ভিক্খুনীসংযুত্ত

আড়ৱিকাসুত্ত

পুচ্ছা – ইদানি আৱুসো ভিক্খুনী সংযুত্তং পুচ্ছামি, যং তস্স ভগৱতো অৰহতো সম্মাসম্বুদ্ধস্স সাৱিকাহি থেৰীহি অত্তনো

চ বুদ্ধসাসনস্স চ যথাভূতং গুণং পকাসেত্ৱা ভাসিতং. তত্থাৱুসো পঠমং পোৰাণকেহি মহাকস্সপাদীহি ধম্মসংগাহকেহি থেৰৱৰেহি সংগীতং আড়ৱিকাসুত্তং কত্থ কং আৰব্ভ কিস্মিং ৱত্থুস্মিং কেন কথঞ্চ ভাসিতং.

ৱিস্সজ্জনা – সাৱত্থিযং ভন্তে মাৰং পাপিমন্তং আৰব্ভ আড়ৱিকায ভিক্খুনিযা ভাসিতং. মাৰো ভন্তে পাপিমা আড়ৱিকায ভিক্খুনিযা ভযং ছম্ভিতত্তং লোমহংসং উপ্পাদেতুকামো ৱিৱেকম্হা চাৱেতুকামো আড়ৱিকং ভিক্খুনিং গাথায অজ্ঝভাসি–

‘‘নত্থি নিস্সৰণং লোকে, কিং ৱিৱেকেন কাহসি;

ভুঞ্জস্স কামৰতিযো, মাহু পচ্ছানুতাপিনী’’তি.

তস্মিং ভন্তে ৱত্থুস্মিং–

‘‘অত্থি নিস্সৰণং লোকে, পঞ্ঞায মে সুফুস্সিতং;

পমত্তবন্ধু পাপিম, ন ত্ৱং জানাসি তং পদং;

সত্তিসূলূপমা কামা, খন্ধাসং অধিকুট্টনা;

যং ত্ৱং কামৰতিং ব্ৰূসি, অৰহি ময্হ সা অহূ’’তি.

এৱং খো ভন্তে আড়ৱিকায ভিক্খুনিযা ভাসিতং.

নত্থি নিস্সৰণং লোকে, কিং ৱিৱেকেন কাহসি;

ভুঞ্জস্সু কামৰতিযো, মাহু পচ্ছানুতাপিনী-হু–

অত্থি নিস্সৰণং লোকে, পঞ্ঞায মে সুফুস্সিতং;

পমত্তবন্ধু পাপিম, ন ত্ৱং জানাসি তং পদং.

সত্তিসূলূপমা কামা, খন্ধাসং অধিকুট্টনা;

যং ত্ৱং কামৰতিং ব্ৰূসি, অৰতি ময্হ সা অহু–

সোমাসুত্ত

পুচ্ছা – সোমাসুত্তং পনাৱুসো কত্থ কং আৰব্ভ কিস্মিং ৱত্থুস্মিং কেন কথঞ্চ ভাসিতং.

ৱিস্সজ্জনা – সাৱত্থিযংযেৱ ভন্তে অন্ধৱনে মাৰং পাপিমন্তং আৰব্ভ সোমায ভিক্খুনিযা ভাসিতং. মাৰো ভন্তে পাপিমা সোমায ভিক্খুনিযা ভযং ছম্ভিতত্তং লোমহংসং উপ্পাদেতুকামো সমাধিম্হা চাৱেতুকামো সোমং ভিক্খুনিং গাথায অজ্ঝভাসি.

‘‘যং তং ইসীহি পত্তব্বং, ঠানং দুৰভিসম্ভৱং;

ন তং দ্ৱঙ্গুলপঞ্ঞায, সক্কা পপ্পোতুমিত্থিযা’’তি.

