৭. সঙ্ঘতেদকক্খন্ধক

পুচ্ছা – কথং আৱুসো ছন্নং সক্যকুমাৰানং সহ উপালিকপ্পকেন পব্বজ্জা অহোসি, কথঞ্চ নেসং ৱিসেসো উদপাদি.

ৱিস্সজ্জনা – ভগৱা ভন্তে উপালিং কপ্পকং পঠমং পব্বাজেসি, পচ্ছা তে সক্যকুমাৰে, অথ ভন্তে আযস্মা ভদ্দিযো তেনেৱ অন্তৰৱস্সেন তিস্সো ৱিজ্জা সচ্ছাকাসি, আযস্মা অনুৰুদ্ধো দিব্বচক্খুং উপ্পাদেসি, আযস্মা আনন্দো সোতাপত্তিফলং সচ্ছাকাসি, দেৱদত্তো পোথুজ্জনিকং ইদ্ধিং অভিনিপ্ফাদেসি. এৱং খো ভন্তে ছন্নং সক্যকুমাৰানং উপালিকপ্পকেন সহ পব্বজ্জা অহোসি, এৱঞ্চ পন ভন্তে তেসং ৱিসেসাধিগমো অহোসি.

পকাসনীয

পুচ্ছা – পকাসনীযকম্মং আৱুসো কাতুং ভগৱতা কত্থ পঞ্ঞত্তং, কং আৰব্ভ কিস্মিং ৱত্থুস্মিং পঞ্ঞত্তং.

ৱিস্সজ্জনা – ৰাজগহে ভন্তে দেৱদত্তং আৰব্ভ পঞ্ঞত্তং, দেৱদত্তো ভন্তে ‘‘সৰাজিকায মং ভগৱা পৰিসায খেড়াসকৱাদেন অপসাদেতি, সাৰিপুত্তমোগ্গল্লানেৱ উক্কংসতী’’তি কুপিতো অনত্তমনো ভগৱতি আঘাতং বন্ধি, তস্মিং ভন্তে ৱত্থুস্মিং পঞ্ঞত্তং.

পকাসনীয

পুচ্ছা – দেৱদত্তস্স আৱুসো পকাসনীযকম্মং কাৰাপেত্ৱা কথং ভগৱা পকাসেতুং আণাপেসি.

ৱিস্সজ্জনা – ভগৱা ভন্তে দেৱদত্তস্স পকাসনীযকম্মং কাতুং পঞ্ঞপেত্ৱা আযস্মন্তং সাৰিপুত্তং আমন্তেসি ‘‘তেন হি ত্ৱং সাৰিপুত্ত দেৱদত্তং ৰাজগহে পকাসেহী’’তি, এৱং খো ভন্তে দেৱদত্তস্স পকাসনীযকম্মং কত্ৱা দেৱদত্তং ৰাজগহে পকাসেতুং ভগৱা আণাপেসি.

দেৱদত্ত

পুচ্ছা – কথং আৱুসো দেৱদত্তেন দুট্ঠচিত্তেন ৱধকচিত্তেন তথা গতস্স ৰুহিৰং উপ্পাদেত্ৱা পঠমং আনন্তৰিযং কম্মং উপচিতং.

ৱিস্সজ্জনা – ভগৱা ভন্তে গিজ্ঝকূটস্স পব্বতস্স ছাযাযং চঙ্কমি, অথ ভন্তে দেৱদত্তো গিজ্ঝকূটং পব্বতং আৰুহিত্ৱা মহতিং সিলং পৱিজ্ঝি ‘‘ইমায সমণং গোতমং জীৱিতা ৱোৰোপেস্সামী’’তি, অথ খো ভন্তে দ্ৱে পব্বতকূটানি সমাগন্ত্ৱা তং সিলং সম্পটিচ্ছিংসু, ততো পপতিকা উপ্পতিত্ৱা ভগৱতো পাদে ৰুহিৰং উপ্পাদেসি. এৱং খো ভন্তে দেৱদত্তেন দুট্ঠেন ৱধকচিত্তেন তথাগতস্স ৰুহিৰং উপ্পাদেত্ৱা পঠমং আনন্তৰিযকম্মং উপচিতং.

পুচ্ছা – কুলেসু আৱুসো তিকভোজনং ভগৱতা কত্থ পঞ্ঞত্তং, কং আৰব্ভ কিস্মিং ৱত্থুস্মিং পঞ্ঞত্তং.

