৩২. সুৱণ্ণতিলকায ৱত্থুম্হি অযমানুপুব্বীকথা

লঙ্কাদীপে কিৰ অনুৰাধপুৰনগৰে একো মাতুগামো [একামাতুগামাতিৱা একামাতুগামোতিৱা কত্থচি] সদ্ধাসম্পন্না নিচ্চং অভযুত্তৰচেতিযে পুপ্ফপূজং কৰোতি, অথেকদিৱসং সা অত্তনো ধীতুযা সদ্ধিং তস্মিং চেতিযে পুপ্ফপূজনত্থায [পুপ্ফপূজত্থায ইতিকত্থচি] গন্ত্ৱা পুপ্ফাসনসালায উদকং অপস্সন্তী ধীতু হত্থে পুপ্ফচঙ্গোটকং ঠপেত্ৱা ঘট মাদায পোক্খৰণিং অগমাসি, ততো সা দাৰিকা মাতৰি অনাগতাযযেৱ [অনাগতেযেৱ ইতিসব্বত্থ] অধোতাসনে পুপ্ফমুট্ঠিংগহেত্ৱা মণ্ডলং কত্ৱা পূজেত্ৱা এৱং পত্থনমকাসি. তথা হি.

১. মহাৱীৰস্স ধীৰস্স, সযম্ভুস্স মহেসিনো;

তিলোকগ্গস্স নাথস্স, ভগৱন্তস্স সত্থুনো.

২. য মহং পূজযিং পুপ্ফং, তস্স কম্মস্স ৱাহসা;

ৰূপীনং পৱৰা হেস্সং, আৰোহপৰিণাহৱা.

৩. মং দিস্ৱা পুৰিসা সব্বে, মুচ্ছন্তু কামমুচ্ছিতা;

নিচ্ছৰন্তু সৰীৰা মে, ৰংসিমালীৱ ৰংসিযো.

৪. হদযঙ্গমা কণ্ণসুখা, মঞ্জুভাণী সুভা মম;

কিন্নৰানং যথা ৱাণী, এৱমেৱ পৱত্ততূতি.

অথস্সা মাতা আগম্ম অধোতাসনে পূজিতানি পুপ্ফানি দিস্ৱা কস্মা চণ্ডালী অধোতাসনে ভগৱতো পুপ্ফানি পূজেসি, অযুত্তং তযা কতন্তি আহ, তং সুত্ৱা সা মাতুযা কুজ্ঝিত্ৱা ত্ৱং চণ্ডালীতি অক্কোসি, সা এত্তকং পুঞ্ঞাপুঞ্ঞং কত্ৱা অপৰভাগে ততো চুতা জম্বুদীপে উত্তৰমধুৰাযং একস্স চণ্ডালগন্ধব্বব্ৰাহ্মণস্স ধীতা হুত্ৱা নিব্বত্তি, উত্তমৰূপধৰা অহোসি, তস্সা সৰীৰতো মেঘমুখতো ৱিজ্জুল্লতাৱিয ৰংসিযো নিচ্ছৰন্তি. সমন্তা চতুহত্থট্ঠানে সৰীৰপ্পভায অন্ধকাৰে ৱিধমতি. মুখতো উপ্পলগন্ধো ৱাযতি, কাযতো চন্দনগন্ধো, তস্সা দ্ৱিন্নং থনান মন্তৰে সুৱণ্ণৱণ্ণং একং তিলকং অহোসি, তেন বালসুৰিযস্স ৱিয পভা নিচ্ছৰতি. দিট্ঠদিট্ঠা যেভুয্যেন উম্মত্তা ৱিয কামমদেন ৱিসঞ্ঞিনো হোন্তি, অহো কুসলাকুসলানং আনুভাৱো. তথা হি.

৫. যেন সা কোধসামাতু, চণ্ডালী ইতি ভাসিতা;

তেন সা আসি চণ্ডালী, জেগুচ্ছা হীনজাতিকা.

