২৮. কপণস্স ৱত্থুম্হি অযমানুপুব্বীকথা

অম্হাকং ভগৱতি পৰিনিব্বুতে বাৰাণসীনগৰৱাসী একো দুগ্গতপুৰিসো পৰগেহে ভতিংকত্ৱা জীৱিকং কপ্পেতি, তস্মিং সমযে নগৰৱাসিনো যেভুয্যেন তস্মিং তস্মিং ঠানে মণ্ডপাদযো কাৰাপেত্ৱা মহাদানং দেন্তি, তং দিস্ৱা দুগ্গতো এৱং চিন্তেসি, অহং পুব্বে অকতপুঞ্ঞত্তা পৰগেহে ভতিং কত্ৱা কিচ্ছেন কসিৰেন জীৱামি. নিৱাসনপাৰুপনম্পি ৱাসট্ঠানমত্তম্মি দুক্খতো লভামি. ইদানি বুদ্ধুপ্পাদো ৱত্ততি ভিক্খুসঙ্ঘোপি.

সব্বে ইমে দানং দত্ৱা সগ্গমগ্গং সোধেন্তি. মযাপি দানং দাতুং ৱট্টতি. তম্মে দীঘৰত্তং হিতায সুখায ভৱিস্সতি. অপি চ ময্হং তণ্ডুলনালিমত্তম্পি নত্থি, অকতৱীৰিযেন তং মত্থকং পাপেতুং ন সক্কা, এতদত্থাযাহং উয্যোগং কত্ৱা দানং দস্সামীতি চিন্তেত্ৱা ততো পট্ঠায ভতিং পৰিযেসমানো গন্ত্ৱা তত্থ তত্থ ভতিং কত্ৱা লদ্ধনিৱাপে চ ভিক্খাচৰিযায লদ্ধতিলতণ্ডুলাদযো চ একত্থ সংহৰিত্ৱা মনুস্সে সমাদাপেত্ৱা তস্মিং মণ্ডপং কাৰাপেত্ৱা ৱনকুসমাদীহি তং অলঙ্কৰিত্ৱা ভিক্খূ নিমন্তেত্ৱা মণ্ডপে নিসীদাপেত্ৱা সব্বেসং পাযসং [পাযাসং ইতিসব্বত্থ] পটিযাদেত্ৱা ভোজেসি. অথ সো মৰণকালে অত্তনা কতং তং দানৱৰং অনুস্সৰি. সো তেন কুসলকম্মেন সুত্তপ্পবুদ্ধো ৱিয দেৱলোকে নিব্বত্তি. তস্মিং তেন কতপুঞ্ঞানুৰূপং মহন্তং কনকৱিমানং নিব্বত্তি. সমন্তা তিগাৱুতট্ঠানে দেৱতা নানা ৱিধানি তুৰিযানি গহেত্ৱা উপহাৰং কৰোন্তি. নিচ্চং দেৱচ্ছৰাসহস্সানি [দেৱচ্ছৰাসহস্সং ইতিসব্বত্থ] তং পৰিৱাৰেত্ৱা তিট্ঠন্তি. এৱং সো মহন্তং সম্পত্তিং অনুভৱতি. অথেকদিৱসং সুৱণ্ণসেলৱিহাৰৱাসী মহাসঙ্ঘৰক্খিতত্থেৰো পত্তপটিসম্ভিদো দেৱচাৰিকং চৰমানো তং দেৱপুত্তং অনুপমায দেৱসম্পত্তিযা ৱিৰোচমানং দিস্ৱা উপসঙ্কম্ম ঠিতো তেন কতকম্মং পুচ্ছি. সোপিস্স যথাভূতং ব্যাকাসি, তেনত্থ.

১. সব্বসোৱণ্ণযো আসি, পাসাদো ৰতনামযো;

সোণ্ণসিঙ্গসতাকিণ্ণো, দুদ্দিক্খো চ পভস্সৰো.

২. কূটাগাৰ সতাকিণ্ণো, সোণ্ণমালাসমাকুলো;

মুত্তাকলাপালম্বন্তি, তত্থ তত্থ মনোৰমা.

