১১. নন্দিযৰাজস্স ৱত্থুম্হি অযমানুপুব্বীকথা

ইতো কিৰ কপ্পসতসহস্সমত্থকে পদুমুত্তৰো নাম সত্থা লোকে উদপাদি সদেৱকং লোকং সংসাৰকন্তাৰা উত্তাৰেন্তো. তস্মিং কিৰ সমযে একো কুটুম্বিকো সত্থু ধম্মদেসনং সুত্ৱা পসন্নমানসো বুদ্ধপমুখং ভিক্খুসঙ্ঘং নিমন্তেত্ৱা মহাদানং সজ্জেত্ৱা অত্তনো ভৱনং দেৱভৱনমিৱ অলঙ্কৰিত্ৱা বুদ্ধাৰহং মহাসনং পঞ্ঞাপেত্ৱা গন্ত্ৱা ভগৱন্তং যাচি কালোযং ভন্তে ভগৱতো ভত্তগ্গস্স উপসঙ্কমনাযাতি. অথ ভগৱা ভিক্খুসঙ্ঘপৰিৱুতো মহতা বুদ্ধানুভাৱেন গন্ত্ৱা নিসীদি পঞ্ঞত্তৱৰবুদ্ধাসনে, ততো কুটুম্বিকো হট্ঠো উদগ্গো সপৰিসো ভগৱন্তং পৰিৱিসতি অনেকেহি মধুৰন্নপানাদীহি. তদা তস্স ভগৱতো সাসনে ধুতঙ্গধৰানং অগ্গো ৱসভত্থেৰোনাম মহাসাৱকো সপদানৱত্তেন পিণ্ডায চৰমানো তস্স কুটুম্বিকস্স গেহদ্ৱাৰে অট্ঠাসি, অথ সো থেৰং দিস্ৱা ভন্তে সত্থা অন্তোগেহে নিসিন্নো, তুম্হেপি পৱিসথাতি যাচি, থেৰো অপৱিসিত্ৱাৱ অগমাসি, কুটুম্বিকো ভগৱন্তং উপসঙ্কমিত্ৱা তমত্তং ৱত্ৱা কিং ভন্তে সদেৱকে লোকে ভগৱতাপি উত্তৰিতৰো গুণেন সংৱিজ্জতীতি আহ. অথস্স সত্থা পুত্তোপমং দস্সেত্ৱা থেৰস্স গুণে ৱণ্ণেন্তো এৱমাহ.

১. পালেন্তি নিম্মলং কত্ৱা, পাতিমোক্খাদিসংৱৰং;

সমাদিন্নধুতঙ্গাচ, অপ্পিচ্ছা মুনিসূনৱো.

২. নিচ্চ মন্তকযুদ্ধম্হি, নদ্ধা যোধাৱ দপ্পিতা;

পুঞ্ঞানং ৱত্থুভূতা তে, দেৱমানুসকা দিনং.

৩. ধাৰেমহং ৱণ্ণৱন্তং, সীৱেয্যম্পিচ চীৱৰং;

বুদ্ধপুত্তা মহানাগা ন ধাৰেন্তি তথাৱিধং.

৪. ধাৰেন্তি তে পংসুকূলং, সঙ্ঘাটেত্ৱা পিলোতিকে;

ৱণচ্ছাদনচোলংৱ, ইচ্ছালোভ ৱিৱজ্জিতা.

৫. সাদিযামি সদা হম্ভো, উপাসকনিমন্তনং;

নেৱ সাদেন্তি সম্বুদ্ধ, পুত্তো পাসকযাচনং.

৬. সপদানেন যং লদ্ধং, লূখংৱাপি পণীতকং;

তেন তুস্সন্তি মে পুত্তা, ৰসগেধৱিৱজ্জিতা.

৭. নিপজ্জামি অহং সাধু, সন্থতে সযনে সুভে;

ন তে সেয্যং পকপ্পেন্তি, সংসাৰভযভীৰুকা.

৮. ঠানা সনগমনেন, কপ্পেন্তি ইৰিযাপথং;

নেকভূমিসমাকিণ্ণ, পাসাদেসু ৱসামহং.