৬. সল্লক্খেত্ৱান সম্বুদ্ধ, গুণং পূজেসি যং তদা;

তেন পুঞ্ঞানুভাৱেন, সা ভিৰূপী মনোৰমা.

৭. যেন যেন পকাৰেন, পুঞ্ঞপাপানি যো কৰে;

তস্স তস্সানুৰূপেন, মোৰোৱ লভতে ফলং.

৮. পাপেন চ তিৰচ্ছানে, জাযন্তি কুসলেন তে;

ৱণ্ণপোক্খৰতা হোতি, মোৰানং কম্ম মীদিসন্তি.

ততো তস্সা মাতাপিতৰো সুৱণ্ণতিলকাতি নাম মকংসু. তস্মিংকিৰ নগৰে মনুস্সা তস্সা ৰুপদস্সনেনচ সৱণেনচ সম্পত্তাপি চণ্ডালধীতা অযন্তি পৰিভৱভযেন আৱাহং ন কৰোন্তি. অথ তস্মিং নগৰে জেট্ঠচণ্ডালব্ৰাহ্মণস্স পুত্তো এতমত্থায তস্সা মাতাপিতুন্নং সন্তিকং ৱত্থাভৰণগন্ধমালাদযো পেসেসি সুৱণ্ণতিলকং অম্হাকং দদন্তূতি, তে তং পৱত্তিং তস্সা আৰোচেসুং. সাস্স জিগুচ্ছন্তী পৰিহাস মকাসি. ততো ব্ৰাহ্মণস্স পুত্তো লজ্জিতো ৰঞ্ঞো সন্তিকং গন্ত্ৱা ৱীণং মুঞ্চেত্ৱা গাযমানো এৱমাহ.

৯. ললনা ননানী চললোচনানী,

তৰুণা ৰুণানী চলিতাধৰাণী;

মনুজো হি যো নেত্তপিযং কৰোতি,

স তু নীচজাতিং অপি নো জহাতি.

কিমিদন্তি ৰঞ্ঞা পুট্ঠো আহ.

১০. সমেতি কিং দেৱ ছমায মত্তিকা,

কদাচি চামীকৰজাতিকায;

সিগালধেনু অপি নীচজাতিকা,

সমেতি কিংসীহৱৰেন দেৱাতি.

