৮. মহামন্ধাতুৱত্থুম্হি অযমানুপুব্বীকথা

ইতো কিৰ একনৱুতিকপ্পমত্থকে ৱিপস্সীনাম সম্মাসম্বুদ্ধো লোকে উপ্পজ্জিত্ৱা পৱত্তৱৰধম্মচক্কো সদেৱকেহি লোকেহি পূজিযমানো বন্ধুমতীনগৰে পটিৱসতি. তদা সো মন্ধাতা তস্মিং নগৰে তুন্নকাৰো হুত্ৱা নিব্বত্তি. তুন্নকাৰকম্মেন জীৱিকং কপ্পেন্তো ৱিহৰতি. তদা সকলনগৰৱাসিনো বুদ্ধপমুখং ভিক্খুসঙ্ঘং নিমন্তেত্ৱা মহাদান মদংসু. অথ সো এৱং চিন্তেসি, সব্বেপিমে নগৰৱাসিনো দানং দদন্তি. অহমেকোৱ সেসো দুগ্গতত্তা, যজ্জাহমজ্জ বীজং ন ৰোপেমি, ইমম্হা দুক্খা ন পৰিমুচ্চিস্সামীতি. সো ৱেগেন তুন্নকাৰকম্মং পৰিযেসিত্ৱা কিঞ্চিমূলং লভিত্ৱা তেন একস্সাপি দানং দাতুং ওকাস মলদ্ধা আপণং গন্ত্ৱা ৰাজমাসকে গহেত্ৱা চঙ্কোটকং পূৰেত্ৱা আদায বুদ্ধপমুখস্স ভিক্খুসঙ্ঘস্স ভত্তগ্গং গন্ত্ৱা ঠিতো এৱং চিন্তেসি, নত্থি দানি ওকাসং একস্সাপি ভিক্খুনো পত্তে ওকিৰিতুং, অদ্ধাহং ইমে আকাসে ৱিকিৰিস্সামীতি অপ্পেৱনাম পতমানানং একস্সাপি ভিক্খুনো পত্তে একম্পি পতেয্য, তং মে ভৱিস্সতি দীঘৰত্তং হিভায সুখাযাতি পসন্নমানসো উদ্ধং খিপি, ত তো পতমানা তে পৰিৱাৰিকদেৱতানঞ্চ ভগৱতো আনুভাৱেনচ বহি অপতিত্ৱা ভগৱন্তমাদিং কত্ৱা সব্বেসং ভিক্খূনং পত্তেযেৱ পতিংসু. অথ সো তং অচ্ছৰিযং দিস্ৱা পসন্নমানসো সিৰসি অঞ্জলিং পগ্গয্হ ঠিতো এৱং পত্থনমকাসি.

১. ইমিনা মে অধিকাৰেন, পসাদেন যতিস্সৰে;

কামভোগীনহং অগ্গো, ভৱেয্যং জাতিজাতিযং.

২. পহৰিত্ৱা যদা পাণিং, ওলোকেমি নভোতলং;

সত্তৰতনসম্পন্নং, ৱস্সং ৱস্সতু সব্বদাতি.

