মহাৱগ্গপাড়ি
সংগাযনস্স পুচ্ছা ৱিস্সজ্জনা
পুচ্ছা – উভতো ৱিভঙ্গানন্তৰং আৱুসো পোৰাণকেহি সংগীতিকাৰমহাথেৰেহি কং নাম পাৱচনং সংগীতং.
ৱিস্সজ্জনা – উভতো ৱিভঙ্গানন্তৰং ভন্তে পোৰাণকেহি সংগীতিকাৰমহাথেৰেহি খন্ধকা সংগীতা.
পুচ্ছা – তে পন আৱুসো খন্ধকা ৱগ্গভেদেন কতিৱিধা.
ৱিস্সজ্জনা – তে পন ভন্তে খন্ধকা দুৱিধা ৱগ্গভেদেন মহাৱগ্গো চূড়ৱগ্গোতি.
পুচ্ছা – মহাৱগ্গে আৱুসো কতি খন্ধকা পৰিযাপন্না.
ৱিস্সজ্জনা – মহাৱগ্গে ভন্তে দসখন্ধকা পৰিযাপন্না, সেয্যথিদং, মহাখন্ধকো উপোসথক্খন্ধকো ৱস্সূপনাযিকক্খন্ধকো পৱাৰণাক্খন্ধকো চম্মক্খন্ধকো ভেসজ্জক্খন্ধকো কথিনক্খন্ধকো চীৱৰক্খন্ধকো চম্পেয্যক্খন্ধকো কোসম্বকক্খন্ধকোতি.
পুচ্ছা – মহাখন্ধকে আৱুসো বহূ কথাযো, কতমা তাসং আদিকথা.
ৱিস্সজ্জনা – মহাখন্ধকে ভন্তে বোধিকথা আদি.
মহাখন্ধক
মহাবোধিপুচ্ছা
পুচ্ছা – তস্মাতিহ আৱুসো ততো পট্ঠায তং পুচ্ছিস্সামি, ভগৱা আৱুসো পঠমাভিসম্বুদ্ধকালে কত্থ কীৱচীৰং কেনাকাৰেন ৱিহাসি.
ৱিস্সজ্জনা – ভগৱা ভন্তে পঠমাভিসম্বুদ্ধো বোধিৰুক্খমূলে সত্তাহং একপল্লঙ্কেন ৱিহাসি ৱিমুত্তিসুখং পটিসংৱেদী.
পুচ্ছা – তদা আৱুসো ভগৱা কীদিসং ধম্মং মনসিকত্ৱা কীদিসং উদানং উদানেসি.
ৱিস্সজ্জনা – তদা ভন্তে ভগৱা ৰত্তিযা পঠমং যামং ৰত্তিযা মজ্ঝিমং যামং ৰত্তিযা পচ্ছিমং যামং পটিচ্চসমুপ্পাদং অনুলোমং পটিলোমং মনসিকত্ৱা তীণি উদানানি উদানেসি.
অজপাল
পুচ্ছা – তস্স আৱুসো সত্তাহস্স অচ্চযেন ভগৱা কত্থ ৱিহাসি.
ৱিস্সজ্জনা – তস্স ভন্তে সত্তাহস্স অচ্চযেন ভগৱা অজপাল নিগ্ৰোধমূলে ৱিহাসি, সত্তাহং একপল্লঙ্কেন ৱিহাসি ৱিমুত্তিসুখং পটিসংৱেদী.
মুচলিন্দা
পুচ্ছা – তস্সপি আৱুসো সত্তাহস্স অচ্চযেন ভগৱা কত্থ ৱিহাসি.
ৱিস্সজ্জনা – তস্স ভন্তে সত্তাহস্স অচ্চযেন ভগৱা মুচলিন্দমূলে সত্তাহং একপল্লঙ্কেন নিসীদি.
পুচ্ছা – তস্সপি আৱুসো সত্তাহস্স অচ্চযেন ভগৱা কত্থ ৱিহাসি.
ৱিস্সজ্জনা – তস্সপি ভন্তে সত্তাহস্স অচ্চযেন ভগৱা ৰাজাযতনমূলে সত্তাহং একপল্লঙ্কেন নিসীদি ৱিমুত্তিসুখং পটিসংৱেদী.
পুচ্ছা – তস্সপি আৱুসো সত্তাহস্স অচ্চযেন ভগৱা কত্থ ৱিহাসি.
ৱিস্সজ্জনা – তস্স ভন্তে সত্তাহস্স অচ্চযেন ভগৱা পুনদেৱ অজপালনিগ্ৰোধমূলে ৱিহাসি.
