নমো তস্স ভগৱতো অৰহতো সম্মাসম্বুদ্ধস্স

সুত্তন্তপিটকে

দীঘনিকাযে

সীলক্খন্ধৱগ্গসুত্ত

সংগাযনস্স পুচ্ছা ৱিস্সজ্জনা

পুচ্ছা – পঠমমহাধম্মসংগীতিকালে আৱুসো ধম্মসংগাহকা মহাকস্সপাদযো মহাথেৰৱৰা পঠমং ৱিনযং সংগাযিত্ৱা তদনন্তৰং কং নাম পাৱচনং সংগাযিংসু.

ৱিস্সজ্জনা – পঠমমহাধম্মসংগীতিযং ভন্তে ধম্মসংগাহকা মহাকস্সপাদযো মহাথেৰৱৰা পঠমং ৱিনযং সংগাযিত্ৱা তদনন্তৰং ধম্মং সংগাযিংসু.

পুচ্ছা – ধম্মো নাম আৱুসো সুত্তন্তাভিধম্মৱসেন দুৱিধো, তত্থ কতৰং ধম্মং পঠমং সংগাযিংসু.

ৱিস্সজ্জনা – দ্ৱীসু ভন্তে ধম্মেসু সুত্তন্তাভিধম্মপিটকেসু পঠমং সুত্তন্তং পিটকং ধম্মং সংগাযিংসু.

পুচ্ছা – সুত্তন্তপিটকে পি আৱুসো দীঘমজ্ঝিমসংযুত্তঅঙ্গুত্তৰখুদ্দকনিকাযৱসেন পঞ্চ নিকাযা, তেসু পঠমং কতৰং নিকাযং সংগাযিংসু.

ৱিস্সজ্জনা – পঞ্চসু ভন্তে নিকাযেসু পঠমং দীঘনিকাযং সংগাযিংসু.

পুচ্ছা – দীঘনিকাযেপি আৱুসো তযো ৱগ্গা চতুত্তিংসা চ সুত্তানি, তেসু কতৰং ৱগ্গং কতৰঞ্চ সুত্তং পঠমং সংগাযিংসু.

ৱিস্সজ্জনা – দীঘনিকাযেপি ভন্তে তীসু ৱগ্গেসু পঠমং সীলক্খন্ধৱগ্গং, চতুত্তিংসতিযা চ সুত্তেসু পঠমং ব্ৰহ্মজালসুত্তং সংগাযিংসু.

ব্ৰহ্মজালসুত্ত

পুচ্ছা – সাধু সাধু আৱুসো মযম্পি দানি ততোযেৱ পট্ঠায সংগাযিতুং পুব্বকিচ্চানি সমাৰভাম…, তেনাৱুসো ভগৱতা জানতা পস্সতা অৰহতা সম্মাসম্বুদ্ধেন ব্ৰহ্মজালসুত্তং কত্থ ভাসিতং.

ৱিস্সজ্জনা – অন্তৰা চ ভন্তে ৰাজগহং অন্তৰা চ নাড়ন্দং অম্বলট্ঠিকাযং ৰাজাগাৰকে ভাসিতং.

পুচ্ছা – কং আৱুসো আৰব্ভ ভাসিতং.

ৱিস্সজ্জনা – সুপ্পিযঞ্চ ভন্তে পৰিব্বাজকং ব্ৰহ্মদত্তঞ্চ মাণৱং আৰব্ভ ভাসিতং.

পুচ্ছা – কিস্মিং আৱুসো ৱত্থুস্মিং ভাসিতং.

ৱিস্সজ্জনা – ৱণ্ণাৱণ্ণে ভন্তে, সুপ্পিযো হি ভন্তে অনেকপৰিযাযেন বুদ্ধস্স অৱণ্ণং ভাসতি ধম্মস্স অৱণ্ণং ভাসতি সঙ্ঘস্স অৱণ্ণং ভাসতি, সুপ্পিযস্স পন পৰিব্বাজকস্স অন্তেৱাসী ব্ৰহ্মদত্তো মাণৱো অনেকপৰিযাযেন বুদ্ধস্স ৱণ্ণং ভাসতি ধম্মস্স ৱণ্ণং ভাসতি সঙ্ঘস্স ৱণ্ণং ভাসতি, তস্মিং ভন্তে ৱত্থুস্মিং ভাসিতং.

অনুসন্ধে

পুচ্ছা – কতি আৱুসো তত্থ অনুসন্ধযো.

ৱিস্সজ্জনা – তযো ভন্তে তত্থ অনুসন্ধযো, একো অৱণ্ণানুসন্ধি, দ্ৱে ৱণ্ণানুসন্ধিযো.

পঠম অনুসন্ধে

পুচ্ছা – তত্থাৱুসো পঠমে অনুসন্ধিম্হি কথং ভগৱতা ভাসিতং, তং সংখেপতো কথেহি.

ৱিস্সজ্জনা – পঠমে ভন্তে অনুসন্ধিম্হি অৱণ্ণে মনোপদোসং নিৱাৰেত্ৱা, তত্থ চ আদীনৱং দস্সেত্ৱা, তত্থ পটিপজ্জিতব্বাকাৰো ভগৱতা ভাসিতো.

মমং ৱা ভিক্খৱে পৰে অৱণ্ণং ভাসেয্যুং, ধম্মস্স ৱা অৱণ্ণং ভাসেয্যুং সঙ্ঘস্স ৱা অৱণ্ণং ভাসেয্যুং, তত্ৰ তুম্হেহি ন আঘাতো অপ্পচ্চযো ন চেতসো অনভিৰদ্ধি কৰণীযা…

দুতিয অনুসন্ধে

পুচ্ছা – সাধু সাধু আৱুসো, সাধু খো ভগৱা অত্তনা পৰমুক্কং সাগতখন্তীগুণসমন্নাগতো অত্তনো সাৱকভূতে অম্হেপি তত্থ সমাদাপেসি, অত্তনা চ লোকধম্মেসু অনিঞ্জনসভাৱো অম্হাকম্পি তথত্তায ওৱাদমদাসি, দুতিযেপনাৱুসো অনুসন্ধিম্হি কথং ভগৱতা ভাসিতং, তম্পি সংখেপতো পকাসেহি.

