আনাপানসংযুত্ত

মহাকপ্পিনসুত্ত

পুচ্ছা – আনাপানসংযুত্তে আৱুসো পোৰাণকেহি ধম্মসংগাহকমহাথেৰেহি সত্তমং সংগীতং মহাকপ্পিনসুত্তং ভগৱতা কত্থ কং আৰব্ভ কথঞ্চ ভাসিতং.

ৱিস্সজ্জনা – সাৱত্থিযং ভন্তে সম্বহুলে ভিক্খূ আৰব্ভ ‘‘পস্সথ নো তুম্হে ভিক্খৱে এতস্স ভিক্খুনো কাযস্স ইঞ্জিতত্তং ৱা ফন্দিতব্বং ৱা’’তি এৱমাদিনা ভগৱতা ভাসিতং.

ইচ্ছানঙ্গলসুত্ত

পুচ্ছা – তত্থেৱ আৱুসো দুতিযৱগ্গে পঠমং ইচ্ছানঙ্গলসুত্তং ভগৱতা কত্থ কং আৰব্ভ কথঞ্চ ভাসিতং.

ৱিস্সজ্জনা – ইচ্ছানঙ্গলে ভন্তে সম্বহুলে ভিক্খূ আৰব্ভ ‘‘সচে খো ভিক্খৱে অঞ্ঞতিত্থিযা পৰিব্বাজকা এৱং পুচ্ছেয্যুং ‘কতমে নাৱুসো ৱিহাৰেন সমণো গোতমো ৱস্সাৱাসং বহুলং ৱিহাসী’তি. এৱং পুট্ঠা তুম্হে ভিক্খৱে তেসং অঞ্ঞতিত্থিযানং পৰিব্বাজকানং এৱং ব্যাকৰেয্যাথ আনাপানস্সতিসমাধিনা খো আৱুসো ভগৱা ৱস্সাৱাসং বহুলং ৱিহাসী’’তি এৱমাদিনা ভন্তে ভগৱতা ভাসিতং.