নিদানৱগ্গপাড়ি

নিদানসংযুত্ত

পটিচ্চসমুপ্পাদসুত্ত

পুচ্ছা – তেনাৱুসো ভগৱতা…পে… সম্মাসম্বুদ্ধেন নিদানৱগ্গসংযুত্তে পঠমং সংগীতং পটিচ্চসমুপ্পাদসুত্তং কত্থ তং আৰব্ভ কিস্মিং ৱত্থুস্মিং কথঞ্চ ভাসিতং.

ৱিস্সজ্জনা – সাৱত্থিযং ভন্তে পঞ্চসতে জনপদৱাসিনো ভিক্খূ আৰব্ভ ভাসিতং. পঞ্চসতা ভন্তে জনপদৱাসিনো ভিক্খূ সব্বে উগ্ঘাটিতঞ্ঞুনো ধুতঙ্গধৰা আৰদ্ধৱীৰিযা যুত্তযোগা ৱিপস্সকা সণ্হং সুখুমং সুঞ্ঞতং পচ্চযাকাৰধম্মদেসনং পত্থযমানা ভগৱন্তং অভিৱাদেত্ৱা ভগৱন্তং পৰিৱাৰেত্ৱা নিসীদিংসু. তস্মিং ৱত্থুস্মিং ‘‘পটিচ্চসমুপ্পাদং ৱো ভিক্খৱে দেসেস্সামি, তং সুণাথ সাধুকং মনসি কৰোথ, ভাসিস্সামী’’তি এৱমাদিনা ভন্তে ভগৱতা ভাসিতং.

কতমো চ ভিক্খৱে পটিচ্চসমুপ্পাদো. অৱিজ্জাপচ্চযা ভিক্খৱে সঙ্খাৰা, সঙ্খাৰপচ্চযা ৱিঞ্ঞাণং (পেয্যাল) জাতিপচ্চযা জৰামৰণং সোকপৰিদেৱদুক্খদোমনস্সুপাসা সম্ভৱন্তি, এৱমেতস্স কেৱলস্স দুক্খন্ধস্স সমুদযো হোতি. অযং ৱুচ্চতি ভিক্খৱে পটিচ্চসমুপ্পাদো.

অৱিজ্জায ত্ৱেৱ অসেসৱিৰাগনিৰোধো সঙ্খাৰনিৰোধো (পেয্যাল) জাতিনিৰোধা জৰামৰণং সোকপৰিদেৱদুক্খদোমনস্সুপাযাসা নিৰুজ্ঝন্তি, এৱমেতস্স কেৱলস্স দুক্খক্খন্ধস্স নিৰোধো হোতি –

ৱিভঙ্গসুত্ত

পুচ্ছা – তত্থাৱুসো দুতিযং সংগীতং ৱিভঙ্গসুত্তং ভগৱতা কত্থ কং আৰব্ভ কিস্মিং ৱত্থুস্মিং কথঞ্চ ভাসিতং.

ৱিস্সজ্জনা – সাৱত্থিযং ভন্তে পঞ্চসতে জনপদৱাসিনো ৱিপঞ্চিতঞ্ঞুনো ভিক্খূ আৰব্ভ ভাসিতং. পঞ্চসতা ভন্তে জনপদৱাসিকা ভিক্খূ ৱিপঞ্চিতঞ্ঞুনো ধুতঙ্গধৰা আৰদ্ধৱীৰিযা যুত্তযোগা ৱিস্সকা সণ্হং সুখুমং সুঞ্ঞতপটিসংযুত্তং পচ্চযাকাৰধম্মদেসনং পত্থযমানা ভগৱন্তং পৰিৱাৰেত্ৱা নিসীদিংসু. তস্মিং ৱত্থুস্মিং ‘‘পটিচ্চ সমুপ্পাদং ৱো ভিক্খৱে দেদেস্সামি ৱিভজিস্সামি, তং সুণাথ সাধুকং মনসিকৰোথ, ভাসিস্সামী’’তি এৱমাদিনা ভন্তে ভগৱতা ভাসিতং.

পঞ্চৱেৰভযসুত্ত

পুচ্ছা – পঞ্চৱেৰভযসুত্তং পনাৱুসো ভগৱতা কত্থ কং আৰব্ভ কথঞ্চ ভাসিতং.

ৱিস্সজ্জনা – সাৱত্থিযং ভন্তে অনাথপিণ্ডিকং গহপতিং আৰব্ভ ‘‘যতো খো গহপতি অৰিযসাৱকস্স পঞ্চ ভযানি ৱেৰানি ৱূপসন্তানি হোন্তি, চতূহি চ সোতাপত্তিযঙ্গেহি সমন্নাগতো হোতি, অৰিযো চস্স ঞাযো পঞ্ঞায সুদিট্ঠো হোতি সুপ্পটিৱিদ্ধো, সো আকঙ্খমানো অত্তনাৱ অত্তানং ব্যাকৰেয্য খীণনিৰযোমি খীণতিৰচ্ছানযোনি খীণপেত্তিৱিসযো খীণাপাযদুগ্গতিৱিনিপাতো, সোতাপন্নোহমস্মি অৱিনিপাতধম্মো নিযতো সম্বোধিপৰাযনো’’তি এৱং খো ভন্তে ভগৱতা ভাসিতং.

পুচ্ছা – কথঞ্চাৱুসোতত্থ ভগৱতা অৰিযসাৱকস্স পঞ্চন্নং ভযানং ৱেৰানং ৱূপসন্ততা পকাসিতা.

ৱিস্সজ্জনা – ‘‘কতমানি পঞ্চ ভযানি ৱেৰানি ৱূপসন্তানি হোন্তি. যং গহপতি পাণাতিপাতী পাণাতিপাতপচ্চযা দিট্ঠধম্মিকম্পি ভযং ৱেৰং পসৱতি, সম্পৰাযিকম্পি ভযং ৱেৰং পসৱতি, চেতসিকম্পি দুক্খং দোমনস্সং পটিসংৱেদযতি. পাণাতিপাতা টিৱিৰতস্স এৱং তং ভযং ৱেৰং ৱূপসন্তং হোতী’’তি এৱমাদিনা ভন্তে তত্থ ভগৱতা অৰিযসাৱকস্স পঞ্চন্নং ভযানং ৱেৰানং ৱূপসন্ততা পকাসিতা.

পুচ্ছা – কথঞ্চাৱুসো তত্থ ভগৱতা অৰিযসাৱকস্স চতূহি সোতাপত্তিযঙ্গেহি সমন্নাগততা পকাসিতা.

