৩৬. মোৰিযব্ৰহ্মণস্স ৱত্থুম্হি অযমানুপুব্বীকথা

অম্হাকং ভগৱতি পৰিনিব্বুতে মগধৰট্ঠে মচলং নাম মহাগামং অহোসি. তত্থ মোৰিযোনাম ব্ৰাহ্মণো পটিৱসতি সদ্ধো পসন্নো, তস্স সেনানামে কা ভৰিযা অত্থি. সাপি সদ্ধা পসন্না ৰতনত্তযেসু. তে উভোপি সমগ্গা সম্মোদমানা ভিক্খুসঙ্ঘং নিমন্তেত্ৱা নিচ্চং দানং পৱত্তেন্তা চীৱৰাদিচতুপচ্চযেহি উপট্ঠহন্তা সীলং ৰক্খন্তা উপোসথকম্মং কৰোন্তা দিৱসং ৱীতিনামেন্তি. অথস্স গেহে ৱিভৱং যেভুয্যেন দানাদীসু পৰিক্খযমগমাসি. ততো ব্ৰাহ্মণী সামি নো গেহে ধনং পৰিক্খীণং. কথং দানং পৱত্তেয্যামাতি ব্ৰাহ্মণস্স আৰোচেসি, ততো ব্ৰাহ্মণো মা ভদ্দে চিন্তেসি. যেনকেনচি উপাযেন দানং পতিট্ঠপেস্সামাতি ৱত্ৱা তস্মিংযেৱ অত্তনো সউস্সাহতং পকাসোন্তো আহ.

১. জানমানো হি লোকস্মিং, দানস্সেদং ফলং ইতি;

ন দজ্জা কো সুসীলেসু, অপ্পম্পি দিৱসম্পতি.

২. সগ্গলোকনিদানানি, দানানি মতিমা ইধ;

কোহিনাম নৰো লোকে, ন দদেয্য হিতে ৰতোতি.

এৱঞ্চ পন ৱত্ৱা ভদ্দে ৱনং পৱিসিত্ৱা অনেকৱিধানি পণ্ণানি চ ফলানি চ পচ্ছিপূৰং আহৰিত্ৱা ৱিক্কিণিত্ৱাপি দানং ন উপচ্ছিন্দিস্সামাতি ৱত্ৱা ততো পট্ঠায ৱনং গন্ত্ৱা পণ্ণানি চ ফলানি চ আহৰিত্ৱা ৱিক্কিণিত্ৱা দানং দেন্তো পটিৱসতি. অথেকদিৱসং ব্ৰাহ্মণো ৱনং পৱিট্ঠো পণ্ণেহি চ ফলেহি চ পচ্ছিং পূৰেত্ৱা সীসেনা দায গেহং আগচ্ছন্তো পুপ্ফফলপল্লৱেহি ৱিনতং নেকতৰুগণনিচিতং সম্মত্তানেকচাতকচতুপ্পদনিসেৱিতং ৱিপ্পকিণ্ণানন্তপুপ্ফপত্তকিঞ্জক্খচ্ছন্নৱাড়ুকাতলং সন্দমানসীতলা মলজলপ্পৱাহং অকদ্দমানিন্নসুপতিত্তেহি সুন্দৰং কন্দৰং দিস্ৱা পচ্ছিং তীৰে ঠপেত্ৱা ওতিণ্ণো নহাযতি, তস্মিং খণে তত্থ একস্মিং ৰুক্খে অধিৱত্থো দেৱপুত্তো তং তত্থ নহাযন্তং দিস্ৱা কিন্নু খো এস কল্যাণজ্ঝাসযো ৱা উদাহু পাপজ্ঝাসযো সত্তোতি দিব্বচক্খুনা উপধাৰন্তো অচ্ছৰিযপুৰিসো এসো দুগ্গতোপি হুত্ৱা অত্তনো দানপ্পৱেণিযা উপচ্ছিজ্জনভযেন ৱনং গন্ত্ৱা পণ্ণানি চ ফলানি চ আহৰিত্ৱা দুক্খেন কসিৰেন জীৱিকং কপ্পেন্তো দানধম্মং ন উপচ্ছিন্দতীতি চিন্তেত্ৱা তস্স গুণাদযো পটিচ্চ পচ্ছিযং ঠপিতপণ্ণানি চ ফলানি চ সব্বানি সুৱণ্ণানি হোন্তূতি অধিট্ঠাসি. অথস্সানুভাৱেন সব্বং সুৱণ্ণং অহোভি, অথ সো সুৱণ্ণপুণ্ণপচ্ছিযং উপৰি সুৱণ্ণৰাসিমত্থকে সব্বকামদদং মহন্তং মণিৰতনং ঠপেত্ৱা অন্তৰহিতো পটিক্কম্ম অট্ঠাসি, ততো ব্ৰাহ্মণো নহাত্ৱা উত্তিণ্ণো পচ্ছিযং সম্পুণ্ণসুৱণ্ণৱণ্ণৰংসিনা সম্ভিন্নৱিজ্জোতমানমণিৰতনং দিস্ৱা কিমেতংতি আসঙ্কিতপৰিসঙ্কিতো পচ্ছিসমীপং গন্ত্ৱা হত্থং পসাৰেতুং অৱিসহন্তো অট্ঠাসি. তং দিস্ৱা দেৱপুত্তো দিস্সমানসৰীৰেন ঠত্ৱা মা ত্ৱং ভাযি ব্ৰাহ্মণ. মযা এতানি নিম্মিতানি, গহেত্ৱা গচ্ছাহীতি আহ, অথ ব্ৰাহ্মণো দেৱপুত্তস্স কথং সুত্ৱা অযং দেৱপুত্তো ইমং মযা নিম্মিতং, গহেত্ৱা গচ্ছাতি ৱদতি. কিন্নু খো সো অত্তনো আনুভাৱেন দেতি, উদাহু মযা কতপুঞ্ঞেনাতি পুচ্ছিস্সামি তংতি পঞ্জলিকোৱ দেৱপুত্তং পুচ্ছন্তো আহ.

