নমো তস্স ভগৱতো অৰহতো সম্মাসম্বুদ্ধস্স
ৱিনযপিটক
সংগাযনস্স পুচ্ছা ৱিস্সজ্জনা
ওকাস দানকথা
সুণাতু মে ভন্তে সঙ্ঘো, মহতী অযং পৰিসা, এৱৰূপায পৰিসায ন সুকৰা সব্বসো কথং সাৱেতুং, তস্মা আযস্মতো চ জৱনত্থেৰস্স পখুক্কূনগৰৱাসিনো আযস্মতো চ ৱিচিত্তসাৰাভিৱংসস্স তিপিটকধৰ ধম্মভণ্ডাগাৰিকস্স ৱিনযপুচ্ছনভাৰঞ্চ ৱিনযৱিস্সজ্জন ভাৰঞ্চ আৱহিতুং ওকাসং দম্মি, কৰোথ তুম্হে আৱুসো ছট্ঠসংগীতিপুব্বঙ্গমানি ৱিনযপুচ্ছন ৱিনযৱিস্সজ্জন কিচ্চানি যথাধম্মং যথাৱিনযং.
অগ্গমহাপণ্ডিত ভদন্তজৱন মহাথেৰেন
ঠপিতা
পুচ্ছক সম্মুতি ঞাত্তি
সুণাতু মে ভন্তে সঙ্ঘো, যদি সঙ্ঘস্স পত্তকল্লং, অহং আযস্মন্তং ৱিচিত্তসাৰাভিৱংসং তিপিটকধৰ ধম্মভণ্ডাগাৰিকং ৱিনযং পুচ্ছেয্যং.
তিপিটকধৰ ধম্মভণ্ডাগাৰিক
ভদন্তৱিচিত্তসাৰাভিৱংসেন
ঠপিতা ৱিস্সজ্জক সম্মুতি ঞাত্তি
সুণাতু মে ভন্তে সঙ্ঘো, যদি সঙ্ঘস্স পত্তকল্লং, অহং আযস্মতা জৱনত্থেৰেন সঙ্ঘনাযক মহাথেৰস্স পটিনিধিভূতেন ৱিনযং পুট্ঠো ৱিস্সজ্জেয্যং.
পঠম পাৰাজিক সিক্খাপুচ্ছা
পুচ্ছা – যং তেন আৱুসো ভগৱতা জানতা পস্সতা অৰহতা সম্মাসম্বুদ্ধেন পঠমং পাৰাজিকং কত্থ পঞ্ঞত্তং.
ৱিস্সজ্জনা – ৱেসালিযং ভন্তে পঞ্ঞত্তং.
পুচ্ছা – কং আৱুসো আৰব্ভ পঞ্ঞত্তং.
ৱিস্সজ্জনা – সুদিন্নং ভন্তে কলন্দপুত্তং আৰব্ভ পঞ্ঞত্তং.
পুচ্ছা – কিস্মিং আৱুসো ৱত্থুস্মিং পঞ্ঞত্তং.
ৱিস্সজ্জনা – সুদিন্দো ভন্তে কলন্দপুত্তো পুৰাণদুতিযিকায মেথুনং ধম্মং পটিসেৱি, তস্মিং ভন্তে ৱত্থুস্মিং পঞ্ঞত্তং.
পুচ্ছা – অত্থি আৱুসো তত্থ পঞ্ঞত্তি অনুপঞ্ঞত্তি অনুপ্পন্নপঞ্ঞত্তি.
ৱিস্সজ্জনা – একা ভন্তে পঞ্ঞত্তি দ্ৱে অনুপঞ্ঞত্তিযো, অনুপ্পন্নপঞ্ঞত্তি তস্মিং নত্থি.
পুচ্ছা – সব্বত্থপঞ্ঞত্তিনুখো আৱুসো পদেসপঞ্ঞত্তিনুখো.
ৱিস্সজ্জনা – সব্বত্থপঞ্ঞত্তি ভন্তে.
পুচ্ছা – সাধাৰণপঞ্ঞত্তিনুখো আৱুসো অসাধাৰণপঞ্ঞত্তিনুখো.