পুচ্ছা – তস্মিং পন আৱুসো অজপালনিগ্ৰোধে ৱিহৰন্তস্স ভগৱতো কথং চেতসো পৰিৱিতক্কো উদপাদি.
ৱিস্সজ্জনা – তস্মিং পন ভন্তে অজপালনিগ্ৰোধে ৱিহৰন্তস্স ভগৱতো ৰহোগতস্স পটিসল্লীনস্স ধম্মগম্ভীৰতাপটিসংযুত্তো চেতসো পৰিৱিতক্কো উদপাদি.
অধিগতো খো ম্যাযং ধম্মো গম্ভীৰো দুদ্দসো অৰনুবোধো সন্তো পণীতো অতক্কাৱচৰা নিপুণো পণ্ডিতৱেদনীযো.
আলযৰামাখো পনাযং পজা আলযৰতা আলযসম্মুদিতা,
সহম্পতি ব্ৰহ্মা
পুচ্ছা – কথং আৱুসো তদা ধম্মদেসনায ব্ৰহ্মযাচনা চ ভগৱতো পটিঞ্ঞাচ অহোসি.
ৱিস্সজ্জনা – দেসেতু ভন্তে ভগৱা ধম্মং, দেসেতু সুগতো ধম্মং, সন্তি সত্তা অপ্পৰজক্খজাতিকা অস্সৱনতা ধম্মস্স পৰিহাযন্তি, ভৱিস্সন্তি ধম্মস্স অঞ্ঞাতাৰোতি ইতি ভন্তে ব্ৰহ্মুনো ধম্মদেসনায যাচনা অহোসি,
‘‘অপাৰুতা তেসং অমতস্স দ্ৱাৰা,
যে সোতৱন্তো পমুঞ্চন্তু সদ্ধং;
ৱিহিংসসঞ্ঞী পগুণং নভাসিং,
ধম্মং পণীতং মনুজেসু ব্ৰহ্মে’’তি.
এৱং খো ভন্তে ভগৱতো ধম্মদেসনায পটিঞ্ঞা চ অহোসি.
নস্সতি ৱত লোকো…
দেসেতু ভন্তে ভগৱা ধম্মং…
অপাৰুতা তেসং অমতস্স দ্ৱাৰা,
যে সোতৱন্তো পমুঞ্চন্তু সদ্ধং.
পুচ্ছা – এৱং খো আৱুসো ভগৱা ধম্মদেসনায পটিঞ্ঞং কত্ৱা পঠমং ধম্মং দেসেন্তো কত্থ কীদিসং ধম্মং কস্স দেসেসি.
ৱিস্সজ্জনা – বাৰাণসিযং ভন্তে ইসিপতনে মিগদাযে পঞ্চৱগ্গিয ভিক্খুপমুখানং ব্ৰহ্মগণানং ধম্মচক্কপৱত্তনসুত্তং দেসেসি.
পুচ্ছা – তস্মিং খো পন আৱুসো ধম্মচক্কপৱত্তনসুত্তে দেসিযমানে মনুস্সলোকে কস্স ধম্মাভিসমযো অহোসি.
ৱিস্সজ্জনা – আযস্মতো ভন্তে কোণ্ডঞ্ঞস্স ধম্মাভিসমযো অহোসি.
পুচ্ছা – কথং নু খো আৱুসো ইমস্মিং বুদ্ধসাসনে পঠমং পব্বজ্জা চ উপসম্পদা চ অহোসি.
ৱিস্সজ্জনা – ইমস্মিং ভন্তে বুদ্ধসাসনে পঠমং এহিভিক্খুপসম্পদা অহোসি.
লভেয্যাহং ভন্তে ভগৱতো সন্তিকে পব্বজং, লভেয্যং উপসম্পদং.
এহি ভিক্খু স্ৱাখাতো ধম্মো, চৰ ব্ৰহ্মচৰিযং সম্মা দুক্খস্স অন্তকিৰিযায.
পুচ্ছা – ইতৰেসং পন আৱুসো চতুন্নং পঞ্চৱগ্গিযানং কদা ধম্মাভিসমযো অহোসি.
ৱিস্সজ্জনা – পাটিপদে ভন্তে দিৱসে আযস্মতো ৱপ্পস্স, দুতিযে ভন্তে দিৱসে আযস্মতো ভদ্দিযস্স, ততিযে ভন্তে দিৱসে আযস্মতো মহানামস্স, চতুত্থে ভন্তে দিৱসে আযস্মতো অস্সজিস্স ধম্মাভিসমযো অহোসি.