ৱিস্সজ্জনা – কতমেহি চতূহি সোতাপত্তিযঙ্গেহি সমন্নাগতো হোতি. ইধ গহপতি অৰিযসাৱকো বুদ্ধে অৱেচ্চপ্পসাদেন সমন্নাগতো হোতি ‘‘ইতিপিসো ভগৱা অৰহং সম্মাসম্বুদ্ধো ৱিজ্জাচৰণসম্পন্নো সুগতো লোকৱিদূ অনুত্তৰোপুৰিসদম্মসাৰথি সত্থাদেৱমনুস্সানং বুদ্ধো ভগৱা’’তি এৱমাদিনা ভন্তে তত্থ ভগৱতা অৰিযসাৱকস্স চতূহি সোতাপত্তিযঙ্গেহি সমন্নাগততা পকাসিতা.

পুচ্ছা – কথঞ্চাৱুসো তত্থ ভগৱতা অৰিযসাৱকেন অৰিযস্স ঞাযস্স পঞ্ঞায সুদিট্ঠতা সুপ্পটিৱিদ্ধতা পকাসিতা.

ৱিস্সজ্জনা – কতমো চস্স অৰিযো ঞাযো পঞ্ঞায সুদিট্ঠো হোতি সুপ্পটিৱিদ্ধো. ইধ গহপতি অৰিযসাৱকো পটিচ্চসমুপ্পাদঞ্ঞেৱ সাধুকং যোনিসো মনসি কৰোতি ‘‘ইতি ইমস্মিং সতি ইদং হোতি, ইমস্মিং অসতি ইদং ন হোতি, ইমস্সুপ্পাদা ইদং উপ্পজ্জতি, ইমস্স নিৰোধা ইদং নিৰুজ্ঝতি, যদিদং অৱিজ্জাপচ্চযা (পেয্যাল) এৱমেতস্স কেৱলস্স দুক্খক্খন্ধস্স নিৰোধো হোতী’’তি, এৱং খো ভন্তে ভগৱতা তত্থ অৰিযসাৱকেন অৰিযস্স ঞাযস্স পঞ্ঞায সুদিট্ঠতা সুপ্পটিৱিদ্ধতা পকাসিতা.

যতো খো গহপতি অৰিযসাৱকস্স ইমানি পঞ্চ ভযানি ৱেৰানি ৱূপসন্তানি হোন্তি. ইমেহি চতূহি সোতাপত্তিযঙ্গেহি সমন্নাগতো হোতি. অযঞ্চস্স অৰিযো ঞাযো পঞ্ঞায সুদিট্ঠো হোতি সুপ্পটিৱিদ্ধো–

দুক্খসুত্ত

পুচ্ছা – দুক্খসুত্তং পনাৱুসো ভগৱতা কত্থ কং আৰব্ভ কথঞ্চ ভাসিতং.

ৱিস্সজ্জনা – সাৱত্থিযং ভন্তে সম্বহুলে ভিক্খূ আৰব্ভ ‘‘দুক্খস্স ভিক্খৱে সমুদযঞ্চ অত্থঙ্গমঞ্চ দেসেস্সামী’’তি এৱমাদিনা ভগৱতা ভাসিতং.

পুচ্ছা – কথঞ্চাৱুসো তত্থ ভগৱতা দুক্খসমুদযো পকাসিতো.

ৱিস্সজ্জনা – কতমো চ ভিক্খৱে দুক্খস্স সমুদযো. চক্খুঞ্চ পটিচ্চ ৰূপে চ উপ্পজ্জতি চক্খুৱিঞ্ঞাণং, তিণ্ণং সঙ্গতি ফস্সো, ফস্সপচ্চযা ৱেদনা, ৱেদনাপচ্চযা তণ্হা. অযং খো ভিক্খৱে দুক্খস্স সমুদযো. সোতঞ্চ পটিচ্চ সদ্দে চ উপ্পজ্জতি সোতৱিঞ্ঞাণং…পে… ঘানঞ্চ পটিচ্চ গন্ধে চ…পে… জিৱ্হঞ্চ পটিচ্চ ৰসে চ…পে… কাযঞ্চ পটিচ্চ ফোট্ঠব্বে চ…পে… মনঞ্চ পটিচ্চ ধম্মে চ উপ্পজ্জতি মনোৱিঞ্ঞাণং, তিণ্ণং সঙ্গতি ফস্সো, ফস্সপচ্চযা ৱেদনা, ৱেদনাপচ্চযা তণ্হা. অযং খো ভিক্খৱে দুক্খস্স সমুদযোতি এৱংখো ভন্তে তত্থ ভগৱতা দুক্খস্স সমুদযো পকাসিতো.

পুচ্ছা – কথঞ্চাৱুসো তত্থ ভগৱতা দুক্খস্স অত্থঙ্গমো পকাসিতো.

ৱিস্সজ্জনা – কতমো চ ভিক্খৱে দুক্খস্স অত্থঙ্গমো. চক্খুঞ্চ পটিচ্চ ৰূপে চ উপ্পজ্জতি চক্খুৱিঞ্ঞাণং, তিণ্ণং সঙ্গতি ফস্সো, ফস্সপচ্চযা ৱেদনা, ৱেদনাপচ্চযা তণ্হা, তস্সাযেৱ তণ্হায অসেসৱিৰাগনিৰোধা উপাদাননিৰোধো উপাদাননিৰোধা ভৱনিৰোধো, ভৱনিৰোধা জাতিনিৰোধো, জাতিনিৰোধা জৰামৰণং সোকপৰিদেৱদুক্খদোমনস্সুপাযাসা নিৰুজ্ঝন্তি. এৱমেতস্স কেৱলস্স দুক্খক্খন্ধস্স নিৰোধো হোতীতি এৱমাদিনা ভন্তে তত্থ ভগৱতা দুক্খস্স অত্থঙ্গমো পকাসিতো.

পুত্তমংসূপমসুত্ত

পুচ্ছা – পুত্তমংসূপমসুত্তং পনাৱুসো ভগৱতা কত্থ কং আৰব্ভ কিস্মিং ৱত্থুস্মিং কথঞ্চ ভাসিতং.

ৱিস্সজ্জনা – সাৱত্থিযং ভন্তে সম্বহুলে অধুনা পব্বজিতে ভিক্খূ আৰব্ভ ভাসিতং. ভগৱতো চ ভন্তে ভিক্খুসঙ্ঘস্স চ মহালাভসক্কাৰো উদপাদি, একচ্চে চ ভন্তে ভিক্খূ নৱা অচিৰপব্বজিতা কুলপুত্তা আহাৰং অপচ্চৱেক্খিত্ৱা পৰিভুঞ্জিংসু. তস্মিং ভন্তে ৱত্থুস্মিং ‘‘চত্তাৰোমে ভিক্খৱে আহাৰা ভূতানং ৱা সত্তানং ঠিতিযা সম্ভৱেসীনং ৱা অনুগ্গহায. কতমে চত্তাৰো কবড়ীকাৰো আহাৰো ওড়াৰিকো ৱা সুখুমো ৱা ফস্সো দুতিযো মনোসঞ্চেতনা ততিযা ৱিঞ্ঞাণং চতুত্থ’’ন্তি এৱং খো ভন্তে ভগৱতা ভাসিতং.