এৱঞ্চ পন ৱত্ৱা দেৱ ইমস্মিংনগৰে সুৱণ্ণতিলকা নামেকা চণ্ডালধীতা অত্থি, সা সমানজাতিকেহি পেসিতপণ্ণাকাৰং ন গণ্হাতি, কুলৱন্তেযেৱ পত্থেতি, কদা নাম কাকী সুৱণ্ণহংসেন সমাগচ্ছতি দেৱাতি. ৰাজা তং সুত্ৱা তস্সা পিতৰং পক্কোসাপেত্ৱা তমত্থং ৱত্ৱা সচ্চং ভণেতি পুচ্ছি, সোপি সচ্চং দেৱ, সা জাতিসম্পন্নমেৱ কামেতীতি আহ. ৰাজা এৱং সতি ভণে পঞ্চমধুৰনগৰে উদ্দাড়ব্ৰাহ্মণো নাম অত্থি, সো জাতিসম্পন্নো মাতিতোচ পিতিতোচ অনুপক্কুট্ঠো, জেগুচ্ছা পটিক্কূলা এতাতি মাতুগামেন সদ্ধিং ন সংৱসতি. অত্তনো গেহতো ৰাজগেহং গচ্ছন্তোচ আগচ্ছন্তো চ সোড়সখীৰোদকঘটেহি মগ্গে সিঞ্চাপেসি. মাতুগামে দিস্ৱা কালকণ্ণী মযা দিট্ঠাতি খীৰোদকেন মুখং ধোৱতি. তৱ ধীতা সক্কোন্তী তেন সদ্ধিং সংৱসতু, এতমত্থং তৱ ধীতৰং কথেহীতি আহ, সোপি তং সুত্ৱা গেহং গন্ত্ৱা ধীতৰং পক্কোসিত্ৱা ৰঞ্ঞা ৱুত্তনিযামেনেৱ তস্সা কথেসি. তায তং সুত্ৱা সক্কোন্তী অহং উদ্দাড়ব্ৰাহ্মণেন সদ্ধিং ৱসিস্সামি, মা তুম্হে চিন্তেথ, পপঞ্চম্পি মা কৰোথ, পাতোৱ গমিস্সামীতি ৱুত্তে পিতা পনস্সা সাধূতি সহস্সগ্ঘনকচিত্তকম্বলকঞ্চুকেন ধীতু সৰীৰং পাৰুপাপেত্ৱা ৱীণাদিতুৰিযভণ্ডানি গাহাপেত্ৱা ধীতুযা সদ্ধিং অদ্ধানমগ্গং পটিপজ্জি. গচ্ছন্তো অন্তৰামগ্গে অঞ্ঞতৰস্মিং নগৰে ৰঞ্ঞো গন্ধব্বং কৰোন্তো ধীতৰং পিট্ঠিপস্সে নিসীদাপেত্ৱা গন্ধব্বমকাসি. অথস্স পিট্ঠিপস্সনিসিন্না সুৱণ্ণতিলকা নযনকোটিযা দিট্ঠিং পাপেন্তী সৰসেন তং ওলোকেত্ৱা পাৰুতকঞ্চুকং কিঞ্চি অপনেত্ৱা সৰীৰপ্পভং পঞ্ঞাপেসি, ৰাজা পনস্সা সৰীৰপ্পভংচ ৰূপসম্পদংচ দিস্ৱা কামাতুৰো ৱিগতসঞ্ঞো সম্মূড়্হো হুত্ৱা মুহুত্তেন পটিলদ্ধস্সাসো তস্সা সস্সামিকাস্সামিকভাৱং পুচ্ছিত্ৱা চণ্ডালধীতাতি সুত্ৱা পৰিভৱভযেন তং আনেতু মসক্কোন্তো এৱৰূপং ৱণ্ণপোক্খৰসম্পন্নং ইত্থিৰতনং অলভন্তস্স মে কো অত্থো জীৱিতেনাতি সোচন্তো পৰিদেৱন্তো কামমুচ্ছিতো কত্তব্বা কত্তব্বং অজানন্তো অসিং গহেত্ৱা অত্তনো সীসং সযমেৱ ছিন্দিত্ৱা কাল মকাসি. এৱমেৱ অন্তৰামগ্গে পঞ্চৰাজানো তস্সা ৰূপসম্পত্তিমদমত্তা অসিনা ছিন্নসীসা জীৱিতক্খযং পাপুণিংসু. তথা হি সত্তা হিৰঞ্ঞসুৱণ্ণদাসিদাস পুত্তদাৰাদীসু [পুত্তদাৰাদীহি ইতিসব্বত্থ] পিযং নিস্সায কামেন মুচ্ছিতা অনযব্যসনং পাপুণন্তীতি. ৱুত্তঞ্হেতং ভগৱতা.

১১. পিযতো জাযতে সোকো,

পিযতো জাযতে ভযং;

পিযতো ৱিপ্পমুত্তস্স,

নত্থি সোকো কুতো ভযং.

১২. পেমতো জাযতে সোকো,

পেমতো জাযতে ভযং;

পেমতো ৱিপ্পমুত্তস্স,

নত্থি সোকো কুতো ভযং.

১৩. ৰতিযা জাযতে সোকো,

ৰতিযা জাযতে ভযং;

ৰতিযা ৱিপ্পমুত্তস্স,

নত্থি সোকো কুতো ভযং.

১৪. কামতো জাযতে সোকো,

কামতো জাযতে ভযং;

কামতো ৱিপ্পমুত্তস্স,

নত্থি সোকো কুতো ভযং.