ৱিস্সজ্জনা – সাধাৰণপঞ্ঞত্তি ভন্তে.
পুচ্ছা – একতোপঞ্ঞত্তিনুখো আৱুসো উভতোপঞ্ঞত্তিনুখো.
ৱিস্সজ্জনা – উভতোপঞ্ঞত্তি ভন্তে.
পুচ্ছা – পঞ্চন্নং আৱুসো পাতিমোক্খুদ্দেসানং কত্থোগধং কত্থ পৰিযাপন্নং.
ৱিস্সজ্জনা – নিদানোগধং ভন্তে নিদানপৰিযাপন্নং.
পুচ্ছা – কতমেন আৱুসো উদ্দেসেন উদ্দেসং আগচ্ছতি.
ৱিস্সজ্জনা – দুতিযেন ভন্তে উদ্দেসেন উদ্দেসং আগচ্ছতি.
পুচ্ছা – চতুন্নং আৱুসো ৱিপত্তীনং কতমা ৱিপত্তি.
ৱিস্সজ্জনা – সীলৱিপত্তি ভন্তে.
পুচ্ছা – কা আৱুসো ৱিপত্তি.
ৱিস্সজ্জনা – অসংৱৰো ভন্তে ৱিপত্তি.
পুচ্ছা – কা আৱুসো সম্পত্তি.
ৱিস্সজ্জনা – সংৱৰো ভন্তে সম্মত্তি.
পুচ্ছা – কা আৱুসো পটিপত্তি.
ৱিস্সজ্জনা – ন এৱৰূপং কৰিস্সামীতি যাৱজীৱং আপাণকোটিকং সমাদায সিক্খতি সিক্খাপদেসু, অযং ভন্তে পটিপত্তি.
পুচ্ছা – কতি আৱুসো অত্থৱসে পটিচ্চ ভগৱতা পঠমং পাৰাজিকং পঞ্ঞত্তং.
ৱিস্সজ্জনা – দস ভন্তে অত্থৱসে পটিচ্চ ভগৱতা পঠমং পাৰাজিকং পঞ্ঞত্তং, ১ - সঙ্ঘসুট্ঠুতায, ২ - সঙ্ঘফাসুতায, ৩ - দুম্মঙ্কূনং পুগ্গলানং নিগ্গহায, ৪ - পেসলানং ভিক্খূনং ফাসুৱিহাৰায, ৫ - দিট্ঠধম্মিকানং আসৱানং সংৱৰায, ৬ - সম্পৰাযিকানং আসৱানং পটিঘাতায, ৭ - অপ্পসন্নানং পসাদায, ৮ - পসন্নানং ভিয্যোভাৱায, ৯ - সদ্ধম্মট্ঠিতিযা, ১০ - ৱিনযানুগ্গহায.
পুচ্ছা – কে আৱুসো সিক্খন্তি.
ৱিস্সজ্জনা – সেক্খাচ ভন্তে পুথুজ্জনকল্যাণকাচ সিক্খন্তি.
পুচ্ছা – কে আৱুসো সিক্খিতসিক্খা.
ৱিস্সজ্জনা – অৰহন্তো ভন্তে সিক্খিতসিক্খা.
পুচ্ছা – কত্থ আৱুসো ঠিতং.
ৱিস্সজ্জনা – সিক্খাকামেসু ভন্তে ঠিতং.
পুচ্ছা – কে আৱুসো ধাৰেন্তি.
ৱিস্সজ্জনা – যেসং ভন্তে ৱত্ততি তে ধাৰেন্তি.
পুচ্ছা – কস্স আৱুসো ৱচনং.
ৱিস্সজ্জনা – ভগৱতো ভন্তে ৱচনং অৰহতো সম্মাসম্বুদ্ধস্স.
পুচ্ছা – কেনাৱুসো আভতং.
ৱিস্সজ্জনা – পৰম্পৰায ভন্তে আভতং.
