২৫. কৱীৰপট্টন ৱত্থুম্হি অযমানুপুব্বীকথা

জম্বুদীপে কিৰ চোড়ৰট্ঠে কাৱীৰপট্টনং নাম অহোসি. তত্থ মাহিস্সৰিকা বহূ মিচ্ছাদিট্ঠিকা ৱসন্তি. তত্থেকস্মিং দেৱালযে চিত্তকম্মং কৰোন্তা একস্মিং ফলকে ইস্সৰস্স ওনমিত্ৱা ৱন্দনাকাৰং ভগৱতো ৰূপং অকংসু. তস্মিং সমযে তত্থ বহূ উপাসকা তং দেৱকুলং গন্ত্ৱা তত্থ তত্থ চিত্তকম্মানি ওলোকেন্তা তস্মিং ফলকে তং চিত্তকম্মং অদ্দসংসু. দিস্ৱান তে অহো অম্হেহি অপস্সিতব্বং পস্সিতং. সদেৱকে লোকে সমাৰকে সব্ৰহ্মকে সস্সমণব্ৰাহ্মণিযাসদেৱমনুস্সায পজায চ অপৰিমাণেসু চক্কৱাড়েসু ভগৱতো উত্তৰিতৰং ঠপেত্ৱা সমসমোপি নত্থি. সকলেহি সত্তনিকাযেহি ৱন্দনীযো পূজনীযো ভগৱা. অননুৰূপং তস্স এতেহি কতংতি ৰোদন্তা পৰিদেৱন্তা ৰাজদ্ৱাৰং গন্ত্ৱা উগ্ঘোসেসুং, তং সুত্ৱা ৰাজা তে পক্কোসাপেত্ৱা কস্মা তুম্হে উগ্ঘোসেথাতি পুচ্ছি, তে এৱ মাহংসু. দেৱ অম্হাকং ভগৱা দেৱাতিদেৱো সক্কাতিসক্কো ব্ৰহ্মাতিব্ৰহ্মা মেৰুৱ অচলো সাগৰো গম্ভীৰো আকাসোৱ অনন্তো পথৱীৱ পত্থটোতিআদীহি ভগৱতো গুণং ৱণ্ণেসুং. তেন ৱুত্তং অপদানে.

১. বত্তিংসলক্খণধৰো, সুনক্খত্তোৱ চন্দিমা;

অনুব্যঞ্জনসম্পন্নো, সালৰাজাৱ ফুল্লিতো.

২. ৰংসিজালপৰিক্খিত্তো, দিত্তোৱ কনকাচলো;

ব্যামপ্পভাপৰিৱুতো, সতৰংসি দিৱাকৰো.

৩. সোণ্ণা ননো জিনৱৰো, সমণীৱ সিলুচ্চযো;

কৰুণাপুণ্ণহদযো, ৱিৱট্টো ৱিয সাগৰো.

৪. লোকৱিস্সুতকিত্তীৱ, সিনেৰুৱ নগুত্তমো;

যসসা ৱিততো ধীৰো, আকাসসদিসো মুনি.

৫. অসঙ্গচিত্তো সব্বত্থ, অনিলো ৱিয নাযকো;

পতিট্ঠা সব্বভূতানং, মহীৱ মুনিসুত্তমো.

৬. অনূপলিত্তো লোকেন, তোযেন পদুমং যথা;

কুৱাদগচ্ছদহনো, অগ্গিক্খন্ধোৱ সোভতি.

৭. অগদো ৱিয সব্বত্থ, কিলেসৱিসনাসকো;

গন্ধমাদনসেলোৱ, গুণগন্ধৱিভূসিতো.

৮. গুণানং আকৰো ধীৰো, ৰতনানংৱ সাগৰো;

সিন্ধূৱ ৱনৰাজীনং, কিলেসমলহাৰকো.

৯. ৱিজযীৱ মহাযোধো, মাৰসেনপ্পমদ্দনো;

চক্কৱত্তীৱ সো ৰাজা, বোজ্ঝঙ্গৰতনিস্সৰো.

১০. মহাভিসক্কসঙ্কাসো, দোসব্যাধিতিকিচ্ছকো;

সল্লকত্তো যথা ৱেজ্জা, দিট্ঠিগণ্ডৱিফালকো.

১১. সত্থা নো ভগৱা দেৱ, মহাব্ৰহ্মেহি ৱন্দিতো;

দেৱিন্দসুৰসিদ্ধেহি, ৱন্দনীযো সদা দৰা.

১২. সব্বেসু চক্কৱাড়েসু, যে অগ্গা যে চ পূজিতা;

তেসমগ্গো মহাৰাজ, ভগৱা নো পতাপৱাতি.

