গহপতিৱগ্গ

ভাৰদ্ৱাজসুত্ত

পুচ্ছা – গহপতিৱগ্গে আৱুসো পোৰাণকেহি ধম্মসংগাহকমহাথেৰেহি চতুত্থং সংগীতং ভাৰদ্ৱাজসুত্তং কত্থ কং আৰব্ভ কিস্মিং ৱত্থুস্মিং কেন কথঞ্চ ভাসিতং.

ৱিস্সজ্জনা – কোসম্বিযং ভন্তে ৰাজানং উদেনং আৰব্ভ আযস্মতা পিণ্ডোলভাৰদ্ৱাজত্থেৰেন ভাসিতং. ৰাজা ভন্তে উদেনো আযস্মন্তং পিণ্ডোলভাৰদ্ৱাজং এতদৱোচ ‘‘কো নু খো ভো ভাৰদ্ৱাজ হেতু কো পচ্চযো, যেনিমে দহৰা ভিক্খূ সুসূ কাড়কেসা ভদ্ৰেন যোব্বনেন সমন্নাগতা পঠমেন ৱযসা অনিকীড়িতাৱিনো কামেসু যাৱজীৱং পৰিপুণ্ণং পৰিসুদ্ধং ব্ৰহ্মচৰিযং চৰন্তি, অদ্ধানঞ্চ আপাদেন্তী’’তি. তস্মিং ৱত্থুস্মিং ‘‘ৱুত্তং খো

এতং মহাৰাজ তেন ভগৱতা জানতা পস্সতা অৰহতা সম্মাসম্বুদ্ধেন এথ তুম্হে ভিক্খৱে মাতুমত্তীসু মাতুচিত্তং উপট্ঠপেথ. ভগনিমত্তীসু ভগিনিচিত্তং উপট্ঠপেথ, ধীতুমত্তীসু ধীতুচিত্তং উপট্ঠপেথা’’তি এৱমাদিনা ভন্তে আযস্মতা পিণ্ডোল ভাৰদ্ৱাজত্থেৰেন ভাসিতং.

ৱেৰহচ্চানিসুত্ত

পুচ্ছা – তত্থেৱ আৱুসো পোৰাণকেহি ধম্মসংগাহকমহাথেৰেহি দসমং সংগীতং ৱেৰহচ্চানিসুত্তং কত্থ কং আৰব্ভ কিস্মিং ৱত্থুস্মিং কেন কথঞ্চ ভাসিতং.

ৱিস্সজ্জনা – কামণ্ডাযং ভন্তে ৱেৰহচ্চানিগোত্তং ব্ৰাহ্মণিং আৰব্ভ আযস্মতা উদাযিত্থেৰেন ভাসিতং. ৱেৰহচ্চানীগোত্তা ভন্তে ব্ৰাহ্মণী আযস্মন্তং উদাযিত্থেৰং এতদৱোচ ‘‘কিস্মিং নু খো ভন্তে সতি অৰহন্তো সুখদুক্খং পঞ্ঞপেন্তি, কিস্মিং অসতি অৰহন্তো সুখদুক্খং ন পঞ্ঞপেন্তী’’তি. তস্মিং ৱত্থুস্মিং ‘‘চক্খুস্মিং খো ভগিনি সতি অৰহন্তো সুখদুক্খং পঞ্ঞপেন্তি, চক্খুস্মিং অসতি অৰহন্তো সুখদুক্খং ন পঞ্ঞপেন্তী’’তি এৱমাদিনা ভন্তে আযস্মতা উদাযিত্থেৰেন ভাসিতং.