৩১. মহাসেনৰঞ্ঞো ৱত্থুম্হি অযমানুপুব্বীকথা

ভগৱতি পৰিনিব্বুতে পাটলিপুত্তনগৰে মহাসেনো নাম ৰাজা ৰজ্জং কাৰেসি ধম্মিকো ধম্মৰাজা. সো পন পিতুপিতামহাদীনং ধনৰাসিং ওলোকেত্ৱা ইমে ইমং সাপতেয্যং পহায মচ্চুনো মুখমুপগতা. অহো সংসাৰিকানং অঞ্ঞাণতা. ধনং ঠপেত্ৱা অত্তনো ৱিনাসঞ্চ অত্তানং ঠপেত্ৱা ধনৱিনাসঞ্চ ন জানন্তীতি সম্পত্তিযা অধিগমঞ্চ ৱিনাসং চাতি সব্বং চিন্তেত্ৱা ধম্মঞ্চ সুত্ৱা পটিলদ্ধসদ্ধো দিৱসে দিৱসে দসসহস্সানং ভিক্খূনং মধুৰেন অন্নপানেন সন্তপ্পেন্তো অনেকানি পুঞ্ঞানি উপচিনন্তো একদিৱসং ৰহো পটিসল্লিনো এৱং চিন্তেসি. এৱং ৰাজনিযোগেন জনস্স পীড়নং কত্ৱা দিন্নদানতো সহত্থেন কম্মং কত্ৱা লদ্ধেন দিন্নদানং মহপ্ফলং মহানিসংসং ভৱিস্সতি, এৱং মযা কাতব্বন্তি সো সুহদা মচ্চস্স ৰজ্জং নীয্যাতেত্ৱা অত্তনো কণিট্ঠিকং আদায কিঞ্চি অজানাপেত্ৱা অঞ্ঞতৰৱেসেন নগৰা নিক্খম্ম উত্তৰমধুৰং নাম নগৰং অগমাসি, তত্থ মহাৱিভৱো একো সেট্ঠি পটিৱসতি, তে সেট্ঠিনো সমীপ মুপগম্ম ঠিতা. তেন কিমত্থাযাগতাতি ৱুত্তে ৰাজা তৱ গেহে ভতিযা কম্মং কৰিস্সামীতি ৱত্ৱা তেনানুঞ্ঞাতো তীণি ৱস্সানি কম্ম মকাসি, ততো একদিৱসং সেট্ঠি তে দিস্ৱা পক্কোসিত্ৱা অতীৱ তুম্হে সুখুমালতৰা. তথাপি ইমস্মিং গেহে কম্মকৰণেন চিৰং ৱসিত্থ, এত্তকং কালং কিস্মিঞ্চি কম্মেপি কুসীতত্তং ন পঞ্ঞাযতি. পগেৱ অনাচাৰম্পি, যাগুভত্তং ঠপেত্ৱা অঞ্ঞং উপকাৰম্পি মম সন্তিকা নত্থি, কেনত্থেন কম্মং কৰোথাতি পুচ্ছি. ৰাজা তস্স ৱচনং সুত্ৱা ইমস্মিং জনপদে সালিনো মনাপভাৱো বহুসো সূযতি. তস্মা সালীনমত্থায ইধা গতম্হাতি আহ, তং সুত্ৱা তেসং তুট্ঠো সেট্ঠি সালীনং সকটসহস্সং অদাসি, ৰাজা সালিংলভিত্ৱা সেট্ঠিনো এৱমাহ, ভো ইমং অম্হাকং নগৰং পাপেথাতি, তং সুত্ৱা সেট্ঠি সাধূতি ৱত্ৱা সালিপৰিপুণ্ণসকটসহস্সং ৰঞ্ঞো নগৰং পাপেসি, ৰাজা নগৰং গন্ত্ৱা সেট্ঠিস্স নানাৱণ্ণৱত্থহিৰঞ্ঞসুৱণ্ণাদীহি সকটে পূৰেত্ৱা পটিপেসেত্ৱা মেত্তিং থিৰং কত্ৱা আভতৱীহযো ৰাজগেহে সন্নিচযমকাসি, অথ ৰাজা কতিপাহচ্চযেন মুসলং পগ্গয্হ সহত্থেনেৱ ৱীহিং কোট্টেতি, কোট্টিতকোট্টিতং কণিট্ঠিকা পপ্ফোটেতি. এৱং উভোপি তণ্ডুলানং মহন্তং ৰাসিং কত্ৱা দাৰূদকাদযো আহৰিত্ৱা অম্বিলভত্তং পচিত্ৱা ৰাজগেহে পঞ্চসতআসনানি পঞ্ঞাপেত্ৱা কালং উগ্ঘোসেসুং, আগচ্ছন্তু অয্যা অনুকম্পং উপাদায মম গেহে ভুঞ্জন্তূতি. তং সুত্ৱা পঞ্চসতা ভিক্খূ আকাসেন আগমিংসু, ৰাজা তে যাৱদত্থং পৰিৱিসি, ততো তেসং অন্তৰে পিযংগুদীপৱাসী একো মহাসিৱত্থেৰো নাম ভত্তং গহেত্ৱা এতে মং পস্সন্তূতি অধিট্ঠহিত্ৱা আকাসেন পিযংগুদীপং গন্ত্ৱা ভত্তং পঞ্চসতানং ভিক্খূনং দত্ৱা পৰিভুঞ্চি. তং তস্সানুভাৱেন সব্বেসং যাৱদত্থং অহোসি. এৱং অপ্পকেনাপি দেয্যধম্মেন সপ্পুৰিসা দাযকানং মনং পসাদেত্ৱা পতিট্ঠং কৰোন্তীতি. ৱুত্তঞ্হি.

১. অপ্পকেনপি মেধাৱী, দাযকানং মনং পতি;

সদ্ধং ৱড্ঢেন্তি চন্দোৱ, ৰংসিনা খীৰসাগৰং.

২. অট্ঠানে ন নিযোজেন্তা, কৰোন্তা নেৱ সন্নিধিং;

পৰিভোগ মকত্ৱান, নেৱ নাসেন্তি পচ্চযং.

৩. ন পাপেন্তাচ থেয্যস্স, ন কৰোন্তা তথেৱিণং;

ৱিভজন্তি সুসীলেসু, সযং ভুত্ৱান সীলৱাতি.

অথ ৰাজা কণিট্ঠিকায সদ্ধিং থত্থেৱ ঠিতো পিযংগুদীপে পৰিভুঞ্জন্তে পঞ্চসতভিক্খূ দিস্ৱা হট্ঠো উদগ্গো অহোসি. অথ তে অপৰভাগে অত্তনা কতং দানৱৰং অনুস্সৰন্তা ন চিৰেনেৱ উভোপি সোতাপন্না অহেসুংতি.

৪. ন গণেন্তাত্তনো দুক্খং, ৱিহায মহতিং সিৰিং;

আযতিংভৱমিচ্ছন্তা, সুজনেৱং সুভে ৰতা.

৫. আযাসেন কতং পুঞ্ঞং, মহন্তফলদাযকং;

ইতি মন্ত্ৱান মেধাৱী, সহত্থেনেৱ তং কৰেতি.

মহাসেনৰঞ্ঞো ৱত্থুং পথমং.