পুচ্ছা – সব্বেসম্পি আৱুসো তেসং পঞ্চৱগ্গিযানং ভিক্খূনং কদা অৰহত্তপত্তি হোতি.
ৱিস্সজ্জনা – সব্বেসম্পি ভন্তে তেসং পঞ্চৱগ্গিযানং ভিক্খূনং পক্খস্স পঞ্চমিযং অনত্তলক্খণসুত্তে দেসিযমানে অৰহত্তপত্তি হোতি.
পুচ্ছা – কদা আৱুসো ভগৱতা ভিক্খূ তত্থ তত্থ চাৰিকং চৰিত্ৱা ধম্মদেসনত্থায পেসিতা.
ৱিস্সজ্জনা – যসপ্পমুখানং ভন্তে চতুপঞ্ঞাস সহাযকানং পব্বজিতকালে ভগৱতা ভিক্খূ তত্থ তত্থ চাৰিকং চৰিত্ৱা ধম্মদেসনত্থায পেসিতা.
সৰণগমন
পুচ্ছা – কদা আৱুসো ভগৱতা তীহি সৰণগমনেহি পব্বজ্জূপ সম্পদা অনুঞ্ঞাতো অহোসি.
ৱিস্সজ্জনা – যসপ্পমুখানং ভন্তে চতুপঞ্ঞাসায গিহি সহাযকানং পব্বজিত্ৱা তত্থ তত্থ চাৰিকং চৰিত্ৱা ধম্মদেসনত্থায পেসিতকালে ভগৱতা তীহি সৰণগমনেহি পব্বজ্জা চ উপসম্পদা চ অনুঞ্ঞাতা.
অনুজানামি ভিক্খৱে তুম্হেৱ দানি তাসু তাসু দিসাসু তেসু তেসু জনপদেসু পব্বাজেথ উপসম্পাদেথ.
পুচ্ছা – ভগৱতা আৱুসো ভিক্খূনং আৰামো পটিগ্গণ্হিতুং কত্থ কিস্মিং ৱত্থুস্মিং অনুঞ্ঞাতো.
ৱিস্সজ্জনা – ভগৱতা ভন্তে ভিক্খূনং আৰামং পটিগ্গণ্হিতুং ৰাজগহে অনুঞ্ঞাতো, ৰাজা ভন্তে মাগধো সেনিযো বিম্বিসাৰো বুদ্ধপ্পমুখস্স ভিক্খুসঙ্ঘস্স ৱেড়ুৱনং উয্যানং অদাসি, তস্মিং ভন্তে ৱত্থুস্মিং অনুঞ্ঞাতো.
এতাহং ভন্তে ৱেড়ুৱনং উয্যানং বুদ্ধপ্পমুখস্স ভিক্খুসঙ্ঘস্স দম্মি –
অনুজানামি ভিক্খৱে আৰামং.
পুচ্ছা – কথঞ্চ আৱুসো দ্ৱিন্নং অগ্গসাৱকানং পব্বজ্জূপসম্পদা অহোসি.
ৱিস্সজ্জনা – দ্ৱিন্নং ভন্তে অগ্গসাৱকানং এহি ভিক্খুপসম্পদা অহোসি.
ৱিপ্পসন্নানি খো তে আৱুসো ইন্দ্ৰিযানি.
কংসি ত্ৱং আৱুসো উদ্দিস্স পব্বজিতো.
কো ৱা তে সত্থা.
কস্স ৱা ত্ৱং ধম্মং ৰোচেসি.
অত্থাৱুসো মহাসমণো সক্যপুত্তো সক্যকুলা পব্বজিতো.
কিং ৱাদী পনাযস্মতো সত্থা কিমক্খাযী.
যে ধম্মা হেতুপ্পভৱা, তেসং হেতুং তথাগতো;
আহ তেসঞ্চ যো নিৰোধো, এৱং ৱাদী মহাসমণো.
অলং আৱুসো মা অগমিত্থ.
এতে ভিক্খৱে দ্ৱে সহাযকা আগচ্ছন্তি কোলিতো উপতিস্সো চ এতং মে সাৱকযুগং ভৱিস্সতি অগ্গং ভদ্দযুগং.
লভেয্যাম মযং ভন্তে ভগৱতো সন্তিকে পব্বজ্জং লভেয্যাম উপসম্পদং.
এথ ভিক্খৱো স্ৱাখাতো ধম্মো, চৰথ ব্ৰহ্মচৰিযং সম্মা দুক্খস্স অন্তকিৰিযায.
