লক্খণসংযুত্ত

অট্ঠিসুত্ত

পুচ্ছা – লক্খণসংযুত্তে পনাৱুসো পোৰাণকেহি ধম্মসংগাহকত্থেৰেহি পঠমং সংগীতং অট্ঠিসুত্তং ভগৱতা কত্থ কং আৰব্ভ কিস্মিং ৱত্থুস্মিং কথঞ্চ ভাসিতং.

ৱিস্সজ্জনা – ৰাজগহে ভন্তে আযস্মন্তঞ্চ লক্খণং আযস্মন্তঞ্চ মহামোগ্গল্লানং আৰব্ভ ভাসিতং. আযস্মা ভন্তে লক্খণো ভগৱতা সম্মুখে আযস্মন্তং মহামোগ্গল্লানং এতদৱোচ ‘‘ইধাযস্মা মহামোগ্গল্লানো গিজ্ঝকূটা পব্বতা ওৰোহন্তো অঞ্ঞতৰস্মিং পদেসে সিতং পাত্ৱাকাসি, কো নু খো আৱুসো মোগ্গল্লান হেতু, কো পচ্চযো সিতস্স পাতুকম্মাযা’’তি. আযস্মা চ ভন্তে মহামোগ্গল্লানো ‘‘ইধাহং আৱুসো গিজ্ঝকূটা পব্বতা ওৰোহন্তো অদ্দসং অট্ঠিকসঙ্খলিকং ৱেহাসং গচ্ছন্তিং’’তি এৱমাদিনা আৰোচেসি. তস্মিং ভন্তে ৱত্থুস্মিং ‘‘চক্খুভূতা ৱত ভিক্খৱে সাৱকা ৱিহৰন্তি, ঞাণভূতা ৱত ভিক্খৱে সাৱকা ৱিহৰন্তি, যত্ৰহি নাম সাৱকো এৱৰূপং ঞস্সতি ৱা দক্খতি ৱা সক্খিং ৱা কৰিস্সতী’’তি এৱমাদিনা ভগৱতা ভাসিতং.

অচ্ছৰিযং ৱত ভো, অব্ভুতং ৱত ভো;

এৱৰূপোপি নাম সত্তো ভৱিস্সতি.

পিণ্ডসুত্ত

পুচ্ছা – তেনাৱুসো জানতা…পে… সম্মাসম্বুদ্ধেন লক্খণসংযুত্তে ততিযং সংগীতং পিণ্ডসুত্তং কত্থ কং আৰব্ভ কিস্মিং ৱত্থুস্মিং কথঞ্চ ভাসিতং.

ৱিস্সজ্জনা – ৰাজগহে ভন্তে আযস্মন্তঞ্চ লক্খণং আযস্মন্তঞ্চ মহামোগ্গল্লানং আৰব্ভ ভাসিতং. আযস্মা ভন্তে লক্খণো ভগ্গৱতো সম্মুখে আযস্মন্তং মহামোগ্গল্লানং এতদৱোচ ‘‘ইধাযস্মা মহামোগ্গল্লানো গিজ্ঝকূটা পব্বতা ওৰোহন্তো অঞ্ঞতৰস্মিং পদেসে সিতং পাত্ৱাকাসি, কো নুখো আৱুসো মোগ্গল্লানহেতু, কো পচ্চযো সিতস্স পাতুকম্মাযা’’তি. আযস্মা চ ভন্তে মহামোগ্গল্লানো ‘‘ইধাহং আৱুসো গিজ্ঝকূটা পব্বতা ওৰোহন্তো অদ্দসং মংসপিণ্ডং ৱেহাসং গচ্ছন্তং, তমেনং গিজ্ঝাপি কাকাপি কুললাপি অনুপতিত্ৱা অনুপতিত্ৱা ৱিতচ্ছেন্তি ৱিৰাজেন্তি. সা সুদং অট্টস্সৰং কৰোতী’’তি এৱমাদিনা আৰোচেসি. তস্মিং ভন্তে ৱত্থুস্মিং ‘‘চক্খুভূতা ৱত ভিক্খৱে সাৱকা ৱিহৰন্তি, ঞাণভূতা ৱত ভিক্খৱে সাৱকা ৱিহৰন্তি, যত্ৰহি নাম সাৱকো এৱৰূপং ঞস্সতি ৱা দক্খতি ৱা সক্খিং ৱা কৰিস্সতী’’তি এৱমাদিনা ভগৱতা ভাসিতং.

অসিলোমসুত্ত

পুচ্ছা – তত্থেৱ আৱুসো পোৰাণকেহি ধম্মসংগাহকেহি মহাথেৰেহি সংগীতং অসিলোমসুত্তং ভগৱতা কত্থ কং আৰব্ভ কিস্মিং ৱত্থুস্মিং কথঞ্চ ভাসিতং.