সংগাযনত্থায সঙ্ঘস্স ঞাপনং
সুণাতু মে ভন্তে সঙ্ঘো অহং ভন্তে আযস্মন্তং ৱিচিত্থসাৰাভিৱংসং তিপিটকধৰ ধম্মভণ্ডাগাৰিকং পঠমস্স পাৰাজিকস্স নিদানম্পি পুচ্ছিং, পুগ্গলম্পি পুচ্ছিং, ৱত্থুম্পি পুচ্ছিং, পঞ্ঞত্তি অনুপঞ্ঞত্তিআদীনিপি পুচ্ছিং, পুট্ঠো পুট্ঠোচ সো আযস্মাৱিচিত্তসাৰাভিৱংসো ৱিস্সজ্জেসি, ইতিহিদং ভন্তে পঠমং পাৰাজিক সিক্খাপদং নিম্মলং সুপৰিসুদ্ধং তস্সেৱ ভগৱতো ৱচনং অৰহতো সম্মাসম্বুদ্ধস্স, তস্মা যথাপুৰে মহাকস্সপাদযো মহাথেৰৱৰা পোৰাণসংগীতিকাৰা ব্ৰহ্মচৰিয সঙ্খাতস্স বুদ্ধসাসনস্স চিৰট্ঠিতিযা বহুজনহিতায বহুজনসুখায লোকানুকম্পায অত্থায হিতায সুখায দেৱমনুস্সানং ধম্মৱিনযং সঙ্গাযিংসুচেৱ অনুসঙ্গাযিংসুচ, এৱমেৱ মযম্পি দানি সব্বেৱ ছট্ঠসংগীতিমহাধম্মসভাপৰিযাপন্না ইদং পঠম পাৰাজিক সিক্খাপদং একতোসজ্ঝাযনৱসেন সংগাযেয্যাম.
ৰেৱতাভি পণ্ডিতধজ সাসনৱংস মহাধম্মৰাজগুৰুনো
অভিধজমহাৰট্ঠগুৰুনোচ সঙ্ঘনাযক মহাথেৰস্স
ওকাস দানকথা
সুণাতু মে ভন্তে সঙ্ঘো, মহতী অযং পৰিসা, এৱৰূপায পৰিসায ন সুকৰা সব্বসো কথং সাৱেতুং, তস্মা আযস্মতোচ সোভনস্স সাসনৰি সাৰামাধিৱাসিনো আযস্মতোচ ৱিচিত্তসাৰাভিৱংসস্স তিপিটকধৰ ধম্মভণ্ডাগাৰিকস্স ৱিনযপুচ্ছনভাৰঞ্চ ৱিনযৱিস্সজ্জনভাৰঞ্চ আৱহিতুং ওকাসং দম্মি, কৰোথ তুম্হে আৱুসো ছট্ঠসংগীতিপুব্বঙ্গমানি ৱিনযপুচ্ছন ৱিনযৱিস্সজ্জন কিচ্চানি যথাধম্মং যথাৱিনযং.
অগ্গমহাপণ্ডিত ভদন্ত সোভনত্থেৰেন
ঠপিতা পুচ্ছক সম্মুতি ঞাত্তি
সুণাতু মে ভন্তে সঙ্ঘো, যদি সঙ্ঘস্স পত্তকল্লং, অহং আযস্মন্তং ৱিচিত্তসাৰাভিৱংসং তিপিটকধৰ ধম্মভণ্ডাগাৰিকং ৱিনযং পুচ্ছেয্যং.
তিপিটকধৰ ধম্মভণ্ডাগাৰিক
ভদন্তৱিচিত্তসাৰাভিৱংসেন
ঠপিতা ৱিস্সজ্জক সম্মুতি ঞাত্তি
সুণাতু মে ভন্তে সঙ্ঘো, যদিসঙ্ঘস্স পত্তকল্লং, অহং আযস্মতা সোভনত্থেৰেন সঙ্ঘনাযক মহাথেৰস্স পটিনিধিভূতেন ৱিনযং পুট্ঠো ৱিস্সজ্জেয্যং.
দুতিয পাৰাজিক সিক্খাপুচ্ছা
পুচ্ছা – যং তেন আৱুসো ভগৱতা জানতা পস্সতা অৰহতা সম্মাসম্বুদ্ধেন দুতিযং পাৰাজিকং কত্থ পঞ্ঞত্তং.