পুচ্ছা – উপজ্ঝাযো আৱুসো গণ্হিতুং ভগৱতা কত্থ অনুঞ্ঞাতো, কং আৰব্ভ কিস্মিং ৱত্থুস্মিং অনুঞ্ঞাতো.
ৱিস্সজ্জনা – ৰাজগহে ভন্তে সম্বহুলে ভিক্খূ আৰব্ভ অনুঞ্ঞাতো, সম্বহুলা ভন্তে ভিক্খূ অনুপজ্ঝাযকা অনাচৰিযকা অনোৱদিযমানা অননুসাসিযমানা দুন্নিৱত্থা দুপ্পাৰুতা অনোকপ্পসম্পন্না পিণ্ডায চৰিংসু, তস্মিং ভন্তে ৱত্থুস্মিং অনুঞ্ঞাতো.
পুচ্ছা – উপজ্ঝাযম্হি আৱুসো ন সম্মাৱত্তন্তস্স দুক্কটং কত্থ পঞ্ঞত্তং, কং আৰব্ভ কিস্মিং ৱত্থুস্মিং পঞ্ঞত্তং.
ৱিস্সজ্জনা – ৰাজগহে ভন্তে সম্বহুলে সদ্ধিৱিহাৰিকে আৰব্ভ পঞ্ঞত্তং, সম্বহুলা ভন্তে সদ্ধিৱিহাৰিকা উপজ্ঝাযম্হি ন সম্মাৱত্তিংসু, তস্মিং ভন্তে ৱত্থুস্মিং পঞ্ঞত্তং.
পুচ্ছা – কদা আৱুসো ভগৱতা তীহি সৰণগমনেহি উপসম্পদং পটিক্খিপিত্ৱা ঞাতিচতুত্থেন কম্মেন উপসম্পদা অনুঞ্ঞাতা.
ৱিস্সজ্জনা – ৰাধব্ৰাহ্মণস্স ভন্তে পব্বজিতকালে ভগৱতা তীহি সৰণগমনেহি উপসম্পদং পটিক্খিপিত্ৱা ঞাত্তিচতুত্থেন কম্মেন উপসম্পদা অনুঞ্ঞাতা.
কোনু খো ভিক্খৱে তস্স ব্ৰাহ্মণস্স অধিকাৰং সৰতি.
অহং খো ভন্তে তস্স ব্ৰাহ্মণস্স অধিকাৰং সৰামি.
সাধু সাধু সাৰিপুত্ত, কতঞ্ঞুনো হি সাৰিপুত্ত সপ্পুৰিসা কতৱেদিনো.
কথাহং ভন্তে তং ব্ৰাহ্মণং উপসম্পাদেমি.
যাসা ভিক্খৱে মযা তীহি সৰণগমনেহি উপসম্পদাঅনুঞ্ঞাতা, তং অজ্জতগ্গে পটিক্খিপামি.
অনুজানামি ভিক্খৱে ঞাত্তিচতুত্থেন কম্মেন উপসম্পাদেতুং.
পুচ্ছা – অযাচিতকং আৱুসো উপসম্পদাপেক্খং উপসম্পাদেন্তস্স দুক্কটং ভগৱতা কত্থ পঞ্ঞত্তং, কং আৰব্ভ কিস্মিং ৱত্থুস্মিং পঞ্ঞত্তং.
ৱিস্সজ্জনা – ৰাজগহে ভন্তে অঞ্ঞতৰং ভিক্খুং আৰব্ভ পঞ্ঞত্তং, অঞ্ঞতৰো ভন্তে ভিক্খু উপসম্পন্নসমনন্তৰং অনাচাৰং অচৰি, তস্মিং ভন্তে ৱত্থুস্মিং পঞ্ঞত্তং.
পুচ্ছা – চতুন্নং আৱুসো নিস্সযানং আচিক্খণা ভগৱতা কত্থ অনুঞ্ঞাতা, কং আৰব্ভ কিস্মিং ৱত্থুস্মিং অনুঞ্ঞাতা.
ৱিস্সজ্জনা – ৰাজগহে ভন্তে অঞ্ঞতৰং ভিক্খুং আৰব্ভ অনুঞ্ঞাতা, অঞ্ঞতৰো ভন্তে ভিক্খু উদৰস্স কাৰণা পব্বজি, তস্মিং ভন্তে ৱত্থুস্মিং অনুঞ্ঞাতা.
এহি দানি আৱুসো পিণ্ডায চৰিস্সাম.
কথঞ্হি নাম ভিক্খু এৱং স্ৱাক্খাতে ধম্মৱিনযে উদৰস্স কাৰণা পব্বজিস্সতি.
