৩৩. কপণায ৱত্থুম্হি অযমানুপুব্বীকথা

ভগৱতি পৰিনিব্বুতে জম্বুদীপে তত্থ তত্থ ভিক্খুভিক্খুণিযো চ উপাসকউপাসিকাযো চ জযমহাবোধিং ৱন্দিস্সামীতি যেভুয্যেন গন্ত্ৱা ৱন্দন্তি. অথা পৰভাগে বহূ ভিক্খূ সঙ্গম্ম মহাবোধিং ৱন্দনত্থায গচ্ছন্তা অঞ্ঞতৰস্মিং গামকে ভিক্খায চৰিত্ৱা আসনসালং গন্ত্ৱা কতভত্তকিচ্চা থোকং ৱিস্সমিংসু, তদা তত্থ একা কপণা দুগ্গতিত্থী তথা নিসিন্নভিক্খূ দিস্ৱা উপসঙ্কমিত্ৱা পঞ্চপতিট্ঠিতেন ৱন্দিত্ৱা একমন্তে ঠিতা অয্যা কুহিং গচ্ছন্তীতি পুচ্ছি. ভিক্খূ তং সুত্ৱা জযমহাবোধিস্স আনুভাৱঞ্চ তং ৱন্দনত্থায অত্তানং গমনঞ্চ কথেন্তা এৱমাহংসু.

১. যত্থাসীনো জিনো জেসি, সসেনং মকৰদ্ধজং;

হন্ত্ৱা কিলেসসেনঞ্চ, বুদ্ধো আসি নিৰুত্তৰো.

২. যং পূজেসি মহাৱীৰো, ঠিতো পদ মকোপযং;

সত্তৰত্তিন্দিৱং নেত্ত, নীলনীৰজৰংসিনা.

৩. সুৰাসুৰনৰাদীনং, নেত্তালি পাড়িপাতনা;

মেচকাকাৰপত্তেহি, সিখণ্ডীৱিয ভাতি যো.

৪. সুৰপাদপোৱ সত্তানং, যং তিট্ঠতি মহীতলে;

ইহ লোকে পৰত্তে চ, দদন্তো ইচ্ছিতিচ্ছিতং.

৫. যস্স পুৰাণপণ্ণম্পি, পতিতং যো নৰো ইধ;

পূজেতি তস্স সো দেতি, ভৱভোগং মহীৰুহো.

৬. গন্ধমালেহি সলিলেহি, যমুপাসতি সদা নৰো;

অজ্ঝত্তঞ্চ বহিদ্ধা চ, দুৰিতং সো নিহঞ্ঞতি.

৭. যো দেতি ইহলোকত্থং,

যো দেতি পাৰলোকিকং,

সম্পদং জযবোধিংতং,

ভোতি গচ্ছাম ৱন্দিতুং.

তং সুত্ৱা উদগ্গা সোমনস্সজাতা ভিক্খূনং এৱমাহ. অহং ভন্তে পৰকুলে ভতিযা কম্মং কৰোন্তী দুক্খেন কসিৰেন জীৱিকং কপ্পেমি. স্ৱাতনায মে তণ্ডুলনালিপি [ভণ্ডুলনাম্প ইতিসব্বত্থ] নত্থি, পগেৱ অঞ্ঞং ধনং, ইমং ৱিনা অঞ্ঞং সাটকম্পি নত্থি, কস্মা পুব্বে অকতপুঞ্ঞত্তা, তস্মা ইমং ভন্তে সাটকং মমানুগ্গহায বোধিম্হি ধজং বন্ধথাতি যাচিত্ৱা সাটকং ধোৱিত্ৱা তেসং অদাসি. ভিক্খূপি তস্সানুগ্গহায তং গহেত্ৱা অগমংসু. সা সাটকং দত্ৱা পীতিপামোজ্জমানসা গেহং গন্ত্ৱা তদহেৱ ৰত্তিযা মজ্ঝিমযামে সত্থকৱাতেন উপহতা কালং কত্ৱা তেসং ভিক্খূনং গমনমগ্গে একস্মিং ৰমণীযে ৱনসণ্ডে ভুম্মদেৱতা হুত্ৱা নিব্বত্তী, অথস্সা পুঞ্ঞানুভাৱেন তিযোজনিকে ঠানে দিব্বকপ্পৰুক্খা পাতুৰহংসু, তত্ত তত্ত নানাৱিৰাগধজপতাকা ওলম্বন্তি. দেৱপুত্তা চ দেৱধীতৰো চ সব্বাভৰণৱিভূসিতা তথেৱ ধজপতাকাদযো গহেত্ৱা কীড়ন্তি. নচ্চগীতাদিনেকানি অচ্ছৰিযানি পযোজেন্তি. অথ দুতিযদিৱসে তেপি ভিক্খূ বোধিমণ্ডলং গচ্ছন্তা সাযণ্হে তং ঠানং পত্ৱা অজ্জ ইমস্মিং ৱনসণ্ডে ৱসিত্ৱা গমিস্সামাতি তত্থ ৱাসং উপগমিংসু, ততো তে ৰত্তিভাগে নানাৱণ্ণধজে চ দেৱতাহি পযোজিযমানা গীতৱাদিতাদযো চ তিযোজনট্ঠানে কপ্পৰুক্খানি চ ইদং সব্বং দেৱিস্সৰিযং তস্সানুভাৱেন নিব্বত্তভাৱং দিস্ৱা ৱিম্হিতমানসা দেৱধীতৰং আমন্তেত্ৱা ত্ৱং কেন কম্মেন ইধ নিব্বত্তাতি পুচ্ছিংসু. সা ভিক্খূ ৱন্দিত্ৱা অঞ্জলিং পগ্গয্হ ঠিতা ভন্তে মং ন সঞ্জানিত্থাতি আহ. ভিক্খূহি ন মযং সঞ্জানাম ভগিনীতি ৱুত্তে সা অত্তনো সভাৱং কথেন্তী এৱমাহ.