পুচ্ছা – কথঞ্চাৱুসো তত্থ কবড়ীকাৰস্স আহাৰস্স দট্ঠব্বাকাৰো ভগৱতা পকাসিতো.

ৱিস্সজ্জনা – সেয্যথাপি ভিক্খৱে দ্ৱে জাযম্পতিকা পৰিত্তং সম্বলং আদায কন্তাৰমগ্গং পটিপজ্জেয্যুং. তেসমস্স একপুত্তকো পিযো মনাপোতি এৱমাদিনা ভন্তে তত্থ ভগৱতা কবড়ীকাৰস্স আহাৰস্স দট্ঠব্বাকাৰো পকাসিতো.

পুচ্ছা – কথঞ্চাৱুসো তত্থ ভগৱতা ফস্সাহাৰস্স দট্ঠব্বাকাৰো পকাসিতো.

ৱিস্সজ্জনা – সেয্যথাপি ভিক্খৱে গাৱী নিচ্চম্মা কুট্টং চে নিস্সায তিট্ঠেয্য, যে কুট্টনিস্সিতা পাণা, তে নং খাদেয্যুং. ৰুক্খং চে নিস্সায তিট্ঠেয্য. উদকং চে নিস্সায তিট্ঠেয্য. আকাসং চে নিস্সায তিট্ঠেয্য, যে আকাসনিস্সিতা পাণা, তে নং খাদেয্যুন্তি এৱমাদিনা ভন্তে তত্থ ভগৱতা ফস্সস্স আহাৰস্স দট্ঠব্বাকাৰো ৱিত্থাৰেত্ৱা পকাসিতো.

এৱমেৱ খ্ৱাহং ভিক্খৱে ফস্সাহাৰো দট্ঠব্বোতি ৱদামি.

পুচ্ছা – কথঞ্চাৱুসো তত্থ ভগৱতা মনোসঞ্চেতনাহাৰস্স দট্ঠব্বাকাৰো পকাসিতো.

ৱিস্সজ্জনা – সেয্যথাপি ভিক্খৱে অঙ্গাৰকাসু সাধিকপোৰিসা পুণ্ণা অঙ্গাৰানং ৱীতচ্চিকানং ৱীতধূমানং. অথ পুৰিসো আগচ্ছেয্য জীৱিতুকামো অমৰিতুকামো সুখ কামো দুক্খপ্পটিকূলোতি এৱমাদিনা ভন্তে তত্থ ভগৱতা মনোসঞ্চেতনাহাৰস্স দট্ঠব্বাকাৰো ৱিত্থাৰেন পকাসিতো.

পুচ্ছা – কথঞ্চাৱুসো তত্থ ভগৱতা ৱিঞ্ঞাণাহাৰস্স দট্ঠব্বাকাৰো পকাসিতো.

ৱিস্সজ্জনা – সেয্যথাপি ভিক্খৱে চোৰং আগুচাৰিং গহেত্ৱা ৰঞ্ঞো দস্সেয্যুং ‘‘অযং তে দেৱচোৰো আগুচাৰী, ইমস্স যং ইচ্ছসি, তং দণ্ডং পণেহী’’তি এৱমাদিনা ভন্তে তত্থ ভগৱতা ৱিঞ্ঞাণাহাৰস্স দট্ঠব্বাকাৰো পকাসিতো.

সুসিমপৰিব্বাজকসুত্ত

পুচ্ছা – তেনাৱুসো ভগৱতা…পে… সম্মাসম্বুদ্ধেন সুসিমপৰিব্বাজক সুত্তং কত্থ কং আৰব্ভ কিস্মিং ৱত্থুস্মিং কথঞ্চ ভাসিতং.

ৱিস্সজ্জনা – ৰাজগহে ভন্তে আযস্মন্তং সুসিমং আৰব্ভ ভাসিতং. আযস্মা ভন্তে সুসিমো যাৱতকো ভিক্খূহি সদ্ধিং অহোসি কথাসল্লাপো, তং সব্বং ভগৱতো আৰোচেসি. তস্মিং ৱত্থুস্মিং ‘‘পুব্বে খো সুসিম ধম্মট্ঠিতিঞাণং, পচ্ছা নিব্বানে ঞাণ’’ন্তি এৱমাদিনা ভন্তে ভগৱতা ভাসিতং.

পুচ্ছা – কথঞ্চাৱুসো তত্থ ভগৱা আযস্মতো সুসিমত্থেৰস্স সম্পতিঅৰহত্তপত্তস্স অনুযোগৱসেন পটিপুচ্ছিত্ৱা পটিপুচ্ছিত্ৱা উত্তৰি ধম্মদেসনং ৱিত্থাৰেত্ৱা দেসেসি.

ৱিস্সজ্জনা – জাতিপচ্চযা জৰামৰণন্তি সুসিম পস্সসীতি. এৱং ভন্তে. ভৱপচ্চযা জাতীতি সুসিম পস্সসীতি. এৱং ভন্তেতি এৱমাদিনা ভন্তে ভগৱা তত্থ আযস্মতো সুসিমস্স সম্পতিঅৰহত্তপত্তস্স উত্তৰিপি অনুযোগৱসেন পটিপুচ্ছিত্ৱা পটিপুচ্ছিত্ৱা ৱিত্থাৰতো ধম্মং দেসেসি.

তস্স মে ভন্তে ভগৱা অচ্চযং অচ্চযতো পটিগ্গণ্হাতু আযতিংসংৱৰায–

অভিসমযসংযুত্ত

নখসিখাসুত্ত

পুচ্ছা – অভিসমযসংযুত্তে পনাৱুসো পঠমং সংগীতং নখসিখাসুত্তং ভগৱতা কত্থ কং আৰব্ভ কথঞ্চ ভাসিতং.

ৱিস্সজ্জনা – সাৱত্থিযং ভন্তে সম্বহুলে ভিক্খূ আৰব্ভ ‘‘তং কিং মঞ্ঞথ ভিক্খৱে, কতমং নু খো বহুতৰং, যো ৱাযং মযা পৰিত্তো নখসিখাযং পংসুআৰোপিতো, অযং ৱা মহাপথৱী’’তি এৱমাদিনা ভগৱতা ভাসিতং.

ধাতুসংযুত্ত

চঙ্কমসুত্ত

পুচ্ছা – ধাতুসংযুত্তে পনাৱুসো চঙ্কমসুত্তং ভগৱতা কত্থ কং আৰব্ভ কথঞ্চ ভাসিতং.