পুচ্ছা – ঊনদসৱস্সেন আৱুসো উপসম্পাদেন্তস্স দুক্কটং ভগৱতা কত্থ পঞ্ঞত্তং, কং আৰব্ভ কিস্মিং ৱত্থুস্মিং পঞ্ঞত্তং.
ৱিস্সজ্জনা – ৰাজগহে ভন্তে আযস্মন্তং উপসেনং ৱঙ্গন্তপুত্তং আৰব্ভ পঞ্ঞত্তং, আযস্মা ভন্তে উপসেনো ৱঙ্গন্তপুত্তো একৱস্সো সদ্ধিৱিহাৰিকং উপসম্পাদেসি, তস্মিং ভন্তে ৱত্থুস্মিং পঞ্ঞত্তং.
পুচ্ছা – বালেন আৱুসো অব্যত্তেন উপসম্পাদেন্তস্স দুক্কটং ভগৱতা কত্থ পঞ্ঞত্তং, কং আৰব্ভ কিস্মিং ৱত্থুস্মিং পঞ্ঞত্তং.
ৱিস্সজ্জনা – ৰাজগহে ভন্তে সম্বহুলে ভিক্খূ আৰব্ভ পঞ্ঞত্তং, সম্বহুলা ভন্তে ভিক্খূ ‘‘দসৱস্সম্হা দসৱস্সম্হা’’তি বালা অব্যত্তা উপসম্পাদেসুং, তস্মিং ভন্তে ৱত্থুস্মিং পঞ্ঞত্তং.
পুচ্ছা – আচৰিযো আৱুসো গণ্হিতুং ভগৱতা কত্থ অনুঞ্ঞাতো, কং আৰব্ভ কিস্মিং ৱত্থুস্মিং অনুঞ্ঞাতো.
ৱিস্সজ্জনা – ৰাজগহে ভন্তে সম্বহুলে ভিক্খূ আৰব্ভ অনুঞ্ঞাতো, সম্বহুলা ভন্তে ভিক্খূ উপজ্ঝাযেসু পক্কন্তেসুপি ৱিব্ভন্তেসুপি কালঙ্কতেসুপি পক্খসঙ্কন্তেসুপি অনাচৰিযকা অনোৱদিযমানা অননুসাসিযমানা দুন্নিৱত্থা দুপ্পাৰুতা অনাকপ্পসম্পন্না পিণ্ডায চৰিংসু, তস্মিং ভন্তে ৱত্থুস্মিং অনুঞ্ঞাতো.
পুচ্ছা – পঞ্চহি আৱুসো আবাধেহি ফুট্ঠং পব্বাজেন্তস্স দুক্কটং ভগৱতা কত্থ পঞ্ঞত্তং, কং আৰব্ভ কিস্মিং ৱত্থুস্মিং পঞ্ঞত্তং.
ৱিস্সজ্জনা – ৰাজগহে ভন্তে সম্বহুলে ভিক্খূ আৰব্ভ পঞ্ঞত্তং, সম্বহুলা ভন্তে ভিক্খূ পঞ্চহি আবাধেহি ফুট্ঠং পব্বাজেসুং, তস্মিং ভন্তে ৱত্থুস্মিং পঞ্ঞত্তং.
সাধু ভন্তে অয্যা পঞ্চহি আবাধেহি ফুট্ঠং ন পব্বাজেয্যুং…
পুচ্ছা – ৰাজভটং আৱুসো পব্বাজেন্তস্স দুক্কটং ভগৱতা কত্থ পঞ্ঞত্তং, কং আৰব্ভ কিস্মিং ৱত্থুস্মিং পঞ্ঞত্তং.
ৱিস্সজ্জনা – ৰাজগহে ভন্তে সম্বহুলে ভিক্খূ আৰব্ভ পঞ্ঞত্তং, সম্বহুলা ভন্তে ভিক্খূ ৰাজভটে পব্বাজেসুং, তস্মিং ভন্তে ৱত্থুস্মিং পঞ্ঞত্তং.
পুচ্ছা – ধজবন্ধং আৱুসো চোৰং পব্বাজেন্তস্স দুক্কটং ভগৱতা কত্থ পঞ্ঞত্তং, কং আৰব্ভ কিস্মিং ৱত্থুস্মিং পঞ্ঞত্তং.
ৱিস্সজ্জনা – ৰাজগহেযেৱ ভন্তে অঙ্গুলিমালং চোৰং আৰব্ভ পঞ্ঞত্তং, অঙ্গুলিমালো ভন্তে চোৰো ভিক্খূসু পব্বজিতো হোতি, তস্মিং ভন্তে ৱত্থুস্মিং পঞ্ঞত্তং.