ৱিস্সজ্জনা – ৰাজগহে ভন্তে দেৱদত্তং আৰব্ভ পঞ্ঞত্তং, দেৱদত্তো ভন্তে পৰিহীনলাভসক্কাৰো সপৰিসো কুলেসু ৱিঞ্ঞাপেত্ৱা ৱিঞ্ঞাপেত্ৱা ভুঞ্জি, তস্মিং ভন্তে ৱত্থুস্মিং পঞ্ঞত্তং.

পুচ্ছা – অলং দেৱদত্ত, মা তে ৰুচ্চি সঙ্ঘভেদো, গৰুকো খো দেৱদত্ত সঙ্ঘভেদোতিআদিকো আৱুসো ওৱাদো ভগৱতা কত্থ দিন্নো, কিস্মিং ৱত্থুস্মিং দিন্নো.

ৱিস্সজ্জনা – ৰাজগহে ভন্তে দেৱদত্তং আৰব্ভ দিন্নো, দেৱদত্তো ভন্তে সঙ্ঘভেদায পৰক্কমি চক্কভেদায, তস্মিং ভন্তে ৱত্থুস্মিং দিন্নো.

অলং দেৱদত্ত, মা তে ৰুচ্চি সঙ্ঘভেদো, গৰুকো খো দেৱদত্ত সঙ্ঘভেদো –

পুচ্ছা – ‘‘সুকৰং সাধুনা সাধুং, সাধুং পাপেন দুক্কৰং. পাপং পাপেন সুকৰং, পাপমৰিযেহি দুক্কৰ’’ন্তি- আৱুসো ইদং উদানং ভগৱতা কত্থ উদানিতং, কং আৰব্ভ কিস্মিং ৱত্থুস্মিং উদানিতং.

ৱিস্সজ্জনা – ৰাজগহে ভন্তে দেৱদত্তংযেৱ আৰব্ভ উদানিতং, আযস্মা ভন্তে আনন্দো পুব্বণ্হসমযং নিৱাসেত্ৱা পত্তচীৱৰমাদায ৰাজগহং পিণ্ডায পাৱিসি, অথ খো ভন্তে দেৱদত্তো যেনাযস্মা আনন্দো তেনুপসঙ্কমি, উপসঙ্কমিত্ৱা আযস্মন্তং আনন্দং এতদৱোচ ‘‘অজ্জতগ্গে দানাহং আৱুসো আনন্দ অঞ্ঞত্ৰেৱ ভগৱতা অঞ্ঞত্ৰেৱ ভিক্খুসঙ্ঘা উপোসথং কৰিস্সামি সঙ্ঘকম্মং কৰিস্সামী’’তি, তস্মিং ভন্তে ৱত্থুস্মিং উদানিতং.

সুকৰং সাধুনা সাধুং, সাধুং পাপেন দুক্কৰং;

পাপং পাপেন সুকৰং, পাপমৰিযেহি দুক্কৰং.

পুচ্ছা – ভেদানুৱত্তকানং আৱুসো ভিক্খূনং থুল্লচ্চযং ভগৱতা কত্থ পঞ্ঞত্তং, কং আৰব্ভ কিস্মিং ৱত্থুস্মিং পঞ্ঞত্তং.

ৱিস্সজ্জনা – ৰাজগহে ভন্তে সম্বহুলে ভিক্খূ আৰব্ভ পঞ্ঞত্তং, আযস্মা ভন্তে সাৰিপুত্তো ভগৱন্তং উপসঙ্কমিত্ৱা এতদৱোচ ‘‘সাধু ভন্তে ভেদানুৱত্তকা ভিক্খূ পুন উপসম্পজ্জেয্যু’’ন্তি, তস্মিং ভন্তে ৱত্থুস্মিং পঞ্ঞত্তং.

‘‘সাধু ভন্তে ভেদানুৱত্তকা ভিক্খূ পুন উপসম্পজ্জেয্যু’’ন্তি –

পুচ্ছা – কিত্তাৱতা নু খো আৱুসো সঙ্ঘৰাজি হোতি নো চ সঙ্ঘভেদো, কিত্তাৱতা চ পন সঙ্ঘৰাজি চেৱ হোতি সঙ্ঘভেদো চ.

