গামণিসংযুত্ত

চণ্ডসুত্ত

পুচ্ছা – তেনাৱুসো ভগৱতা…পে… সম্মাসম্বুদ্ধেন গামণিসংযুত্তে পঠমং চণ্ডসুত্তং কত্থ কং আৰব্ভ কিস্মিং ৱত্থুস্মিং কথঞ্চ ভাসিতং.

ৱিস্সজ্জনা – সাৱত্থিযং ভন্তে চণ্ডং গামণিং আৰব্ভ ভাসিতং. চণ্ডো ভন্তে গামণি ভগৱন্তং এতদৱোচ ‘‘কো নু খো ভন্তে হেতু কো পচ্চযো, যেন মিধেকচ্চো চণ্ডো চণ্ডোত্ৱেৱ সঙ্খং গচ্ছতি. কো পন ভন্তে হেতু কো পচ্চযো, যেন মিধেকচ্চো সোৰতো সোৰতোত্ৱেৱ সঙ্খং গচ্ছতী’’তি. তস্মিং ভন্তে ৱত্থুস্মিং ‘‘ইধ গামণি একচ্চস্স ৰাগো অপ্পহীনো হোতি, ৰাগস্স অপ্পহীনত্তা পৰে কোপেন্তি, পৰেহি কোপিযমানো কোপং পাতুকৰোতি, সো চণ্ডোত্ৱেৱ সঙ্খং গচ্ছতী’’তি এৱমাদিনা ভগৱতা ভাসিতং.

খেত্তূপমসুত্ত

পুচ্ছা – তত্থেৱ আৱুসো পোৰাণকেহি ধম্মসংগাহকমহাথেৰেহি সত্তমং সংগীতং খেত্তূপমসুত্তং কত্থ কং আৰব্ভ কিস্মিং ৱত্থুস্মিং কথঞ্চ ভাসিতং.

ৱিস্সজ্জনা – নাড়ন্দাযং ভন্তে পাৱাৰিকম্বৱনে অসিবন্ধকপুত্তং গামণিং আৰব্ভ ভাসিতং. অসিবন্ধকপুত্তো ভন্তে গামণি ভগৱন্তং এতদৱোচ ‘‘ননু ভন্তে ভগৱা সব্বপাণভূতহিতানুকম্পী ৱিহৰতীতি. এৱং গামণি তথাগতো সব্বপাণভূতহিতানুকম্পী ৱিহৰতীতি. অথ কিঞ্চৰহি ভন্তে ভগৱা একচ্চানং সক্কচ্চং ধম্মং দেসেতি, একচ্চানং নো তথা সক্কচ্চং ধম্মং দেসেতী’’তি. তস্মিং ভন্তে ৱত্থুস্মিং ‘‘তেন হি গামণি তঞ্ঞেৱেত্থ পটিপুচ্ছিস্সামি, যথা তে খমেয্য, তথা নং ব্যাকৰেয্যাসী’’তি এৱমাদিনা ভগৱতা ভাসিতং.

সঙ্খধমসুত্ত

পুচ্ছা – তত্থেৱ আৱুসো পোৰাণকেহি ধম্মসংগাহক মহাথেৰেহি অট্ঠমং সংগীতং সঙ্খধমসুত্তং ভগৱতা কত্থ কং আৰব্ভ কিস্মিং ৱত্থুস্মিং কথঞ্চ ভাসিতং.

ৱিস্সজ্জনা – নাড়ন্দাযংযেৱ ভন্তে পাৱাৰিকম্বৱনে অসিবন্ধকপুত্তং গামণিং নিগণ্ঠসাৱকং আৰব্ভ ভাসিতং. ভগৱা ভন্তে অসিবন্ধকপুত্তং গামণিং নিগণ্ঠসাৱকং এতদৱোচ ‘‘কথং নু খো গামণি নিগণ্ঠো নাটপুত্তো সাৱকানং ধম্মং দেসেতী’’তি. এৱং খো ভন্তে নিগণ্ঠো নাটপুত্তো সাৱকানং ধম্মং দেসেতি ‘‘যো কোচি পাণং অতিপাতেতি, সব্বো সো আপাযিকো নেৰযিকো. (পেয্যাল) যংবহুলং যংবহুলং ৱিহৰতি, তেন তেন নীযতী’’তি. তস্মিং ভন্তে ৱত্থুস্মিং ‘‘যংবহুলং যংবহুলঞ্চ গামণি ৱিহৰতি, তেন তেন নীযতি, এৱং সন্তে ন কোচি আপাযিকো নেৰযিকো ভৱিস্সতি, যথা নিগণ্ঠস্স নাটপুত্তস্স ৱচন’’ন্তি এৱং খো ভগৱতা সংখিত্তেন ভাসিতং.

