৩৫. সাখমালপূজিকায ৱত্থুম্হি অযমানুপুব্বীকথা

অম্হাকং ভগৱা দসপাৰমিযো পূৰেত্ৱা অনুক্কমেন তুসিতভৱনে নিব্বত্তো দেৱেহি আৰাধিতো সক্কৰাজকুলে পটিসন্ধিং গহেত্ৱা মাতুকুচ্ছিতো নিক্খন্তো অনুক্কমেন পৰমাভিসম্বোধিং পত্ৱা ততো পট্ঠায পঞ্চচত্তালীসসংৱচ্ছৰানি ঠত্ৱা চতুৰাসীতিধম্মক্খন্ধসহস্সানি দেসেত্ৱা গণনপথমতীতে সত্তে ভৱকন্তাৰতো সন্তাৰেত্ৱা সব্ববুদ্ধকিচ্চানি নিট্ঠাপেত্ৱা কুসিনাৰাযং উপৱত্তনে মল্লানং সালৱনে যমকসালান মন্তৰে উত্তৰসীসকং পঞ্ঞত্তে মঞ্চকে ৱেসাখপুণ্ণদিৱসে দক্খিণেন পস্সেন সতো সম্পজানো অনুট্ঠানসেয্যায নিপন্নো পচ্ছিমযামে ভিক্খূ ওৱদিত্ৱা বলৱপচ্চূ-স সমযে মহাপথৱিংকম্পেন্তো অনুপাদিসেসায নিব্বাণধাতুযা পৰিনিব্বাযি, নিব্বুতে পন ভগৱতি লোকনাথে আনন্দত্থেৰো মল্লৰাজূনং এতং পৱত্তিং আৰোচেসি. ততো কোসিনাৰকা চ দেৱব্ৰহ্মাদযো চ সন্নিপতিত্ৱা নচ্চগীতৱাদিতেহি মালাগন্ধাদীহি চ সক্কৰোন্তা গৰুকৰোন্তা মানেন্তা পূজেন্তা চেলৱিতানাদযো কৰোন্তা ভগৱতো সৰীৰং নগৰমজ্ঝে যত্থ মকুটবন্ধনং নাম মল্লানং চেতিযং, তত্থ নেত্ৱা চক্কৱত্তিস্স সৰীৰং ৱিয অহতেন ৱত্থেন ৱেঠেত্ৱা ততো ৱিহতেন কপ্পাসেন ৱেঠেত্ৱাতি এৱং পঞ্চদুস্সযুগসতেহি ৱেঠেত্ৱা আযসায তেলদোণিযা পক্খিপিত্ৱা অঞ্ঞিস্সায আযসায দোণিযা পটিকুজ্জিত্ৱা সব্বগন্ধানং চিতকং কৰিত্ৱা ভগৱতো সৰীৰং চিতকং আৰোপেসুং. অথ মহাকস্সপত্থেৰেন ভগৱতো পাদে সিৰসা ৱন্দিতে দেৱতানুভাৱেন চিতকো সমন্তা একপ্পহাৰেনেৱ পজ্জলি. ভগৱতো পন সৰীৰে দড্ঢে সুমনমকুড়সদিসা ধাতুযো অৱসিস্সিংসু. তস্মিং কিৰ সমযে কোসলৰঞ্ঞো জনপদে অঞ্ঞতৰা গামৱাসিকা ইত্থী ভগৱতি পৰিনিব্বুতে সাধুকীড়্হং আগচ্ছমানা অন্তৰামগ্গে অত্তনো সৰীৰে উপ্পন্নৱাতৰোগেন উপদ্দুতা সাধুকীড়্হং সম্পাপুণিতুং অসক্কোন্তী সত্থু আড়াহনং গন্ত্ৱা ভগৱতো ধাতুসৰীৰে তীণি সাখপুপ্ফানি পূজেত্ৱা পসন্নমানসা পঞ্চপতিট্ঠিতেন ৱন্দিত্ৱা গতা তায এৱ ৰত্তিযা মজ্ঝিমযামে কালং কত্ৱা তাৱতিংসভৱনে তিংসযোজনিকে কনকৱিমানে নিব্বত্তি. তস্সা পুব্বকম্মপকাসনত্থং চক্কমত্তানি সাখপুপ্ফানি তত্ত তত্থ ওলম্বন্তি. তেহেৱ সব্বং ৱিমানং একোভাসী [একোভাসি ততো ইতিসব্বত্থ] অহোসি. ততো সুগন্ধকৰণ্ডকং ৱিয চ অহোসি, সা পন অত্তনো সোভগ্গপ্পত্তং অত্তভাৱঞ্চ ৱিমানসম্পদঞ্চ পৰিৱাৰসম্পত্তিযো চ দিস্ৱা ৱিম্হিতমানসা পুব্বে কতেন [পুব্বেকিস্সমে. পুব্বেকতেনমে ইতিচকত্থচি] কেন মে পুঞ্ঞকম্মেনা যং লদ্ধাতি ওলোকন্তী ভগৱতো ধাতুসৰীৰস্মিং পূজিতানি তীণি সাখপুপ্ফানি দিস্ৱা পসন্নমানসা মহাচক্কপ্পমাণং সাখমালং হত্থেন ধাৰেন্তী ধাতুপূজনত্থায অগমাসি. তদা তত্থ সন্নিপতিতা মনুস্সা তস্সা ৰূপসম্পদঞ্চ হত্তে মহন্তং সাখমালঞ্চ দিস্ৱা ৱিম্হিতমানসা অম্ম ত্ৱং কত্থ ৱাসিকা. কত্থ পনিমং পুপ্ফং পটিলদ্ধন্তি পুচ্ছিংসু, তং সুত্ৱা দেৱধীতা অত্তনা ভগৱতো ধাতুসৰীৰস্স পূজিতসাখমালত্তযানুভাৱেন পটিলদ্ধসম্পত্তিযো চ দিব্বৱিমানঞ্চ পুব্বে মতকলেৱৰং চাতি সব্বং তেসং দস্সেত্ৱা ধম্মদেসনাৱসানে আহ.