ৱিস্সজ্জনা – ৰাজগহে ভন্তে পঞ্ঞত্তং.
পুচ্ছা – কং আৱুসো আৰব্ভ পঞ্ঞত্তং.
ৱিস্সজ্জনা – ধনিযং ভন্তে কুম্ভকাৰপুত্তং আৰব্ভ পঞ্ঞত্তং.
পুচ্ছা – কিস্মিং আৱুসো ৱত্থুস্মিং পঞ্ঞত্তং.
ৱিস্সজ্জনা – ধনিযো ভন্তে কুম্ভকাৰপুত্তো ৰঞ্ঞো দাৰূনি অদিন্নং আদিযি, তস্মিং ৱত্থুস্মিং পঞ্ঞত্তং.
পুচ্ছা – অত্থি আৱুসো তত্থ পঞ্ঞত্তি অনুপঞ্ঞত্তি অনুপ্পন্নপঞ্ঞত্তি.
ৱিস্সজ্জনা – একা ভন্তে পঞ্ঞত্তি একা অনুপঞ্ঞত্তি অনুপ্পন্নপঞ্ঞত্তি তস্মিং নত্থি.
পুচ্ছা – কা আৱুসো তত্থ মূলপঞ্ঞত্তি.
ৱিস্সজ্জনা – যো পন ভিক্খু অদিন্নং থেয্যসঙ্খাতং আদিযেয্য, যথাৰূপে অদিন্নাদানে ৰাজানো চোৰং গহেত্ৱা হনেয্যুংৱা বন্ধেয্যুংৱা পব্বাজেয্যুংৱা চোৰোসি বালোসি মুড়্হোসি থেনোসীতি তথাৰূপং ভিক্খু অদিন্নং আদিযমানো অযম্পি পাৰাজিকো হোতি অসংৱাসোতি অযং ভন্তে তত্থ মূলপঞ্ঞত্তি.
পুচ্ছা – কা আৱুসো তত্থ অনুপঞ্ঞত্তি.
ৱিস্সজ্জনা – গামাৱা অৰঞ্ঞাৱাতি অযং ভন্তে তত্থ অনুপঞ্ঞত্তি.
পুচ্ছা – কা আৱুসো তত্থ পৰিপুণ্ণপঞ্ঞত্তি.
ৱিস্সজ্জনা – যো পন ভিক্খু গামাৱা অৰঞ্ঞাৱা অদিন্নং থেয্যসঙ্খাতং আদিযেয্য, কথাৰূপে অদিন্নাদানে ৰাজানো চোৰং গহেত্ৱা হনেয্যুংৱা বন্ধেয্যুংৱা পব্বাজেয্যুংৱা চোৰোসি বালোসি মূড়্হোসি থেনোসীতি তথাৰূপং ভিক্খু অদিন্নং আদিযমানো অযম্পি পাৰাজিকো হোতি অসংৱাসোতি অযং ভন্তে তত্থ পৰিপুণ্ণপঞ্ঞত্তি.
পুচ্ছা – সব্বত্থপঞ্ঞত্তি নুখো আৱুসো পদেসপঞ্ঞত্তিনুখো.
ৱিস্সজ্জনা – সব্বত্থপঞ্ঞত্তি ভন্তে.
পুচ্ছা – সাধাৰণপঞ্ঞত্তিনুখো আৱুসো অসাধাৰণপঞ্ঞত্তি নুখো.
ৱিস্সজ্জনা – সাধাৰণপঞ্ঞত্তি ভন্তে.
পুচ্ছা – একতোপঞ্ঞত্তিনুখো আৱুসো উভতোপঞ্ঞত্তিনুখো.
ৱিস্সজ্জনা – উভতোপঞ্ঞত্তি ভন্তে.
পুচ্ছা – তস্মিং আৱুসো দুতিয পাৰাজিকে অদিন্নং আদিযন্তো কতি আপত্তিযো আপজ্জতি ৱিভজিত্ৱা ৱিস্সজ্জেহি.