৯. বুদ্ধপুত্তা তথাচ্ছন্নং, ন কদা পৱিসন্তি তে;

ৰুক্খমূলে সুসানস্মিং, অব্ভোকাসে ৰমন্তি তে.

১০. ভাৱেত্ৱা ভৱনাসায, হেতুং ভাৱনমুত্তমং;

অহং গামে ৱসিস্সামি, পাপেন্তো জনতং সিৱং.

১১. ৰমন্তি মম পুত্তা তে, পন্তসেনাসনে ককা;

তেসং মহত্তৰো সন্তো, থেৰোযং ৱসভো মহা;

ধুতপাপো ধুতঙ্গগ্গো, ঞাতোযং মম সাসনেতি.

এৱং ভগৱা হত্থং উক্খিপিত্ৱা চন্দমণ্ডলে পহৰন্তো ৱিয থেৰস্স গুণে পকাসেসি, ততো সো তস্স গুণকথং সুত্ৱা সযম্পিতং ঠানন্তৰং কামযমানো যন্নূনাহং অনাগতে অঞ্ঞতৰস্স সম্মাসম্বুদ্ধস্স সাসনে ধুতঙ্গধৰানং অগ্গো ভৱিস্সামীতি তং ঠানন্তৰং পত্থেন্তো ভগৱতো পাদমূলে নিপজ্জি, সত্থা তং কাৰণং উপপৰিক্খিত্ৱা ইতো কপ্পসতসহস্সমত্থকে গোতমো নাম সত্থা উপ্পজ্জিস্সতি. ত্ৱং তদা ধুতঙ্গধৰানং অগ্গো হুত্ৱা কস্স পোতি পঞ্ঞাযিস্সতীতি ব্যাকৰণ মদাসি. ততো পট্ঠায সো সোমনস্সো পুঞ্ঞকম্মং কত্ৱা ততো চুতো দেৱমনুস্সেসু দেৱিস্সৰিযং অনুভৱন্তো ৱিপস্সীসম্মাসম্বুদ্ধকালে একসাটকো নাম ব্ৰাহ্মণো হুত্ৱা মহাদানং অদাসি. ততো চুতো কস্সপসম্মাসম্বুদ্ধে পৰিনিব্বুতে বাৰাণসীনগৰে বাৰাণসীসেট্ঠি হুত্ৱা নিব্বত্তো দানাদীনি পুঞ্ঞানি কত্ৱা ততো চৱিত্ৱা সংসাৰে সংসৰন্তো দসৱস্সসহস্সা যুকেসু মনুস্সেসু বাৰাণসিযং একো কুটুম্বিকো হুত্ৱা নিব্বত্তি. সো পনাযং কুটুম্বিকো অৰঞ্ঞে জঙ্ঘাৱিহাৰং অনুৱিচৰন্তো পচ্চন্তিমে জনপদে অৰঞ্ঞাযতনে অঞ্ঞতৰং পচ্চেকবুদ্ধং অদ্দস. সো চ পচ্চেকবুদ্ধো তত্থ চীৱৰকম্মং কৰোন্তো অনুৱাতে অপ্পহোন্তে সংহৰিত্ৱা ঠপেতুং আৰদ্ধো. কুটুম্বিকো তং দিস্ৱা ভন্তে কিং কৰোথাতি পুচ্ছি. সো পচ্চেকবুদ্ধো অপ্পিচ্ছতায তেন পুট্ঠো ন কিঞ্চি ৱুত্তো হোতি. সো চীৱৰদুস্সং নপ্পহোতীতি ঞত্ৱা অত্তনো উত্তৰসাটকং পচ্চেকবুদ্ধস্স পাদমূলে ঠপেত্ৱা অগমাসি. পচ্চেকবুদ্ধো তং গহেত্ৱা অনুৱাতকং আৰোপেন্তো চীৱৰং কত্ৱা পাৰুপি. কুটুম্বিকো জীৱিতপৰিযোসানে কালং কত্ৱা তাৱতিংসভৱনে নিব্বত্তিত্ৱা তত্থ যাৱতাযুকং দিব্বসম্পত্তিং অনুভৱিত্ৱা ততো চৱিত্ৱা বাৰাণসিতো তিযোজনমত্তকে ঠানে অঞ্ঞতৰস্মিং নগৰে নিব্বত্তি, তস্স মাতাপিতৰো নন্দিযোতি [নন্দীতিনামং ইতিসব্বত্থ] নামং অকংসু, তস্স সত্ত ভাতৰো অহেসুং, সেসা ছ ভাতৰো নানাকম্মন্তেসু ব্যাৱটা মাতাপিতুন্নং