ৱিস্সজ্জনা – দুতিযে পন ভন্তে অনুসন্ধিম্হি ৱণ্ণে চেতসো উপ্পিলাৱিতত্তং নিসেধেত্ৱা, তত্থ চ আদীনৱং দস্সেত্ৱা, তত্থ চ পটিপজ্জনাকাৰং দস্সেত্ৱা, পুথুজ্জনস্স ৱণ্ণভূমিভূতানি তীণি সীলানি ৱিত্থাৰতো ভগৱতা ভাসিতানি.

মমং ৱা ভিক্খৱে পৰে ৱণ্ণং ভাসেয্যুং, ধম্মস্স ৱা ৱণ্ণং ভাসেয্যুং, সঙ্ঘস্স ৱা ৱণ্ণং ভাসেয্যুং, তত্ৰ তুম্হেহি ন আনন্দো ন সোমনস্সং ন চেতসো অভিৰদ্ধি কৰণীযা –

ততিয অনুসন্ধে

পুচ্ছা – সাধু সাধু আৱুসো, সাধু খো ভগৱা অত্তনা পৰমুক্কংসগতসুপৰিসুদ্ধসীলসমন্নাগতো, তং অত্তনো সুপৰিসুদ্ধসীলং দস্সেত্ৱা পৰেপি তত্থ নিযোজেসি, ততিযে পনাৱুসো অনুসন্ধিম্হি কথং ভগৱতা ভাসিতং, তং সংখেপতো পকাসেহি.

ৱিস্সজ্জনা – ততিযে পন ভন্তে অনুসন্ধিম্হি দ্ৱাসট্ঠি দিট্ঠিযো সব্বঞ্ঞুত ঞাণেন ৱিত্থাৰতো ৱিভজিত্ৱা, তাসঞ্চ ছ ফস্সাযতনপদট্ঠানভাৱং ৱিভাৱেত্ৱা, মিচ্ছাদিট্ঠিগতিকাধিট্ঠা নঞ্চ ৱট্টং কথেত্ৱা, যুত্তযোগভিক্খুঅধিট্ঠানঞ্চ ৱিৱট্টং কথেত্ৱা, মিচ্ছাদিট্ঠিগতিকস্স দেসনাজালতো অৱিমুত্তভাৱং দেসনাজালতো ৱিমুত্তস্স নত্থিকভাৱঞ্চ ৱিভাৱেত্ৱা, অত্তনো চ কত্থচি অপৰিযাপন্নভাৱং দস্সেত্ৱা, উপাদিসেসনিব্বানধাতুং পাপেত্ৱা দেসনা ভগৱতা নিট্ঠাপিতা.

উচ্ছিন্নভাৱনেত্তিকো ভিক্খৱে তথাগতস্স কাযো তিট্ঠতি, যাৱস্স কাযো ঠস্সতি তাৱ নং দক্খন্তি দেৱমনুস্সা, কাযস্স ভেদা উদ্ধং জীৱিতপৰিযাদানা ন নং দক্খন্তি দেৱমনুস্সা.

সুত্তনিদেসনা

পুচ্ছা – সাধু সাধু আৱুসো, সাধু খো ভগৱা অত্তনা দ্ৱাসট্ঠি দিট্ঠিযো চ ছ ফস্সাযতনানি চ দ্ৱাদস পটিচ্চসমুপ্পাদঙ্গানি চ সব্বসো পৰিজানিত্ৱা তেসং পৰিজাননত্থায পৰেসম্পি তথত্তায ধম্মং পকাসেতি, সুত্তঞ্চ নাম আৱুসো চতুন্নং সুত্তনিক্খেপানং অঞ্ঞতৰৱসেনেৱ নিক্খিত্তং, তস্মা তেসু ইদং সুত্তং কতৰেন সুত্তনিক্খেপেন ভগৱতা নিক্খিত্তং.

ৱিস্সজ্জনা – চতূসু ভন্তে সুত্তনিক্খেপেসু অট্ঠুপ্পত্তিনিক্খেপন ইদং সুত্তং নিক্খিত্তং.

পুচ্ছা – কস্স আৱুসো ৱচনং.

ৱিস্সজ্জনা – ভগৱতো ভন্তে ৱচনং অৰহতো সম্মাসম্বুদ্ধস্স.

পুচ্ছা – কেনাৱুসো আভতং.

ৱিস্সজ্জনা – পৰম্পৰায ভন্তে আভতং.

পুচ্ছা – অত্থি নু খো আৱুসো এত্থ কোচি ৱিৰদ্ধদোসা, যেন পচ্ছিমা জনা মিচ্ছাঅত্থং গণ্হেয্যুং.

ৱিস্সজ্জনা – নত্থি ভন্তে.

সামঞ্ঞফলসুত্ত

পুচ্ছা – তেনাৱুসো ভগৱতা…পে… সম্মাসম্বুদ্ধেন সামঞ্ঞফলসুত্তং কত্থ ভাসিতং.

ৱিস্সজ্জনা – ৰাজগহে ভন্তে জীৱকস্স কোমাৰভচ্চস্স অম্বৱনে ভাসিতং.

পুচ্ছা – কেনাৱুসো সদ্ধিং ভগৱতা ভাসিতং.

ৱিস্সজ্জনা – ৰঞ্ঞা ভন্তে মাগধেন অজাতসত্তুনা ৱেদেহিপুত্তেন সদ্ধিং ভাসিতং.

পুচ্ছা – তং পনাৱুসো সুত্তং চতুন্নং সুত্তনিক্খেপানং কতৰেন সুত্তনিক্খেপেন ভগৱতা নিক্খিত্তং.

ৱিস্সজ্জনা – চতুন্নং ভন্তে সুত্তনিক্খেপানং পুচ্ছাৱসিকেন সুত্তনিক্খেপেন নিক্খিতং ভগৱতা.

অজাতসত্তু

পুচ্ছা – সা পনাৱুসো পুচ্ছা কেনাকাৰেন সমুপ্পন্না.

ৱিস্সজ্জনা – ৰাজা ভন্তে মাগধো অজাসত্তু ৱেদেহিপুত্তো তদহুপোসথে পন্নৰসে কোমুদিযা চাতুমাসিনিযা পুণ্ণায পুণ্ণমায ৰত্তিযা যেন ভগৱা তেনুপসংকমি, উপসংকমিত্ৱা ভগৱন্তং দিট্ঠেৱ ধম্মে সংদিট্ঠিকং সামঞ্ঞফলং পুচ্ছি, এৱং খো সা ভন্তে পুচ্ছা উপ্পন্না.