তস্মিং ভন্তে ৱত্থুস্মিং–

‘‘ইত্থিভাৱো কিং কযিৰা, চিত্তম্হি সুসমাহিতে;

ঞাণম্হি ৱত্তমানম্হি, সম্মা ধম্মং ৱিপস্সতো;

যস্স নূন সিযা এৱং, ইত্থাহং পুৰিসোতি ৱা;

কিঞ্চি ৱা পন অঞ্ঞস্মি, তং মাৰো ৱত্তুমৰহতী’’তি.

এৱং খো ভন্তে সোমায ভিক্খুনিযা অৰিযসাৱিকায ভাসিতং.

যং তং ইসীহি পত্তব্বং, ঠানং দুৰভিসম্ভৱং;

ন তং দ্ৱঙ্গুলপঞ্ঞায, সক্কা পপ্পোতুমিত্থিযা–

ইত্থি ভাৱো কিং কযিৰা, চিত্তম্হি সুসমাহিতে;

ঞাণম্হি ৱত্ত মানম্হি, সম্মা ধম্মং ৱিপস্সতো.

যস্স নূন সিযা এৱং, ইত্থাহং পুৰিসোতি ৱা;

কিঞ্চি ৱা পন অঞ্ঞস্মি, তং মাৰো ৱত্তুমৰহতি.

কিসাগোতমীসুত্ত

পুচ্ছা – তত্থাৱুসো কিসাগোতমীসুত্তং কত্থ কং আৰব্ভ কিস্মিং ৱত্থুস্মিং কেন কথঞ্চ ভাসিতং.

ৱিস্সজ্জনা – সাৱত্থিযংযেৱ ভন্তে অন্ধৱনে মাৰং পাপিমন্তং আৰব্ভ কিসাগোতমিযা ভিক্খুনিযা থেৰিযা ভাসিতং. মাৰো ভন্তে পাপিমা কিসাগোতমিযা ভিক্খুনিযা ভযং ছম্ভিতত্তং লোমহংসং উপ্পাদেতুকামো সমাধিম্হা চাৱেতুকামো কিসাগোতমিং ভিক্খুনিং গাথায অজ্ঝভাসি–

‘‘কিং নু ত্ৱং মতপুত্তাৱ, একমাসি ৰুদম্মুখী;

ৱনমজ্ঝগতা একা, পুৰিসং নু গৱেসসী’’তি.

তস্মিং ভন্তে ৱত্থুস্মিং–

অচ্চন্তং মতপুত্তাম্হি, পুৰিসা একদন্তিকা;

ন সোচামি ন ৰোদামি, ন তং ভাযামি আৱুসো.

সব্বত্থ ৱিহতা নন্দী, তমোক্খন্ধো পদালিতো;

জেত্ৱান মচ্চুনো সেনং, ৱিহৰামি অনাসৱা’’তি.

এৱং খো ভন্তে কিসাগোতমিযা ভিক্খুনিযা ভাসিতং.

কিং নু ত্ৱং মতপুত্তাৱ, একমাসি ৰুদম্মুখী;

ৱনমজ্ঝগতা একা, পুৰিসং নু গসেসসি-হু–

অচ্চন্তং মতপুত্তাম্হি, পুৰিসা এতদন্তিকা;

ন সোচামি ন ৰোদামি, ন তং ভাযামি আৱুসো.

সব্বত্থ ৱিহতা নন্দী, তমোক্খন্ধো পদালিতো;

জেত্ৱান মচ্চুনো সেনং, ৱিহৰামি অনাসৱা.

উপ্পলৱণ্ণাসুত্ত

পুচ্ছা – তত্থাৱুসো পোৰাণেহি সংগীতিকাৰমহাথেৰৱৰেহি সংগীতং উপ্পলৱণ্ণসুত্তং কত্থ কং আৰব্ভ কিস্মিং ৱত্থুস্মিং কেন কথঞ্চ ভাসিতং.

