ব্ৰহ্মসংযুত্ত

গাৰৱসুত্ত

পুচ্ছা – ব্ৰহ্মসংযুত্তে আৱুসো পোৰাণেহি মহাকস্সপথেৰাদীহি ধম্মসংগাহকথেৰৱৰেহি দুতিযং সংগীতং গাৰৱসুত্তং কত্থ কথঞ্চ সমুপ্পন্নং.

ৱিস্সজ্জনা – উৰুৱেলাযং ভন্তে সমুপ্পন্নং. ভগৱা ভন্তে উৰুৱেলাযং ৱিহৰতি নজ্জা নেৰঞ্জৰায তীৰে অজপালনিগ্ৰোধমূলে পঠমাভিসম্বুদ্ধো. অথ খো ভগৱতো ৰহোগতস্স পটিসল্লীনস্স এৱং চেতসো পৰিৱিতক্কো উদপাদি ‘‘দুক্খং খো অগাৰৱো ৱিহৰতি অপ্পতিস্সো, কং নু খ্ৱাহং সমণং ৱা ব্ৰাহ্মণং ৱা সক্কত্ৱা গৰুং কত্ৱা উপনিস্সায ৱিহৰেয্য’’ন্তি.

অথ খো ভন্তে ভগৱতো এতদহোসি ‘‘অপৰিপুণ্ণস্স খো সীলক্খন্ধস্স পাৰিপূৰিযা অঞ্ঞং সমণং ৱা ব্ৰাহ্মণং ৱা সক্কত্ৱা গৰুং কত্ৱা উপনিস্সায ৱিহৰেয্যুং, ন খো পনাহং পস্সামি সদেৱকে লোকে সমাৰকে সব্ৰহ্মকে সস্সমণব্ৰাহ্মণিযা পজায সদেৱমনুস্সায অত্তনা সীলসম্পন্নতৰং অঞ্ঞং সমণং ৱা

ব্ৰাহ্মণং ৱা, যমহং সক্কত্ৱা গৰুং কত্ৱা উপনিস্সায ৱিহৰেয্যুং.

অপৰিপুণ্ণস্স খো সমাধিক্খন্ধস্স;

অপৰিপুণ্ণস্স খো পঞ্ঞাক্খন্ধস্স;

অপৰিপুণ্ণস্স খো ৱিমুত্তিক্খন্ধস্স.

অপৰিপুণ্ণস্স খো ৱিমুত্তিঞাণদস্সনক্খন্ধস্স পাৰিপূৰিযা অঞ্ঞং সমণং ৱা ব্ৰাহ্মণং ৱা সক্কত্ৱা গৰুং কত্ৱা উপনিনিস্সায ৱিহৰেয্যং. ন খো পনাহং পস্সামি সদেৱকে লোকে সমাৰকে সব্ৰহ্মকে সস্সমণব্ৰাহ্মণিযা পজায সদেৱমনুস্সায অত্তনা ৱিমুত্তিঞাণদস্সনসম্পন্নতৰং অঞ্ঞং সমণং ৱা ব্ৰাহ্মণং ৱা, যমহং সক্কত্ৱা গৰুং কত্ৱা উপনিস্সায ৱিহৰেয্যং. যংনূনাহং য্ৱাযং ধম্মো মযা অভিসম্বুদ্ধো, তমেৱ ধম্মং সক্কত্ৱা গৰুং কত্ৱা উপনিস্সায ৱিহৰেয্য’’ন্তি. এৱং খো ভন্তে ভগৱতো চেতসো পৰিৱিতক্কৱসেন উপ্পন্নং.

যে চ অতীতা সম্বুদ্ধা, যে চ বুদ্ধা অনাগতা;

যো চেতৰহি সম্বুদ্ধো, বহূনং সোকনাসনো;

সব্বে সদ্ধম্মগৰুনো, ৱিহংসু ৱিহৰন্তি চ;

তথাপি ৱিহৰিস্সন্তি, এসা বুদ্ধান ধম্মতা.

তস্মা হি অত্তকামেন, মহত্তমভিকঙ্খতা;

সদ্ধম্মো গৰুকাতব্বো, সৰং বুদ্ধান সাসনং.

অঞ্ঞৰতব্ৰহ্মসুত্ত

পুচ্ছা- তত্থাৱুসো পোৰাণকেহি মহাকস্সপাদীহি ধম্মসংগাহকথেৰৱৰেহি পঠমং সংগীতং অঞ্ঞতৰব্ৰহ্মসুত্তং কত্থ কং আৰব্ভ কিস্মিং ৱত্থুস্মিং কেন কথঞ্চ ভাসিতং.

ৱিস্সজ্জনা – ব্ৰহ্মলোকে ভন্তে অঞ্ঞতৰং ব্ৰহ্মানং আৰব্ভ আযস্মতা মহামোগ্গল্লানত্থেৰেন ভাসিতং. অঞ্ঞতৰস্স ভন্তে ব্ৰহ্মুনো এৱৰূপং পাপকং দিট্ঠিগতং উপ্পন্নং হোতি ‘‘নত্থি সো সমণো ৱা ব্ৰাহ্মণো ৱা, যো ইধ আগচ্ছেয্যা’’তি. তস্মিং ভন্তে ৱত্থুস্মিং–

অজ্জাপি তে আৱুসো সা দিট্ঠি, যা তে দিট্ঠি পুৰে অহু;

পস্সসি ৱীতিৱত্তন্তং, ব্ৰহ্মলোকে পভস্সৰন্তি;

এৱং খো ভন্তে আযস্মতা মহামোগ্গল্লানত্থেৰেন ভাসিতং.

অজ্জাপি তে আৱুসো সা দিট্ঠি, যা তে দিট্ঠি পুৰে অহু;

পস্সসি ৱীতিৱত্তন্ত, ব্ৰহ্মলোকে পভস্সৰং-হু–

ন মে মাৰিস সা দিট্ঠি, যা মে দিট্ঠি পুৰে অহু;

পস্সামি ৱীতিৱত্তন্তং, ব্ৰহ্মলোকে পভস্সৰং;

স্ৱাহং অজ্জ কথং ৱজ্জং, অহং নিচ্চোম্হি সস্সতো হু–

তেৱিজ্জা ইদ্ধিপত্তা চ, চেতোপৰিযায কোৱিদা;

খীণাসৱা অৰহন্তো, বহূ বুদ্ধস্স সাৱকা-হু–

অৰুণৱতীসুত্ত

পুচ্ছা – তত্থাৱুসো অৰুণৱতীসুত্তং ভগৱতা কত্থ কং আৰব্ভ কথঞ্চ ভাসিতং.

ৱিস্সজ্জনা – সাৱত্থিযং ভন্তে সম্বহুলে ভিক্খূ আৰব্ভ ‘‘ভূতপুব্বং ভিক্খৱে ৰাজা অহোসি অৰুণৱা নাম. ৰঞ্ঞো খো পন ভিক্খৱে অৰুণৱতো অৰুণৱতী নাম ৰাজধানী অহোসী’’তি এৱমাদিনা ভন্তে ভগৱতা অৰুণৱতী সুত্তং ভাসিতং.

আৰম্ভথ নিক্কমথ, যুঞ্জথ বুদ্ধসাসনে;

ধুনাথ মচ্চুনো সেনং, নড়াগাৰংৱ কুঞ্জৰো;

যো ইমস্মিং ধম্মৱিনযে, অপ্পমত্তো ৱিহস্সতি;

পহায জাতি সংসাৰং, দুক্খস্সন্তং কৰিস্সতি-হু–