাপেত্ৱা অত্থি কেনচি সুতপুব্বং অসুকট্ঠানে ধাতুনিধানংতি পুচ্ছি. তত্থেকো ৱীসংৱস্স সতিকো থেৰো অসুকট্ঠানে ধাতুনিধানংতি ন জানামি, ময্হং পন পিতামহত্থেৰো মযি সত্তৱস্সিকালে মালাচঙ্গোটকং গাহাপেত্ৱা এহি সামণেৰ অসুকগচ্ছন্তৰে পাসাণথূপো অত্থি. তত্থ গচ্ছামাতি গন্ত্ৱা পূজেত্ৱা ইমং ঠানং উপধাৰেতুং ৱট্টতি সামণেৰাতি আহ. অহং এতমেৱ জানামি মহাৰাজাতি আহ. ৰাজা এতদেৱ ঠানংতি ৱত্ৱা গচ্ছে হৰাপেত্ৱা পাসাণথূপং পংসুংচ অপনেত্ৱা হেট্ঠা সুধাভূমিং অদ্দস, ততো সুধা চ ইট্ঠকাযো চ হৰাপেত্ৱা অনুপুব্বেন পৰিৱেণং ওৰুয্হ সত্তৰতনৱালিকং অসিহত্থানি চ কট্ঠৰূপকানি সম্পৰিৱত্তন্তানি অদ্দস, সো যক্খদাসকে পক্কোসাপেত্ৱা বলিকম্মং কাৰাপেত্ৱাপি নেৱ অন্তং পস্সন্তো দেৱতা নমস্সমানো অহং ইমা ধাতুযো গহেত্ৱা চতুৰাসীতিৱিহাৰসহস্সে নিদহিত্ৱা সক্কাৰং কৰোমি. মা মে দেৱতা অন্তৰাযং কৰোন্তূতি আহ, সক্কো দেৱৰাজা চাৰিকং চৰন্তো তং দিস্ৱা ৱিস্সকম্মং আমন্তেত্ৱা তাত অসোকধম্মৰাজা ধাতুযো নীহৰিস্সামীতি পৰিৱেণং ওতিণ্ণো. গন্ত্ৱা কট্ঠৰূপানি নীহৰাপেহীতি. সো পঞ্চচূলকগামদাৰকৱেসেন গন্ত্ৱা ৰঞ্ঞো পুৰতো ধনুকহত্থো ঠত্ৱা হাৰেমি মহাৰাজাতি আহ, হৰ তাতাতি সৰং গহেত্ৱা সন্ধিম্হিযেৱ ৱিজ্ঝি, সব্বং ৱিপ্পকিৰীযিত্থ, অথ ৰাজা আৱিঞ্জনে [অৱিঞ্চিনে ইতিপিকত্থচি] বন্ধকুঞ্চিকমুদ্দিকং গণ্হি, মণিক্খন্ধং পস্সিত্ৱা অনাগতে দড়িদ্দৰাজানো ইমং মণিং গহেত্ৱা ধাতূনং সক্কাৰং কৰোন্তূতি পণ্ণে অক্খৰানি দিস্ৱা কুজ্ঝিত্ৱা মাদিসানং পন ৰাজূনং [ৰাজানং ইতিসব্বত্থ] দড়িদ্দৰাজাতি ৱত্তুং অযুত্তংতি পুনপ্পুনং ঘটেত্ৱা দ্ৱাৰং ৱিৱৰিত্ৱা অন্তোগেহং পৱিট্ঠো অট্ঠাৰসৱস্সাধিকানং দ্ৱিন্নং ৱস্সসতানং উপৰি আৰোপিতদীপা তথেৱ পজ্জলন্তি, নীলুপ্পলপুপ্ফানি তংখণংযেৱ আহৰিত্ৱা আৰোপিতানি ৱিয পুপ্ফসন্থাৰো তং খণং সন্থতো ৱিয গন্ধা তং মুহুত্তং পিংসিত্ৱা ঠপিতা ৱিয অহেসুং. ৰাজা সুৱণ্ণপট্টং গহেত্ৱা অনাগতে পিযদাসো নাম কুমাৰো ছত্তং উস্সাপেত্ৱা অসোকো নাম ধম্মৰাজা ভৱিস্সতি, সো ইমা ধাতুযো ৱিত্থাৰিতা কৰিস্সতীতি ৱাচেত্ৱা দিট্ঠোহং অয্যেন