ৰম্মণীযা ৱত ভো দোসিনা ৰত্তি, অভিৰূপা ৱত ভো দোসিনা ৰত্তি, দস্সনীযা ৱত ভো দোসিনা ৰত্তি, পাসাদিকা ৱত ভো দোসিনা ৰত্তি, লক্খঞ্ঞা ৱত ভো দোসিনা ৰত্তি….

কং নুখ্ৱজ্জ সমণং ৱা ব্ৰাহ্মণং ৱা পযিৰুপাসেয্যাম….

যং নো পযিৰুপসতো চিত্তং পসীদেয্য….

ছৰাজীৱক

ত্ৱং পন সম্ম জীৱক কিং তুণ্হীসি –

অযং দেৱ অম্হাকং ভগৱা অৰহং সম্মাসম্বুদ্ধো অম্হাকং অম্বৱনে ৱিহৰতি.

তং খো পন ভগৱন্তং এৱং কল্যাণো কিত্তিসদ্দো অব্ভুগ্গতো ‘‘ইতিপি সো ভগৱা অৰহং সম্মাসম্বুদ্ধো ৱিজ্জাচৰণসম্পন্নো সুগতো লোকৱিদূ অনুত্তৰোপুৰিসদম্মসাৰথি সত্থাদেৱমনুস্সানং বুদ্ধো ভগৱা’’তি.

তং দেৱো ভগৱন্তং পযিৰুপাসতু, অপ্পেৱনাম দেৱস্স ভগৱন্তং পযিৰুপাসতো চিত্তং পসীদেয্য.

তেন হি সম্ম জীৱক হত্থিযানানি কপ্পাপেহি.

কপ্পিতানি খো তে দেৱ হত্থিযানানি, যস্স দানি কালং মঞ্ঞসি.

অজাতসত্তু

কিচ্চি মং সম্ম জীৱক ন ৱঞ্চেসি, কচ্চি মং সম্ম জীৱক ন পলম্ভেসি….

মা ভাযি মহাৰাজ, মা ভাযি মহাৰাজ….

ন তং দেৱ ৱঞ্চেমি, ন তং দেৱ পলম্ভামি….

অজাতসত্ত

এসো মহাৰাজ ভগৱা, এসো মহাৰাজ ভগৱা মজ্ঝিমং থম্ভং নিস্সায পুৰত্থাভিমুখো নিসিন্নো পুৰক্খতো ভিক্খুসঙ্ঘস্স….

ইমিনা মে উপসমেন উদযভদ্দো কুমাৰো সমন্নাগতো হোতু…

অগমা খো ত্ৱং মহাৰাজ যথা পেমং.

পুচ্ছেয্যামহং ভন্তে ভগৱন্তং কিঞ্চিদেৱ দেসং সচে মে ভগৱা ওকাসং কৰোতি পঞ্হস্স ৱেয্যাকৰণায.

পুচ্ছ মহাৰাজ যদাকঙ্খসি.

যথা নু খো ইমানি ভন্তে পুথুসিপ্পাযতনানি, সেয্যথিদং, হত্থাৰোহা অস্সাৰোহা ৰথিকা ধনুগ্গহা চেলকা চলকা পিণ্ডদাযকা (পেয্যাল) গণকা মুদ্দিকা, অঞ্ঞানিপি এৱং গতিকানি পুথুসিপ্পাযতনানি, তে তেন সিপ্পেন সন্দিট্ঠিকং সিপ্পফলং জীৱন্তি, তে তেন অত্তানং সুখেন্তি পীণেন্তি, মাতাপিতৰো সুখেন্তি, পীণেন্তি, পুত্তদাৰং সুখেন্তি পীণেন্তি, মিত্তামচ্চে সুখেন্তি পীণেন্তি সমণব্ৰাহ্মণেসু উদ্ধগ্গিকং দক্খিণং পতিট্ঠপেন্তি সোৱগ্গিকং সুখৱিপাকং সগ্গসংৱত্তনিকং, সক্কা নু খো ভন্তে এৱমেৱ দিট্ঠেৱ ধম্মে সন্দিট্ঠিকং সামঞ্ঞফলং পঞ্ঞপেতুং.

পুচ্ছা – তদা আৱুসো কথং ভগৱতা ৰাজা অজাতসত্তু ৱেদেহি পুত্তো পটিপুচ্ছিতো কথঞ্চ তেন ভগৱতো আৰোচিতং.

ৱিস্সজ্জনা – ‘‘অভিজানাসি নো ত্ৱং মহাৰাজ ইমং পঞ্হং অঞ্ঞে সমণব্ৰাহ্মণে পুচ্ছিতাতি, অভিজানামহং ভন্তে অঞ্ঞে সমণব্ৰাহ্মণে পুচ্ছিতাতি, যথাকথং পন তে মহাৰাজ ব্যাকৰিংসু, সচে তে অগৰু, ভাসস্সূতি ন খো মে ভন্তে গৰু, যত্থস্স ভগৱা নিসিন্নো ভৱন্তৰূপো ৱাতি, তেনেহি মহাৰাজ ভাসস্সূ’’তি, এৱং খো ভন্তে তদা ভগৱতা ৰাজা মাগধো অজাতসত্তু ৱেদেহি পুত্তো পটিপুচ্ছিতো, এৱং খো ভন্তে তেন তদা ভগৱতো আৰোচিতং.

পূৰণকস্সপ অযূৱাদ

পুচ্ছা – কথঞ্চাৱুসো পূৰণকস্সপস্স সন্তিকে পুচ্ছাৱিস্সজ্জনা অহোসি.

ৱিস্সজ্জনা – একমিদং ভন্তে সমযং ৰাজা মাগধো অজাতসত্তু ৱেদেহিপুত্তো যেন পূৰণো কস্সপো তেনুপসঙ্কমি, উপসঙ্কমিত্ৱা পূৰণং কস্সপং সন্দিট্ঠিকং সামঞ্ঞফলং পুচ্ছি, অথ খো ভন্তে পূৰণো কস্সপো কৰোতো খো মহাৰাজ কাৰযতো, ছিন্দতো ছেদাপযতো, পচতো পাচাপযতো, সোচযতো সোচাপযতো (পেয্যাল) কৰোতো ন কৰীযতি পাপং ত্যাদিনা ৰঞ্ঞো মাগধস্স অজাতসত্তুস্স ৱেদেহিপুত্তস্স সংদিট্ঠি কং সামঞ্ঞফলং পুট্ঠো সমানো অকিৰিযং ব্যাকাসি, এৱং খো ভন্তে পূৰণস্স কস্সপস্স সন্তিকে পুচ্ছাৱিস্সজ্জনা অহোসি.