ৱিস্সজ্জনা – একতো ভন্তে একো হোতি, একতো দ্ৱে চতুত্থো অনুস্সাৱেতি, সলাকং গাহেতি ‘‘অযং ধম্মো অযং ৱিনযো ইদং সত্থুসাসনং ইমং গণ্হথ ইমং ৰোচেথাতি’’, এতেনেৱ ভন্তে নযেন চতুন্নং ৱা পঞ্চন্নং ৱা ছন্নং ৱা সত্তন্নং ৱা অট্ঠন্নং ৱা সঙ্ঘৰাজি হোতি, নো চ সঙ্ঘভেদো, একতো ভন্তে চত্তাৰো হোন্তি, একতো চত্তাৰো, নৱমো অনুস্সাৱেতি, সলাকং গাহেতি ‘‘অযং ধম্মো অযং ৱিনযো ইদং সত্থুসাসনং ইমং গণ্হথ ইমং ৰোচেথা’’তি, এৱং খো ভন্তে সঙ্ঘৰাজি চেৱ হোতি সঙ্ঘভেদো চ. এৱং খো ভন্তে সঙ্ঘৰাজি হোতি, নো চ সঙ্ঘভেদো, এৱঞ্চ পন ভন্তে সঙ্ঘৰাজি চেৱ হোতি সঙ্ঘভেদো চ.

পুচ্ছা – কিত্তাৱতা নু খো আৱুসো সঙ্ঘো ভিন্নো হোতি.

ৱিস্সজ্জনা – ইধ ভন্তে ভিক্খূ অধম্মাদিং ধম্মাদীনীতি দীপেন্তি, তে ইমেহি অট্ঠাৰসহি ৱত্থূহি অপকস্সন্তি, অৱপকস্সন্তি, আৱেনিং উপোসথং কৰোন্তি, আৱেনিং পৱাৰণং কৰোন্তি, আৱেনিং সঙ্ঘকম্মং কৰোন্তি, এৱং খো ভন্তে সঙ্ঘো ভিন্নো হোতি.

পুচ্ছা – কিত্তাৱতা নু খো আৱুসো সঙ্ঘো সমগ্গো হোতি.

ৱিস্সজ্জনা – ইধ ভন্তে ভিক্খূ অধম্মং অধম্মোতি দীপেন্তি, ধম্মং ধম্মোতি দীপেন্তি, অৱিনযং অৱিনযোতি দীপেন্তি…পে… দুট্ঠুল্লং আপত্তিং দুট্ঠুল্লা আপত্তীতি দীপেন্তি, অদুট্ঠুল্লং আপত্তিং অদুট্ঠুল্লা আপত্তীতি দীপেন্তি, তে ইমেহি অট্ঠাৰসহি ৱত্থূহি ন অপকস্সন্তি, ন অৱপকস্সন্তি, ন আৱেনিং উপোসথং কৰোন্তি, ন আৱেনিং পৱাৰণং কৰোন্তি, ন আৱেনিং সঙ্ঘকম্মং কৰোন্তি, এত্তাৱতা খো ভন্তে সঙ্ঘো সমগ্গো হোতি.

পুচ্ছা – সমগ্গং আৱুসো সঙ্ঘং ভিন্দিত্ৱা কিং সো পসৱতি.

ৱিস্সজ্জনা – সমগ্গং খো ভন্তে সঙ্ঘং ভিন্দিত্ৱা কপ্পট্ঠিতিকং কিব্বিসং পসৱতি, কপ্পং নিৰযম্হি পচ্চতি.

পুচ্ছা – ভিন্নং খো আৱুসো সঙ্ঘং সমগ্গং কত্ৱা কিং সো পসৱতি.

ৱিস্সজ্জনা – ভিন্নং খো ভন্তে সঙ্ঘং সমগ্গং কত্ৱা ব্ৰহ্মং পুঞ্ঞং পসৱতি, কপ্পং সগ্গম্হি মোদতি.

পুচ্ছা – সঙ্ঘভেদং পুচ্ছিস্সং, সনিদানং সনিদ্দেসং. সমুক্কট্ঠপদানং আৱুসো কতি আপত্তিযো.

ৱিস্সজ্জনা – সঙ্ঘভেদং ৱিস্সজ্জিস্সং, সনিদানং সনিদ্দেসং. সমুক্কট্ঠপদানং ভন্তে দ্ৱে আপত্তিযো.