যং বহুলৱাদ

পুচ্ছা – কথঞ্চাৱুসো তত্থ ভগৱতা যংবহুলৱাদে দোসো পকাসিতো.

ৱিস্সজ্জনা – তং কিং মঞ্ঞসি গামণি, যো সো পুৰিসো পাণাতিপাতী ৰত্তিযা ৱা দিৱসস্স ৱা সমযাসমযং উপাদায কতমো বহুতৰো সমযো যং ৱাসো পাণমতিপাতেতি. যং ৱা সো পাণং নাতিপাতেতীতি এৱমাদিনা ভন্তে তত্থ ভগৱতা অসিবন্ধকং নিগণ্ঠনাটপুত্তস্স সাৱকং গামণিং পুচ্ছিত্ৱা পুচ্ছিত্ৱা যংবহুলৱাদে দোসো পকাসিতো.

পুচ্ছা – কথঞ্চাৱুসো তত্থ ভগৱতা অনেকংস ৱিপাককম্মস্স একং সৱিপাকৱাদে দোসো পকাসিতো.

ৱিস্সজ্জনা – ইধ গামণি একচ্চো সত্থা এৱংৱাদী হোতি এৱংদিট্ঠি যো কোচি পাণমতিপাতেতি, সব্বো সো আপাযিকো নেৰযিকোতি এৱমাদিনা ভন্তে তত্থ ভগৱতা অনেকংস কম্মৱিপাকস্স একংসৱিপাকৱাদে দোসো ৱিত্থাৰেত্ৱা পকাসিতো.

পুচ্ছা – কথঞ্চাৱুসো তত্থ ভগৱতা যথাধম্মসাসনে গুণোৱিভজিত্ৱা পকাসিতো.

ৱিস্সজ্জনা – ইধ পন গামণি তথাগতো লোকে উপ্পজ্জতি অৰহং সম্মাসম্বুদ্ধো ৱিজ্জাচৰণসম্পন্নো সুগতো লোকৱিদূ অনুত্তৰোপুৰিস দম্মসাৰথি সত্থাদেৱমনুস্সানং বুদ্ধো ভগৱা, সো অনেকপৰিযাযেন পাণাতিপাতং গৰহতি ৱিগৰহতি. ‘‘পাণাতিপাতা ৱিৰমথা’’তি চাহাতি এৱমাদিনা ভন্তে ভগৱতা তত্থ যথাধম্মসাসনে গুণো ৱিত্থাৰেত্ৱা পকাসিতো.

ভদ্ৰকসুত্ত

পুচ্ছা – তত্থেৱ আৱুসো পোৰাণকেহি ধম্মসংগাহকমহাথেৰেহি একাদসমং সংগীতং ভদ্ৰকসুত্তং ভগৱতা কত্থ কং আৰব্ভ কিস্মিং ৱত্থুস্মিং কথঞ্চ ভাসিতং.

ৱিস্সজ্জনা – মল্লেসু ভন্তে উৰুৱেলকপ্পেনাম মল্লানং নিগমে ভদ্ৰকং গামণিং আৰব্ভ ভাসিতং. ভদ্ৰকো ভন্তে গামণি ভগৱন্তং এতদৱোচ ‘‘সাধু মে ভন্তে ভগৱা দুক্খস্স সমুদযঞ্চ অত্থঙ্গমঞ্চ দেসেতূ’’তি. তস্মিং ভন্তে ৱত্থুস্মিং ‘‘অহঞ্চে তে গামণি অতীতমদ্ধানং আৰব্ভ দুক্খস্স সমুদযঞ্চ অত্থঙ্গমঞ্চ দেসেয্যং ‘এৱং অহোসি অতীতমদ্ধান’ন্তি. তত্ৰ তে সিযা কঙ্খা সিযা ৱিমতী’’তি এৱমাদিনা ভগৱতা ভাসিতং.