মহাকস্সপত্থেৰেনাতি ৱত্ৱা ৱামহত্থং আভুজিত্ৱা দক্খিণহত্থেন অপ্ফোটেসি. সো তস্মিং ঠানে পৰিচৰণকধাতুমত্তমেৱ ঠপেত্ৱা সেসধাতুযো সব্বা গহেত্ৱা ধাতুঘৰং পুব্বে পিহিতনযেনেৱ পিদহিত্ৱা সব্বা যথা পকতিযাযেৱ কাৰেত্ৱা উপৰিপাসাণচেতিযং পতিট্ঠাপেত্ৱা চতুৰাসীতিযা ৱিহাৰসহস্সেসু ধাতুযো পতিট্ঠাপেসি. অথেকদিৱসং ৰাজা ৱিহাৰং গন্ত্ৱা ভিক্খুসংঘং ৱন্দিত্ৱা একমন্তে নিসিন্নো যদি ভন্তে ছন্নৱুতিকোটিধনং ৱিস্সজ্জেত্ৱা চতুৰাসীতিৱিহাৰসহস্সানিসচেতিযানি কাৰাপেত্ৱাপি অহং ন দাযাদো. অঞ্ঞো কো দাযাদোতি, পচ্চযদাযকো নাম ত্ৱং মহাৰাজ, যো পন অত্তনো পুত্তঞ্চ ধীতৰঞ্চ পব্বাজেতি, অযং সাসনে দাযাদো নামাতি এৱং ৱুত্তে অসোকো ৰাজা সাসনে দাযাদভাৱং পত্থযমানো অৱিদূৰে ঠিতং মহিন্দকুমাৰং দিস্ৱা সক্খিস্সসি তাত ত্ৱং পব্বজিতুংতি আহ. কুমাৰো পকতিযা পব্বজিতুকামো ৰঞ্ঞো ৱচনং সুত্ৱা অতিৱিয পামোজ্জজাতো পুব্বজামি [পব্বজ্জামি ইতিসব্বত্থ] দেৱ. মং পব্বাজেত্ৱা সাসনে দাযাদো হোথাতি আহ. তেন চ সমযেন ৰাজধীতা সংঘমিত্তাপি তস্মিং ঠানে ঠিতা হোতি. তং দিস্ৱা আহ ত্ৱম্পি অম্ম পব্বজিতুং সক্খিস্সসীতি, সাধু তাতাতি সম্পটিচ্ছি. ৰাজা পুত্তানং মনং লভিত্ৱা পহট্ঠচিত্তো ভিক্খুসংঘং উপসঙ্কমিত্ৱা ভন্তে ইমে দাৰকে পব্বাজেত্ৱা মং সাসনে দাযাদং কৰোথাতি. সঙ্ঘো ৰঞ্ঞো ৱচনং সম্পটিচ্ছিত্ৱা কুমাৰং মোগ্গলিপুত্ততিস্সত্থেৰেন উপজ্ঝাযেন মহাদেৱত্থেৰেন আচৰিযেন পব্বজাপেসি [পব্বজ্জাপেসি ইতিসব্বত্থ]. মজ্ঝন্তিকত্থেৰেন আচৰিযেন উপসম্পাদেসি, সো উপসম্পদামালকেযেৱ সহ পটিসম্ভিদাহি অৰহত্তং পাপুণি. সঙ্ঘমিত্তাযপি ৰাজধীতায আচৰিযাণী আযুপালত্থেৰী নাম [অচাৰিযা আযুপালত্থেৰীনাম ইতিসব্বত্থ]. উপজ্ঝাযা ধম্মপালত্থেৰী নাম অহোসি. ৰাজা পন অনেকাকাৰেন বুদ্ধসাসনং সোভেত্ৱা মোগ্গলিপুত্ততিস্সত্থেৰস্স সহাযেন [সহয্যেন. সাহায্যেন. সাহয্যেন ইতিপিকত্থচি] সট্ঠিসহস্সমত্তে দুস্সীলে তিত্থিযে বুদ্ধসাসনা উপ্পব্বাজেত্ৱা ততিযধম্মসংগীতিং নিট্ঠাপেসি. তস্মিং কিৰ সমাগমে ভিক্খুভিক্খুণিযো কিত্তকাতি [কিত্তকানীতি ইতিসব্বত্থ], ৱুত্তঞ্হি.