৮. হীয্যো আসনসালায, নিসীদিত্থ সমাগতা;

তুম্হকং সন্তিকং গম্ম, যা ৱৰাকীভিৱাদযি.

৯. যা বোধিং পূজনত্থায, ৱত্থকং পটিপাদযি;

সাহং হীয্যো চুতা আসিং, ৰত্তিযং ব্যাধিপীড়িতা.

১০. নানাসম্পত্তিসংযুত্তা, নানাভূসনভূসিতা;

ৱিমানে ৰতনা কিণ্ণে, জাতাহং এত্থ কাননে.

১১. হীয্যো পস্সিত্থ মে গত্তং, ৰজোজল্লেহি সংকুলং;

অজ্জ পস্সথ মে গত্তং, ৱণ্ণৱন্তং পভস্সৰং.

১২. হীয্যো পস্সিত্থ মে ভন্তে, নিৱত্থং মলিনম্বৰং;

অজ্জ পস্সথ মে ভন্তে, দিব্বমম্বৰমুত্তমং.

১৩. ৱিকিণ্ণফলিতগ্গেহি, কেসেহি ৱিৰলা কুলং;

ঊকাগূথপটিক্কূলং, হীয্যো আসিসিৰং মম.

১৪. অজ্জ তং পৰিৱত্তিত্ৱা, মম পুঞ্ঞানুভাৱতো;

সুনীলমুদুধম্মিল্লং, কুসুমা ভৰণভূসিতং.

১৫. পুৰা মে সকসীসেন, ৱহিতং দাৰূ দকাদিকং;

পুঞ্ঞেনাহং অজ্জ মালা, ভাৰং সীসে সমুব্বহে.

১৬. ধজত্থায মযা হীয্যো, পদিন্নং থূলসাটকং;

অজ্জ নিব্বত্তি মে ভোন্তো, মহন্তং দিব্বসম্পদং.

১৭. জানমানেন কত্তব্বং, দানাদীসু মহপ্ফলং;

দেৱলোকে মনুস্সেসু, সুখদং দান মুত্তমন্তি.

তং সুত্ৱা সব্বে ভিক্খূ অচ্ছৰিযব্ভুতচিত্তা অহেসুং. সা দেৱতা তস্সা ৰত্তিযা অচ্চযেন ভিক্খূ নিমন্তেত্ৱা দিব্বেহি খজ্জভোজ্জেহি সহত্থা সন্তপ্পেত্ৱা তেহি সদ্ধিং আগচ্ছন্তী অন্তৰামগ্গে দানং দদমানা মহাবোধিং গন্ত্ৱা সব্বেহি ধজপতাকা দীহি চ নানাৱিধৱণ্ণগন্ধসম্পন্নপুপ্ফেহি চ দীপধূপেহি চ বোধিং পূজেত্ৱা ভিক্খূনং চীৱৰত্থায দিব্বৱত্থানি দত্ৱা আগম্ম তস্মিংযেৱ ৱনসণ্ডে ৱসন্তী নানাৱিধানি পুঞ্ঞানি কত্ৱা তাৱতিংসভৱনে নিব্বত্তি. ভিক্খূপি তং অচ্ছৰিযং তত্থ তত্থ পকাসেন্তা বহূজনে পুঞ্ঞকম্মে নিযোজেসুংতি.

১৮. এৱং ৱিধাপি কপণা জিনসাসনম্হি,

কত্ৱা পসাদ মথ থূলকুচেলকেন;

পূজেত্ৱ দিব্বৱিভৱং অলভীতি ঞত্ৱা,

পূজাপৰা ভৱথ ৱত্থুসু তীসু সম্মাতি.

কপণায ৱত্থুং ততিযং.