১৫. তণ্হায জাযতে সোকো,

তণ্হায জাযতে ভযং;

তণ্হায ৱিপ্পমুত্তস্স,

নত্থি সোকো কুতো ভযং.

ততো সো অনুক্কমেন পঞ্চমধুৰনগৰং গন্ত্ৱা অত্তনো আগতভাৱং ৰঞ্ঞা কথাপেত্ৱা তেন অনুঞ্ঞাতো গন্ত্ৱা ৰাজানং অদ্দস. তদা উদ্দাড়ব্ৰাহ্মণো ৰঞ্ঞো অৱিদূৰে কম্বলভদ্দপীঠে নিসিন্নো হোতি, গন্ধব্বব্ৰাহ্মণোপি ধীতুযা সদ্ধিং গন্ধব্বং কুৰুমানো নিসীদি. তস্মিংখণে পিতু পিট্ঠিপস্সে নিসিন্না সুৱণ্ণতিলকা উদ্দাড়ব্ৰাহ্মণো কতমোতি পুচ্ছিত্ৱা এতস্মিং ভদ্দপীঠে নিসিন্নোং এসোতি সুত্ৱা নিলামললোচনেহি তং ওলোকন্তি দসনৰংসিনা সম্ভিন্নসুৰত্তাধৰেন মন্দহসিতং কৰোন্তী তং ওলোকেত্ৱা পাৰুতকঞ্চুকং অপনেত্ৱা সৰীৰপ্পভং ৱিস্সজ্জেসি. তং দিস্ৱা ব্ৰাহ্মণো উম্মত্তো সোকেন পৰিদড্ঢগত্তো উণ্হৱাতেন পূৰিতমুখনাসো অস্সুনা কিলিন্ননেত্তো ৱিসঞ্ঞী অহোসি. ততো সো মুহুত্তেন লদ্ধস্সাসো ৰোগীৱিয ৰঞ্ঞো সকাসা অপসৰন্তো অত্তনো গেহং গন্ত্ৱা সুহদে পক্কোসিত্ৱা তেসং এৱমাহ. ভৱন্তেত্থ.

১৬. যো আপদে সমুপ্পন্নে,

উপতিট্ঠতি সন্তিকে;

সুখদুক্খে সমো হোতি,

সো মিত্তো সোচ ঞাতকো.

১৭. যো গুণং ভাসতে যস্স, অগুণঞ্চ নিগূহতি;

পটিসেধেত্য [পটিসেধেতিকত্তব্বা ইতিসব্বত্থ] কত্তব্বা, সো মিত্তো সোচ ঞাতকো.

১৮. সুৱণ্ণতিলকানাম, ললনা কামলালযা;

নীলক্খিচণ্ডকণ্ডেহি, ৱিখণ্ডেসি মনো মম.

১৯. তস্সা মুখম্বুজে সত্তা, মম নেত্তমধুব্বতা,

অপ্পম্পিন সৰন্তামং, তত্থেৱা ভিৰমন্তি তে.

২০. সহেৱ তেহি মে চিত্তং, গতং উল্লংঘিযুদ্ধতো;

লজ্জাগম্ভীৰপৰিখং, ধিতিপাকাৰমুগ্গতং.

২১. সম্মুয্হামি পমুয্হামি, সব্বা মুয্হন্তি মে দিসা;

তস্স মে সৰণং হোথ, কৰোথ মম সঙ্গহন্তি.

তং সুত্ৱা তে এৱমাহংসু.

২২. যং ত্ৱমাচৰিয পত্থেসি, চণ্ডালী সা অসঙ্গমা;

কিন্নু মীড়্হেন সংযোগো, চন্দনস্স কদা সিযা.

২৩. অগম্মগমনা যাতি, নৰানং দূৰতো সিৰী;

কিত্তিচাযু বলং বুদ্ধি, অযসংচ স গচ্ছতীতি.

অথ তেসং ব্ৰহ্মণো আহ.