সাধু মে ভন্তে ভগৱা দুক্খস্স

সমুদযঞ্চ অত্থঙ্গমঞ্চ দেসেতু–

‘‘তং কিং মঞ্ঞসি গামণি, অত্থি উৰুৱেলকপ্পে মনুস্সা’’ –

ৰাসিযসুত্ত

পুচ্ছা – তেনাৱুসো ভগৱতা…পে… সম্মাসম্বুদ্ধেন গামণিসংযুত্তে দ্ৱাদসমং সংগীতং ৰাসিযসুত্তং কত্থ কং আৰব্ভ কিস্মিং ৱত্থুস্মিং কথঞ্চ ভাসিতং.

ৱিস্সজ্জনা – মল্লেসু ভন্তে উৰুৱেলকপ্পেনাম মল্লানং নিগমে ৰাসিযং গামণিং আৰব্ভ ভাসিতং. ৰাসিযো ভন্তে গামণি ভগৱন্তং উপসঙ্কমিত্ৱা এতদদোচ ‘‘সুতং মে ভন্তে ‘সমণো গোতমো সব্বং তপং গৰহতি, সব্বং তমস্সিং লূখজীৱিং একংসেন উপৱদতি উপক্কোসতী’’তি. যে তে ভন্তে এৱমাহংসু ‘সমণো গোতমো সব্বং তপং গৰহতি, সব্বং তপস্সিং লূখজীৱিং একংসেন উপৱদতি উপক্কোসতী’’তি. কচ্চি তে ভন্তে ভগৱতো ৱুত্তৱাদিনো, ন চ ভগৱন্তং অভূতেন অব্ভাচিক্খন্তি, ধম্মস্স চানুধম্মং ব্যাকৰোন্তী’’তি. তস্মিং ভন্তে ৱত্থুস্মিং যে তে গামণি এৱমাহংসু ‘‘সমণো গোতমো সব্বং তপং গৰহতি, সব্বং তপস্সিং লূখজীৱিং একংসেন উপৱদতি উপক্কোসতী’’তি এৱমাদিনা ভগৱতা ভাসিতং.

পুচ্ছা – কথঞ্চাৱুসো তত্থ ভগৱতা গৰহিতব্বাগৰহিতব্বা কামভোগিনো ৱিত্থাৰেন ৱিভজিত্ৱা পকাসিতা.

ৱিস্সজ্জনা – তযো খো মে গামণি কামভোগিনো সন্তো সংৱিজ্জমানা লোকস্মিং. কতমে তযো. ইধ গামণি একচ্চো কামভোগী অধম্মেন ভোগে পৰিযেসতি সাহসেন, অধম্মেন ভোগে পৰিযেসিত্ৱা সাহসেন ন অত্তানং সুখেতি ন পীণেতি, ন সংৱিভজতি ন পুঞ্ঞানি কৰোতীতি এৱমাদিনা ভন্তে তত্থ ভগৱতা গৰহিতব্বাগৰহিতব্বা কামভোগিনো ৱিত্থাৰেন ৱিভজিত্ৱা পকাসিতা.

পুচ্ছা – কথঞ্চাৱুসো তত্থ ভগৱতা গৰহিতব্বাগৰহিতব্বা তপস্সিনো লূখজীৱিনো ৱিত্থাৰেন ৱিভজিত্ৱা পকাসিতা.

ৱিস্সজ্জনা – তযো মে গামণি তপস্সিনো লূখজীৱিনো সন্তো সংৱিজ্জমানা লোকস্মিং. কতমে তযো. ইধ গামণী একচ্চো তপস্সী লূখজীৱী সদ্ধা অগাৰস্মা অনগাৰিযং পব্বজিতো হোতি ‘‘অপ্পেৱ নাম কুসলং ধম্মং অধিগচ্ছেয্যং, অপ্পেৱ নাম উত্তৰিমনুস্সধম্মা অলমৰিযঞাণদস্সনৱিসেসং সচ্ছিকৰেয্য’’ন্তি, সো অত্তানং আতাপেতি পৰিতাপেতি, কুসলঞ্চ ধম্মং নাধিগচ্ছতি, উত্তৰি চ মনুস্সধম্মা অলমৰিযঞাণদস্সনৱিসেসং ন সচ্ছিকৰোতীতি এৱমাদিনা ভন্তে তত্থ ভগৱতা গৰহিতব্বাগৰহিতব্বা তপস্সিনো লূখজীৱিনো ৱিত্থাৰেন ৱিভজিত্ৱা পকাসিতা.