১২. তস্মিং সমাগমে আসুং, অসীতিভিক্খুকোটিযো;

অহেসুং সতসহস্সানি, তেসু খীণাসৱা যতী.

১৩. নৱুতিসতসহস্সানি, অহূ ভিক্খুণিযো তহিং;

খীণাসৱা সিক্খুণিযো, সহস্সং আসু তাসু চাতি.

এৱং সো অসোকো ধম্মৰাজা সকলজম্বুদীপে অগ্গৰাজা হুত্ৱা বুদ্ধসাসনং সোভেন্তো ৱিহাসি. অযং পনেত্থ সঙ্খেপো, ৱিত্থাৰো পন মহাৱংসে ৱুত্তোতি. ৱুত্তঞ্হি.

১৪. সম্পুণ্ণত্তা অযং তিস্সো, চেতনাযো মধুপ্পদো;

সব্বত্থ সব্বদা সব্ব, সম্পত্তিমভিসম্ভুণীতি.

মজ্ঝিমো পন ৱাণিজো অত্তনো পাৰৱাদিদোসেন পৰসমুদ্দে লঙ্কাযং নিব্বত্তি. তস্সেৱং কথাপটিপাটি ৱেদিতব্বা. তম্বপণ্ণিদীপে কিৰ মুটসীৱো নাম ৰাজা সট্ঠিৱস্সানি ৰজ্জং কাৰেসি, তস্স পুঞ্ঞপঞ্ঞাগুণোপেতা অঞ্ঞমঞ্ঞং হিতেসিনো দস পুত্তা অহেসুং. দ্ৱে চ ধীতৰো. সব্বে তে সমগ্গা সম্মোদমানা ৱসন্তি. অথাপৰস্মিং সমযে অমচ্চা মুটসীৱৰঞ্ঞে কালকতে দেৱানংপিযতিস্সকুমাৰং অভিসিঞ্চিংসু, অভিসেকসমকালমেৱস্স অনেকানি অচ্ছৰিযানি অহেসুং. তানি পকাসেন্তা মহাৱংসকথাচৰিযা আহংসু.

১৫. দেৱানংপিযতিস্সোতি, ৱিস্সুতো দুতিযো সুতো;

তেসু [অহোসিমুটসীৱস্স, দসপুত্তেসুপুঞ্ঞৱা ইতিকত্থচি] ভাতুসু সব্বেসু, পুঞ্ঞপঞ্ঞাধিকো অহু.

১৬. দেৱানংপিযতিস্সো সো, ৰাজাসি পিতুঅচ্চযে;

তস্সাভিসেকেন সমং, বহূনচ্ছৰিযানহূ.

১৭. লঙ্কাদীপম্হি সকলে, নিধযো ৰতনানিচ;

অন্তোঠিতানি উগ্গন্ত্ৱা, পথৱীতলমাৰুহুং.

১৮. লঙ্কাদীপসমীপম্হি, ভিন্ননাৱা গতানি চ;

তত্ৰ জাতানি চ থলং, ৰতনানি সমাৰুহুং.

১৯. ছাতপব্বতপাদম্হি, তিস্সো চ ৱেড়ুযট্ঠিযো;

জাতা ৰথপতোদেন, সমানা পৰিমাণতো.

