১০. ভিক্খুনিক্খন্ধক

পুচ্ছা – অট্ঠহি আৱুসো গৰুধম্মেহি উপসম্পদা ভগৱতা কত্থ অনুঞ্ঞাতা, কস্স অনুঞ্ঞাতা, কিস্মিঞ্চ ৱত্থুস্মিং অনুঞ্ঞাতা.

ৱিস্সজ্জনা – ৱেসালিযং ভন্তে মহাপজাপতিযা গোতমিযা অনুঞ্ঞাতা, মহাপজাপতি ভন্তে গোতমী সূনেহি পাদেহি ৰজোকিণ্ণেন গত্তেন দুক্খী দুম্মনা অস্সুমুখী ৰুদমানা বহিদ্ৱাৰকোট্ঠকে অট্ঠাসি, অথ খো ভন্তে আযস্মা আনন্দো মহাপজাপতিং গোতমিং তং কাৰণং পুচ্ছিত্ৱা ভগৱন্তং চতুক্খত্তুং যাচি মাতুগামস্স তথাগতপ্পৱেদিতে ধম্মৱিনযে আগাৰস্মা অনাগাৰিযং পব্বজ্জং, তস্মিং ভন্তে ৱত্থুস্মিং অনুঞ্ঞাতা.

পুচ্ছা – ভিক্খূহি আৱুসো ভিক্খুনিযো উপসম্পাদেতুং ভগৱতা কত্থ অনুঞ্ঞাতং, কং আৰব্ভ কিস্মিং ৱত্থুস্মিং অনুঞ্ঞাতং.

ৱিস্সজ্জনা – ৱেসালিযং ভন্তে মহাপজাপতিং গোতমিং আৰব্ভ অনুঞ্ঞাতং, মহাপজাপতি ভন্তে গোতমী ভগৱন্তং এতদৱোচ ‘‘কথাহং ভন্তে ইমাসু সাকিযানীসু পটিপজ্জামী’’তি, তস্মিং ভন্তে ৱত্থুস্মিং অনুঞ্ঞাতং.

পুচ্ছা – একতো উপসম্পন্নায আৱুসো ভিক্খুনিসঙ্ঘে ৱিসুদ্ধায ভিক্খুসঙ্ঘে উপসম্পাদেতুং ভগৱতা কত্থ অনুঞ্ঞাতং, কং আৰব্ভ কিস্মিং ৱত্থুস্মিং অনুঞ্ঞাতং.

ৱিস্সজ্জনা – সাৱত্থিযং ভন্তে সম্বহুলে ভিক্খূ আৰব্ভ অনুঞ্ঞাতং, সম্বহুলা ভন্তে ভিক্খূ ভিক্খুনীনং অন্তৰাযিকে ধম্মে পুচ্ছিংসু, উপসম্পদাপেক্খাযো ৱিত্থাযিংসু, মঙ্কূ অহেসুং, ন সক্খিংসু ৱিস্সজ্জেতুং, তস্মিং ভন্তে ৱত্থুস্মিং অনুঞ্ঞাতং.

পুচ্ছা – ভিক্খুনিক্খন্ধকং পুচ্ছিস্সং, সনিদানং সনিদ্দেসং. সমুক্কট্ঠপদানং আৱুসো কতি আপত্তিযো.

ৱিস্সজ্জনা – ভিক্খুনিক্খন্ধকং ৱিস্সজ্জিস্সং, সনিদানং সনিদ্দেসং. সমুক্কট্ঠপদানং ভন্তে দ্ৱে আপত্তিযো.