ৱিস্সজ্জনা – সাৱত্থিযংযেৱ ভন্তে অন্ধৱনে মাৰং পাপিমন্তং আৰব্ভ উপ্পলৱণ্ণায ভিক্খুনিযা ভাসিতং. মাৰো ভন্তে পাপিমা উপ্পলৱণ্ণায ভিক্খুনিযা ভযং ছম্ভিতত্তং লোমহংসং উপ্পাদেতুকামো সমাধিম্হা চাৱেতুকামো উপ্পলৱণ্ণং ভিক্খুনিং গাথায অজ্ঝভাসি–

‘‘সুপুপ্ফিতগ্গং উপগম্ম ভিক্খুনি, একা তুৱং তিট্ঠসি সালমূলে. ন চত্থি তে দুতিযা ৱণ্ণধাতু, বালে ন ত্ৱং ভাযসি ধুত্তকান’’ন্তি.

তস্মিং ভন্তে ৱত্থুস্মিং–

‘‘সতং সহস্সানিপি ধুত্তকানং,

ইধাগতা তাদিসকা ভৱেয্যুং;

লোমং ন ইঞ্জামি ন সন্তসামি,

ন মাৰ ভাযামি তমেকিকাপি.

এসা অন্তৰধাযামি, কুচ্ছিং ৱা পৱিসামি তে;

পখুমন্তৰিকাযম্পি, তিট্ঠন্তিং মং ন দক্খসি.

চিত্তস্মিং ৱসীভূতাম্হি, ইদ্ধিপাদা সুভাৱিতা;

সব্ববন্ধনমুত্তাম্হি, ন তং ভাযামি আৱুসো’’তি.

এৱং খো ভন্তে উপ্পলৱণ্ণায ভিক্খুনিযা ভাসিতং.

চালাসুত্ত

পুচ্ছা – তত্থাৱুসো চালাসুত্তং কত্থ কং আৰব্ভ কিস্মিং ৱত্থুস্মিং কেন কথঞ্চ ভাসিতং.

ৱিস্সজ্জনা – সাৱত্থিযং ভন্তে অন্ধৱনে মাৰংযেৱ পাপিমন্তং আৰব্ভ চালায ভিক্খুনিযা অৰিযসাৱিকায ভাসিতং. মাৰো ভন্তে পাপিমা চালং ভিক্খুনিং উপসঙ্কমিত্ৱা এতদৱোচ ‘‘কিং নু ত্ৱং ভিক্খুনি ন ৰোচেসী’’তি. জাতিং খ্ৱাহং আৱুসো ন ৰোচেমী’’তি.

কিং নু জাতিং ন ৰোচেসি, জাতো কামানি ভুঞ্জতি;

কো নু তং ইদমাদপযি, জাতিং মা ৰোচ ভিক্খুনীতি.

তস্মিং ভন্তে ৱত্থুস্মিং–

জাতস্স মৰণং হোতি, জাতো দুক্খানি ফুস্সতি;

বন্ধং ৱধং পৰিক্লেসং, তস্মা জাতিং ন ৰোচযে.

বুদ্ধো ধম্মমদেসেসি, জাতিযা সমতিক্কমং;

সব্বদুক্খপ্পহানায, সো মং সচ্চে নিৱেসযি.

যে চ ৰূপূপগা সত্তা, যে চ অৰূপট্ঠাযিনো;

নিৰোধং অপ্পজানন্তা, আগন্তাৰো পুনব্ভৱন্তি.

এৱং খো ভন্তে চালায ভিক্খুনিযা ভাসিতং.

কিং নু জাতিং ন ৰোচেসি, জাতো কামানি ভুঞ্জতি;

কো নু তং ইদমাদপযি, জাতিং মা ৰোচ ভিক্খুনী.

জাতস্স মৰণং হোতি, জাতো দুক্খানি ফুস্সতি;

বন্ধং ৱধং পৰিক্লেসং, তস্মা জাতিং ন ৰোচযে.

বুদ্ধো ধম্মমদেসেসি, জাতিযা সমতিক্কমং,

সব্বদুক্খপ্পহানায, সো মং সচ্চে নিৱেসযি.

সেলাসুত্ত

পুচ্ছা – তত্থাৱুসো সেলাসুত্তং কত্থ কং আৰব্ভ কিস্মিং ৱত্থুস্মিং কেন কথঞ্চ ভাসিতং.