২০. তাসু একা লতাযট্ঠি, ৰজতাভা তহিং লতা;

সুৱণ্ণৱণ্ণা ৰুচিৰা; দিস্সন্তেতা মনোৰমা.

২১. একা কুসুমযট্ঠীতু; কুসুমানি তহিংপন;

নানানি নানাৱণ্ণানি; দিস্সন্তেতিফুটানি চ.

২২. একা সকুণযট্ঠী তু, তহিংপক্খিমিগা বহূ;

নানা চ নানাৱণ্ণা চ, সজীৱাৱিয দিস্সৰে.

২৩. হযগজৰথা মলক্যা, ৱলযঙ্গুলিৱেঠকা চেৱ;

ককুধফলা পাকতিকা, ইচ্চে তা অট্ঠ জাতিযা.

২৪. মুত্তা সমুদ্দা উগ্গন্ত্ৱা; তীৰে ৱট্টিৱিযট্ঠিতা;

দেৱানংপিযতিস্সস্স; সব্বং পুঞ্ঞৱিজম্ভিতং.

২৫. ইন্দনীলং ৱেড়ুৰিযং, লোহিতঙ্কমণী চি মে;

ৰতনানি পনে তানি, মুত্তা তা তাচ যট্ঠিযো;

সত্তাহব্ভন্তৰেযেৱ, ৰঞ্ঞো সন্তিকমাহৰুংতি.

তেন চ সমযেন দেৱানংপিযতিস্সমহাৰাজা চ অসোকো ধম্মৰাজা চ অদ্দিট্ঠসহাযা হোন্তি. তস্মা সো এতানি ৰতনানি চ অঞ্ঞানি বহূনি উপাযনানি মম সহাযস্স দেথাতি ধম্মাসোকমহানৰিন্দস্স পণ্ণাকাৰত্থায পেসেসি. সোপি তং দিস্ৱা পসীদিত্ৱা পঞ্চৰাজককুধভণ্ডানি চ অঞ্ঞঞ্চ বহুপণ্ণাকাৰঞ্চ অভিসেকত্থায পেসেসি. ময্হং সহাযং অভিসেকং কৰোন্তূতি. ন কেৱলঞ্চেতং আমিসপণ্ণাকাৰং. ইমং কিৰ ধম্মপণ্ণাকাৰম্পি পেসেসি.

২৬. অহং বুদ্ধংচ ধম্মংচ; সংঘংচ সৰণং গতো;

উপসকত্তং ৱেদেসিং; সক্যপুত্তস্স সাসনে.

২৭. ইমেসু তীসু ৱত্থূসু; উত্তমেসু নৰুত্তম;

চিত্তং পসাদযিত্ৱান, সদ্ধায সৰণং ৱজাতি.