১. সমাগতা ভৱন্তা ভো, পস্সন্তু মম সম্পদং;

কতমপ্পেন কাৰেন, সম্মাসম্বুদ্ধধাতুযা.

২. সাখমালানি তীণেৱ, হীয্যোহং মুনিধাতুযা;

পূজযিত্ৱান সন্তুট্ঠা, নিৱত্তা তায ৰত্তিযা.

৩. মৰন্তী খৰৱাতেন, তমহং সুচৰিতং সৰিং;

তেনাহং পুঞ্ঞকম্মেন, তাৱতিংসূপগাঅহুং.

৪. তত্থ মে আসি পাসাদো, তিংসযোজনমুগ্গতো;

কূটাগাৰৱৰাকিণ্ণো, সাখমালাতি [সাধমালো ইতিপিকত্থচি], ৱিস্সুতো.

৫. যথা সব্বসুগন্ধেহি, কৰণ্ডং পৰিভাৱিতং;

তথা দিব্বসুগন্ধেহি, গন্ধিতং ভৱনং মম.

৬. চক্কমত্তা সাখপুপ্ফা, তত্থ তত্থূপলম্বৰে [ততৱত্থুপলব্বৰে ইতিপিকত্থচি];

দিব্বগন্ধা পৱাযন্তি, মধুব্বভনিসেৱিতা.

৭. ভস্সন্তি একপুপ্ফস্মা, তুম্বমত্তা হি ৰেণৱো;

তেহি পিঞ্জৰিতা দেৱা, কীড়ন্তি চ ললন্তিচ.

৮. পীড়ন্ধিত্ৱান মালাধযা, সুদিব্বা ভৰণানিচ;

সহচ্ছৰা দেৱপুত্তা, নচ্চগীতাদিব্যাৱটা.

৯. পস্সথেমং ভুজঙ্গা ভো, সত্তা মোহেন পাৰুতা;

হীয্যো মতং পৱিদ্ধং মে, পূতিভূতং কলেৱৰং.

১০. পুড়ৱেহি সমাকিণ্ণং, মক্খিকাগণকীড়িতং;

কাকসোণাদিসত্তান, মাহাৰং কুণপালযং.

১১. পত্থেন্তি পুৰিসা পুব্বে, অনেকোপাযনেন তং;

দট্ঠুম্পিদানি নিচ্ছন্তি, তণ্হাযঞ্ঞাণতা অহো.

১২. লোকপজ্জোতকস্সাহং, ৱিমলস্স যসস্সিনো;

ধাতুং হীয্যো মহিং সম্মা, অজ্জ সগ্গে পতিট্ঠিতা.

১৩. হিত্ৱানে তাদিসং কাযং, লদ্ধংদানি মমেদিসং;

দিব্বত্তভাৱং সোভাহি, ভাসমান মুদিক্খথ.

১৪. ভাসমানায মে ৱাচং, সুণোথেত্থ সমাগতা;

নত্থেৱাকতপুঞ্ঞস্স, অণুমত্তং ভৱে সুখং.

১৫. বিন্দুমত্তম্পি যো পুঞ্ঞ, বীজং ৰোপেতি সাসনে;

ন হা নত্থফলং [নহপনন্তফলং ইতিপিকত্থচি] হোতি, যাৱ নিব্বাণপত্তিযাতি.

এৱং সা দেৱতা অত্তনা পটিলদ্ধদিব্বৱিভৱং দস্সেত্ৱা জনকাযং ওৱদিত্ৱা দিব্বসাখপুপ্ফেহি জিনধাতুং পূজেত্ৱা মনুস্সানং পস্সন্তানংযেৱ সদ্ধিং ৱিমানেন দেৱলোকমেৱ অগমাসি. তং দিস্ৱা মহাজনো দানাদীনি পুঞ্ঞানি কত্ৱা দেৱলোকং পূৰেসীতি.

১৬. এৱঞ্হি সা পুপ্ফমত্তেন ধাতুং,

পূজেত্ৱ দেৱেসু অলত্থ ভূতিং;

তুম্হেপি ভোন্তো তিদিৱেসু সাতং,

কামত্থ চে কত্থ পুঞ্ঞানি সাধুংতি.

সাখমালপূজিকায ৱত্থুং পঞ্চমং.