ৱিস্সজ্জনা – ৰাজগহে ভন্তে সম্বহুলে ভিক্খূ আৰব্ভ ‘‘ধাতুসোৱ ভিক্খৱে সত্তা সংসন্দন্তি সমেন্তি, হীনাধিমুত্তিকা হীনাধিমুত্তিকেহি সদ্ধিং সংসন্দন্তি সমেন্তি, কল্যাণাধিমুত্তিকা কল্যাণাধিমুত্তিকেহি সদ্ধিং সংসন্দন্তি সমেন্তী’’তি এৱমাদিনা ভগৱতা ভাসিতং.

অস্সদ্ধসংসন্দনসুত্ত

পুচ্ছা – অস্সদ্ধসংসন্দনসুত্তং পনাৱুসো ভগৱতা কত্থ কং আৰব্ভ কথঞ্চ ভাসিতং.

ৱিস্সজ্জনা – সাৱত্থিযং ভন্তে সম্বহুলে ভিক্খূ আৰব্ভ ‘‘ধাতুসোৱ ভিক্খৱে সত্তা সংসন্দন্তি সমেন্তি, অস্সদ্ধা অস্সদ্ধেহি সদ্ধিং সংসন্দন্তি সমেন্তি, অহিৰিকা অহিৰিকেহি সদ্ধিং সংসন্দন্তি সমেন্তি, অনোত্তপ্পিনো. অপ্পস্সুতা. কুসীতা. মুট্ঠস্সতিনো. দুপ্পঞ্ঞা দুপ্পঞ্ঞেহি সদ্ধিং সংসন্দন্তি সমেন্তী’’তি এৱমাদিনা ভগৱতা ভাসিতং.

অনমতগ্গসংযুত্ত

পথৱীসুত্ত

পুচ্ছা – অনমতগ্গসংযুত্তে আৱুসো দুতিযং সংগীতং পথৱীসুত্তং কত্থ কং আৰব্ভ কথঞ্চ ভাসিতং.

ৱিস্সজ্জনা – সাৱত্থিযং ভন্তে সম্বহুলে ভিক্খূ আৰব্ভ ‘‘অনমতগ্গোযং ভিক্খৱে সংসাৰো, পুব্বা কোটি ন পঞ্ঞাযতি অৱিজ্জানীৱৰণানং সত্তানং তণ্হাসংযোজনানং সন্ধাৱতং সংসৰতং. সেয্যথাপি ভিক্খৱে পুৰিসো ইমং মহাপথৱিং কোলট্ঠিমত্তং কোলট্ঠিমত্তং মত্তিকাগুড়িকং কৰিত্ৱা নিক্খিপেয্য ‘অযং মে পিযা, তস্স মে পিতু অযং পিতা’তি. অপৰিযাদিন্নাৱ ভিক্খৱে তস্স পুৰিসস্স পিতুপিতৰো অস্সু. অথাযং মহাপথৱী পৰিক্খযং পৰিযাদানং গচ্ছেয্য. তং কিস্সহেতু, অনমতগ্গোযং ভিক্খৱে সংসাৰো, পুব্বা কোটি ন পঞ্ঞাযতি অৱিজ্জানীৱৰণানং সত্তানং তণ্হা সংযোজনানং সন্ধাৱতং সংসৰতং’’ এৱমাদিনা ভগৱতা ভাসিতং.

এৱং দীঘৰত্তং ৱো ভিক্খৱে দুক্খং পচ্চনুভূতং তিব্বং পচ্চনুভূতং ব্যসনং পচ্চনুভূতং কটসী ৱড্ঢিতা.

অলমেৱ সব্বসঙ্খাৰেসু নিব্বিন্দিতুং,

অলং ৱিৰজ্জিতুং, অলং ৱিমুচ্চিতুং,

অস্সুসুত্ত

পুচ্ছা – তত্থাৱুসো ততিযং সংগীতং অস্সুসুত্তং ভগৱতা কত্থ কং আৰব্ভ কথঞ্চ ভাসিতং.

ৱিস্সজ্জনা – সাৱত্থিযং ভন্তে সম্বহুলেযেৱ ভিক্খূ আৰব্ভ ‘‘তং কিং মঞ্ঞথ ভিক্খৱে, কতমং নু খো বহুতৰং, যং ৱা ৱো ইমিনা দীঘেন অদ্ধুনা সন্ধাৱতং সংসৰতং অমনাপসম্পযোগা মনাপৱিপ্পযোগা কন্দন্তানং ৰোদন্তানং অস্সু পস্সন্নং পগ্ঘৰিতং, যং ৱা চতূসু মহাসমুদ্দেসু উদক’’ন্তি এৱমাদিনা ভগৱতা ভাসিতং.

সাসপসুত্ত

পুচ্ছা – তত্থাৱুসো ছট্ঠং সংগীতং সাসপসুত্তং ভগৱতা কত্থ কং আৰব্ভ কিস্মিং ৱত্থুস্মিং কথঞ্চ ভাসিতং.

ৱিস্সজ্জনা – সাৱত্থিযং ভন্তে অঞ্ঞতৰং ভিক্খুং আৰব্ভ ভাসিতং. অঞ্ঞতৰো ভন্তে ভিক্খু ভগৱন্তং এতদৱোচ ‘‘কীৱদীঘো নু খো ভন্তে কপ্পো’’তি. তস্মিং ভন্তে ৱত্থুস্মিং ‘‘দীঘো খো ভিক্খু কপ্পো, সো ন সুকৰো সঙ্খাতুং এত্তকানি ৱস্সানি ইতিৱা, (পেয্যাল) এত্তকানি ৱস্সসতসহস্সানি ইতিৱাতি এৱমাদিনা ভগৱতা ভাসিতং.

গঙ্গাসুত্ত

পুচ্ছা – তেনাৱুসো…পে… সম্মাসম্বুদ্ধেন অনমতগ্গসংযুত্তে গঙ্গাসুত্তং কত্থ কং আৰব্ভ কিস্মিং ৱত্থুস্মিং কথঞ্চ ভাসিতং.

ৱিস্সজ্জনা – ৰাজগহে ভন্তে অঞ্ঞতৰং ব্ৰাহ্মণং আৰব্ভ ভাসিতং. অঞ্ঞতৰো ভন্তে ব্ৰাহ্মণো ভগৱন্তং এতদৱোচ ‘‘কীৱ-

বহুকা নু খো ভো গোতম কপ্পা অব্ভতীতা অতিক্কন্তা’’তি. তস্মিং ভন্তে ৱত্থুস্মিং ‘‘বহুকা খো ব্ৰাহ্মণ কপ্পা অব্ভতীতা অতিক্কন্তা, তে ন সুকৰা সঙ্খাতুং ‘এত্তকা কপ্পা’ ইতি ৱা ‘এত্তকানি কপ্পসতানি’ ইতি ৱা ‘এত্তকানি কপ্পসহস্সানি’ ইতিৱা ‘এত্তকানি কপ্পসতসহস্সানি’ ইতি ৱা’’তি এৱ মাদিনা ভগৱতা ভাসিতং.