পোসেন্তি. নন্দিযো পন অকম্মসীলো গেহেযেৱ ৱসতি. তস্মা তস্স সেসা কুজ্ঝন্তি. মাতাপিতৰোপি নন্দিযং আমন্তেত্ৱা ওৱদন্তি. সো তুণ্হী হোতেৱ. অথাপৰস্মিং সমযে গামে নক্খত্তং সঙ্ঘুট্ঠং, তদা সো মাতৰং আহ. অম্ম সাটকং দেহি, নক্খত্তং কীড়িস্সামীতি, সা ধোত- ৱত্থং নীহৰিত্ৱা অদাসি, অম্ম থূলং ইদন্তি, সা অঞ্ঞং নীহৰিত্ৱা অদাসি, তম্পি পটিক্খিপি. অথ নং মাতা আহ. তাত যাদিসে মযং গেহে জাতা, নত্থি ইতো সুখুমতৰস্স পটিলাভায পুঞ্ঞন্তি, লভনট্ঠানং গমিস্সামি অম্মাতি. পুত্ত অহং অজ্জেৱ তৱ বাৰাণসীনগৰে ৰজ্জপটিলাভং ইচ্ছামীতি আহ. সো সাধু অম্মাতি মাতৰং ৱন্দিত্ৱা পদক্খিণং কত্ৱা পক্কামি. মাতুযা পনস্স এৱং অহোসি. কহং সো গমিস্সতি, পুব্বেৱিয ইধৱা এত্থৱা গেহে নিসীদিত্ৱা আগচ্ছতীতি, সো পন পুঞ্ঞনিযামেন চোদিযমানো গামতো নিক্খমিত্ৱা বাৰাণসিং গন্ত্ৱা সেনগুত্তস্স গেহে পটিৱসতি, অথেকদিৱসং সো তস্স কম্মকাৰেহি সদ্ধিং সল্লপন্তো নিসীদিত্ৱা পচলাযন্তো সুপিনং অদ্দস. মুখেন অন্তং নিক্খমিত্ৱা সকলজম্বুদীপে পত্থৰিত্ৱা অন্তোকুচ্ছিমেৱ পাৱিসি. পবুদ্ধো সো ভীতো মহাসদ্দমকাসি. অথ নং মহাসেনগুত্তো পুচ্ছি. নন্দিযো সুপিনং অদ্দসন্তি আহ. অথ তেন কীদিসন্তি পুট্ঠো কথেসি, ততো সেনগুত্তো তং অত্তনো কুলূপগং পৰিব্বাজিকং পুচ্ছি কো তস্স ৱিপাকোতি. পৰিব্বাজিকা যদি ভো ইত্থী পস্সতি. সত্তদিৱসব্ভন্তৰেযেৱ অভিসেকং লভতি, যদি পুৰিসো পস্সতি, তথেৱ ৰাজা হোতীতি কথেসি. সেনগুত্তো তস্সা তং কথং সুত্ৱা ইমং মম ঞাতিং কৰোমীতি অত্তনো সত্ত ধীতৰে পক্কোসিত্ৱা পটিপাটিযা পুচ্ছি. নন্দিযস্স সন্তিকে ৱসথাতি, সেসা সব্বা ন ইচ্ছিংসু, ন মযং জানাম এতং অধুনাগতং কুলৱন্তং ৱা দুক্কুলৱন্তংৱাতি. অথ কণিট্ঠিকং পুচ্ছি. সা যস্স মং মাতাপিতৰো দস্সন্তি. তেসং ৱচনং ন ভিন্দিস্সামীতি সম্পটিচ্ছি, অথ সেনগুত্তো নন্দিযং পক্কোসিত্ৱা অত্তনো ধীতৰং দত্ৱা তস্স মহাসম্পত্তি মদাসি. ততো সত্তমে দিৱসে নন্দিযো তত্থ তত্থ আহিণ্ডন্তো ৰঞ্ঞো মঙ্গলুয্যানং পস্সিস্সামীতি গন্ত্ৱা ধঙ্গলসিলাপট্টেসসীসং পাৰুপিত্ৱা নিপজ্জি, সো চ বাৰাণসীৰঞ্ঞো কালঙ্কতস্স সত্তমো দিৱসো হোতি. অমচ্চাচ পুৰোহিতোচ ৰঞ্ঞো সৰীৰকিচ্চং কাৰেত্ৱা ৰাজঙ্গণে নিসীদিত্ৱা মন্তযিংসু. ৰঞ্ঞো একাৱ ধীতা অত্থি, পুত্তো পনস্স