২৯. দেৱপুত্তস্স ৱত্থুম্হি অযমানুপুব্বীকথা

ইতো পুব্বে নাৰদস্স কিৰ সম্মাসম্বুদ্ধস্স কালে অযং দীপো অঞ্ঞতৰেন নামেন পাকটো অহোসি, সো পনেকস্মিং কালে দুব্ভিক্খো অহোসি দুস্সস্সো, মহাছাতকভযং সত্তে পীড়েতি. তস্মিং সমযে নাৰদস্স ভগৱতো একো সাসনিকো সাৱকো অঞ্ঞতৰস্মিং গামে পিণ্ডায চৰিত্ৱা যথা ধোতপত্তোৱ নিক্খমি. অথঞ্ঞতৰস্মিং গেহে মনুস্সা একং তণ্ডুলনাড়িংপোটলিকায বন্ধিত্ৱা উদকে পক্খিপিত্ৱা পচিত্ৱা উদকং গহেত্ৱা পিৱন্তো জীৱন্তি, তদা থেৰং দিস্ৱা ৱন্দিত্ৱা পত্তং গহেত্ৱা তেন তণ্ডুলেন ভত্তং পচিত্ৱা পত্তে পক্খিপিত্ৱা থেৰস্স অদংসু. অথ তেসং সদ্ধাবলেন সা উক্খলি ভত্তেন পৰিপুণ্ণা অহোসি, তে তং অব্ভুতং দিস্ৱা অয্যস্স দিন্নদানে ৱিপাকো অজ্জেৱ নো দিট্ঠোতি সোমনস্সজাতা মহাজনং সন্নিপাতেত্ৱা তে ভত্তং ভোজেত্ৱা পচ্ছা সযং ভুঞ্জিংসু. ভত্তস্স গহিতগহিতট্ঠানং পূৰতেৱ. ততো পট্ঠায তে সম্পত্তমহাজনস্স দানং দদন্তা আযুপৰিযোসানে দেৱলোকে নিব্বত্তিংসু, অথ সো থেৰো ভত্তং আদায গন্ত্ৱা অঞ্ঞতৰস্মিং ৰুক্খমূলে নিসীদিত্ৱা ভুঞ্জিতুমাৰতি. তস্মিং কিৰ ৰুক্খে নিব্বত্তো একো দেৱপুত্তো আহাৰেন কিলন্তো ভুঞ্জমানং থেৰং দিস্ৱা অত্তভাৱং ৱিজহিত্ৱা মহল্লকৱেসেন তস্স সমীপে অট্ঠাসি. থেৰো অনাৱজ্জিত্ৱাৱ ভুঞ্জতি. দেৱপুত্তো চৰিমালোপং ঠপেত্ৱা ভুত্তকালে উক্কাসিত্ৱা অত্তানং ঠিতভাৱং জানাপেসি. থেৰো তং দিস্ৱা ৱিপ্পটিসাৰি হুত্ৱা চৰিমং ভত্থপিণ্ডং তস্স হত্থে ঠপেসি, ততো সো ভত্তপিণ্ডং গহেত্ৱা ঠিতো চিন্তেসি. ইতো কিৰ মযা পুব্বে সমণব্ৰাহ্মণানং ৱা কপণদ্ধিকানং ৱা অন্তমসো কাকসুনখা দীনম্পি আহাৰং অদিন্নপুব্বং ভৱিস্সতি, তেনৱাহং দেৱো হুত্ৱাপি ভত্তং ন লভামি. হন্দাহং ইমং ভত্তপিণ্ডং থেৰস্সেৱ দস্সামি, তং মে ভৱিস্সতি দীঘৰত্তং হিতায সুখায চাতি. এৱঞ্চ পন চিন্তেত্ৱা ভত্তপিণ্ডে আসং পহায থেৰং উপসঙ্কম্ম সামি দাসস্স ৱো অলং ইধ লোকেন সঙ্গহং. পৰলোকেন মে সঙ্গহং কৰোথাতি ৱত্ৱা তস্স পত্তে ওকিৰি. অথস্স ভত্থপিণ্ডং [ভত্থপিণ্ডং ইতিসব্বত্থ] পত্তে পতিতমত্তেযেৱ তিগাৱুতট্ঠানে দিব্বমযানি ভত্তভাজনানিপঞ্ঞাযিংসু. দেৱপুত্তো থেৰং পঞ্চপতিট্ঠিতেন ৱন্দিত্ৱা