পুগ্গলসুত্ত

পুচ্ছা – পুগ্গলসুত্তং পনাৱুসো ভগৱতা কত্থ কং আৰব্ভ কথঞ্চ ভাসিতং.

ৱিস্সজ্জনা – ৰাজগহে ভন্তে সম্বহুলে ভিক্খূ আৰব্ভ ‘‘অনমতগ্গোযং ভিক্খৱে সংসাৰো, পুব্বাকোটি ন পঞ্ঞাযতি অৱিজ্জা নীৱৰণানং সত্তানং তণ্হাসংযোজনানং সন্ধাৱতং সংসৰতং. একপুগ্গলস্স ভিক্খৱে কপ্পং সন্ধাৱতো সংসৰতো সিযা এৱং মহা অট্ঠিকঙ্কলো অট্ঠিপুঞ্জো অট্ঠিৰাসি, যথা যং ৱেপুল্লো পব্বতো. সচে সংহাৰকো অস্স, সম্ভতঞ্চ ন ৱিনস্সেত্যা’’তি এৱমাদিনা ভগৱতা ভাসিতং.

দুগ্গতসুত্ত, সুখিতসুত্ত

পুচ্ছা – তত্থাৱুসো দুগ্গতসুত্তঞ্চ সুখিতসুত্তঞ্চ ভগৱতা কত্থ কং আৰব্ভ কথঞ্চ ভাসিতং.

ৱিস্সজ্জনা – সাৱত্থিযং ভন্তে সম্বহুলে ভিক্খূ আৰব্ভ ‘‘অনমতগ্গোযং ভিক্খৱে সংসাৰো, পুব্বা কোটি ন পঞ্ঞাযতি অৱিজ্জানীৱৰণানং সত্তানং তণ্হাসংযোজনানং সন্ধাৱতং সংসৰতং. যং ভিক্খৱে পস্সেয্যাথ দুগ্গতং দুৰূপেতং, নিট্ঠমেত্থ গন্তব্বং ‘অম্হেহিপি এৱৰূপং পচ্চনুভূতং ইমিনা দীঘেন অদ্ধুনা’তি, যং ভিক্খৱে পস্সেয্যাথ সুখিতং সুসজ্জিতং,

নিট্ঠমেত্থ গন্তব্বং, ‘‘অম্হেহিপি পচ্চনুভূতং ইমিনা দীঘেন অদ্ধুনা’’তি এৱমাদিনা ভগৱতা ভাসিতং.

তিংসমত্তসুত্ত

পুচ্ছা – তিংসমত্তসুত্তং পনাৱুসো ভগৱতা কত্থ কং আৰব্ভ কথঞ্চ ভাসিতং.

ৱিস্সজ্জনা – ৰাজগহে ভন্তে তিংসমত্তে পাৱেয্যকে ভিক্খূ আৰব্ভ ‘‘অনমতগ্গোযং ভিক্খৱে সংসাৰো, পুব্বাকোটি ন পঞ্ঞাযতি অৱিজ্জানীৱৰণানং সত্তানং তণ্হাসংযোজনানং সন্ধাৱতং সংসৰতং. তং কিং মঞ্ঞথ ভিক্খৱে, কতমং নু খো বহুতৰং, যং ৱা ৱো ইমিনা দীঘেন অদ্ধুনা সন্ধাৱতং সংসৰতং সীসচ্ছিন্নানং লোহিতং পস্সন্নং পগ্ঘৰিতং, যং ৱা চতূসু মহাসমুদ্দেসু উদক’’ন্তি এৱমাদিনা ভৱগতা ভাসিতং.

মাতুসুত্ত

পুচ্ছা – মাতুসুত্তাদীনি পনাৱুসো ছসুত্তানি ভগৱতা কত্থ কং আৰব্ভ কথঞ্চ ভাসিতং.

ৱিস্সজ্জনা – সাৱত্থিযং ভন্তে সম্বহুলে ভিক্খূ আৰব্ভ ‘‘অনমতগ্গোযং ভিক্খৱে সংসাৰো, পুব্বা কোটি ন পঞ্ঞাযতি অৱিজ্জানীৱৰণানং সত্তানং তণ্হাসংযোজনানং সন্ধাৱতং সংসৰতং. ন সো ভিক্খৱে সত্তো সুলভৰূপো, যো ন মাতাভূতপুব্বো ইমিনা দীঘেন অদ্ধুনা. যো ন পিতাভূতপুব্বো. যো ন ভাতাভূতপুব্বো. যো ন ভগিনিভূতপুব্বো. যো ন পুত্তভূতপুব্বো. যো ন ধীতাভূতপুব্বো ইমিনা দীঘেন অদ্ধুনা’’তি এৱমাদিনা ভন্তে ভগৱতা ভাসিতং.

কস্সপসংযুত্ত

চন্দূপমসুত্ত

পুচ্ছা – কস্সপসংযুত্তে পনাৱুসো চন্দূপমসুত্তং ভগৱতা কত্থ কং আৰব্ভ কথঞ্চ ভাসিতং.

ৱিস্সজ্জনা – সাৱত্থিযং ভন্তে সম্বহুলে ভিক্খূ আৰব্ভ ‘‘চন্দূপমা ভিক্খৱে কুলানি উপসঙ্কমথ অপকস্সেৱ কাযং অপকস্স চিত্তং নিচ্চনৱকা কুলেসু অপ্পগব্ভা. সেয্যথাপি ভিক্খৱে পুৰিসো জৰুদপানং ৱা ওলোকেয্য পব্বতৱিসমং ৱা নদীৱিদুগ্গং ৱা অপকস্সেৱ কাযং অপকস্স চিত্তং. এৱমেৱ খো ভিক্খৱে চন্দূপমা কুলানি উপসঙ্কমথ অপকস্সেৱ কাযং অপকস্স চিত্তং নিচ্চনৱকা কুলেসু অপ্পগব্ভা’’তি এৱমাদিনা ভগৱতা ভাসিতং.

তং কিং মঞ্ঞথ ভিক্খৱে, কথং ৰূপা ভিক্খু অৰহতি কুলানি উপসঙ্কমিতুং.

পুচ্ছা – কথঞ্চাৱুসো তত্থ ভগৱতা পৰিসুদ্ধাপৰিসুদ্ধ ধম্মদেসনং দস্সেত্ৱা ভিক্খূনং ওৱাদো দিন্নো.