৩. পুচ্ছামি পঞ্জলী দানি, দেৱপুত্ত মহিদ্ধিক;

দদাসি মে সুৱণ্ণঞ্চ, কামদং মণিমুত্তমং.

৪. নাপি কো নো তুৱং ঞাতি,

ন মিত্তো নোপকাৰকো;

কিং ত্ৱং অত্থৱসং দিস্ৱা,

মম দজ্জাসিমং ধনং.

৫. কেন তপেন সীলেন, কেনাচাৰগুণেন চ;

যেন দজ্জাসি মে দেৱ, কিং মে সুচৰিতং চিতং.

৬. কিন্নু পুৰাতনং কম্মং, কেন কম্মেন দস্সসি;

অথৱা তৱিদ্ধিযা দেসি, তং মে অক্খাহি পুচ্ছিতোতি.

ততো দেৱপুত্তো ন খো পনাহং ব্ৰাহ্মণ দেৱোতি পৰেসং কিঞ্চি দাতুং সক্কোমি, তযা পুব্বে কতসুচৰিতানুভাৱেন নিব্বত্ততীতি ৱত্ৱা দিব্বচক্খুনা তস্স পুব্বকম্মং দিস্ৱা তস্স পকাসেন্তো আহ.

৭. কস্সপে লোকপজ্জোতে, সম্বুদ্ধে পৰিনিব্বুতে;

সব্বত্থ পত্থটং আসি, তস্স বুদ্ধস্স সাসনং.

৮. তদা পচ্চন্তিমে গামে, ত্ৱমাসি কুলদাৰকো;

সদ্ধো আসি পসন্নো চ, দাযকো কুসলে ৰতো.

৯. তদা পব্বজিতো একো, গচ্ছন্তো অন্তৰাপথে;

চোৰেহি অনুবদ্ধোসি, অচ্ছিন্নপত্তচীৱৰো.

১০. সাখাভঙ্গং নিৱাসেত্ৱা, পাৰুপিত্ৱা তথেৱ তং;

অন্তোগামং পৱিট্ঠোসি, এসমানো পিলোতিকে.

১১. ততো ত্ৱং চৰমানং তং, দিস্ৱা কম্পিতমানসো;

ৱত্থযুগং অদাসি ত্ৱং, সদ্দহং দানতো ফলং.

১২. পত্থোদনেন তং ভিক্খুং, পৰিৱিসিত্ৱা যথাবলং;

পেসেসি অভিৱাদেত্ৱা, সদ্ধায সুদ্ধমানসো.

১৩. ইমং ত্ৱং অকৰী পুঞ্ঞং, তুয্হেতং চৰিতং ইমং;

তস্স তে পুঞ্ঞকম্মস্স, অমুখ্যফল মীদিসংতি.

এৱঞ্চ পন ৱত্ৱা ইদং তে ব্ৰাহ্মণ ধনং ৰাজাদীহি মযা অনাহৰণীযং কতং, ত্ৱং অপৰিসঙ্কন্তো গহেত্ৱা যথাধিপ্পাযং কৰোহি, ইমং খো পন মণিৰতনং ইচ্ছিতিচ্ছিতং পসৱতি, তেনাপি আনুভাৱেন তৱ দানং অনুপচ্ছিন্দন্তো পুত্তদাৰাদযো পোসেহীতি অনুসাসি, তং সুত্ৱা ব্ৰাহ্মণো তেন ৱুত্তনিযামেনেৱ ভিক্খুসঙ্ঘস্স মহাদানং দদন্তো সীলং ৰক্খন্তো চিৰং ৱসিত্ৱা অপৰভাগে ততো চুতো দেৱলোকে নিব্বত্তীতি.

১৪. এৱং নিহীনাপী ধনেন সন্তো,

দানন্ৱযং নেৱ পৰিচ্চজন্তি;

তস্মা হি ভোন্তো সতি দেয্যধম্মে,

মা কত্থ দানেসু পমাদভাৱংতি.

মোৰিযব্ৰাহ্মণস্স ৱত্থুং ছট্ঠমং.