ৱিস্সজ্জনা – ৰাজগহে ভন্তে আযস্মন্তঞ্চ লক্খণং আযস্মন্তঞ্চ মহামোগ্গল্লানং আৰব্ভ ভাসিতং. আযস্মা ভন্তে লক্খণো ভগৱতো সম্মুখে আযস্মন্তং মহামোগ্গল্লানং এতদৱোচ ‘‘কো নু খো আৱুসো মোগ্গল্লান হেতু, কো পচ্চযো সিতস্স পাতুকম্মাযা’’তি. আযস্মা চ ভন্তে মহামোগ্গল্লানত্থেৰো ‘‘ইধাহং আৱুসো গিজ্ঝকূটা পব্বতা ওৰোহন্তো অদ্দসং অসিলোমং ৱেহাসং গচ্ছন্তং’’তি এৱমাদিনা আৰোচেসি. তস্মিং ভন্তে ৱত্থুস্মিং চক্খুভূতা ৱত ভিক্খৱে সাৱকা ৱিহৰন্তি, ঞাণভূতা ৱত ভিক্খৱে সাৱকা ৱিহৰন্তি. (পেয্যাল) এসো ভিক্খৱে সত্তো ইমস্মিংযেৱ ৰাজগহে সূকৰিকো অহোসী’’তি এৱমাদিনা ভগৱতা ভাসিতং.

সূচিলোমসুত্ত

পুচ্ছা – তত্থেৱ আৱুসো পোৰাণকেহি ধম্মসংগাহকমহাথেৰেহি সংগীতং সূচিলোমসুত্তং ভগৱতা কত্থ কং আৰব্ভ কিস্মিং ৱত্থুস্মিং কথঞ্চ ভাসিতং.

ৱিস্সজ্জনা – তত্থেৱ ভন্তে ৰাজগহে আযস্মন্তঞ্চ লক্খণং আযস্মন্তঞ্চ মহামোগ্গল্লানং আৰব্ভ ভাসিতং. আযস্মা ভন্তে লক্খণো ভগৱতো সম্মুখে তথেৱ অৱোচ.

আযস্মা চ ভন্তে মহামোগ্গল্লানো তথেৱ আৰোচেসি. তস্মিং ভন্তে ৱত্থুস্মিং ‘‘চক্খুভূতা ৱত ভিক্খৱে সাৱকা ৱিহৰন্তি, ঞাণভূতা ৱত ভিক্খৱে সাৱকা ৱিহৰন্তি, (পেয্যাল) এসো ভিক্খৱে সত্তো ইমস্মিংযেৱ ৰাজগহে সূতো অহোসী’’তি এৱমাদিনা ভগৱতা ভাসিতা.

পাপভিক্খুসুত্ত

পুচ্ছা – তত্থেৱ আৱুসো পোৰাণকেহি ধম্মসংগাহকমহাথেৰেহি সংগীতানি পাপভিক্খুসুত্তাদীনি পঞ্চসুত্তানি ভগৱতা কত্থ কং আৰব্ভ কিস্মিং ৱত্থুস্মিং কথঞ্চ ভাসিতানি.

ৱিস্সজ্জনা – ৰাজগহে আযস্মন্তঞ্চ লক্খণং আযস্মন্তঞ্চ মহামোগ্গল্লানং আৰব্ভ ভাসিতানি. আযস্মা ভন্তে লক্খণো ভগৱতো সম্মুখে পুব্বে ৱুত্তনযেনেৱ আৰোচেসি. আযস্মা চ ভন্তে মহামোগ্গল্লানো ‘‘ইধাহং আৱুসো গিজ্ঝকূটা পব্বতা ওৰোহন্তো অদ্দসং ভিক্খুং ৱেহাসং গচ্ছন্তং. অদ্দসং ভিক্খুনিং ৱেহাসং গচ্ছন্তিং. অদ্দসং সিক্খমানং ৱেহাসং গচ্ছন্তিং. অদ্দসং সামণেৰং ৱেহাসং গচ্ছন্তং. অদ্দসং সামণেৰিং ৱেহাসং গচ্ছন্তিং. তস্সা সঙ্ঘাটিপি আদিত্তা সম্পজ্জলিতা সজোতিভূতা, পত্তোপি আদিত্তো সম্পজ্জলিতো সজোতিভূতো, কাযবন্ধনম্পি আদিত্তং সম্পজ্জলিতং সজোতিভূতং, কাযোপি আদিত্তো সম্পজ্জলিতো সজোতিভূতো, সা সুদং অট্টস্সৰং কৰোতী’’তি এৱমাদিনা আৰোচেসি. তস্মিং ভন্তে ৱত্থুস্মিং ‘‘চক্খুভূতা ৱত ভিক্খৱে সাৱকা ৱিহৰন্তি ঞাণভূতা ৱত ভিক্খৱে সাৱকা ৱিহৰন্তি. (পেয্যাল). এসো ভিক্খৱে ভিক্খু কস্সপস্সসম্মাসম্বুদ্ধস্স পাৱচনে পাপভিক্খু অহোসি. এসা ভিক্খৱে ভিক্খুনী কস্সপস্স সম্মাসম্বুদ্ধস্স পাৱচনে পাপভিক্খুনী অহোসি. এসা ভিক্খৱে সিক্খমানা কস্সপস্স সম্মাসম্বুদ্ধস্স পাৱচনে পাপসিক্খমানা অহোসি. এসো ভিক্খৱে সামণেৰো কস্সপস্সসম্মাসম্বুদ্ধস্স পাৱচনে পাপসামণেৰো অহোসি. এসা ভিক্খৱে সামণেৰী কস্সপস্স সম্মাসম্বুদ্ধস্স পাৱচনে পাপসামণেৰী অহোসী’’তি এৱমাদিনা ভগৱতা ভাসিতানি.