নত্থি. অৰাজিকং ৰজ্জং ন তিট্ঠতি. ফুস্সৰথং ৱিস্সজ্জেস্সামাতি. তে কুমুদপত্তৱণ্ণে চত্তাৰো সিন্ধৱে যোজেত্ৱা সেতচ্ছত্তপমুখংপঞ্চৱিধৰাজককুধভণ্ডং ৰথস্মিংযেৱ ঠপেত্ৱা ৰথং ৱিস্সজ্জেত্ৱা পচ্ছতো তুৰিযানি পগ্গণ্হাপেসুং. ৰথো পাচীদ্ৱাৰেন নিক্খমিত্ৱা উয্যানাভিমুখো অহোসি. পৰিচযেন উয্যানাভিমুখো গচ্ছতি. নিৱত্তেমাতি কেচি আহংসু. পুৰোহিতো মা নিৱাৰযিত্থাতি আহ. ৰথো কুমাৰকং পদক্খিণং কত্ৱা আৰোহণসজ্জো হুত্ৱা অট্ঠাসি. পুৰোহিতো পাৰুপণকণ্ণং অপনেত্ৱা পাদতলানি ওলোকেন্তো তিট্ঠতু অযং দীপো. দ্ৱিসহস্সদীপ পৰিৱাৰেসু চতূসু মহাদীপেসু একৰজ্জং কাতুং সমত্থোতিৱত্ৱা তস্স ধিতিং উপধাৰেতুং তিক্খত্তুং তুৰিযানি পগ্গণ্হাপেসি. অথ কুমাৰো মুখং ৱিৱৰিত্ৱা ওলোকেত্ৱা কেন কাৰণেন আগতত্থাতি আহ, দেৱ তুম্হাকং ৰজ্জং পাপুণাতীতি, ৰাজা কহন্তি, দেৱত্তং গতো সামীতি, কতি দিৱসা অতিক্কন্তাতি, অজ্জ সত্তমো দিৱসোতি. পুত্তো ৱা ধীতা ৱা নত্থীতি, ধীতা অত্থি দেৱ. পুত্তো ন ৱিজ্জতীতি, তেনহি কৰিস্সামি ৰজ্জন্তি, তে তাৱদেৱ অভিসেকমণ্ডপং কাৰেত্ৱা ৰাজধীতৰং সব্বালঙ্কাৰেহি অলঙ্কাৰিত্ৱা উয্যানং নেত্ৱা কুমাৰস্স অভিসেকং অকংসু, অথস্স কতাভিসেকস্স সতসহস্সগ্ঘনকং ৱত্থং আনেসুং, সো কিমিদং তাতাতি আহ, নিৱাসনৱত্থং দেৱাতি, ননু তাতা থূলংতি, মনুস্সানং পৰিভোগৱত্থেসু ইতো সুখুমতৰং নত্থি দেৱাতি, তুম্হাকং ৰাজা এৱৰূপং নিৱাসেসীতি, আম দেৱাতি. ন মঞ্ঞে পুঞ্ঞৱা তুম্হাকং ৰাজাতি ৱত্ৱা হন্দ সুৱণ্ণভিঙ্কাৰং আহৰথ, লভিস্সাম ৱত্থন্তি, তে সুৱণ্ণভিঙ্কাৰং আহৰিংসু, সো উট্ঠায হত্থে ধোৱিত্ৱা মুখং ৱিক্খালেত্ৱা হত্থেন উদকং আদায পুৰত্থিমদিসায অব্ভুক্কিৰি, তাৱদেৱ ঘনপথৱিং ভিন্দিত্ৱা সোড়সকপ্পৰুক্খা উট্ঠহিংসু, পুন উদকং হত্থেন গহেত্ৱা দক্খিণং পচ্ছিমং উত্তৰন্তি এৱং চতস্সোপি দিসা অব্ভুক্কিৰি, সব্বদিসাসু সোড়স সোড়স হুত্ৱা চতুসট্ঠিকপ্পৰুক্খা উট্ঠহিংসু, সো একং দিব্বদুস্সং নিৱাসেত্ৱা একং পাৰুপিত্ৱা নন্দিযৰঞ্ঞো ৱিজিতে সুত্তকন্তিকা ইত্থিযো মা সুত্তং কন্তন্তূতি ভেৰিং চৰাপেথাতি ৱত্ৱা ছত্তং উস্সাপেত্ৱা অলঙ্কতপটিযত্তো হত্থিক্খন্ধৱৰগতো নগৰং পৱিসিত্ৱা পাসাদমভিৰুয্হ মহাসম্পত্তিং অনুভৱি. অহো তদা পচ্চেকবুদ্ধস্স দিন্নানুৱাতকস্স ৱিপাকো. তেনাহু পোৰাণা.