ৱিস্সজ্জনা – ‘‘তং কিং মঞ্ঞথ ভিক্খৱে, কথং ৰূপস্স ভিক্খুনো অপৰিসুদ্ধা ধম্মদেসনা হোতি, কথং ৰূপস্স ভিক্খুনো পৰিসুদ্ধা ধম্মদেসনা হোতী’’তি এৱমাদিনা পৰিসুদ্ধাপৰিসুদ্ধধম্মদেসনা ৱিত্থাৰতো দস্সেত্ৱা ‘‘কস্সপেন ৱা হি ৱো ভিক্খৱে ওৱদিস্সামি যো ৱা পনস্স কস্সপসদিসো, ওৱদিতেহি চ পন ৱো তথত্তায পটিপজ্জিতব্ব’’ন্তি. এৱং খো ভন্তে ভগৱতো ভিক্খূনং ওৱাদো দিন্নো.

যো হি কোচি ভিক্খৱে ভিক্খু এৱংচিত্তো পৰেসং ধম্মং দেসেতি ‘‘অহো ৱত মে ধম্মং সুণেয্যুং, সুত্ৱা চ পন ধম্মং পসীদেয্যুং, পসন্না চ মে পসন্নাকাৰং কৰেয্যুং–

স্ৱাক্খাতো ভগৱতা ধম্মো সন্দিট্ঠিকো অকালিকো এহি পস্সিকো ওপনেয্যিকো পচ্চত্তং ৱেদিতব্বো ৱিঞ্ঞূহি–

কস্সপেন ৱা হি ৱো ভিক্খৱে ওৱদিস্সামি যো ৱা পনস্স কস্সপসদিসো, ওৱদিতেহি চ পন ৱো তথত্তায পটিপজ্জিতব্বং–

কুলূপকসুত্ত

পুচ্ছা – তেনাৱুসো ভগৱতা…পে… সম্মাসম্বুদ্ধেন কস্সপসংযুত্তে চতুত্থং কুলূপকসুত্তং কত্থ কং আৰব্ভ কথঞ্চ ভাসিতং.

ৱিস্সজ্জনা – সাৱত্থিযং ভন্তে সম্বহুলে ভিক্খূ আৰব্ভ ‘‘তং কিং মঞ্ঞথ ভিক্খৱে, কথং ৰূপো ভিক্খু অৰহতি কুলূপকো হোতুং, কথং ৰূপো ভিক্খু ন অৰহতি কুলূপকো হোতু’’ন্তি এৱমাদিনা ভগৱতা ভাসিতং.

কস্সপেন ৱা হি ৱো ভিক্খৱে ওৱদিস্সামি যো ৱা পনস্স কস্সপসদিসো, ওৱদিতেহি চ পন ৱো তথত্তায পটিপজ্জিতব্বং.

দুতিয ওৱাদসুত্ত

পুচ্ছা – তত্থেৱাৱুসো ভগৱতা দুতিয ওৱাদসুত্তং কত্থ কেন সদ্ধিং কথঞ্চ ভাসিতং.

ৱিস্সজ্জনা – ৰাজগহে ভন্তে আযস্মতা মহাকস্সপেন সদ্ধিং ‘‘ওৱদ কস্সপ ভিক্খূ, কৰোহি কস্সপ ভিক্খূনং ধম্মিং কথং, অহং ৱা কস্সপ ভিক্খূ ওৱদেয্যং ত্ৱং ৱা, অহং ৱা ভিক্খূনং ধম্মিং কথং কৰেয্যং ত্ৱং ৱা’’তি এৱমাদিনা ভগৱতা ভাসিতং.

যস্স কস্সচি ভন্তে সদ্ধা নত্থি কুসলেসু ধম্মেসু, হিৰী নত্থি. ওত্তপ্পং নত্থি. ৱীৰিযং নত্থি. পঞ্ঞা নত্থি কুসলেসু ধম্মেসু.

ততিয ওৱাদসুত্ত

পুচ্ছা – তত্থেৱাৱুসো ভগৱতা ততিযওৱাদসুত্তং কত্থ কেন সদ্ধিং কথঞ্চ ভাসিতং.

ৱিস্সজ্জনা – ৰাজগহে ভন্তে আযস্মতাযেৱ মহাকস্সপেন সদ্ধিং ‘‘ওৱদ কস্সপ ভিক্খূ. কৰোহি কস্সপ ভিক্খূনং ধম্মিং কথং, অহং ৱা কস্সপ ভিক্খূ ওৱদেয্যং ত্ৱং ৱা. অহং ৱা ভিক্খূনং ধম্মং কথং কৰেয্যং ত্ৱং ৱা’’তি এৱমাদিনা ভগৱতা ভাসিতং.

দুব্বচা খো ভন্তে এতৰহি ভিক্খূ দোৱচস্সকৰণেহি ধম্মেহি সমন্নাগতা অক্খমা অপ্পদক্খিণগ্গাহিনো অনুসাসনিং–

সদ্ধম্মপ্পতিৰূপকসুত্ত

পুচ্ছা – তত্থেৱাৱুসো ভগৱতা পৰিযোসানং সদ্ধম্মপ্পতিৰূপকসুত্তং কত্থ কং আৰব্ভ কিস্মিং ৱত্থুস্মিং কথঞ্চ ভাসিতং.

ৱিস্সজ্জনা – সাৱত্থিযং ভন্তে আযস্মন্তংযেৱ মহাকস্সপং আৰব্ভ ভাসিতং. আযস্মা ভন্তে মহাকস্সপো ভগৱন্তং এতদেৱোচ ‘‘কো নু খো ভন্তে হেতু কো পচ্চযো, যেন পুব্বে অপ্পতৰানি চেৱ সিক্খাপদানি অহেসুং, বহুতৰা চ ভিক্খূ অঞ্ঞায সণ্ঠহিংসু. কো পন ভন্তে হেতু কো পচ্চযো, যেনেতৰহি বহুতৰানি চেৱ সক্খাপদানি অপ্পতৰা চ ভিক্খূ অঞ্ঞায সণ্ঠহন্তী’’তি. তস্মিং ভন্তে ৱত্থুস্মিং ‘‘এৱঞ্চেতং কস্সপ হোতি সত্তেসু হাযমানেসু সদ্ধম্মে অন্তৰধাযমানে বহুতৰানিচেৱ সিক্খাপদানি হোন্তি, অপ্পতৰাচ ভিক্খূ অঞ্ঞায সণ্ঠহন্তী’’তি এৱমাদিনা ভগৱতা ভাসিতং.

লাভসক্কাৰসংযুত্ত

মীড়্হকসুত্ত

পুচ্ছা – তেনাৱুসো…পে… সম্মাসম্বুদ্ধেন লাভসক্কাৰংযুত্তে পঞ্চমং সংগীতং মীড়্হকসুত্তং কত্থ কং আৰব্ভ কথঞ্চ ভাসিতং.