পূৰণকস্সপৱাদ

নিস্সিৰিকো ৱত আৱুসো পূৰণস্স কস্সপস্স ৱাদো অনত্থসংহিতো জিগুচ্ছনীযো অতিৱিয ভযানকো, যে তস্স ৱচনং সোতব্বং সদ্ধাতব্বং মঞ্ঞেয্যুং, তেসং তং অস্স দীঘৰত্তং অহিতায দুক্খায, এত্তকেনেৱ অজ্জ মযং পুচ্ছাৱিস্সজ্জনং থপেস্সাম.

মক্খলিগোসাল অযূৱাদ

পুচ্ছা – পুৰিমদিৱসে আৱুসো মযা সামঞ্ঞফলসুত্তস্স নিদানপৰিযাপন্নানি পুচ্ছিতব্বট্ঠানানি কানিচি কানিচি পুচ্ছিতানি, তযা চ সুট্ঠু ৱিস্সজ্জিতানি, অজ্জ পন যথানুপ্পত্তমক্খলিগোসায ৱাদতো পট্ঠায পুচ্ছিস্সামি, মক্খলি পন আৱুসো

গোসালো ৰঞ্ঞা মাগধেন অজাতসত্তুনা ৱেদেহিপুত্তেন সন্দিট্ঠিকং সামঞ্ঞফলং পুট্ঠো কথং ব্যাকাসি.

ৱিস্সজ্জনা – একমিদং ভন্তে সমযং ৰাজা মাগধো অজাতসত্তু ৱেদেহিপুত্তো যেন মক্খলিগোসালো তেনুপসংকমি, উপসংকমিত্ৱা মক্খলিং গোসালং সন্দিট্ঠিকং সামঞ্ঞফলং পুচ্ছি, অথ খো ভন্তে মক্খলিগোসালো ৰাজানং মাগধং অজাতসত্তুং ৱেদেহিপুত্তং এতদৱোচ ‘‘নত্থি মহাৰাজ হেতু নত্থি পচ্চযো সত্তানং সংকিলেসায, অহেতূ অপচ্চযা সত্তা সংকিলিস্সন্তি. নত্থি মহাৰাজ হেতু নত্থি পচ্চযো সত্তানং ৱিসুদ্ধিযা, অহেতূ অপচ্চযা সত্তা ৱিসুজ্ঝন্তি, (পেয্যাল) চুল্লাসীতি মহাকপ্পিনো সতসহস্সানি, যানি বালে চ পণ্ডিতে চ সন্ধাৱিত্ৱা সংসৰিত্ৱা দুক্খস্সন্তং কৰিস্সন্তি, তত্থ নত্থি ‘ইমিনাহং সীলেন ৱা ৱতেন ৱা তপেন ৱা ব্ৰহ্মচৰিযেন ৱা অপৰিপক্কং ৱা কম্মং পৰিপাচেস্সামি, পৰিপক্কং ৱা কম্মং ফুস্স ফুস্স ব্যন্তিং কৰিস্সামী’তি হেৱং নত্থি. দোণমিতে সুখদুক্খে, পৰিযন্তকতে সংসাৰে নত্থি হাযনৱড্ঢনে, নত্থি উক্কংসাৱকংসে. সেয্যথাপি নাম সুত্তপুট্ঠে খিত্তে নিব্বেঠিযমানমেৱ পলেতি, এৱমেৱ বালে চ পণ্ডিতে চ সন্ধাৱিত্ৱা সংসৰিত্ৱা দুক্খস্সন্তং কৰিস্সন্তী’’তি, ইত্থং খো ভন্তে ৰঞ্ঞো মাগধস্স অজাতসত্তুস্স ৱেদেহিপুত্তস্স মক্খলিগোসালো সন্দিট্ঠিকং সামঞ্ঞফলং পুট্ঠো সমানো সংসাৰসুদ্ধিং ব্যাকাসি.

মক্খলিগোসালৱাদ

অযম্পি আৱুসো ৱাদো নিস্সিৰিকোযেৱ অনত্থসংহিতো জিগুচ্ছনীযো অতি ৱিয ভযানকো, যে তস্স ৱচনং সোতব্বং সদ্ধাতব্বং মঞ্ঞেয্যুং, তেসং তং অস্স দীঘৰত্তং অহিতায দুক্খায.

অজিতকেসকম্বলৱাদ

পুচ্ছা – অথাপৰম্পি পুচ্ছামি, অজিতো পন আৱুসো কেসকম্বলো ৰঞ্ঞা মাগধেন অজাতসত্তুনা ৱেদেহিপুত্তেন সন্দিট্ঠিকং সামঞ্ঞফলং পুট্ঠো কথং ব্যাকাসি.

ৱিস্সজ্জনা – একমিদং ভন্তে সমযং ৰাজা মাগধো অজাতসত্তু ৱেদেহিপুত্তো যেন অজিতো কেসকম্বলো তেনুপসঙ্কমি, উপসঙ্কমিত্ৱা অজিতং কেসকম্বলং সন্দিট্ঠিকং সামঞ্ঞফলং পুচ্ছি, অথ খো ভন্তে অজিতো কেসকম্বলো ৰাজানং মাগধং অজাতসত্তুং ৱেদেহিপুত্তং এতদৱোচ ‘‘নত্থি মহাৰাজ দিন্নং, নত্থি যিট্ঠং, নত্থি হুতং, নত্থি সুকতদুক্কটানং কম্মানং ফলং ৱিপাকো, নত্থি অযং লোকো, নত্থি পৰো লোকো, নত্থি মাতা, নত্থি পিতা, নত্থি সত্তা ওপপাতিকা, নত্থি লোকে সমণব্ৰাহ্মণা সম্মগ্গতা সম্মাপটিপন্না, যে ইমঞ্চ লোকং পৰঞ্চ লোকং সযং অভিঞ্ঞা সচ্ছিকত্ৱা পৱেদেন্তি. (পেয্যাল) বালে চ পণ্ডিতে চ কাযস্স ভেদা উচ্ছিজ্জন্তি ৱিনস্সন্তী’’তি. ইত্থং খো ভন্তে ৰঞ্ঞো মাগধস্স অজাতসত্তুস্স ৱেদেহিপুত্তস্স অজিতো কেসকম্বলো সন্দিট্ঠিকং সামঞ্ঞফলং পুট্ঠো সমানো উচ্ছেদং ব্যাকাসি.

