২৬. চোৰঘাতকৱত্থুম্হি অযমানুপুব্বীকথা

একস্মিং কিৰ সমযে অম্হাকং ভগৱা সাৱত্থিযং উপনিস্সায জেতৱনে ৱিহৰতি ধম্মদেসনায মহাজনস্স সগ্গমোক্খসম্পদং দদমানো. তস্মিংসমযে পঞ্চসতা চোৰা অটৱিতো নগৰং আগন্ত্ৱা ৰত্তিভাগে চোৰকম্মং কত্ৱা তেন পুত্তদাৰে পোসেন্তি. অথেকদিৱসং চোৰা চোৰকম্মত্থায নগৰং পৱিসন্তা নগৰদ্ৱাৰে একং দুক্খিতং জনপদমনুস্সং পস্সিত্ৱা হম্ভো কত্থ ৱসতীতি পুচ্ছিংসু, সো অত্তজনা জনপদৱাসিভাৱং পকাসেসি. অথস্স তে কস্মা ভো ইমিনা দুক্খৱাসেন ৱসিস্সসি, এহি অম্হেহি সদ্ধিং চোৰকম্মং কৰোন্তো ৱত্থালঙ্কাৰসম্পন্নো পুত্তদাৰং পোসেহি. ইমিনা কপণৱাসেন ন ৱসাতি আহংসু. সো পনিমে যুত্তং কথেন্তীতি তেসং ৱচনং সম্পটিচ্ছি. অথ তে এৱং সতি অম্হেহি সদ্ধিং আগচ্ছাহীতি ৱত্ৱা নং গহেত্ৱা অন্তোনগৰং পৱিট্ঠা তত্থ তত্থ ৱিলুম্পন্তা চোৰকম্মং অকংসু. তদা জানপদিকো লদ্ধৱিভৱো ইমমেৱ ৱৰতৰন্তি তেহি সদ্ধিং চোৰকম্মং কৰোন্তো জীৱিকং কপ্পেসি, অথেকদিৱসং ৰাজপুৰিসা কতকম্মে তে সব্বেৱ গহেত্ৱা পচ্ছাবাহং গাড়্হং বন্ধিত্ৱা কোসলৰঞ্ঞো দস্সেসুং, ৰাজা তে দিস্ৱা এৱমাহ, ভণে তুম্হাকং অন্তৰে যো এতেসং মাৰেত্ৱা জীৱিতক্খযং পাপেস্সতি, তস্স জীৱিতদানং দম্মীতি, তং সুত্ৱা তে চোৰা সব্বে অঞ্ঞমঞ্ঞঞাতিসুহদসম্বন্ধভাৱেন তং ন ইচ্ছিংসু. সো পন জনপদৱাসী মনুস্সো অহমেতে সব্বে মাৰেস্সামীতি ৰঞ্ঞো ৱত্ৱা তেনানুঞ্ঞাতো তে সব্বে মাৰেসি. তং দিস্ৱা তুট্ঠো ৰাজা তস্স চোৰঘাতকম্মং অদাসি. সো চোৰে চ ৱজ্ঝপ্পত্তে চ মাৰেন্তো পঞ্চৱীসতিৱস্সানি ৱসন্তো অপৰভাগে মহল্লকো অহোসি. অথ সো মন্দবলত্তা কতিপযপহাৰেনাপি চোৰং মাৰেতুং ন সক্কোতি, ৰাজা তং ঞত্ৱা অঞ্ঞস্স চোৰঘাতকম্মং অদাসি. অথ সো চোৰঘাতকম্মা [চোৰঘাতকম্ম ইতিপিকত্থচি] পৰিহীনো অত্তনো গেহে ৱসতি. তদা অঞ্ঞতৰো মনুস্সো মন্তং পৰিৱত্তেত্ৱা নাসাৱাতেন মনুস্সমাৰণকমন্তং জানাতি. তথাহি হত্থপাদকণ্ণনাসসীসাদীসু যংকিঞ্চি ছেজ্জভেজ্জং কত্তুকামো মন্তং পৰিৱত্তেত্ৱা নাসাৱাতং ৱিস্সজ্জেতি. তং তং ঠানং ছিজ্জতি ভিজ্জতি, এৱং মহানুভাৱো সো মন্তো, অথ সো তং পুৰিসং উপট্ঠহিত্ৱা মন্তং লভিত্ৱা ৰঞ্ঞো সাসনং পেসেসি. অহং ইতো পুব্বে মহল্লকত্তা চোৰানং হত্থপাদাদযো দুক্খেন ছেজ্জ ভেজ্জং কৰোমি, মাৰেতব্বেপি দুক্খেন মাৰেমি. ইদানি পনাহং তথা ন কৰোমি, মম মন্তানুভাৱেন ছেজ্জভেজ্জকম্মং কৰিস্সামীতি. ৰাজা তং সাসনং সুত্ৱা সাধূতি তং পক্কোসাপেত্ৱা ঠানন্তৰং তস্সেৱ পাকতিক মকাসি. সো ততো পট্ঠায তং কম্মং কৰোন্তো পুন পঞ্চৱস্সানি অতিক্কামেসি. সো মহল্লকো খীণাযুকো দুব্বলো মৰণমঞ্চপৰাযণো হুত্ৱা মৰণৱেদনাদুক্খেন মহন্তেন ভযানকেন সদ্দেন ৱিস্সৰং ৱিৰৱন্তো নিমীলিতেন চক্খুনা ভযানকং নৰকগ্গিজালাপজ্জলন্তঅযকূটমুগ্গৰধৰে নিৰযপালে চ পস্সন্তো নিপন্নো হোতি, ততো তস্স পটিৱিস্সকগেহে মনুস্সা তস্স ভযানকসদ্দসৱণেন গেহং ছট্টেত্ৱা পলাযিংসু. তস্মিং কিৰ দিৱসে মহাসাৰিপুত্তত্থেৰো দিব্বচক্খুনা লোকং ওলোকেন্তা তং চোৰঘাতকং তদহেৱ কালংকত্ৱা নিৰযে নিব্বত্তমানং দিস্ৱা মযি তত্থ গতে পনেস মযি পসাদেন সগ্গে নিব্বত্ততীতি ঞত্ৱা অজ্জ মযা তস্সানুগ্গহং কাতুং ৱট্টতীতি পুব্বণ্হসমযং নিৱাসেত্ৱা তস্স ঘৰদ্ৱাৰ মগমাসি. অথ সো থেৰং দিস্ৱা কুদ্ধো কোপেন তটতটাযমানদেহো অজ্জ তং ৱিজ্ঝিত্ৱা ফালেত্ৱা মাৰেস্সামীতি নিপন্নোৱ মন্তং পৰিৱত্তেত্ৱা নাসাৱাতং ৱিস্সজ্জেসি, থেৰো তস্মিং খণে নিৰোধসমাপন্নো নিৰোধা ৱুট্ঠায সুৰিযো ৱিয ৱিৰোচমানো অট্ঠাসি, অথ সো থেৰস্স তযো ৱাৰে তথেৱ কত্ৱা কিঞ্চি কাতুং অসক্কোন্তো অতিৱিয ৱিম্হিতচিত্তো থেৰে চিত্তং পসাদেত্ৱা অত্তনো পটিযত্তং পাযসং থেৰস্স দাপেসি, থেৰো মঙ্গলং ৱড্ঢেত্ৱা ৱিহাৰমেৱ অগমাসি, চোৰঘাতকো থেৰস্স দিন্নদানং অনুস্সৰন্তো তস্মিং খণে কালং কত্ৱা সগ্গে নিব্বত্তি. অহো ৱীতৰাগানং বুদ্ধপুত্তানং আনুভাৱো. এৱং নৰকে নিব্বত্তমানোপিস্স বলেন সগ্গে নিব্বত্তোতি. তথাহি.