ৱিস্সজ্জনা – সাৱত্থিযং ভন্তে সম্বহুলে ভিক্খূ আৰব্ভ ‘‘দাৰুণো ভিক্খৱে লাভসক্কাৰসিলোকো ফৰুসো অন্তৰাযিকো অনুত্তৰস্স যোগক্খেমস্স অধিগমায. সেয্যথাপি ভিক্খৱে মীড়্হকা গূথাদী গূথপূৰা পুণ্ণা গূথস্স, পুৰতো চস্স মহাগূথপুঞ্জো, সা তেন অঞ্ঞা মীড়্হকা অতিমঞ্ঞেয্য ‘‘অহম্হি গূথাদী গূথপূৰা পুণ্ণা গূথস্স, পুৰতো চ ম্যাযং মহাগূথপুঞ্জো’’তি এৱমাদিনা ভগৱতা ভাসিতং.

তং হি তস্স ভিক্খৱে মোঘপুৰিসস্স হোতি দীঘৰত্তং অহিতায দুক্খায.

এৱং দাৰুণো খো ভিক্খৱে লাভসক্কাৰসিলোকো.

তস্মাতিহ ভিক্খৱে এৱং সিক্খিতব্বং, ‘‘উপ্পন্নং লাভসক্কাৰসি লোকং পজহিস্সাম, ন চ নো উপ্পন্নো লাভসক্কাৰসিলোকো চিত্তং পৰিযাদায ঠস্সভী’’তি, এৱঞ্হি খো ভিক্খৱে সিক্খিতব্বং.

একপুত্তকসুত্ত

পুচ্ছা – তত্থো আৱুসো পোৰাণকেহি ধম্মসংগাহকেহি সংগীতং একপুত্তকসুত্তং কত্থ কং আৰব্ভং কথঞ্চ ভাসিতং.

ৱিস্সজ্জনা – সাৱত্থিযং ভন্তে সম্বহুলে ভিক্খূ আৰব্ভ ‘‘দাৰুণো ভিক্খৱে লাভসক্কাৰসিলোকো কটুকো ফৰুসো অন্তৰাযিকো অনুত্তৰস্স যোগক্খেমস্স অধিগমায, সদ্ধা ভিক্খৱে উপাসিকা একপুত্তকং পিযং মনাপং এৱং সম্মাআযাচমানা আযাচেয্য তাদিসো তাত ভৱাহি, যাদিসো চিত্তো চ গহপতি হত্থকো চ আড়ৱকো’’তি এৱমাদিনা ভগৱতা ভাসিতং.

এসা ভিক্খৱে তুলা এতং পমাণং মম সাৱকানং উপাসকানং যদিদং চিত্তো চ গহপতি হত্থকো চ আড়ৱকো.

সচে খো ত্ৱং তাত অগাৰস্মা অনগাৰিযং পব্বজসি, তাদিসো তাত ভৱাহি, যাদিসা সাৰিপুত্তমোগ্গল্লানা.

মা চ খো ত্ৱং তাত সেখং অপ্পত্তমানসং লাভসক্কাৰসিলোকো অনুপাপুণাতু–

এৱং দাৰুণো ভিক্খৱে লাভসক্কাৰসিলোকো কটুকো ফৰুসো অন্তৰাযিকো অনুত্তৰস্স যোগক্খেমস্স অধিগমায.

একৱীতুসুত্ত

পুচ্ছা – তত্থেৱ আৱুসো পোৰাণকেহি ধম্মসংগাযকেহি সংগীতং একধীতুসুত্তং ভগৱতা কত্থ কং আৰব্ভ কথঞ্চ ভাসিতং.

ৱিস্সজ্জনা – সাৱত্থিযংযেৱ ভন্তে সম্বহুলে ভিক্খূ আৰব্ভ ‘‘দাৰুণো ভিক্খৱে লাভসক্কাৰসিলোকো কটুকো ফৰুসো অন্তৰাযিকো অনুত্তৰস্স যোগক্খেমস্স অধিগমায. সদ্ধা ভিক্খৱে উপাসিকা একং ধীতৰং পিযং মনাপং এৱং সম্মা আযাচমানা আযাচেয্য ‘তাদিসা অয্যে ভৱাহি, যাদিসা খুজ্জুত্তৰা চ উপাসিকা ৱেড়ুকণ্ডকিযা চ নন্দমাতা’তি. এসা ভিক্খৱে তুলা এতং পমাণং মম সাৱিকানং উপাসিকানং, যদিদং খুজ্জুত্তৰা চ উপাসিকা ৱেড়ুকণ্ডকিযা চ নন্দমাতা’’তি এৱমাদিনা ভন্তে ভগৱতা ভাসিতং.

সচে খো ত্ৱং অয্যে অগাৰস্মা অনগাৰিযং পব্বজসি, ভাদিসা অয্যে ভৱাহি, যাদিসা খেমা চ ভিক্খুনী উপ্পলৱণ্ণা চ–

তস্মাতিহ ভিক্খৱে এৱং সিক্খিতব্বং.

ৰাহুলসংযুত্ত

পুচ্ছা – ৰাহুলসংযুত্তং পনাৱুসো ভগৱতা কত্থ কং আৰব্ভ কিস্মিং ৱত্থুস্মিং কথঞ্চ ভাসিতং.

ৱিস্সজ্জনা – সাৱত্থিযং ভন্তে আযস্মন্তং ৰাহুলং আৰব্ভ ভাসিতং. আযস্মা ভন্তে ৰাহুলো ভগৱন্তং এতদৱোচ ‘‘সাধু মে ভন্তে ভগৱা সংখিত্তেন ধম্মং দেসেতু, যমহং ভগৱতো ধম্মং সুত্ৱা একো ৱূপকট্ঠো অপ্পমত্তো আতাপী পহিতত্তো ৱিহৰেয্য’’ন্তি, তস্মিং ভন্তে ৱত্থুস্মিং ‘‘তং কিং মঞ্ঞসি ৰাহুল, চক্খুনিচ্চং ৱা অনিচ্চং ৱাতি. অনিচ্চং ভন্তে. যং পনানিচ্চং, দুক্খং ৱা তং সুখং ৱাতি. দুক্খং ভন্তে. যং পনানিচ্চং দুক্খং ৱিপৰিণামধম্মং, কল্লং নু তং সমনুপস্সিতুং ‘এতং মম, এসো হমস্মি, এসো মে অত্তা’তি. নো হেতং ভন্তে’’তি এৱমাদিনা ভন্তে ভগৱতা ভাসিতং.

লক্খণসংযুত্ত

অট্ঠিসুত্ত

পুচ্ছা – লক্খণসংযুত্তে পনাৱুসো পোৰাণকেহি ধম্মসংগাহকত্থেৰেহি পঠমং সংগীতং অট্ঠিসুত্তং ভগৱতা কত্থ কং আৰব্ভ কিস্মিং ৱত্থুস্মিং কথঞ্চ ভাসিতং.