১২. যথা সাসপমত্তম্হা, বীজা নিগ্ৰোধপাদপো;

জাযতে সতসাখড্ঢো, মহানীলম্বুদোপমো.

১৩. তথেৱ পুঞ্ঞকম্মম্হা, অণুম্হা ৱিপুলং ফলং;

হোতীতি অপ্পপুঞ্ঞন্তি, নাৱমঞ্ঞেয্য পণ্ডিতোতি.

এৱং গচ্ছন্তে কালে একদিৱসং দেৱী ৰঞ্ঞো সম্পত্তিং দিস্ৱা অহো তপস্সীতি কাৰুঞ্ঞাকাৰং দস্সেসি. কিমিদং দেৱীতি চ পুট্ঠা অতিমহতী তে দেৱ সম্পত্তি. অতীতমদ্ধানং কল্যাণং কতত্তা. ইদানি অনাগতস্সত্থায কুসলং কৰোথাতি আহ. কস্স দস্সাম. সীলৱন্তা নত্থীতি. অসুঞ্ঞো দেৱ জম্বুদীপো অৰহন্তেহি, তুম্হে দানং সজ্জেথ, অহং অৰহন্তে লচ্ছামীতি আহ. পুনদিৱসে ৰাজা মহাৰহং দানং সজ্জাপেসি. দেৱী সচে ইমিস্সা দিসায অৰহন্তো অত্থি, ইধা গন্ত্ৱা অম্হাকং ভিক্খং গণ্হন্তূতি উত্তৰহিমৱন্তাভিমুখী পুপ্ফানি উদ্ধং খিপিত্ৱা উৰেন নিপজ্জি. অথ তানি পুপ্ফানি আকাসতো গন্ত্ৱা হিমৱন্তপদেসে ৱসন্তানং পদুমৱতিযা পুত্তানং পঞ্চসতানংপচ্চেকবুদ্ধানং জেট্ঠকমহাপদুমপচ্চেকবুদ্ধস্স পাদমূলে পতিংসু. তথাহি.

১৪. অহো পস্সথ ভো দানি, ৱিম্হযং পুঞ্ঞকম্মুনো;

অচেতনাপি পুপ্ফানি, দূতকিচ্চেসু ব্যাৱটা.

