২২. মিচ্ছদিট্ঠিকস্স ৱত্থুম্হি অযমানুপুব্বীকথা

ভগৱতি ধৰমানে ৰাজগহনগৰে কিৰ একো ব্ৰহ্মভত্তিকো মিচ্ছাদিট্ঠিকো পটিৱসতি, তত্থেৱ সম্মাদিট্ঠিকোপি. তেসং উভিন্নম্পি দ্ৱে পুত্তা অহেসুং. তে একতো কীড়ন্তা ৱড্ঢন্তি. অথাপৰভাগে গুড়কীড়ংকীড়ন্তানং সম্মাদিট্ঠিকস্স পুত্তো ‘‘নমো বুদ্ধযা’’তি ৱত্ৱা গুড়্হং খিপন্তো দিৱসে দিৱসে জিনাতি. মিচ্ছাদিট্ঠিকস্স পুত্তো ‘‘নমো ব্ৰহ্মুনো’’তি ৱত্ৱা খিপন্তো পৰাজেতি, ততো মিচ্ছাদিট্ঠিকস্স পুত্তো নিচ্চং জিনন্তং সম্মাদিট্ঠিকং কুমাৰং দিস্ৱা সম্ম ত্ৱং নিচ্চমেৱ জিনাসি, কিং ৱত্ৱা গুড়ং খিপসীতি পুচ্ছি. সোহং সম্ম ‘‘নমো বুদ্ধাযা’’তি ৱত্ৱা খিপামীতি আহ. সোপি ততো পট্ঠায ‘‘নমো বুদ্ধাযা’’তি ৱত্ৱা খিপতি, অথ তে যেভুয্যেন দূতে সমসমাৱ হোন্তি. অপৰভাগে মিচ্ছাদিট্ঠিকস্স পুত্তো পিতৰা সদ্ধিং দাৰূনমত্থায ৱনং গন্ত্ৱা সকটেন দাৰুং গহেত্ৱা আগচ্ছন্তো নগৰদ্ৱাৰসমীপে সকটং ৱিস্সজ্জেত্ৱা তিণে খাদনত্থায গোণে ৱিস্সজ্জেসি, গোণা তিণং খাদন্তো অঞ্ঞেহি গোৰূপেহি সদ্ধিং অন্তোনগৰং পৱিসিংসু. অথস্স পিতা গোণে পৰিযেসন্তো সকটং ওলোকেহীতি পুত্তং নিৱত্তেত্ৱা নগৰং পৱিট্ঠো অহোসি, অথ সাযণ্হে জাতে মনুস্সা নগৰদ্ৱাৰং পিদহিংসু, ততো কুমাৰো বহিনগৰে দাৰুসকটস্স হেট্ঠা সযন্তো নিদ্দূপগতো অহোসি. অথ তস্সা ৰত্তিযা সম্মাদিট্ঠিকো চ মিচ্ছাদিট্ঠিকো চাতি দ্ৱে যক্খা গোচৰং পৰিযেসমানা সকটস্স হেট্ঠা নিপন্নং কুমাৰং অদ্দসংসু, তেসু মিচ্ছাদিট্ঠিকো ইমং খাদামীতি আহ. অথাপৰো মা এৱ মকাসি, ‘‘নমো বুদ্ধাযা’’তি ৱাচকো এসোতি, খাদামেৱেতন্তি ৱত্ৱা ইতৰেন যাৱততিযং ৱাৰিযমানোপি গন্ত্ৱা তস্স পাদে গহেত্ৱা আকড্ঢি. তস্মিং খণে দাৰকো পুব্বপৰিচযেন ‘‘নমো বুদ্ধাযা’’তি আহ তং সুত্ৱা যক্খো ভযপ্পত্তো লোমহট্ঠো হত্থং ৱিস্সজ্জেত্ৱা পটিক্কম্ম অট্ঠাসি. অহো অচ্ছৰিযং বুদ্ধানুভাৱং অব্ভুতং, এৱং অত্তং অনীয্যাতেত্ৱা পৰিচযেন ‘‘নমো বুদ্ধাযা’’তি ৱুত্তস্সপি ভযং ছম্ভিতত্তং উপদ্দৱং ৱা ন হোতি. পগেৱ অত্তং নীয্যাতেত্ৱা যাৱজীৱং বুদ্ধং সৰণং গতস্সাতি. ৱুত্তঞ্হি.

১. যথাপি সিখিনো নাদং, ভুজঙ্গানং ভযাৱহং;

এৱং বুদ্ধোতি ৱচনং, অমনুস্সানং ভযাৱহং.