পুচ্ছা – কাৰভেদকং আৱুসো চোৰং পব্বাজেন্তস্স দুক্কটং ভগৱতা কত্থ পঞ্ঞত্তং, কং আৰব্ভ কিস্মিং ৱত্থুস্মিং পঞ্ঞত্তং.
ৱিস্সজ্জনা – ৰাজগহেযেৱ ভন্তে সম্বহুলে ভিক্খূ আৰব্ভ পঞ্ঞত্তং, সম্বহুলা ভন্তে ভিক্খূ কাৰভেদকচোৰং পব্বাজেসুং, তস্মিং ভন্তে ৱত্থুস্মিং পঞ্ঞত্তং.
পুচ্ছা – ইণাযিকং আৱুসো পব্বাজেন্তস্স দুক্কটং ভগৱতা কত্থ পঞ্ঞত্তং, কং আৰব্ভ কিস্মিং ৱত্থুস্মিং পঞ্ঞত্তং.
ৱিস্সজ্জনা – ৰাজগহেযেৱ ভন্তে সম্বহুলে ভিক্খূ আৰব্ভ পঞ্ঞত্তং, সম্বহুলা ভন্তে ভিক্খূ ইণাযিকং পব্বাজেসুং, তস্মিং ভন্তে ৱত্থুস্মিং পঞ্ঞত্তং.
পুচ্ছা – দাসং আৱুসো পব্বজেন্তস্স দুক্কটং ভগৱতা কত্থ পঞ্ঞত্তং, কং আৰব্ভ কিস্মিং ৱত্থুস্মিং পঞ্ঞত্তং.
ৱিস্সজ্জনা – ৰাজগহেযেৱ ভন্তে সম্বহুলে ভিক্খূ আৰব্ভ পঞ্ঞত্তং, সম্বহুলা ভন্তে ভিক্খূ দাসং পব্বাজেসুং, তস্মিং ভন্তে ৱত্থুস্মিং পঞ্ঞত্তং.
পুচ্ছা – ভণ্ডুকম্মায আৱুসো অপলোকনং ভগৱতা কত্থ অনুঞ্ঞাতং, কং আৰব্ভ কিস্মিং ৱত্থুস্মিং অনুঞ্ঞাতং.
ৱিস্সজ্জনা – ৰাজগহেযেৱ ভন্তে অঞ্ঞতৰং কম্মাৰভণ্ডুপুত্তং আৰব্ভ অনুঞ্ঞাতং অঞ্ঞতৰো ভন্তে কম্মাৰভণ্ডুপুত্তো মাতাপিতূহি সদ্ধিং ভণ্ডিত্ৱা ভিক্খূসু পব্বজিতো হোতি, তস্মিং ভন্তে ৱত্থুস্মিং অনুঞ্ঞাতং.
পুচ্ছা – ঊনৱীসতিৱস্সস্স আৱুসো পুগ্গলস্স উপসম্পদা ভগৱতা কত্থ পটিক্খিত্তা, কং আৰব্ভ কিস্মিং ৱত্থুস্মিং পটিক্খিত্তা.
ৱিস্সজ্জনা – ৰাজগহে ভন্তে সম্বহুলে ভিক্খূ আৰব্ভ পটিক্খিত্তা, সম্বহুলা ভন্তে ভিক্খূ ঊনৱীসতিৱস্সং পুগ্গলং উপসম্পাদেসুং, তস্মিং ভন্তে ৱত্থুস্মিং পটিক্খিত্তা.
ন ভিক্খৱে জানং ঊনৱীসতিৱস্সো পুগ্গলো উপসম্পাদেতব্বো, যোউপসম্পাদেয্য, যথাধম্মো কাৰেতব্বো.
পুচ্ছা – মাতাপিতূহি আৱুসো অননুঞ্ঞাতং পুত্তং পব্বাজেন্তস্স দুক্কটং ভগৱতা কত্থ পঞ্ঞত্তং, কিস্মিং ৱত্থুস্মিং পঞ্ঞত্তং.
ৱিস্সজ্জনা – সক্কেসু ভন্তে পঞ্ঞত্তং, ৰাজা ভন্তে সুদ্ধোদনো ভগৱন্তং উপসঙ্কমিত্ৱা ৱৰং যাচি, সাধু ভন্তে অয্যাঅননুঞ্ঞাতং মাতাপিতূহি পুত্তং পব্বাজেয্যুন্তি, তস্মিং ভন্তে ৱত্থুস্মিং পঞ্ঞত্তং.
