সোতাপত্তিসংযুত্ত

চক্কৱত্তিৰাজসুত্ত

পুচ্ছা – সোতাপত্তিসংযুত্তে আৱুসো পোৰাণকেহি ধম্মসংগাহকমহাথেৰেহি পঠমং সংগীতং চক্কৱত্তিৰাজসুত্তং ভগৱতা কত্থ কং আৰব্ভ কথঞ্চ ভাসিতং.

ৱিস্সজ্জনা – সাৱত্থিযং ভন্তে সম্বহুলে ভিক্খূ আৰব্ভ ‘‘কিঞ্চাপি ভিক্খৱে ৰাজা চক্কৱত্তী চতুন্নং দীপানং ইস্সৰিযাধিপচ্চং ৰজ্জং কাৰেত্ৱা কাযস্স ভেদা পৰং মৰণা সুগতিং সগ্গং লোকং উপপজ্জতি দেৱানং তাৱতিংসানং সহব্যতং, সো তত্থ নন্দনে ৱনে অচ্ছৰাসঙ্ঘপৰিৱুতো দিব্বেহি চ পঞ্চহি কামগুণেহি সমপ্পিতো সমঙ্গীভূতো পৰিচাৰেতি সো চতূহি ধম্মেহি অসমন্নাগতো, অথ খো সো অপৰিমুত্তোৱ নিৰযা, অপৰিমুত্তো তিৰচ্ছানযোনিযা, অপৰিমুত্তো পেত্তিৱিসযা, অপৰিমুত্তো অপাযদুগ্গতিৱিনিপাতা’’তি এৱমাদিনা ভন্তে ভগৱতা ভাসিতং.

দীঘাৱু উপাসকসুত্ত

পুচ্ছা – তত্থেৱ আৱুসো পোৰাণকেহি ধম্মসংগাহকমহাথেৰেহি ততিযং সংগীতং দীঘাৱুউপাসকসুত্তং ভগৱতা কত্থ কং আৰব্ভ কিস্মিং ৱত্থুস্মিং কথঞ্চ ভাসিতং.

ৱিস্সজ্জনা – ৰাজগহে ভন্তে দীঘাৱুং উপাসকং আৰব্ভ ভাসিতং. ভগৱা ভন্তে দীঘাৱুং উপাসকং আবাধিকং দুক্খিতং বাড়্হগিলানং এতদৱোচ ‘‘কচ্চি তে দীঘাৱু খমনীযং, কচ্চি যাপনীযং, কচ্চি দুক্খা ৱেদনা পটিক্কমন্তি নো অভিক্কমন্তি, পটিক্কমোসানং পঞ্ঞাযতি নো অভিক্কমো’’তি. ন মে ভন্তে খমনীযং, ন যাপনীযং বাড়্হা মে দুক্খা ৱেদনা অভিক্কমন্তি নো পটিক্কমন্তি, অভিক্কমোসানং পঞ্ঞাযতি নো পটিক্কমোতি. তস্মিং ভন্তে ৱত্থুস্মিং ‘‘তস্মাতিহ তে দীঘাৱু এৱং সিক্খিতব্বং বুদ্ধে অৱেচ্চপ্পসাদেন সমন্নাগতো ভৱিস্সামী’’তি এৱমাদিনা ভগৱতা ভাসিতং.

যানিমানি ভন্তে ভগৱতা চত্তাৰি সোতাপত্তিযঙ্গানি দেসিতানি, সংৱিজ্জন্তে তে ধম্মা মযি–

তস্মাতিহ ত্ৱং দীঘাৱু ইমেসু চতূসু সোতাপত্তিযঙ্গেসু পতিট্ঠায ছ ৱিজ্জাভাগিযে ধম্মে উত্তৰি ভাৱেয্যাসি–

মা ত্ৱং তাত দীঘাৱু এৱং মনসাকাসি.

ইঙ্ঘ ত্ৱং তাত দীঘাৱু যদেৱ তে ভগৱা আহ, তদেৱ ত্ৱং সাধুকং মনসিকৰোহি.

পণ্ডিতো ভিক্খৱে দীঘাৱু উপাসকো.

পচ্চপাদি ধম্মস্সানুধম্মং.

ন চ মং ধম্মাধিকৰণং ৱিহেঠেসি.

দীঘাৱু ভিক্খৱে উপাসকো পঞ্চন্নং ওৰম্ভাগিযানং সংযোজনানং পৰিক্খযা ওপপাতিকো তত্থ পৰিনিব্বাযী অনাৱত্তিধম্মো তস্মা লোকা.

ৱেড়ুদ্ৱাৰেয্যসুত্ত

পুচ্ছা – তেনাৱুসো ভগৱতা…পে… সম্মাসম্বুদ্ধেন সোতাপত্তিসংযুত্তে সত্তমং সংগীতং ৱেড়ুদ্ৱাৰেয্যসুত্তং কত্থ কং আৰব্ভ কিস্মিং ৱত্থুস্মিং কথঞ্চ ভাসিতং.

ৱিস্সজ্জনা – কোসলেসু ভন্তে ৱেড়ুদ্ৱাৰে নাম কোসলানং ব্ৰাহ্মণ গামে ৱেড়ুদ্ৱাৰেয্যকে ব্ৰাহ্মণগহপতিকে আৰব্ভ ভাসিতং.

ৱেড়ুদ্ৱাৰেয্যকা ভন্তে ব্ৰাহ্মণগহপতিকা ভগৱন্তং এতদৱোচুং ‘‘মযং ভো গোতম এৱংকামা এৱংছন্দা এৱংঅধিপ্পাযা পুত্তসম্বাধসযনং অজ্ঝাৱসেয্যাম…পে… জাতৰূপৰজতং সাদিযেয্যাম, কাযস্স ভেদা পৰং মৰণা সুগতিং সগ্গং লোকং উপপজ্জেয্যাম, তেসং নো ভৱং গোতমো অম্হাকং এৱংকামানং এৱংছন্দানং এৱংঅধিপ্পাযানং তথা দম্মং দেসেতু, যথা মযং পুত্তসম্বাধসযনং অজ্ঝাৱসেয্যাম…পে… কাযস্স ভেদা পৰং মৰণা সুগতিং সগ্গং লোকং উপপজ্জেয্যামা’’তি. তস্মিং ভন্তে ৱত্থুস্মিং ‘‘অত্তূপনাযিকং ৱো গহপতযো ধম্মপৰিযাযং দেসেস্সামি, তং সুণাথ সাধুকং মনসি কৰোথ, ভাসিস্সামী’’তি এৱমাদিনা ভগৱতা ভাসিতং.