ৱিস্সজ্জনা – ৰাজগহে ভন্তে আযস্মন্তঞ্চ লক্খণং আযস্মন্তঞ্চ মহামোগ্গল্লানং আৰব্ভ ভাসিতং. আযস্মা ভন্তে লক্খণো ভগৱতা সম্মুখে আযস্মন্তং মহামোগ্গল্লানং এতদৱোচ ‘‘ইধাযস্মা মহামোগ্গল্লানো গিজ্ঝকূটা পব্বতা ওৰোহন্তো অঞ্ঞতৰস্মিং পদেসে সিতং পাত্ৱাকাসি, কো নু খো আৱুসো মোগ্গল্লান হেতু, কো পচ্চযো সিতস্স পাতুকম্মাযা’’তি. আযস্মা চ ভন্তে মহামোগ্গল্লানো ‘‘ইধাহং আৱুসো গিজ্ঝকূটা পব্বতা ওৰোহন্তো অদ্দসং অট্ঠিকসঙ্খলিকং ৱেহাসং গচ্ছন্তিং’’তি এৱমাদিনা আৰোচেসি. তস্মিং ভন্তে ৱত্থুস্মিং ‘‘চক্খুভূতা ৱত ভিক্খৱে সাৱকা ৱিহৰন্তি, ঞাণভূতা ৱত ভিক্খৱে সাৱকা ৱিহৰন্তি, যত্ৰহি নাম সাৱকো এৱৰূপং ঞস্সতি ৱা দক্খতি ৱা সক্খিং ৱা কৰিস্সতী’’তি এৱমাদিনা ভগৱতা ভাসিতং.

অচ্ছৰিযং ৱত ভো, অব্ভুতং ৱত ভো;

এৱৰূপোপি নাম সত্তো ভৱিস্সতি.

পিণ্ডসুত্ত

পুচ্ছা – তেনাৱুসো জানতা…পে… সম্মাসম্বুদ্ধেন লক্খণসংযুত্তে ততিযং সংগীতং পিণ্ডসুত্তং কত্থ কং আৰব্ভ কিস্মিং ৱত্থুস্মিং কথঞ্চ ভাসিতং.

ৱিস্সজ্জনা – ৰাজগহে ভন্তে আযস্মন্তঞ্চ লক্খণং আযস্মন্তঞ্চ মহামোগ্গল্লানং আৰব্ভ ভাসিতং. আযস্মা ভন্তে লক্খণো ভগ্গৱতো সম্মুখে আযস্মন্তং মহামোগ্গল্লানং এতদৱোচ ‘‘ইধাযস্মা মহামোগ্গল্লানো গিজ্ঝকূটা পব্বতা ওৰোহন্তো অঞ্ঞতৰস্মিং পদেসে সিতং পাত্ৱাকাসি, কো নুখো আৱুসো মোগ্গল্লানহেতু, কো পচ্চযো সিতস্স পাতুকম্মাযা’’তি. আযস্মা চ ভন্তে মহামোগ্গল্লানো ‘‘ইধাহং আৱুসো গিজ্ঝকূটা পব্বতা ওৰোহন্তো অদ্দসং মংসপিণ্ডং ৱেহাসং গচ্ছন্তং, তমেনং গিজ্ঝাপি কাকাপি কুললাপি অনুপতিত্ৱা অনুপতিত্ৱা ৱিতচ্ছেন্তি ৱিৰাজেন্তি. সা সুদং অট্টস্সৰং কৰোতী’’তি এৱমাদিনা আৰোচেসি. তস্মিং ভন্তে ৱত্থুস্মিং ‘‘চক্খুভূতা ৱত ভিক্খৱে সাৱকা ৱিহৰন্তি, ঞাণভূতা ৱত ভিক্খৱে সাৱকা ৱিহৰন্তি, যত্ৰহি নাম সাৱকো এৱৰূপং ঞস্সতি ৱা দক্খতি ৱা সক্খিং ৱা কৰিস্সতী’’তি এৱমাদিনা ভগৱতা ভাসিতং.

অসিলোমসুত্ত

পুচ্ছা – তত্থেৱ আৱুসো পোৰাণকেহি ধম্মসংগাহকেহি মহাথেৰেহি সংগীতং অসিলোমসুত্তং ভগৱতা কত্থ কং আৰব্ভ কিস্মিং ৱত্থুস্মিং কথঞ্চ ভাসিতং.

ৱিস্সজ্জনা – ৰাজগহে ভন্তে আযস্মন্তঞ্চ লক্খণং আযস্মন্তঞ্চ মহামোগ্গল্লানং আৰব্ভ ভাসিতং. আযস্মা ভন্তে লক্খণো ভগৱতো সম্মুখে আযস্মন্তং মহামোগ্গল্লানং এতদৱোচ ‘‘কো নু খো আৱুসো মোগ্গল্লান হেতু, কো পচ্চযো সিতস্স পাতুকম্মাযা’’তি. আযস্মা চ ভন্তে মহামোগ্গল্লানত্থেৰো ‘‘ইধাহং আৱুসো গিজ্ঝকূটা পব্বতা ওৰোহন্তো অদ্দসং অসিলোমং ৱেহাসং গচ্ছন্তং’’তি এৱমাদিনা আৰোচেসি. তস্মিং ভন্তে ৱত্থুস্মিং চক্খুভূতা ৱত ভিক্খৱে সাৱকা ৱিহৰন্তি, ঞাণভূতা ৱত ভিক্খৱে সাৱকা ৱিহৰন্তি. (পেয্যাল) এসো ভিক্খৱে সত্তো ইমস্মিংযেৱ ৰাজগহে সূকৰিকো অহোসী’’তি এৱমাদিনা ভগৱতা ভাসিতং.

সূচিলোমসুত্ত

পুচ্ছা – তত্থেৱ আৱুসো পোৰাণকেহি ধম্মসংগাহকমহাথেৰেহি সংগীতং সূচিলোমসুত্তং ভগৱতা কত্থ কং আৰব্ভ কিস্মিং ৱত্থুস্মিং কথঞ্চ ভাসিতং.

ৱিস্সজ্জনা – তত্থেৱ ভন্তে ৰাজগহে আযস্মন্তঞ্চ লক্খণং আযস্মন্তঞ্চ মহামোগ্গল্লানং আৰব্ভ ভাসিতং. আযস্মা ভন্তে লক্খণো ভগৱতো সম্মুখে তথেৱ অৱোচ.

আযস্মা চ ভন্তে মহামোগ্গল্লানো তথেৱ আৰোচেসি. তস্মিং ভন্তে ৱত্থুস্মিং ‘‘চক্খুভূতা ৱত ভিক্খৱে সাৱকা ৱিহৰন্তি, ঞাণভূতা ৱত ভিক্খৱে সাৱকা ৱিহৰন্তি, (পেয্যাল) এসো ভিক্খৱে সত্তো ইমস্মিংযেৱ ৰাজগহে সূতো অহোসী’’তি এৱমাদিনা ভগৱতা ভাসিতা.

পাপভিক্খুসুত্ত