ন ভিক্খৱে অননুঞ্ঞাতো মাতাপিতূহি পুত্তো পব্বাজেতব্বো, যো পব্বাজেয্য, আপত্তিদুক্কটস্স.
পুচ্ছা – থেয্যসংৱাসকস্স আৱুসো উপসম্পদা ভগৱতা কত্থ পটিক্খিত্তা, কং আৰব্ভ কিস্মিং ৱত্থুস্মিং পটিক্খিত্তা.
ৱিস্সজ্জনা – সাৱত্থিযং ভন্তে অঞ্ঞতৰং পুৰাণকুলপুত্তং আৰব্ভ পটিক্খিত্তা, অঞ্ঞতৰো ভন্তে পুৰাণকুলপুত্তো খীণ কোলঞ্ঞো সামং পত্তচীৱৰং পটিযাদেত্ৱা কেসমস্সুং ওহাৰেত্ৱা কাসাযানি ৱত্থানি অচ্ছাদেত্ৱা আৰামং গন্ত্ৱা ভিক্খূহি সদ্ধিং সংৱসি, ভন্তে ৱত্থুস্মিং পটিক্খিত্তা.
পুচ্ছা – তিৰচ্ছানগতস্স আৱুসো উপসম্পদা ভগৱতা কত্থ পটিক্খিত্তা, কং আৰব্ভ কিস্মিং ৱত্থুস্মিং পটিক্খিত্তা.
ৱিস্সজ্জনা – সাৱত্থিযং ভন্তে অঞ্ঞতৰং নাগং আৰব্ভ পটিক্খিত্তা, অঞ্ঞতৰো ভন্তে নাগো মাণৱকৱণ্ণেন ভিক্খূ উপসঙ্কমিত্ৱা পব্বজ্জং যাচি, তং ভিক্খূ পব্বাজেসুং উপসম্পাদেসুং, তস্মিং ভন্তে ৱত্থুস্মিং পটিক্খিত্তা.
পুচ্ছা – মাতুঘাতকস্স চ আৱুসো পিতুঘাতকস্স চ উপসম্পদা ভগৱতা কত্থ পটিক্খিত্তা, কং আৰব্ভ কিস্মিং ৱত্থুস্মিং পটিক্খিত্তা.
ৱিস্সজ্জনা – সাৱত্থিযংযেৱ ভন্তে অঞ্ঞতৰং মাণৱকং আৰব্ভ পটিক্খিত্তা, অঞ্ঞতৰো চ ভন্তে মাণৱকো অঞ্ঞতৰো চ মাণৱকো মাতৰং জীৱিতা ৱোৰোপেসি পিতৰং জীৱিতা ৱোৰোপেসি, তস্মিং ভন্তে ৱত্থুস্মিং পটিক্খিত্তা.
মাতুঘাতকো ভিক্খৱে অনুপসম্পন্নো নউপসম্পাদেতব্বো, উপসম্পন্নো নাসেতব্বো, পিতুঘাতকো ভিক্খৱে অনুপসম্পন্নো নউপসম্পাদেতব্বো, উপসম্পন্নো নাসেতব্বো.
পুচ্ছা – অপত্তচীৱৰকং ৱা আৱুসো যাচিতপত্তচীৱৰকং ৱা উপসম্পাদেন্তস্স দুক্কটং ভগৱতা কত্থ পঞ্ঞত্তং, কং আৰব্ভ কিস্মিং ৱত্থুস্মিং পঞ্ঞত্তং.
ৱিস্সজ্জনা – সাৱত্থিযং ভন্তে সম্বহুলে ভিক্খূ আৰব্ভ পঞ্ঞত্তং, সম্বহুলা ভন্তে ভিক্খূ অপত্তচীৱৰকং উপসম্পাদেসুং, যাচিতকেন পত্তচীৱৰেন উপসম্পাদেসুং, তস্মিং ভন্তে ৱত্থুস্মিং পঞ্ঞত্তং.
পুচ্ছা – উপসম্পদং পুচ্ছিস্সং, সনিদানং সউদ্দেসং. সমুক্কট্ঠপদানং আৱুসো কতি আপত্তিযো.
ৱিস্সজ্জনা – উপসম্পদং ৱিস্সজ্জিস্সং, সনিদানং সনিদ্দেসং. সমুক্কট্ঠপদানং ভন্তে দ্ৱে আপত্তিযো.