অজিতকেসকম্বল

অযম্পি খো আৱুসো নিস্সিৰিকোযেৱ, অনত্থসংহিতো জিগুচ্ছনীযো অতি ৱিয ভযানকো, যে তস্স ৱচনং সোতব্বং সদ্ধাতব্বং মঞ্ঞেয্যুং, তেসং তং অস্স দীঘৰত্তং অহিতায দুক্খায.

পকুধকচ্চাযনৱাদ

পুচ্ছা – অথাপৰম্পি পুচ্ছামি, পকুধো পন আৱুসো কচ্চাযনো ৰঞ্ঞা মাগধেন অজাতসত্তুনা ৱেদেহিপুত্তেন সন্দিট্ঠিকং সামঞ্ঞফলং পুট্ঠো কথং ব্যাকাসি.

ৱিস্সজ্জনা – একমিদং ভন্তে সমযং ৰাজা মাগধো অজাতসত্তু ৱেদেহিপুত্তো যেন পকুধো কচ্চাযনো তেনুপসঙ্কমি, উপসঙ্কমিত্ৱা পকুধং কচ্চাযনং সন্দিট্ঠিকং সামঞ্ঞফলং পুচ্ছি, অথ খো ভন্তে পকুধো কচ্চাযনো ৰাজানং মাগধং অজাসত্তুং ৱেদেহিপুত্তং এতদৱোচ ‘‘সত্তিমে মহাৰাজ কাযা অকটা অকটৱিধা অনিম্মিতা অনিম্মাতা ৱঞ্চা কূটট্ঠা এসিকট্ঠাযিতা, তে ন ইঞ্জন্তি, ন ৱিপৰিণামেন্তি, ন অঞ্ঞমঞ্ঞং ব্যাবাধেন্তি, নালং অঞ্ঞমঞ্ঞস্স সুখায ৱা দুক্খায ৱা সুখদুক্খায ৱা. কতমে সত্ত, পথৱীকাযো, আপোকাযো, তেজোকাযো ৱাযোকাযো, সুখে, দুক্খে, জীৱে সত্তমে. ইমে সত্তকাযা অকটা অকটৱিধা অনিম্মিতা অনিম্মাতা ৱঞ্চ্যা কূটট্ঠা এসিকট্ঠাযিতা, তে ন ইঞ্জন্তি, ন ৱিপৰিণামেন্তি, ন অঞ্ঞমঞ্ঞং ব্যাবাধেন্তি, নালং অঞ্ঞমঞ্ঞস্স সুখায ৱা দুক্খায ৱা সুখদুক্খায ৱা. তত্থ নত্থি হন্তা ৱা ঘাতেতা ৱা, সোতা ৱা সাৱেতা ৱা, ৱিঞ্ঞাতা ৱা ৱিঞ্ঞাপেতা ৱা, যোপি তিণ্হেন সত্থেন সীসং ছিন্দতি, ন কোচি কিঞ্চি জিৱিতা ৱোৰোপেতি, সত্তন্নংত্ৱেৱ কাযানমন্তৰেন সত্থং ৱিৱৰমনুপততী’’তি. ইত্থং খো ভন্তে ৰঞ্ঞো মাগধস্স অজাতসত্তুস্স ৱেদেহিপুত্তস্স পকুধো কচ্চাযনো সামঞ্ঞফলং পুট্ঠো সমানো অঞ্ঞেন অঞ্ঞং ব্যাকাসি.

পকুধকচ্চাযনৱাদ

অযম্পি খো আৱুসো ৱাদো পুৰিমৱাদোৱিয নিস্সিৰিকোযেৱ অনত্থসংহিতো জিগুচ্ছনীযো অতিৱিয ভযানকো.

নিগণ্ঠনাটপুত্তৱাদ

পুচ্ছা – অথাপৰম্পি পুচ্ছামি, নিগণ্ঠো পনাৱুসো নাটপুত্তো ৰঞ্ঞা মাগধেন অজাতসত্তুনা ৱেদেহিপুত্তেন সন্দিট্ঠিকং সামঞ্ঞফলং পুট্ঠো কথং ব্যাকাসি.

ৱিস্সজ্জনা – একমিদং ভন্তে সমযং ৰাজা মাগধো অজাতসত্তু ৱেদেহিপুত্তো যেন নিগণ্ঠো নাটপুত্তো তেনুপসংকমি, উপসংকমিত্ৱা নিগণ্ঠং নাটপুত্তং সন্দিট্ঠিকং সামঞ্ঞফলং পুচ্ছি, অথ খো নিগণ্ঠো নাটপুত্তো ৰাজানং মাগধং অজাতসত্তুং ৱেদেহিপুত্তং এতদৱোচ, ‘‘ইধ মহাৰাজ নিগণ্ঠো চাতুযামসংৱৰসংৱুতো হোতি, কথঞ্চ মহাৰাজ

নিগণ্ঠো চাতুযামসংৱৰসংৱুতো হোতি, ইধ মহাৰাজ নিগণ্ঠো সব্বৱাৰিৱাৰিতো চ হোতি, সব্বৱাৰিযুত্তো চ, সব্বৱাৰিধুতো চ, সব্বৱাৰিফুটো চ. এৱং খো মহাৰাজ নিগণ্ঠো চাতুযামসংৱৰসংৱুতো হোতি, যতো খো মহাৰাজ নিগণ্ঠো এৱং চাতুযামসংৱৰসংৱুতো হোতি. অযং ৱুচ্চতি মহাৰাজ নিগণ্ঠো গতত্তো চ যতত্তো চ ঠিতত্তো চা’’তি. ইত্থং খো ভন্তে ৰঞ্ঞো মাগধস্স অজাতসত্তুস্স ৱেদেহিপুত্তস্স নিগণ্ঠো নাটপুত্তো সন্দিট্ঠিকং সামঞ্ঞফলং পুট্ঠো সমানো চাতুযামসংৱৰং ব্যাকাসি.

নিগণ্ঠৱাদ

এতস্স পনাৱুসো ৱাদে কোচি সাসনানুলোমৱাদো অত্থি, অসুদ্ধলদ্ধিতায পন এসোপি ৱাদো জিগুচ্ছনীযোযেৱ, সেয্যথাপি ভোজনং গূথমিস্সং গাৰয্হোযেৱ আৰকা পৰিৱজ্জিতব্বোযেৱ, সেয্যথাপি ৱিসসংসট্ঠো আপানীযকংসো.