১. দানং তাণং মনুস্সানং, দানং দুগ্গতিৱাৰণং;

দানং সগ্গস্স সোপানং, দানং সন্তিকৰং পৰং.

২. ইচ্ছিতিচ্ছিতদানেন, দানং চিন্তামণী ৱিয;

কপ্পৰুক্খোৱ সত্তানং, দানং ভদ্দঘটোৱিয.

৩. সীলৱন্তস্স দানেন, চক্কৱত্তিসিৰিম্পি চ;

লভন্তি সক্কসম্পত্তিং, তথা লোকুত্তৰং সুখং.

৪. পাপকম্মেসু নিৰতো, ঠিতোযং নৰকাযনে [নৰকাৱনে ইতিপিকত্থচি];

সাৰিপুত্তস্স থেৰস্স, পিণ্ডপাতস্স ৱাহসা.

৫. অপাযং পৰিৱজ্জেত্ৱা, নেকদুক্খসমাকুলং;

দেৱসঙ্ঘপৰিব্বূড়্হো, গতো দেৱপুৰং ৱৰং.

৬. তস্মা সুখেত্তে সদ্ধায, দেথ দানানি কামদং;

দানং দেন্তেহি সীলম্পি, পালনীযংতিসুন্দৰন্তি [পালনংচাতিসুন্দৰং ইতিপিকত্থচি].

অথ ভিক্খূ ধম্মসভাযং সন্নিপতিত্ৱা নিসিন্না ভগৱন্তং পুচ্ছিংসু, কিংভন্তে সো পাপো চতূসু অপাযেসু কতৰস্মিং নিব্বত্তোতি. অথ সত্থা অজ্জেস ভিক্খৱে সাৰিপুত্তস্স দিন্নদানানুভাৱেন দেৱলোকে নিব্বত্তো, তস্সেৱ নিস্সন্দেন অনাগতে পচ্চেকবুদ্ধো ভৱিস্সতীতি ব্যাকাসীতি.

৭. ভো সাৰিপুত্তে নিহিতপ্পদানং,

খণেন পাপেতি হি সগ্গমগ্গং;

তস্মা সুখেত্তেসু দদাথ দানং,

কামত্থ চে সগ্গমোক্খং পৰত্থ.

চোৰঘাতকৱত্থুং ছট্ঠমং.