৩. নেকগব্ভসতাকিণ্ণো, সযনাসনমণ্ডিতো;

ৱিভত্তো ভব্বভাগেহি, পুঞ্ঞৱড্ঢকিনা কতো.

৪. নচ্চন্তি পমদা তত্থ, ভেৰিমণ্ডলমজ্ঝগা;

গাযন্তি কাচি কীড়ন্তি, ৱাদেন্তি কাচি তন্তিযো.

৫. ততো তিগাৱুতে ঠানে, পাসাদস্স সমন্ততো;

সহচ্ছৰা দেৱপুত্তা, গহেত্ৱা আততাদযো.

৬. মোদন্তি পৰিৱাৰেত্ৱা, নচ্চগীতাদিনা সদা;

উল্লঙ্ঘন্তিচ সেলেন্তি, সিলাঘন্তি সমন্ততো.

৭. এৱং মহিদ্ধিকো দানি, তুৱং ৱন্দোৱ ভাসতি;

পুচ্ছামি তং দেৱপুত্ত, কিং কম্মমকৰী পুৰা.

দেৱপুত্তো আহ.

৮. অহোসিং দুগ্গতো পুব্বে, বাৰাণসীপুৰুত্তমে;

দানং দেন্তি নৰা তত্থ, নিমন্তেত্ৱান ভিক্খৱো.

৯. জীৱন্তো ভতিযা সোহং, দানং দেন্তে মহাজনে;

তুট্ঠহট্ঠে পমুদিতে, এৱং চিন্তেসহং তদা.

১০. সম্পন্নৱত্থালঙ্কাৰা, দানং দেন্তি ইমে জনা;

পৰত্থপি পহট্ঠাৱ, সম্পত্তিমনুভোন্তি তে.

১১. বুদ্ধুপ্পাদো অযং দানি, ধম্মো লোকে পৱত্ততি;

সুসীলা দানি ৱত্তন্তি, দক্খিণেয্যা জিনোৰসা.

১২. অনাৱট্ঠিতো [অৱট্ঠিতোচ; অন্ধট্ঠিতোচ ইতিপিকত্তচি] সংসাৰো, অপাযা খলু পূৰিতা;

কল্যাণৱিমুখা সত্তা, কামং গচ্ছন্তি দুগ্গতিং.

১৩. ইদানি দুক্খিতো হুত্ৱা, জীৱামি কসিৰেনহং;

দলিদ্দো কপণো দীনো, অপ্পভোগো অনালযো.

১৪. ইদানি বীজং ৰোপেমি, সুখেত্তে সাধুসম্মতে;

অপ্পেৱনাম তেনাহং, পৰত্থ সুখিতো সিযা.

১৫. ইতি চিন্তিয ভিক্খিত্ৱা, ভতিং কত্ৱান নেকধা;

মণ্ডপং তত্থ কাৰেত্ৱা, নিমন্তেত্ৱান ভিক্খৱো.

১৬. আযাসেন অদাসাহং, পাযসং অমতায সো;

তেন কম্মৱিপাকেন, দেৱলোকে মনোৰমে.

১৭. জাতোম্হি দিব্বকামেহি, মোদমানো অনেকধা;

দীঘাযুকো ৱণ্ণৱন্তো, তেজস্সীচ অহোসহন্তি.

এৱং দেৱপুত্তো অত্তনা কতপুঞ্ঞকম্মং ৱিত্তাৰেন কথেসি, থেৰোপি মনুস্সলোকং আগন্ত্ৱা মনুস্সানং অত্তনা পচ্চক্খতো দিট্ঠদিব্বসম্পত্তিং পকাসেসি. তং সুত্ৱা মহাজনো কুসলকম্মং কত্ৱা যেভুয্যেন সগ্গে নিব্বত্তোতি.

১৮. অনালযো দুগ্গতদীনকোপি,

দানং দদন্তো ধিগতো ৱিসেসং;

সগ্গা পৱগ্গং যদি পত্থযৱ্হো,

হন্ত্ৱান মচ্ছেৰমলং দদাথাতি.

কপণস্স ৱত্থুং অট্ঠমং.