ততো দিব্বভোজনং গহেত্ৱা পথমং দানং দত্ৱা পচ্ছা সযং ভুঞ্চি. ততো দেপুত্তো দুতিযদিৱসতো পট্ঠায থেৰস্স চ সম্পত্তমহাজনস্স চ মহাদানং দেন্তো আযুপৰিযোসানে ০ দেৱলোকে নিব্বত্তিত্ৱা ছসু কামসগ্গেসু অপৰাপৰং দিব্বসম্পত্তি মনুভৱমানো পদুমুত্তৰস্স ভগৱতো কালে ততো চুতো বাৰাণসিযং অনেকৱিভৱস্স মিচ্ছাদিট্ঠিকস্স কুটুম্বিকস্স গেহে নিব্বত্তি. দেৱোতিস্স নামং অকংসু. অপৰভাগে ৱিঞ্ঞুতং পত্তস্স তস্স মাতাপিতৰো কালমকংসু. সোৱণ্ণমণিমুত্তাদিপূৰিতকোট্ঠাগাৰাদযো ওলোকেত্ৱা মম মাতাপিতৰো মিচ্ছাদিট্ঠিকত্তা ইতো দানাদিকিঞ্চিকম্মং অকৰিত্ৱা পৰলোকং গচ্ছন্তা কাকণিকমত্তম্পি অগহেত্ৱা গতা, অহং পন তং গহেত্ৱাৱ গমিস্সামীতি সন্নিট্ঠানং কত্ৱা ভেৰিং চৰাপেত্ৱা কপণদ্ধিকৱনিব্বকে সন্নিপাতেত্ৱা সত্তাহব্ভন্তৰে সব্বং সাপতেয্যং দানমুখেন দত্ৱা অৰঞ্ঞং পৱিসিত্ৱা ইসিপ্পব্বজ্জং পব্বজিত্ৱা কসিণপৰিকম্মং কত্ৱা পঞ্চ ভিঞ্ঞা অট্ঠ সমাপত্তিযো নিব্বত্তেত্ৱা আকাসচাৰী অহোসি. অথ তস্মিংসমযে পদুমুত্তৰো নাম ভগৱা হংসৱতীনগৰে পটিৱসন্তো দেৱব্ৰহ্মাদিপৰিৱুতো চতুসচ্চপটিসংযুত্তং ধম্মং দেসেন্তো নিসিন্নো হোতি, তদা সো তাপসো আকাসেন গচ্ছন্তো মহাজনসমাগমঞ্চ ভগৱতো সৰীৰতো নিক্খন্তছব্বণ্ণৰংসিযো চ দিস্ৱা কিমেতংতি ৱিম্হিতো আকাসা ওতৰিত্ৱা মহতিযা বুদ্ধলীড়ায নিসীদিত্ৱা ধম্মং দেসেন্তং ভগৱন্তং দিস্ৱা পসন্নমানসো পৰিসন্তৰে নিসিন্নো ধম্মং সুত্ৱা ভগৱন্তং ৱন্দিত্ৱা অত্তনো অস্সমমেৱ অগমাসি. অথ সো তত্থ যাৱতাযুকং ঠত্ৱা আযুপৰিযোসানে তাৱতিংসভৱনে নিব্বত্তো তিংসকপ্পে দিব্বসম্পত্তিমনুভৱন্তো ছসু কামসগ্গেসু অপৰাপৰিযৱসেন সংসৰি. একপঞ্ঞাসঅত্তভাৱে সক্কো দেৱৰাজা অহোসি, এককৱীসতিঅত্তভাৱে চক্কৱত্তি হুত্ৱা মনুস্সসম্পত্তি মনুভৱিত্ৱা ইমস্মিংবুদ্ধুপ্পাদে ভগৱতি পৰিনিব্বুতে সাৱত্থিযং অঞ্ঞতৰস্মিং কুলগেহে নিব্বত্তিত্ৱা সত্তৱস্সিকো একং ভিক্খুং ধম্মং দেসেন্তং অদ্দস. দিস্ৱা তং উপসঙ্কমিত্ৱা ধম্মং সুত্ৱা অনিচ্চসঞ্ঞং পটিলভিত্ৱা তত্থ নিসিন্নোৱ অৰহত্তং পাপুণি, ততো সো পত্তপটিসম্ভিদো অত্তনা কতপুঞ্ঞকম্মং ওলোকেন্তো তং পুব্বচৰিযং ভিক্খূনং মজ্ঝে পকাসেন্তো আহ. তস্মা.