২৪. ন পৰিচ্চজতি লোকোযং, অমেজ্ঝে মণিমুত্তমং;

থীৰতনং যুৱাণী চ, দুক্কুলা অপি গাহিযাতি.

এৱঞ্চ পন ৱত্ৱা তস্সা সস্সামিকাস্সামিকভাৱং ঞত্ৱা আনেথাতি আহ, তে তথা অকংসু. ততো ব্ৰাহ্মণো তায গেহং আগতকালতো পট্ঠায চত্তাৰো মাসে ৰঞ্ঞো উপট্ঠানং নেৱ অগমাসি. তস্স পন ব্ৰহ্মণস্স সন্তিকে পঞ্চসতৰাজকুমাৰা নানাৱিধানি সিপ্পানি উগ্গণ্হন্তি. তে তং কাৰণং ঞত্ৱা সুৱণ্ণতিলকায ৱিজ্জমানায অম্হাকং সিপ্পুগ্গহণস্স অন্তৰাযো ভৱিস্সতি, যেন কেনচি উপাযেন এতং মাৰেতুং ৱট্টতীতি, চিন্তেত্ৱা তে হত্থা চৰিযং পক্কোসিত্ৱা লঞ্জং দত্ৱা এৱমাহংসু, হত্থিং সুৰায মত্তং কত্ৱা সুৱণ্ণতিলকং মাৰেহীতি. ততো তে সব্বে ৰাজঙ্গণে সন্নিপতিত্ৱা দূতং পাহেসুং, আচৰিযং দট্ঠুকামম্হাতি. ততো ব্ৰাহ্মণেন আগন্ত্ৱা নিসিন্নেন পটিসন্থাৰং কত্ৱা আচৰিয আচৰিযানিং পস্সিতুকামম্হাতি আহংসু. অথ সো সুৱণ্ণতিলকং গহেত্ৱা আগচ্ছথাতি মনুস্সে পেসেসি. তে তথা কৰিংসু, অথ তস্সা ৱীথিমজ্ঝং সম্পত্তকালে হত্থিং ৱিস্সজ্জাপেসুং. সো সোণ্ডায ভূমিযং পহৰন্তো [পহৰন্তোউপধাৱিত্ৱা ইতিকত্থচি] গচ্ছন্তো উপধাৱিত্ৱা সোণ্ডেন তং উক্খিপিত্ৱা কুম্ভে নিসীদাপেসি. ততো ৰাজানো তথা তং মাৰাপেতু মসক্কোন্তা পুন দিৱসে মনুস্সে পযোজেত্ৱা ৰত্তিযং মাৰাপেসুং. ব্ৰাহ্মণোপি এৱৰূপং ইত্থিং অলসিত্ৱা জীৱনতো মতমেৱ [মতংমেসেয্যো ইতিকত্থচি] সেয্যোতি সোচন্তো পৰিদেৱন্তো ৰাজঙ্গণে দাৰুচিতকং কাৰাপেত্ৱা অগ্গিংপৱিসিত্ৱা মতোতি. এৱং মাতুগামৱসঙ্গতা মহন্তং অনযব্যসনঞ্চ মৰণঞ্চ পাপুণন্তীতি. ৱুত্তঞ্হেতং ভগৱতা.

২৫. মাযাৱেসা [মাযাচেসা ইতিকত্থচি] মৰীচীৱ,

সোকো ৰোগো চুপদ্দৱো;

খৰাৱ বন্ধনা চেসা,

মচ্চুপাসো গুহাসযো;

তাসু যো ৱিস্সসে পোসো,

সো নৰেসু নৰাধমোতি.

২৬. অযোনিসো সা পুৰিমায জাতিযা,

পুঞ্ঞং কৰিত্ৱা অলভীদিসং গতিং;

ধীসম্পযুত্তং [ধিতিসম্পযুত্তং ইতিকত্থচি] কুসলং কৰোন্তা,

নিব্বাণমেৱাভিমুখং কৰোথাতি.

সুৱণ্ণতিলকায ৱত্থুং দুতিযং.