ৱিস্সজ্জনা – অদিন্নং ভন্তে আদিযন্তো তিস্সো আপত্তিযো আপজ্জতি, পঞ্চ মাসকংৱা অতিৰেক পঞ্চ মাসকংৱা অগ্ঘনকং অদিন্নং থেয্যসঙ্খাতং আদিযতি আপত্তি পাৰাজিকস্স, ঊনপঞ্চমাসকংৱা অতিৰেকমাসকংৱা অদিন্নং থেয্যসঙ্খাতং আদিযতি আপত্তি থুল্লচ্চযস্স, মাসকংৱা ঊনমাসকৱা অগ্ঘনকং অদিন্নং থেয্যসঙ্খাতং আদিযতি আপত্তি দুক্কটস্স, অদিন্নং ভন্তে আদিযন্তো ইমা তিস্সো আপত্তিযো আপজ্জতি.
পুচ্ছা – কেসং আৱুসো অনাপত্তি.
ৱিস্সজ্জনা – দসন্নং ভন্তে পুগ্গলানং অনাপত্তি, সকসঞ্ঞিস্স, ৱিস্সাসগ্গাহেন গণ্হন্তস্স, তাৱকালিকং গণ্হন্তস্স, পেতপৰিগ্গহং গণ্হন্তস্স, তিৰচ্ছানগতপৰিগ্গহং গণ্হন্তস্স, পংসুকূলসঞ্ঞিস্স, উম্মত্তকস্স, খিত্তচিত্তস্স, ৱেদনাট্টস্স, আদিকম্মিকস্সাতি.
পুচ্ছা – পঞ্চন্নং আৱুসো পাতিমোক্খুদ্দেসানং কত্থোগধং কত্থপৰিযাপন্নং.
ৱিস্সজ্জনা – নিদানোগধং ভন্তে নিদানপৰিযাপন্নং.
পুচ্ছা – কতমেন আৱুসো উদ্দেসেন উদ্দেসং আগচ্ছতি.
ৱিস্সজ্জনা – দুতিযেন ভন্তে উদ্দেসেন উদ্দেসং আগচ্ছতি.
পুচ্ছা – চতুন্নং আৱুসো ৱিপত্তীনং কতমা ৱিপত্তি.
ৱিস্সজ্জনা – সীলৱিপত্তি ভন্তে.
পুচ্ছা – সত্তন্নং আৱুসো আপত্তিক্খন্ধানং কতমো আপত্তিক্খন্ধো.
ৱিস্সজ্জনা – পাৰাজিকাপত্তিক্খন্ধো ভন্তে.
পুচ্ছা – ছন্নং আৱুসো আপত্তিসমুট্ঠানানং কতিহি সমুট্ঠানেহি সমুট্ঠাতি.
ৱিস্সজ্জনা – তীহি ভন্তে সমুট্ঠানেহি সমুট্ঠাতি, সিযা কাযতোচ চিত্ততোচ সমুট্ঠাতি, ন ৱাচাতো, সিযা ৱাচাতোচ
চিত্ততোচ সমুট্ঠাতি, ন কাযতো, সিযা কাযতোচ ৱাচাতোচ চিত্ততোচ সমুট্ঠাতি.
পুচ্ছা – চতুন্নং আৱুসো অধিকৰণানং কতমং অধিকৰণং.
ৱিস্সজ্জনা – আপত্তাধিকৰণং ভন্তে.
পুচ্ছা – সত্তন্নং আৱুসো সমথানং কতিহি সমথেহি সম্মতি.
ৱিস্সজ্জনা – দ্ৱিহি ভন্তে সমথেহি সম্মতি সম্মুখাৱিনযেনচ পটিঞ্ঞাত কৰণেনচ.
পুচ্ছা – কো আৱুসো তত্থ ৱিনযো, কো তত্থ অভিৱিনযো.
ৱিস্সজ্জনা – পঞ্ঞত্তি ভন্তে ৱিনযো ৱিভত্তি অভিৱিনযো.
পুচ্ছা – কিংআৱুসো তত্থ পাতিমোক্খং কিং তত্থ অধিপাতিমোক্খং.