সো ততো পট্ঠায দেৱমনুস্সেসু সংসৰন্তো মহন্তং দিব্বসম্পত্তিং অনুভৱিত্ৱা ইমস্মিং ভদ্দকপ্পে আদিম্হি মহাসম্মতো নাম ৰাজা অহোসি. তস্স পুত্তো ৰোজো নাম. তস্স পুত্তো ৱৰৰোজো নাম, তস্স পুত্তো কল্যাণো নাম, তস্স পুত্তো ৱৰকল্যাণো নাম. ৱৰকল্যাণস্স পুত্তো উপোসথো নাম. উপোসথস্স পুত্তো মন্ধাতা নাম হুত্ৱা নিব্বত্তি. সো সত্তহি ৰতনেহি চতূহি চ ইদ্ধীহি সমন্নাগতো চক্কৱত্তিৰজ্জং কাৰেসি, তস্স ৱামহত্থং সম্মিঞ্জিত্ৱা দক্খিণহত্থেন অপ্পোট্ঠিতে আকাসতো দিব্বমেঘা ৱিয জণ্ণুপ্পমাণং সত্তৰতনৱস্সং ৱস্সতি. এৱৰূপো অচ্ছৰিযো অহোসি. সো চতুৰাসীতিৱস্সসহস্সানি কুমাৰকীড়ং কীড়ি. চতুৰাসীতিৱস্সসহস্সানি ওপৰজ্জং কাৰেসি. চতুৰাসীতিৱস্সসহস্সানি চক্কৱত্তিৰজ্জং কাৰেসি, আযু পনস্স অসঙ্খ্যেয্যং অহোসি. সো একদিৱসং কামতণ্হং পূৰেতুং অসক্কোন্তো উক্কণ্ঠিতাকাৰং দস্সেসি, অমচ্চা দেৱ কিন্নখো উক্কণ্ঠা সীতি পুচ্ছিংসু. সো ভণে ময্হং পুঞ্ঞকম্মে ওলোকিযমানে ইমং ৰজ্জং নপ্পহোতি, কতৰন্নু খো ঠানং ৰমণীযন্তি. দেৱলোকো মহাৰাজাতি. সো চক্কৰতনং অব্ভুক্কিৰিত্ৱা পৰিসায সদ্ধিং চাতুমহাৰাজিকদেৱলোকং অগমাসি, অথস্স চত্তাৰো মহাৰাজানো দিব্বমালগন্ধ- হত্থা দেৱগণপৰিৱুতা পচ্চুগ্গমনং কত্ৱা তং আদায চাতুমহাৰাজিকদেৱলোকং গন্ত্ৱা ৰজ্জং অদংসু, তস্স পৰিসায পৰিৱুতস্স তস্মিং ৰজ্জং কৰোন্তস্স দীঘো অদ্ধা ৱীতিৱত্তো. সো তত্থপি তণ্হং পূৰেতু মসক্কোন্তো উক্কণ্ঠিতা কাৰং দস্সেসি. ততো চত্তাৰো মহাৰাজানো কিন্নুখো মহাৰাজ উক্কণ্ঠিতোতি পুচ্ছিংসু. ইমম্হা দেৱলোকা কতৰন্নু খো ঠানং ৰমণীযন্তি, দেৱ পৰেসং উপট্ঠাকমনুস্সসদিসা মযং. তাৱতিংসদেৱলোকো ইতো সতগুণেন ৰমণীযোতি. মন্ধাতা চক্কৰতনং অব্ভুক্কিৰিত্ৱা অত্তনো পৰিসপৰিৱুতো তাৱতিংসাভিমুখো পাযাসি, অথস্স সক্কো দেৱৰাজা দিব্বমালগন্ধহত্থো দেৱগণপৰিৱুতো পচ্চুগ্গমনং কত্ৱা তং হত্থে গহেত্ৱা ইতো এহি মহাৰাজাতি আহ. ততো ৰঞ্ঞো দেৱগণপৰিৱুতস্স গমনকালে পৰিণাযকৰতনং চক্কৰতনং আদায সদ্ধিংপৰিসায মনুস্সপথং ওতৰিত্ৱা অত্তনো ঘৰং পাৱিসি. সক্কো মন্ধাতুং সক্কভৱনং নেত্ৱা দেৱতা দ্ৱে কোট্ঠাসে কত্ৱা অত্তনো ৰজ্জং মজ্ঝে ভিন্দিত্ৱা অদাসি. ততো পট্ঠায দ্ৱেপি ৰাজনো ৰজ্জং কাৰেসুং. এৱং কালে গচ্ছন্তে সক্কো সট্ঠিসতসহস্সাধিকানি তিস্সোচ ৱস্সকোটিযো আযুং খেপেত্ৱা চৱি. অঞ্ঞো সক্কো নিব্বত্তি, সোপি তথেৱ দেৱৰজ্জং কাৰেত্ৱা আযুক্খযেন চৱি, এতেনু পাযেন ছত্তিংস সক্কা চৱিংসু, মন্ধাতা পন মনুস্সপৰিহাৰেন দেৱৰজ্জং কাৰেসিযেৱ, তস্সেৱং কালে গচ্ছন্তে ভীয্যোসো মত্তায কামতণ্হা উপ্পজ্জি, সো কিম্মে উপড্ঢৰজ্জেন. সক্কং মাৰেত্ৱা একৰজ্জং কৰিস্সামীতি চিন্তেসি. সক্কং পন মাৰেতুং ন সক্কা, কামতণ্হা পনেসা ৱিপত্তিমূলা. তথাহি.