অমচ্চা পুন লঙ্কমাগম্ম ৰাজানং অভিসিঞ্চিংসু, তেন খো পন সমযেন মোগ্গলিপুত্ততিস্সত্থেৰো কত্থ নুখো অনাগতে সাসনং সুপ্পতিট্ঠিতং ভৱেয্যাতি উপপৰিক্খন্তো পচ্চন্তিমে সুপ্পতিট্ঠিতং ভৱিস্সতীতি ঞত্ৱা তে তে থেৰে তত্থ তত্থ পেসেত্ৱা মহামহিন্দত্থেৰং গন্ত্ৱা তম্বপণ্ণিদীপং পসাদেহীতি নিযোজেসি, সক্কো চ দেৱানমিন্দো মহামহিন্দত্থেৰং উপসংকমিত্ৱা কালকতো ভন্তে মুটসীৱো ৰাজা. ইদানি দেৱানংপিযতিস্সমহাৰাজা ৰজ্জং কাৰেতি. সম্মাসম্বুদ্ধেন চ তুম্হে ব্যাকতা অনাগতে মহিন্দো নাম ভিক্খু তম্বপণ্ণিদীপং পসাদেস্সতীতি. তস্মা তিহ খো ভন্তে কালো দীপৱৰং গমনায, অহম্পি সহাযো ভৱিস্সামীতি, থেৰো তস্স ৱচনং সম্পটিচ্ছিত্ৱা অত্তসত্তমো চেতিযপব্বতৱিহাৰতো ৱেহাসং উপ্পতিত্ৱা অনুৰাধপুৰস্স পুৰত্থিমদিসায মিস্সকপব্বতে পতিট্ঠহি, ইমং এতৰহি চেতিযপব্বতোতিপি সঞ্জানন্তি. তদা তম্বপণ্ণিযং উস্সৱদিৱসো হোতি, ৰাজা ছণং কৰোথাতি অমচ্চে আণাপেত্ৱা চত্তাড়ীসসহস্সপুৰিসেহি পৰিৱাৰিতো নগৰম্হা নিক্খমিত্ৱা মিস্সকপব্বতং পাযাসি মিগৱং কীড়িতুকামো. অথ তস্মিং পব্বতে অধিৱত্থা একা দেৱতা ৰঞ্ঞো থেৰে দস্সেস্সামীতি ৰোহিতমীগৱণ্ণেন অৱিদূৰে তিণপণ্ণানি খাদমানা ৱিয চৰতি, ৰাজা অযুত্তং দানি পমত্তং ৱিজ্ঝিতুংতি জিযং পোঠেসি, মিগো অম্বত্থলমগ্গং গহেত্ৱা পলাযিতুং আৰভি, ৰাজা তং অনুবন্ধন্তো অম্বত্থলমেৱ অভিৰুহি, মিগোপি থেৰানং অৱিদূৰে অন্তৰধাযি, মহিন্দত্থেৰো ৰাজানং অৱিদূৰে আগচ্ছন্ত মংযেৱ ৰাজা পস্সতু, মা ইতৰেতি অধিট্ঠহিত্ৱা তিস্স তিস্স ইতো এহীতি আহ, ৰাজা তং সুত্ৱা চিন্তেসি. ইমস্মিং তম্বপণ্ণিদীপে জাতো মং তিস্সোতি নামং গহেত্ৱা আলপিতুং সমত্থো নাম নত্থি. অযং পন ছিন্নভিন্নপটধৰো ভণ্ডুকাসাৱ ৱসনো মং নামেনা লপতি, কো নুখো যং ভৱিস্সতি মনুস্সো অমনুস্সো ৱাতি. থেৰো আহ.

২৮. সমণা মযং মহাৰাজ, ধম্মৰাজস্স সাৱকা;

তৱেৱ অনুকম্পায, জম্বুদীপা ইধাগতাতি.

ৰাজা ধম্মাসোকনৰিন্দেন পেসিতসাসনানুসাৰেন অনুস্সৰমানো অয্যা নুখো আগতাতি তাৱদেৱ আযুধং নিক্খিপিত্ৱা একমন্তং নিসীদি সম্মোদনীযং কথং কথযমানো সাৰণীযং [সম্মোদনীযং-ইতিসব্বত্থ] কথং কুৰুমানো. তস্মিং তানিপি চত্তাড়ীসপুৰিসসহস্সানি আগন্ত্ৱা তং পৰিৱাৰেসুং, তদা থেৰো ইতৰেপি জনে দস্সেসি, ৰাজা দিস্ৱা ইমে কদা আগতাতি পুচ্ছি, মযা সদ্ধিংযেৱ মহাৰাজাতি. ইদানি পন জম্বুদীপে অঞ্ঞেপি এৱৰূপা সমণা সন্তীতি. মহাৰাজ এতৰহি জম্বুদীপো কাসাৱপজ্জোতো ইসিৱাতপটিৱাতো, তস্মিং.

২৯. তেৱিজ্জা ইদ্ধিপ্পত্তা চ, চেতোপৰিঞ্ঞকোৱিদা;

খীণাসৱা অৰহন্তো, বহূ বুদ্ধস্স সাৱকাতি.

ৰাজা তং সুত্ৱা পসন্নো অহোসি, অথ থেৰো ৰুক্খোপমাদিনা তস্স পঞ্ঞাৱেয্যত্তিযং ঞত্ৱা ধম্মং দেসেসি সনৰামৰেহি সাধুকাৰং কাৰযমানো. তেন ৱুত্থং.