১. নাৰদো কিৰ সম্বুদ্ধো, পুব্বে আসি নৰুত্তমো;

লোকং দুক্খা পমোচেন্তো, দদন্তো অমতং পদং.

২. তস্মিং তু সমযে তস্স, সাৱকো ছিন্নবন্ধনো;

ভিক্খিত্ৱা দীপকে লদ্ধ, মাহাৰং পৰিভুঞ্জিতুং.

৩. ৰুক্খমূল মুপা গঞ্ছি, তত্থাসিং ৰুক্খদেৱতা;

বুভুক্খিতা উদিক্খন্তী, অট্ঠাসিং তস্স সন্তিকে.

৪. অদাসি মে ভত্তপিণ্ডং, কৰুণাপূৰিতন্তৰো;

গহেত্ৱান ঠিতো পিণ্ডং, সহমানো খুদং তদা.

৫. অদিন্নত্তা মযা পুব্বে, কিঞ্চি দানং সুপেসলে;

জিঘচ্ছাপীড়িতো হোমি, জাতোপি দেৱযোনিযং.

৬. অজ্জ খেত্তং সুলদ্ধংমে, দেয্যধম্মোপি ৱিজ্জতি;

বীজমেত্থ চ ৰোপেমি, ভৱতো পৰিমুত্তিযা.

৭. ইতি চিন্তিয ৱন্দিত্ৱা, দাসস্স সামি ৱো অলং;

সঙ্গহং ইধ লোকস্মিং, কৰোথ পাৰলোকিকং.

৮. ইতি ৱত্ৱা অদাসাহং, ভুঞ্চি সোপি দযাপৰো;

তেনাহং পুঞ্ঞকম্মেন, সুধন্নমলভিং খণে.

৯. ততো চুতো ছদেৱেসু, ৱিন্দন্তো মহতিংসিৰিং;

চিৰকালং ৱসিং তত্থ, দেৱিদ্ধীহি সমঙ্গিতা.

১০. সতসহস্সে ইতো কপ্পে, পদুমুত্তৰনামকো;

উপ্পজ্জি লোকনাযকো, ধম্মৰাজা তথাগতো.

১১. মহিদ্ধিকো তদা আসিং, তাপসো কাননে ৱনে;

সম্পত্তপঞ্চা ভিঞ্ঞাণো, আকাসেন চৰামহং.

১২. তদা কাসেন গচ্ছন্তো, ৰম্মে হংসৱতীপুৰে;

বুদ্ধৰংসিপৰিক্খিত্তং, কেতুমালাৱিলাসিতং.

১৩. দেৱসঙ্ঘপৰিব্বূড়্হং, দেসেন্তং অদ্দসং জিনং;

সো তং দিস্ৱান নভসা, ঠিতোহং পৰিসন্তৰে.

১৪. ধম্মং সুত্ৱা উদগ্গোহং, কালং কত্ৱান সত্থুনো;

ততো চুতো পপন্নোস্মি, তাৱতিংসে মনোৰমে.

১৫. তিংসকপ্পসহস্সানি, চৰন্তো দেৱমানুসে;

দুগ্গতিং নাভিজানামি, লভামি ৱিপুলং সুখং.

১৬. একপঞ্ঞাসতিক্খত্তুং, দেৱৰজ্জমকাৰযিং;

অথেকৱীসতিক্খত্তুং, চক্কৱত্তী অহোসহং.

১৭. পদেসৰজ্জং কাসাহং, বহুক্খত্তুং তহিং তহিং;

ইমস্মিং ভদ্দকে কপ্পে, নিব্বুতেতু [নিব্বুতেসু ইতিসব্বত্থ] তথাগতে.

১৮. চোদিতো পুঞ্ঞকম্মেন, সাৱত্থিপুৰমুত্তমে;

উপ্পজ্জিত্ৱা কুলে সেট্ঠে, জাতিযা সত্তৱস্সিকো.

১৯. সুত্ৱা ধম্মং কথেন্তস্স, ভিক্খুস্সঞ্ঞতৰস্সহং;

ভৱস্সন্তং কৰিত্ৱান, অৰহত্তমপাপুণিং.

২০. সুদিন্নং মে তদা দানং, সুস্সুতং ধম্মমুত্তমং;

দুক্খস্সন্তং অকাসাহং, তস্স কম্মস্স ৱাহসাতি.

এৱঞ্চ পন ৱত্ৱা বহূ জনে কুসলকম্মে নিযোজেসীতি.

২১. দানেনপেৱং চৰিমায পিণ্ডিযা,

সৱণায ধম্মস্স মুহুত্তকেন;

লভন্তি সত্তা তিৱিধম্পি সম্পদং,

ফলং ৱদে কো বহুদাযকস্স ভো.

দেৱপুত্তস্স ৱত্থুং নৱমং.