সিঞ্চঞ্ঞৱাদ

পুচ্ছা – অথাপৰম্পি পুচ্ছামি, সঞ্চযো পনাৱুসো বেলট্ঠপুত্তো সন্দিট্ঠিকং সামঞ্ঞফলং পুট্ঠো কথং ব্যাকাসি.

ৱিস্সজ্জনা – একমিদং ভন্তে সমযং ৰাজা মাগধো অজাতসত্তু ৱেদেহিপুত্তো যেন সঞ্চযো বেলট্ঠপুত্তো তেনুপসঙ্কমি, উপসঙ্কমিত্ৱা সঞ্চযং বেলট্ঠপুত্তং এতদৱোচ, ‘‘যথা নু খো ইমানি ভো সঞ্চয পুথুসিপ্পাযতনানি, সেয্যথিদং, হত্থাৰোহা অস্সৰোহা…পে… সক্কা নু খো ভো সঞ্চয এৱমেৱ দিট্ঠেৱ ধম্মে সন্দিট্ঠিকং সামঞ্ঞফলং পঞ্ঞপেতু’’ন্তি, এৱং ৱুত্তে ভন্তে সঞ্চযো বেলট্ঠপুত্তো ৰাজানং মাগধং অজাতসত্তুং ৱেদেহিপুত্তং এতদৱোচ.

‘‘অত্থি পৰোলোকোতি ইতি চে মং পুচ্ছসি, অত্থি পৰো লোকোতি ইতি চে মে অস্স, অত্থি পৰো

লোকোতি ইতি তে নং ব্যাকৰেয্যং, এৱন্তিপি মে নো, তথাতিপি মে নো, অঞ্ঞথাতিপি মে নো, নোতিপি মে নো, নো নোতিপি মে নো…পে… নেৱ হোতি ন ন হোতি তথাগতো পৰং মৰণাতি ইতি চে মং পুচ্ছসি, নেৱ হোতি ন ন হোতি তথাগতো পৰং মৰণাতি ইতি চে মে অস্স, নেৱ হোতি ন ন হোতি তথাগতো পৰং মৰণাতি ইতি তে নং ব্যাকৰেয্যং, এৱন্তিপি মে নো, তথাতিপি মে নো, অঞ্ঞথাতিপি মে নো, নোতিপি মে নো, নো নোতিপি মে নো’’তি. ইত্থং খো ভন্তে ৰঞ্ঞো মাগধস্স অজাতসত্তুস্স ৱেদেহিপুত্তস্স সঞ্চযো বেলট্ঠপুত্তো সন্দিট্ঠিকং সামঞ্ঞফলং পুট্ঠো সমানো ৱিক্খেপং ব্যাকাসি.

তিত্থিঅযূৱাদ

সব্বেপি আৱুসো এতে ছন্নং সত্থাৰানং ৱাদা নিস্সিৰিকাযেৱ জিগুচ্ছনীযাযেৱ অনত্থসংহিতাযেৱ, বালানং ভিয্যোসো মত্তায সম্মোহায সংৱত্তন্তি অনত্থায.

অজ্জ পন আৱুসো কালো অতিক্কন্তো, স্ৱেযেৱ ভগৱতা ৱুত্তং পণীতং পসট্ঠং সন্দিট্ঠিকফলং পুচ্ছাম.

পুচ্ছা – পুৰিমদিৱসেসু আৱুসো সামঞ্ঞফলসুত্তস্স পুব্বভাগে যাৱ ছসত্থাৰমিচ্ছাৱাদপৰিযোসানং পুচ্ছনৱিস্সজ্জনং অম্হেহি কতং, অজ্জ পন যথানুপ্পত্তং ভগৱতা দেসিতসামঞ্ঞফলসুত্তাধিকাৰে পুচ্ছাৱিস্সজ্জনং কৰিস্সাম. ভগৱা পন আৱুসো ৰঞ্ঞা মাগধেন অজাতসত্তুনা ৱেদেহিপুত্তেন সন্দিট্ঠিকং সামঞ্ঞফলং পুট্ঠো কথং ব্যাকাসি.

ৱিস্সজ্জনা – ভগৱা ভন্তে তিধা ৱিভজিত্ৱা ৰঞ্ঞো মাগধস্স অজাতসত্তুস্স ৱেদেহিপুত্তস্স সন্দিট্ঠিকং সামঞ্ঞফলং পুট্ঠো ব্যাকাসি.

পুচ্ছা – কথঞ্চাৱুসো ভগৱা ৰঞ্ঞো মাগধস্স অজাতসত্তুনো ৱেদেহিপুত্তস্স পঠমং সন্দিট্ঠিকং সামঞ্ঞফলং দেসেসি.

ৱিস্সজ্জনা – দাসং ভন্তে পব্বজিতং উপমাভাৱেন নিদ্দিসিত্ৱা ৰঞ্ঞো মাগধস্স অজাতসত্তুস্স ৱেদেহিপুত্তস্স ভগৱা পঠমং সন্দিট্ঠিকং সামঞ্ঞফলং দেসেসি.

সোহং ভন্তে ভগৱন্তম্পি পুচ্ছামি, যথা নু খো ইমানি ভন্তে পুথুসিপ্পাযতনানি সেয্যথিদং…পে… সক্কা নু খো ভন্তে এৱ মেৱ দিট্ঠেৱ ধম্মে সন্দিট্ঠিকং সামঞ্ঞফলং পঞ্ঞপেতুং –

অচ্ছৰিযং আৱুসো অব্ভুতং আৱুসো, যাৱ স্ৱাখাতস্স বুদ্ধসাসনস্স মহিদ্ধিকতা মহানুভাৱতা, যত্ৰহি নাম দাসোপি নিহীনজচ্চো এৱং স্ৱাখাতে বুদ্ধসাসনে পব্বজিত্ৱা অত্তনো ইস্সৰভূতেন ৰঞ্ঞাপি ৱন্দনীযত্তং গৰুকৰণীযত্তং পাপুণিস্সতি, সুপঞ্ঞত্তমেতং ভগৱতা পঠমং সন্দিট্ঠিকফলং.

পুচ্ছা – কথং পনাৱুসো ভগৱা ৰঞ্ঞো মাগধস্স অজাতসত্তুনো ৱেদেহিপুত্তস্স দুতিযং সন্দিট্ঠিকং সামঞ্ঞফলং দেসেসি.