ৱিস্সজ্জনা – পঞ্ঞত্তি ভন্তে পাতিমোক্খং, ৱিভত্তি অধিপাতিমোক্খং.
পুচ্ছা – কা আৱুসো ৱিপত্তি.
ৱিস্সজ্জনা – অসংৱৰো ভন্তে ৱিপত্তি.
পুচ্ছা – কা আৱুসো সম্পত্তি.
ৱিস্সজ্জনা – সংৱৰো ভন্তে সম্পত্তি.
পুচ্ছা – কা আৱুসো পটিপত্তি.
ৱিস্সজ্জনা – ন এৱৰূপং কৰিস্সামীতি যাৱজীৱং আপাণকোটিকং সমাদায সিক্খতি সিক্খাপদেসু অযং ভন্তে তত্থ পটিপত্তি.
পুচ্ছা – কতি আৱুসো অত্থৱসে পটিচ্চ ভগৱতা দুতিযং পাৰাজিকং পঞ্ঞত্তং.
ৱিস্সজ্জনা – দস ভন্তে অত্থৱসে পটিচ্চ ভগৱতা দুতিযং পাৰাজিকং পঞ্ঞত্তং. সঙ্ঘসুট্ঠুতায সঙ্ঘফাসুতায দুম্মঙ্কূনং পুগ্গলানং নিগ্গহায পেসলানং ভিক্খূনং ফাসুৱিহাৰায দিট্ঠধম্মিকানং আসৱানং সংৱৰায সম্পৰাযিকানং আসৱানং পটিঘাতায অপ্পসন্নানং পসাদায পসন্নানং ভিয্যোভাৱায সদ্ধম্মট্ঠিতিযা ৱিনযানুগ্গহায.
পুচ্ছা – কো আৱুসো সিক্খন্তি.
ৱিস্সজ্জনা – সেক্খাচ ভন্তে পুথুজ্জনকল্যাণকাচ সিক্খন্তি.
পুচ্ছা – কে আৱুসো সিক্খিতসিক্খা.
ৱিস্সজ্জনা – অৰহন্তো ভন্তে সিক্খিতসিক্খা.
পুচ্ছা – কত্থ আৱুসো ঠিতং.
ৱিস্সজ্জনা – সিক্খাকামেসু ভন্তে ঠিতং.
পুচ্ছা – কে আৱুসো ধাৰেন্তি.
ৱিস্সজ্জনা – যেসং ভন্তে ৱত্ততি তে ধাৰেন্তি.
পুচ্ছা – কস্স আৱুসো ৱচনং.
ৱিস্সজ্জনা – ভগৱতা ভন্তে ৱচনং অৰহতো সম্মাসম্মুদ্ধস্স.
পুচ্ছা – কেনাৱুসো আভতং.
ৱিস্সজ্জনা – পৰম্পৰায ভন্তে আভতং.
পুচ্ছা – অত্থি নু খো আৱুসো তত্থ উপনেতব্বং ৱা অপনেতব্বং ৱা অক্খৰপদপচ্চাভট্ঠং ৱা ৱিৰদ্ধপদব্যঞ্জনং ৱা.
ৱিস্সজ্জনা – নত্থি ভন্তে.