ৱিস্সজ্জনা – সাৱত্থিযং ভন্তে মাৰংযেৱ পাপিমন্তং আৰব্ব্ভ সেলায ভিক্খুনিযা অৰিযসাৱিকায ভাসিতং. মাৰো ভন্তে পাপিমা সেলায ভিক্খুনিযা ভযং ছম্ভিতত্তং লোমহংসং উপ্পাদেতুকামো সমাধিম্হা চাৱেতুকামো সেলং ভিক্খুনিং গাথায অজ্ঝভাসি–

কেনিদং পকতং বিম্বং, ক্ৱনু বিম্বস্স কাৰকো;

ক্ৱনু বিম্বং সমুপ্পন্নং, ক্ৱনু বিম্বং নিৰুজ্ঝতীতি.

তস্মিং ভন্তে ৱত্থুস্মিং–

নযিদং অত্তকতং বিম্বং, নযিদং পৰকতং অঘং;

হেতুং পটিচ্চ সম্ভূতং, হেতুভঙ্গা নিৰুজ্ঝতীতি.

এৱমাদিনা ভন্তে সেলায ভিক্খুনিযা ভাসিতং.

কেনিদং পকতং বিম্বং, ক্ৱনু বিম্বস্স কাৰকো;

ক্ৱনু বিম্বং সমুপ্পন্নং, ক্ৱনু বিম্বং নিৰুজ্ঝতি-হু–

নযিদং অত্তকতং বিম্বং, নযিদং পৰকতং অঘং;

হেতুং পটিচ্চ সম্ভূতং, হেতুভঙ্গা নিৰুজ্ঝতি.

ৱজিৰাসুত্ত

পুচ্ছা – তত্থাৱুসো পোৰাণকেহি মহাকস্সপাদীহি ধম্মসংগাহকথেৰৱৰেহি সংগীতং ৱজিৰাসুত্তং কত্থ কং আৰব্ভ কেন কথঞ্চ ভাসিতং.

ৱিস্সজ্জনা – সাৱত্থিযং ভন্তে মাৰং পাপিমন্তং আৰব্ভ ৱজিৰায থেৰিযা ভিক্খুনিযা ভাসিতং. মাৰো ভন্তে পাপিমা পুৰিমনযেনেৱ ৱজিৰং ভিক্খুনিং গাথায অজ্ঝভাসি–

কেনাযং পকতো সত্তো, কুৱং সত্তস্স কাৰকো,

কুৱং সত্তো সমুপ্পন্নো, কুৱং সত্তো নিৰুজ্ঝতীতি.

তস্মিং ভন্তে ৱত্থুস্মিং–

কিং নু সত্তোতি পচ্চেসি, মাৰদিট্ঠিগতং নু তে;

সুদ্ধসঙ্খাৰপুঞ্জোযং, নযিধ সত্তুপলব্ভতি.

যথা হি অঙ্গসম্ভাৰা, হোতি সদ্দো ৰথো ইতি;

এৱং খন্ধেসু সন্তেসু, হোতি সত্তোতি সম্মুতি.

দুক্খমেৱ হি সম্ভোতি, দুক্খং তিট্ঠতি ৱেতি চ,

নাঞ্ঞত্ৰ দুক্খা সম্ভোতি, নাঞ্ঞং দুক্খা নিৰুজ্ঝতীতি.

এৱং খো ভন্তে ৱজিৰায ভিক্খুনিযা ভাসিতং.

কেনাযং পকতো সত্তো, কুৱং সত্তস্সকাৰকো;

কুৱং সত্তো সমুপ্পন্নো, কুৱং সত্তো নিৰুজ্ঝতি-হু–

কিং নু সত্তোতি পচ্চেসি, মাৰ দিট্ঠিগতং নু তে;

সুদ্ধসঙ্খাৰপুঞ্জোযং, নযিধ সত্তুপলব্ভতি.