ৱিস্সজ্জনা – কস্সকং ভন্তে পব্বজিতং উপমাভাৱেন দস্সেত্ৱা ভগৱা ৰঞ্ঞো মাগধস্স অজাতসত্তুস্স ৱেদেহিপুত্তস্স সন্দিট্ঠিকং সামঞ্ঞফলং দেসেসি.

অচ্ছৰিযং আৱুসো অব্ভুতং আৱুসো, যাৱ বুদ্ধসাসনস্স স্ৱাখাততা মহিদ্ধিকতা মহানুভাৱতা, যত্ৰহি নাম কস্স কোপি গুণৰহিতো এৱং স্ৱাখাতে বুদ্ধসাসনে পব্বজিত্ৱা ৰট্ঠধিপতিনা মনুস্সলোকে দেৱভূতেন ৰঞ্ঞাপি গৰুকৰণীযতং ৱন্দনীযতং পাপুণিস্সতি, সুপঞ্ঞত্তমেতং আৱুসো ভগৱতা দুতিযং সন্দিট্ঠিকফলং.

পুচ্ছা – কথঞ্চা পনাৱুসো ভগৱা পুৰিমেহি সন্দিট্ঠিকসামঞ্ঞফলেহি অভিক্কন্ততৰঞ্চ পণীততৰঞ্চ সন্দিট্ঠিকং সামঞ্ঞফলং ৰঞ্ঞো দেসেসি.

ৱিস্সজ্জনা – ভগৱা ভন্তে বুদ্ধুপ্পাদতো পট্ঠায কুলপুত্তস্স পব্বজিত ভাৱং, তস্স চ সীলসম্পদং, তস্স চ ইন্দ্ৰিযেসু গুত্তদ্ৱাৰতং, অৰিযঞ্চসতিসম্পজঞ্ঞং, অৰিযঞ্চ সন্তুট্ঠিং, পঞ্চন্নঞ্চ নীৱৰণানং পহানং, চত্তাৰি চ ঝানানি, অট্ঠ চ ৱিজ্জাযো, তাহি তাহি উপমাহি ৱিত্থাৰতো ৱিভজিত্ৱা ৰঞ্ঞো মাগধস্স অজাতসত্তুস্স ৱেদেহিপুত্তস্স সন্দিট্ঠিকং সামঞ্ঞফলং পুৰিমেহি সন্দিট্ঠিকেহি সামঞ্ঞফলেহি অভিক্কন্ততৰঞ্চ পণীততৰঞ্চ দেসেসি.

সক্কা পন ভন্তে দিট্ঠেৱ ধম্মে সন্দিট্ঠিকং সামঞ্ঞফলং, পুৰিমেহি সন্দিট্ঠিকেহি সামঞ্ঞফলেহি অভিক্কন্ততৰঞ্চ পণীততৰঞ্চ পঞ্ঞপেতুং.

সক্কা মহাৰাজা, তেন হি মহাৰাজ সুণোহি সাধুকং মনসিকৰোহি ভাসিস্সামি.

পুচ্ছা – কথঞ্চ পনাৱুসো ভিক্খু সীলসম্পন্নো হোতি, কথঞ্চ ভগৱা ৰঞ্ঞো মাগধস্স অজাতসত্তুনো ৱেদেহিপুত্তস্স চূড়সীলং ৱিভজিত্ৱা দেসেসি.

ৱিস্সজ্জনা – ‘‘কথঞ্চ মহাৰাজ ভিক্খু সীলসম্পন্নো হোতি. ইধ মহাৰাজ ভিক্খু পাণাতিপাতং পহায পাণাতিপাতা পটিৱিৰতো হোতি নিহিতদণ্ডো নিহিতসত্থো লজ্জী দযাপন্নো, সব্বপাণভূতহিতানুকম্পী ৱিহৰতি. ইদম্পিস্স হোতি সীলস্মিং’’ এৱমাদিনা ভন্তে ভগৱা ৰঞ্ঞো মাগধস্স অজাতসত্তুস্স ৱেদেহিপুত্তস্স ছব্বীসতিযা আকাৰেহি চূড়সীলং ৱিভজিত্ৱা দেসেসি.

সাধু সাধু আৱুসো, সাধু সাধু আৱুসো যং ভিক্খু এৱং স্ৱাখাতে বুদ্ধসাসনে সদ্ধাপব্বাজিতো ইমিনা চ চূড়সীলেন সমন্নাগতো ৱিহৰেয্য.

ইদানি পন কালো অতিক্কন্তো.

সুৱে যথানুপ্পত্তট্ঠানতো পট্ঠায পুচ্ছাৱিস্সজ্জনং কৰিস্সাম.

পুচ্ছা – কথং পনাৱুসো ৰঞ্ঞো মাগধস্স অজাতসত্তুনো ৱেদেহিপুত্তস্স মজ্ঝিমসীলঞ্চ মহাসীলঞ্চ ৱিভজিত্ৱা দেসেসি.

ৱিস্সজ্জনা – ‘‘যথা ৱা পনেকে ভোন্তো সমণব্ৰাহ্মণা সদ্ধাদেয্যানি ভোজনানি ভুঞ্জিত্ৱা তে এৱৰূপং বীজগামভূতগামসমাৰম্ভং অনুযুত্তা ৱিহৰন্তি. সেয্যথিদং. মূলবীজং খন্ধবীজং ফড়ুবীজং অগ্গবীজং বীজবীজমেৱ পঞ্চমং, ইতি এৱৰূপা বীজগামভূতগামসমাৰম্ভা পটিৱিৰতো হোতি. ইদম্পিস্স হোতি সীলস্মিং’’ এৱমাদিনা ভন্তে ভগৱা ৰঞ্ঞো মাগধস্স অজাতসত্তুস্স ৱেদেহিপুত্তস্স মজ্ঝিমসীলঞ্চ মহাসীলঞ্চ ৱিত্থাৰতো ৱিভজিত্ৱা দেসেসি.

সাধু সাধু আৱুসো, সাধু খো আৱুসো যং ভিক্খু এৱং স্ৱাখাতে বুদ্ধসাসনে সদ্ধাপব্বজিতো এৱং অৰিযেন সীলেন সমন্নাগতো ৱিহৰেয্য.