২. উপোসথক্খন্ধক
পুচ্ছা – চাতুদ্দসে চ আৱুসো পন্নৰসে চ পক্খস্স চ অট্ঠমিযা সন্নিপতিত্ৱা ধম্মং ভাসিতুং ভগৱতা কত্থ অনুঞ্ঞাতং, কিস্মিং ৱত্থুস্মিং অনুঞ্ঞাতং.
ৱিস্সজ্জনা – ৰাজগহে ভন্তে সম্বহুলে ভিক্খূ আৰব্ভ অনুঞ্ঞাতা, সম্বহুলা ভন্তে ভিক্খূ চাতুদ্দেস পন্নৰসে অট্ঠমিযা চ পক্খস্স সন্নিপতিত্ৱা তুণ্হী নিসীদিংসু, তস্মিং ভন্তে ৱত্থুস্মিং অনুঞ্ঞাতা.
অনুজানামি ভিক্খৱে চাতুদ্দসে পন্নৰসে অট্ঠমিযা চ পক্খস্স সন্নিপতিতুং.
ননু নাম সন্নিপতিতেহি ধম্মো ভাসিতব্বো.
পুচ্ছা – কদা আৱুসো ভিক্খূনং পাতিমোক্খুদ্দেসো ভগৱতা অনুঞ্ঞাতো.
ৱিস্সজ্জনা – যদা ভন্তে ভগৱতো ৰহোগতস্স পটিসল্লীনস্স এৱং চেতসো পৰিৱিতক্কো উদপাদি ‘‘যংনূনাহং যানি মযা ভিক্খূনং পঞ্ঞত্তানি সিক্খাপদানি, তানি নেসং পাতিমোক্খুদ্দেসং অনুজানেয্যং, সো নেসং ভৱিস্সতি উপোসথকম্ম’’ন্তি তদা ভন্তে ভগৱতা ভিক্খূনং পাতিমোক্খুদ্দেসো অনুঞ্ঞাতো.
পুচ্ছা – সীমং আৱুসো সম্মনিতুং ভগৱতা কত্থ অনুঞ্ঞাতং, কিস্মিঞ্চ ৱত্থুস্মিং অনুঞ্ঞাতং.
ৱিস্সজ্জনা – ৰাজগহে ভন্তে অনুঞ্ঞাতং, ৰাজগহে ভন্তে ভগৱতি ৱিহৰতি ভিক্খূনং এতদহোসি ‘‘ভগৱতা পঞ্ঞত্তং এত্তাৱতা সামগ্গী, যাৱতা একাৱাসোতি কিত্তাৱতানুখো একাৱাসো হোতী’’তি, তস্মিং ভন্তে ৱত্থুস্মিং অনুঞ্ঞাতং.
পুচ্ছা – কতি আৱুসো উপোসথা দিৱসৱসেন চ কাৰকপুগ্গলৱসেন চ কাতব্বাকাৰৱসেন চ.
ৱিস্সজ্জনা – দিৱসৱসেন ভন্তে তযো উপোসথা, পুগ্গলৱসেন চ ভন্তে তযো উপোসথা, কাতব্বাকাৰৱসেন চ ভন্তে তযো উপোসথা.
পুচ্ছা – কতি আৱুসো উপোসথকম্মানি তেসু চ কীদিসং উপোসথকম্মং ভগৱতা অনুঞ্ঞাতং, কীদিসং অননুঞ্ঞাতং.
ৱিস্সজ্জনা – চত্তাৰিমানি ভন্তে উপোসথকম্মানি, অধম্মেন ৱগ্গং উপোসথকম্মং, অধম্মেন সমগ্গং উপোসথকম্মং, ধম্মেন ৱগ্গং উপোসথকম্মং, ধম্মেন সমগ্গং উপোসথকম্মং. তত্ৰ ভন্তে যদিদং অধম্মেন ৱগ্গং উপোসথকম্মং, অধম্মেন সমগ্গং উপোসথকম্মং ধম্মেন ৱগ্গং উপোসথকম্মং, এৱৰূপং ভন্তে উপোসথকম্মং অননুঞ্ঞাতং, তত্ৰ ভন্তে যদিদং ধম্মেন সমগ্গং উপোসথকম্মং, এৱৰূপং ভন্তে উপোসথকম্মং অনুঞ্ঞাতং.
পুচ্ছা – উপোসথং পুচ্ছিস্সং, সনিদানং সনিদ্দেসং. সমুক্কট্ঠপদানং আৱুসো কতি আপত্তিযো.
ৱিস্সজ্জনা – উপোসথং ৱিস্সজ্জিস্সং, সনিদানং সনিদ্দেসং. সমুক্কট্ঠপদানং ভন্তে তিস্সো আপত্তিযো.