১৫. কত্তুকামেন লোকস্মিং, সকলং অত্তনো ৱসং;

সব্বত্থামেন কত্তব্বং, পুঞ্ঞং পঞ্ঞৱতা সদাতি.

ততো মহাপদুমপচ্চেকবুদ্ধো তং ঞত্ৱা সেসভাতৰে আমন্তেসি. মাৰিসা নন্দিযৰাজা তুম্হে নিমন্তেসি. অধিৱাসেথ তস্স নিমন্তনন্তি. তে অধিৱাসেত্ৱা তাৱদেৱ আকাসেনা গন্ত্ৱা উত্তৰদ্ৱাৰে ওতৰিংসু. মনুস্সা পঞ্চসতা দেৱ পচ্চেকবুদ্ধা আগতাতি ৰঞ্ঞো আৰোচেসুং, ৰাজা সদ্ধিং দেৱিযা গন্ত্ৱা ৱন্দিত্ৱা পত্তে গহেত্ৱা পচ্চেকবুদ্ধে পাসাদং আৰোপেত্ৱা তত্থ তেসং দানং দত্ৱা ভত্তকিচ্চাৱসানে ৰাজা সঙ্ঘত্থেৰস্স দেৱী সঙ্ঘনৱকস্স চ পাদমূলে নিপজ্জিত্ৱা অয্যা পচ্চযেহি ন কিলমিস্সন্তু, মযং পুঞ্ঞেন ন হাযিস্সাম, অম্হাকং ইধ ৱাসায পটিঞ্ঞং দেথাতি পটিঞ্ঞং কাৰেত্ৱা উয্যানে নিৱাসট্ঠানাদযো কাৰেত্ৱা যাৱজীৱং পচ্চকবুদ্ধে উপট্ঠহিত্ৱা তেসু পৰিনিব্বুতেসু সাধুকীড়নং কাৰেত্ৱা চন্দনা গৰুআদীহি সৰীৰকিচ্চং কাৰেত্ৱা ধাতুযো গহেত্ৱা চেতিযং পতিট্ঠাপেত্ৱা এৱৰূপানম্পি মহানুভাৱানং মহেসীনং মৰণং ভৱিস্সতি, কিমঙ্গং পন মাদিসানন্তি সংৱেগজাতো জেট্ঠপুত্তং ৰজ্জে পতিট্ঠাপেত্ৱা সযং পব্বজং পব্বজি, দেৱীপি ৰঞ্ঞে পব্বজিতে অহং কিংকৰিস্সামীতি পব্বজিত্ৱা দ্ৱেপি উয্যানে ৱসন্তা ঝানাভিঞ্ঞং নিব্বত্তেত্ৱা ঝানসুখেন ৱীতিনামেন্তা আযুপৰিযোসানে ব্ৰহ্মলোকে নিব্বত্তিংসু. তে অম্হাকং ভগৱতো কালে ব্ৰাহ্মণকুলে নিব্বত্তিত্ৱা বুদ্ধসাসনে পব্বজিংসু, তদা নন্দিযৰাজা ধুতঙ্গধৰানং অগ্গো মহাকস্সপত্থেৰোনাম হুত্ৱা চন্দো ৱিয সুৰিযো ৱিযচ লোকে পাকটো হুত্ৱা ভগৱতি পৰি- নিব্বুতে বুদ্ধসাসনং অতিৱিয সোভেতি. ভৰিযাপিস্স ভদ্দকাপিড়ানী নাম অহোসীতি.

১৬. দত্ৱা পুৰেকো ৱিপিনে চৰন্তো,

পচ্চেকবুদ্ধস্সনুৱাতমত্তং;

কত্ৱা সৰট্ঠং কুৰুদীপসোভং,

মহানুভাৱো ৱসুধা ধিপোসি.

১৭. তুম্হেচ ভোন্তো খলু সীলৱন্তে,

দদাথ দানানি অনপ্পকানি;

তং ৱো পতিট্ঠাচ ভৱন্তৰস্মিং,

চিন্তামণিং কপ্পতৰুংৱ সাৰন্তি.

নন্দিযৰাজস্স ৱত্থুং পথমং.