২. যথা মন্তস্স জপ্পেন, ৱিলযং যাতি কিব্বিসং;

এৱং বুদ্ধোতি ৱচনেন, অপযন্তি [পহাযন্তি ইতিসব্বত্থ] পিসাচকা.

৩. অগ্গিং দিস্ৱা যথা সিত্থং, দূৰতোৱ ৱিলীযতি;

দিস্ৱানেৱং সৰণগতং, পেতা পেন্তিৱ [পেতাপেন্তাৱ ইতিকত্থচি] দূৰতো.

৪. পৱৰং বুদ্ধইচ্চেত, মক্খৰদ্ৱযমব্ভুতং;

সব্বো পদ্দৱনাসায, থিৰপাকাৰ মুগ্গতং.

৫. সত্তৰতনপাসাদং, তমেৱ ৱজিৰং গুহং;

তমেৱ নাৱং দীপং তং, তমেৱ কৱচং সুভং.

৬. তমেৱ সিৰসি ভাসন্তং, কিৰীটং ৰতনামযং;

ললাটে তিলকং ৰম্মং, কপ্পূৰং নযনদ্ৱযে.

৭. তাডঙ্কং কণ্ণযুগলে, সোণ্ণমালা গলে সুভা;

একাৱড়ি তাৰহাৰ, ভাৰা জত্তুসু লঙ্কতা.

৮. অঙ্গদং বাহুমূলস্স, কৰগ্গে ৱলযং তথা;

অঙ্গুলিস্ৱঙ্গুলিযঞ্চ, খগ্গং মঙ্গলসম্মতং.

৯. সোণ্ণা তপত্ত মুণ্হীসং, সবাণংৱ সৰাসনং;

তমেৱ সব্বালঙ্কাৰং, তমেৱ দুৰিতাপহং.

১০. তস্মা হি পণ্ডিতো পোসো,

লোকলোচনসত্থুনো;

সৰণং তস্স গন্তেৱ,

গুণনামং এহিপস্সিকং.

১১. নমোতি ৱচনং পুব্বং, বুদ্ধাযেতি গিৰং তদা;

সুপন্তেন কুমাৰেন, মিচ্ছাদিট্ঠিকসূনুনা.

১২. সুত্ৱা ৱুত্তং পিসা চাপি, মনুস্সকুণপে ৰতা;

ন হিংসন্তি অহো বুদ্ধ, গুণসাৰমহন্ততাতি.

অথ সম্মাদিট্ঠিকযক্খো মিচ্ছাদিট্ঠিকস্স যক্খস্স এৱমাহ, অযুত্তং ভো তযা কতং. বুদ্ধগুণে পহাৰো দিন্নো, দণ্ডকম্মং তযা কাতব্বংতি, তেন কিংমযা সম্ম কাতব্বন্তি ৱুত্তে বুভুক্খিতস্স আহাৰং দেহীতি আহ. ততো সো সাধূতি ৱত্ৱা যাৱাহং আগচ্ছামি, ত্ৱং তাৱেত্থ ৱচ্ছাহীতি ৱত্ৱা বিম্বিসাৰৰঞ্ঞো কঞ্চনতট্টকে ৱড্ঢিতং ৰসভোজনং আহৰিত্ৱা কুমাৰস্স পিতুৱণ্ণেন দাৰকং ভোজেত্ৱা পুন কুমাৰেন ৱুত্তবুদ্ধৱচনঞ্চ অত্তনা কতৱাযামং চাতি সব্বং তট্টকে লিখিত্ৱা ইদং ৰঞ্ঞোযেৱ পঞ্ঞাযতূতি অধিট্ঠায অগমংসু, অথ পভাতায ৰত্তিযা ৰঞ্ঞো ভোজনকালে ৰাজপুৰিসা তত্থ তট্টকং অদিস্ৱা নগৰং উপপৰিক্খন্তা সকটে দাৰকঞ্চ তট্টকঞ্চ দিস্ৱা তট্টকেন সদ্ধিং তং গহেত্ৱা ৰঞ্ঞো দস্সেসুং. ৰাজা তট্টকে অক্খৰাদীনি দিস্ৱা ৱাচেত্ৱা তস্স গুণে পসন্নো মহন্তেন যসেন সদ্ধিং সেট্ঠিট্ঠানমদাসি.

১৩. জিনস্স নামং সুপিনেন পেৱং,

ন হোতি ভীতিং লপনেন যস্মা;

তস্মা মুনিন্দং সততং সৰাথ,

গুণে সৰন্তা সৰণঞ্চ যাথাতি.

মিচ্ছাদিট্ঠিকস্স ৱত্থুং দুতিযং.