‘‘সংগাযনত্থায সঙ্ঘস্স ঞাপনং’’
সুণাতু মে ভন্তে সঙ্ঘো অহং ভন্তে আযস্মন্তং ৱিচিত্তসাৰাভিৱংস তিপিটকধৰধম্মভণ্ডাগাৰিকং দুতিযস্স পাৰাজিকস্স নিদানম্পি পুচ্ছিং, পুগ্গলম্পি পুচ্ছিং, ৱত্থুম্পি পুচ্ছিং, পঞ্ঞত্তিম্পি পুচ্ছিং, অনুপঞ্ঞত্তিম্পি পুচ্ছিং, আপত্তিম্পি পুচ্ছিং, অনাপত্তিম্পি পুচ্ছিং, অঞ্ঞানিপি ঈদিসানি পুচ্ছিতব্বট্ঠানানি অনেকানি পুচ্ছিং, পুট্ঠো পুট্ঠোচ সো আযস্মা ৱিচিত্তসাৰাভিৱংসো ৱিস্সজ্জেসি. ইতি হিদং ভন্তে ইদং দুতিযং পাৰাজিক সিক্খাপদং নিম্মলং, সুপৰিসুদ্ধং, তস্সেৱ ভগৱতো ৱচনং অৰহতো সম্মাসম্বুদ্ধস্স, তস্মা যথা পুৰে মহাকস্স পাদযো মহাথেৰৱৰা পোৰাণসংগীতিকাৰা ব্ৰহ্মচৰিযসঙ্খাতস্স বুদ্ধসাসনস্স চিৰট্ঠিতিযা, বহুজনহিতায, বহুজনসুখায লোকানুকম্পায অত্থায, হিতায, সুখায, দেৱমনুস্সানং ধম্মৱিনযং সঙ্গাযিংসুচেৱ অনুসঙ্গাযিংসুচ, এৱমেৱ মযম্পি দানি সব্বেৱ ছট্ঠসংগীতিমহাধম্মসভাপৰিযাপন্না ইদং দুতিয পাৰাজিক সিক্খাপদং একতো গণসজ্ঝাযং কত্ৱা সমগ্গা সম্মোদমানা হুত্ৱা সঙ্গাযেয্যাম.
ততিয পাৰাজিক সিক্খাপুচ্ছা
পুচ্ছা – যং তেন আৱুসো ভগৱতা (প) সম্মাসম্বুদ্ধেন ততিযং পাৰাজিকং কত্থ পঞ্ঞত্তং.
ৱিস্সজ্জনা – ৱেসালিযং ভন্তে পঞ্ঞত্তং.
পুচ্ছা – কং আৱুসো আৰব্ভ পঞ্ঞত্তং.
ৱিস্সজ্জনা – সম্বহুলে ভন্তে ভিক্খূ আৰব্ভ পঞ্ঞত্তং.
পুচ্ছা – কিস্মিং আৱুসো ৱত্থুস্মিং পঞ্ঞত্তং.
ৱিস্সজ্জনা – সম্বহুলা ভন্তে ভিক্খু অঞ্ঞমঞ্ঞং জীৱিতা ৱোৰোপেসুং, তস্মিং ভন্তে ৱত্থুস্মিং পঞ্ঞত্তং.
পুচ্ছা – অত্থি নুখো আৱুসো তত্থ পঞ্ঞত্তি অনুপঞ্ঞত্তি অনুপ্পন্নপঞ্ঞত্তি.
ৱিস্সজ্জনা – একা ভন্তে পঞ্ঞত্তি, একা অনুপঞ্ঞত্তি, অনুপ্পন্নপঞ্ঞত্তি তস্মিং নত্থি.
পুচ্ছা – কা আৱুসো তত্থ মূলপঞ্ঞত্তি.
ৱিস্সজ্জনা – যোপন ভিক্খু সঞ্চিচ্চ মনুস্সৱিগ্গহং জীৱিতা ৱোৰোপেয্য, সত্থহাৰকংৱাস্স পৰিযেসেয্য অযম্পি পাৰাজিকো হোতি অসংৱাসোতি অযং ভন্তে তত্থ মূলপঞ্ঞত্তি.
পুচ্ছা – কা আৱুসো তত্থ অনুপঞ্ঞত্তি.
ৱিস্সজ্জনা – মৰণৱণ্ণং ৱা সংৱণ্ণেয্য মৰণায ৱা সমাদপেয্য অম্ভোপুৰিস কিং তুয্হিমিনা পাপকেন দুজ্জীৱিতেন মতন্তে জীৱিতা
সেয্যাতি ইতি চিত্তমনো চিত্তসঙ্কপ্পো অনেকপৰিযাযেন মৰণৱণ্ণং ৱা সংৱণ্ণেয্য মৰণায ৱা সমাদপেয্যাতি অযং ভন্তে তত্থ অনুপঞ্ঞত্তি.
পুচ্ছা – কা আৱুসো তত্থ পৰিপুণ্ণপঞ্ঞত্তি.