অযুত্তং দেৱ দেৱকুলেহি কতংতি আহংসু. তং সুত্ৱা ৰাজা ভো সব্বেপি মনুস্সা অত্তনো অত্তনো দেৱতানং মহন্তভাৱং কথেন্তি. তুম্হাকং পন সত্থুনো মহন্তভাৱং কথং অম্হাকং জানাপেথাতি, উপাসকা ন গৰু ত্ৱং মহাৰাজ ফলকং আহৰাপেত্ৱা সুদ্ধৱত্থেন ৱেঠেত্ৱা তং অত্তনো মুদ্দিকায লঞ্ছিত্ৱা সুৰক্খিতসুগোপিতে একস্মিং দেৱকুলে ঠপেত্ৱা সত্তাহচ্চযেন আহৰাপেত্ৱা তং ওলোকেথ, তদা নো সত্থুনো মহন্তানুভাৱং জানাথাতি আহংসু, অথ ৰাজা তেসং ৱুত্তনিযামেনেৱ কাৰাপেত্ৱা অন্তোদেৱকুলে ঠপেত্ৱা সব্বদ্ৱাৰানি পিদহিত্ৱা লঞ্ছেত্ৱা ৰক্খেয্যাথাতি নিযোজেসি. ততো তে উপাসকা সব্বে সন্নিপতিত্ৱা সত্তাহং দানং দেন্তা সীলং ৰক্খন্তা উপোসথকম্মং কৰোন্তা সব্বসত্তেসু মেত্তিং ভাৱেন্তা সব্বসত্তানং অত্তনা কতপুঞ্ঞেসু পত্তিং দেন্তা তিণ্ণং ৰতনানং পূজং কৰোন্তা এৱং উগ্ঘোসেসুং. অম্হাকং কতকুসলনিস্সন্দেন লোকে মহিদ্ধিকা মহানুভাৱা সব্বে দেৱা চ লোকং পালেন্তা চত্তাৰো মহাৰাজানো চ অম্হাকং সত্থুনো উপট্ঠানায [উপট্ঠায ইতিসব্বত্থ] ঠিতভাৱং দস্সেন্তূতি সচ্চকিৰিযং অকংসু. অথ তেসং পুঞ্ঞানুভাৱেন তস্মিং খণে সক্কস্স দেৱৰঞ্ঞো পণ্ডুকম্বলসিলাসনং উণ্হাকাৰং দস্সেসি. ততো সো মনুস্সলোকং ওলোকেন্তো মিচ্ছাদিট্ঠীহি কতং তং ৱিপ্পকাৰং দিস্ৱা সংৱিগ্গো আগন্ত্ৱা ইস্সৰং ভগৱতো পাদে ৱন্দিত্ৱা সযিতাকাৰং কত্ৱা তং পৱত্তিং উপাসকানং কথেত্ৱা সকট্ঠানমেৱ অগমাসি. ততো সত্তমে দিৱসেপাতোৱ তে সব্বেপি ৰঞ্ঞো সন্তিকং গন্ত্ৱা ৱন্দিত্ৱা এৱমাহংসু. দেৱ ইস্সৰো অম্হাকং ভগৱতো পাদে সিৰসা ৱন্দিত্ৱা নিপন্নোতি. অথ ৰাজা তেসং কথং সুত্ৱা নগৰে ভেৰিং চৰাপেত্ৱা মহাজনে সন্নিপাতেত্ৱা তেহি পৰিৱুতো দেৱকুলং গন্ত্ৱা লঞ্ছং ভিন্দাপেত্ৱা দ্ৱাৰং ৱিৱৰিত্ৱা ফলকং আহৰাপেত্ৱা ৱেঠিতসাটকে মোচাপেসি. অথ ৰাজা চ মহাজনো চ তং মহন্তং পাটিহাৰিযং দিস্ৱা মিচ্ছাদিট্ঠিং পহায সব্বে সত্থুনো সৰণ মগমংসু. অথ ৰাজা তং দেৱকুলং ভিন্দাপেত্ৱা মহন্তং ৰমণীযং ৱিহাৰং কাৰাপেত্ৱা যাৱজীৱং পুঞ্ঞকম্মং কত্ৱা দেৱলোকে নিব্বত্তি.

১৩. অনব্ভুতং সত্থু ধৰীযমানে,

কৰোন্তি দিস্ৱা কুসলানি ইদ্ধিং;

যে তং মুনিন্দে পৰিনিব্বুতম্হি,

কৰোন্তি পুঞ্ঞানি মহব্ভূতং যেতি.

কাৱীৰপট্টনৱত্থুং পঞ্চমং.