৩০. পণ্ডিতোতি ৱিদিত্ৱান, চুল্লহত্থিপদোপমং;

সুত্তন্তং দেসযী থেৰো, মহীপস্স মহামতি [মহীমতী ইতিপিকত্থচি].

দেসনাপৰিযোসানে সো সদ্ধিং তেহি নৰেহি চত্তাড়ীসসহস্সেহি সৰণেসু পতিট্ঠহীতি. অথস্স ৰাজা স্ৱে ভন্তে মম গেহে ভিক্খং গণ্হাথাতি যাচিত্ৱা গন্ত্ৱা নগৰঞ্চ ৰাজগেহঞ্চ অলঙ্কৰিত্ৱা থেৰে নিসীদাপেত্ৱা পণীতেনাহাৰেন পৰিৱিসিত্ৱা অনুড়াদেৱিপ্পমুখাহি পঞ্চসতইত্থীহি সদ্ধিং একমন্তং নিসীদি. অথ থেৰো ধম্মৰতন ৱস্সং ৱস্সাপেসি. ততো তা পঞ্চসতইত্থিযো সোতাপত্তিফলং পাপুণিংসু. ততো হত্থিসালাযং সহস্সং, নন্দনৱনে সহস্সংতি এৱং দুতিযদিৱসে অড্ঢতেয্যানি পাণসহস্সানি সোতাপত্তিফলে পতিট্ঠাপেসি. ততিযদিৱসে অড্ঢনৱপ্পমাণং পাণসহস্সংতি এৱং অনেকসতানং অনেকসহস্সানং অনেকসত সহস্সানং ধম্মা মতং পাযেসি. ৱুত্তঞ্হি.

৩১. মহামহিন্দসুৰিযো, লঙ্কাৱেহাসমজ্ঝগো;

বোধনেয্যম্বুজে কাসি, ৱিকাসং ধম্মৰংসিনা.

৩২. মহামহিন্দচন্দো সো, লঙ্কাৱেহাসমজ্ঝগো;

বোধেসি ধম্মৰংসীহি, ৱেনেয্যকুমুদাকৰে.

৩৩. মহামহিন্দমেঘো সো, ৱস্সং ধম্মম্বুৱুট্ঠিযা;

সাধূনং চিত্তবীজেসু, জনেসি কুসলঙ্কুৰেতি.

অথ ৰাজা সুমনসামণেৰেন ধম্মাসোকস্স হত্থতো সম্মাসম্বুদ্ধপৰিভুত্তপত্তপূৰধাতুযো চ সক্কস্স সন্তিকা দক্খিণক্খকধাতুংচ আহৰাপেত্ৱা [আহাৰিত্ৱা-ইতিসব্বত্থ] চেতিযপব্বতে থূপং আদিংকত্ৱা সকললঙ্কাদীপে যোজনে যোজনে থূপানি কাৰেত্ৱা দক্খিণকধাতুং নিদহিত্ৱা থূপাৰামথূপঞ্চ পতিট্ঠাপেসি. অথ সঙ্ঘমিত্তায থেৰিযা আনীতং জযমহাবোধিনো দক্খিণমহাসাখং পতিট্ঠাপেত্ৱা পূজং কাৰেসি. সব্বো পনেত্থ কথাৱিত্থৰো মহাৱংসতো ৱেদিতব্বো.

৩৪. পাৰৱাদিকদোসেন, জাতেৱং পৰসাগৰে;

পত্তানুমোদনা এৱং, লঙ্কাযং আসি ইস্সৰো.

৩৫. পাপম্পি এৱং ফলতীতি মন্ত্ৱা,

ঞত্ৱান পুঞ্ঞস্স ফলং ইদন্তি;

ভো যোনিসো কুব্বথ পুঞ্ঞকম্মে,

গন্ত্ৱান যে যত্থ ন সোচযন্তীতি.

তেভাতিকমধুৱাণিজকানং ৱত্থুং অট্ঠমং.