৩. ৱৰমত্ৰ সুখন্ত্যত্ৰ, অত্ৰিচ্ছাৱিহতো নৰো;

ইধৱা পৰত্থৱা কিঞ্চি, ন সাতং ৱিন্দতে সদা.

৪. তণ্হায জাযতে সোকো,

তণ্হায জাযতে ভযং;

তণ্হায ৱিপ্পমুত্তস্স,

নত্থি সোকো কুতো ভযং.

৫. তণ্হাদাসো নৰো এত্থ, ৰাজচোৰাদিসম্ভৱং;

হত্তচ্ছেদাদিকং দুক্খং, পাপুণাতি ৱিহঞ্ঞতি.

৬. যেন লোভেন জাতেন, সদা জীযন্তি পাণিনো;

খেত্তং ৱত্থুং হিৰঞ্ঞংচ, গৱাস্সং দাসপোৰিসং;

সব্বত্থামেন সো লোভো, পহাতব্বোৱ ৱিঞ্ঞুনাতি.

ততো অত্ৰিচ্ছাৱিহতস্স তস্স আযুসঙ্খাৰো পৰিহাযি, জৰা সৰীৰং পহৰি, মনুস্সসৰীৰঞ্হি নাম ন দেৱলোকেভিজ্জতি, তথ সো দেৱলোকা ভস্সিত্ৱা বন্ধুমতীনগৰুয্যানং পাৱিসি, উয্যানপালো তস্স আগতভাৱং ৰাজকুলং নিৱেদেসি. ৰাজা ৰাজকুলা আগন্ত্ৱা উয্যানেযেৱ আসনং পঞ্ঞাপেসি. ততো মন্ধাতা উয্যানে পঞ্ঞত্তৱৰাসনে নিপন্নো অনুট্ঠানসেয্যং কপ্পেসি. ততো অমচ্চা দেৱ তুম্হাকং পৰতো কিন্নু কথেসামাতি পুচ্ছিংসু, মম পৰতো তুম্হে ইমং সাসনং মহাজনস্স কথেয্যাথ, মন্ধাতুমহাৰাজা দ্ৱিসহস্সদীপপৰিৱাৰেসু চতূসু মহাদীপেসু চক্কৱত্তিৰজ্জং কাৰেত্ৱা চাতুমহাৰাজিকেসু ৰজ্জং কাৰেত্ৱা ছত্তিংসসক্কানং আযুপৰিমাণেন দেৱলোকে ৰজ্জং কাৰেত্ৱা কালমকাসীতি. সো এৱং ৱত্ৱা কালংকত্ৱা যথাকম্মং গতোতি ইমমত্থং পকাসেতুং ভগৱা চতুমহাপৰিসমজ্ঝে ইমা গাথাযো আহ.

৭. যাৱতা চন্দিমসুৰিযা, পৰিহৰন্তি দিসা ভন্তি ৱিৰোচনা;

সব্বেৱ দাসা মন্ধাতা, যে পাণা পথৱিনিস্সিতা.

৮. ন কহাপণৱস্সেন, তিত্তি কামেসু ৱিজ্জতি;

অপ্পস্সদা দুখা কামা, ইতি ৱিঞ্ঞায পণ্ডিতো.

৯. অপি দিব্বেসু কামেসু, ৰতিংসো নাধিগচ্ছতি;

তণ্হাক্খযৰতো হোতি, সম্মাসম্বুদ্ধসাৱকোতি.

তং সুত্ৱা বহূ সোতাপত্তিফলাদীনি পাপুণিংসূতি.

১০. ইতি গতিনিযতানং বোধিযা উত্তমানং;

সকৱসমুপনেত্ৱা দেতি দুক্খাতিতণ্হা;

অনিযতগতিকানং কা কথা মাদিসানং;

জহথ তমিতি মন্ত্ৱা ভো ভজৱ্হো তিৱত্থুংতি.

মহামন্ধাতুৱত্থুং অট্ঠমং.