পুচ্ছা – কথং পনাৱুসো অৰিযং ইন্দ্ৰিযসংৱৰঞ্চ অৰিযং সতিসম্পজঞ্ঞঞ্চ অৰিযং সন্তোসঞ্চ ভগৱা ৰঞ্ঞো মাগধস্স অজাতসত্তুস্স ৱিভজিত্ৱা দেসেসি.

ৱিস্সজ্জনা – ইধ মহাৰাজ ভিক্খু চক্খুনা ৰূপং দিস্ৱা ন নিমিত্তগ্গাহী হোতি ননুব্যঞ্জনগ্গাহী, যত্ৱাধিকৰণমেনং চক্খুন্দ্ৰিযং অসংৱুতং ৱিহৰন্তং অভিজ্ঝাদোমনস্সা পাপকা অকুসলা ধম্মা অন্ৱাস্সৱেয্যুং, তস্স সংৱৰায পটিপজ্জতি, ৰক্খতি চক্খুন্দ্ৰিযং, চক্খুন্দ্ৰিযে সংৱৰং আপজ্জতি, এৱমাদিনা চ.

ইধ মহাৰাজ ভিক্খু সতিসম্পজঞ্ঞেন সমন্নাগতো হোতি, অভিক্কন্তে পটিক্কন্তে সম্পজনকাৰী হোতি,

আলোকিতে ৱিলোকিতে সম্পজানকাৰী হোতি, সমিঞ্জিতে পসাৰিতে সম্পজানকাৰী হোতি, সঙ্ঘাটিপত্তচীৱৰধাৰণে সম্পজানকাৰী হোতি, অসিতে পীতে খাযিতে সাযিতে সম্পজানকাৰী হোতি, উচ্চাৰপস্সাৱকম্মে সম্পজানকাৰী হোতি, গতে ঠিতে নিসিন্নে সুত্তে জাগৰিতে ভাসিতে তুণ্হীভাৱে সম্পজানকাৰী হোতি, এৱং খো মহাৰাজ ভিক্খু সতিসম্পজঞ্ঞেন সমন্নাগতো হোতি.

কথঞ্চ মহাৰাজ ভিক্খু সন্তুট্ঠো হোতি, ইধ মহাৰাজ ভিক্খু সন্তুট্ঠো হোতি কাযপৰিহাৰিকেন চীৱৰেন কুচ্ছিপৰিহাৰিকেন পিণ্ডপাতেন.

এৱমাদিনা ভন্তে ভগৱা ৰঞ্ঞো মাগধস্স অজাতসত্তুস্স ৱেদেহিপুত্তস্স অৰিযঞ্চ ইন্দ্ৰিযেসুগুত্তদ্ৱাৰতং অৰিযঞ্চ সতিসম্পজঞ্ঞং অৰিযঞ্চ সন্তোসং ৱিভজিত্ৱা দেসেসি.

সাধু সাধু আৱুসো, সাধু খো আৱুসো যং ভিক্খু এৱং স্ৱাখাতে বুদ্ধসাসনে সদ্ধাপব্বজিতো ইমিনা চ অৰিযেন ইন্দ্ৰিযসংৱৰেন সমন্নাগতো, ইমিনা চ অৰিযেন সতিসম্পজঞ্ঞেন

সমন্নাগতো, ইমায চ অৰিযায সন্তুট্ঠিযা সমন্নাগতো ৱিহৰেয্য.

পুচ্ছা – কথং পনাৱুসো ভগৱা ৰঞ্ঞো মাগধস্স অজাতসত্তুস্স ৱেদেহিপুত্তস্স নীৱৰণপহানং ৱিভজিত্ৱা দেসেসি.

ৱিস্সজ্জনা – সো এৱং অৰিযেন সীলক্খন্ধেন সমন্নাগতো, অৰিযেন ইন্দ্ৰিযসংৱৰেন সমন্নাগতো, অৰিযেন সতিসম্পজঞ্ঞেন সমন্নাগতো, অৰিযায সন্তুট্ঠিযা সমন্নাগতো, ৱিৱিত্তং সেনাসনং ভজতি অৰঞ্ঞং ৰুক্খমূলং পব্বতং কন্দৰং গিৰিগুহং সুসানং ৱনপত্তং অব্ভোকাসং পলালপুঞ্জং. সো পচ্ছাভত্তং পিণ্ডপাতপটিক্কন্তো নিসীদতি পল্লঙ্কং আভুঞ্জিত্ৱা উজুং কাযং পণিধায পৰিমুখং সতিং উপট্ঠপেত্ৱা. সো অভিজ্ঝং লোকে পহায ৱিগতাভিজ্ঝেন চেতসা ৱিহৰতি…পে… তস্সিমে পঞ্চ নীৱৰণে পহীনে অত্তনি সমনুপস্সতো পামোজ্জং জাযতি, পমুদিতস্স পীতি জাযতি, পীতিমনস্স কাযো পস্সম্ভতি, পস্সদ্ধকাযো সুখং ৱেদেহি, সুখিনো চিত্তং সমাধিযতি. এৱং খো ভন্তে ভগৱা ৰঞ্ঞো মাগধস্স অজাতসত্তুস্স ৱেদেহিপুত্তস্স নীৱৰণপ্পহানং ৱিভজিত্ৱা ৱিত্থাৰতো দেসেসি.

সাধু সাধু আৱুসো, সাধু খো আৱুসো যং ভিক্খু এৱং স্ৱাখাতে বুদ্ধসাসনে সদ্ধাপব্বজিতো এৱং পঞ্চনীৱৰণে পজহিত্ৱা তেহি চিত্তং ৱিসোধেত্ৱা ৱিহৰেয্য.

পুচ্ছা – কথঞ্চাৱুসো ভগৱা ৰঞ্ঞো মাগধস্স অজাতসত্তুস্স ৱেদেহিপুত্তস্স পঠমং সন্দিট্ঠিকং সামঞ্ঞফলং দেসেসি, পুৰিমেহি সন্দিট্ঠিকেহি সামঞ্ঞফলেহি অভিক্কন্ততৰঞ্চ পণীততৰঞ্চ.

ৱিস্সজ্জনা – সো ৱিৱিচ্চেৱ কামেহি ৱিৱিচ্চ অকুসলেহি ধম্মেহি সৱিতক্কং সৱিচাৰং ৱিৱেকজং পীতিসুখং পঠমং ঝানং উপসম্পজ্জ ৱিহৰতি…পে… ইদম্পি খো মহাৰাজ সন্দিট্ঠিকং সামঞ্ঞফলং পুৰিমেহি সন্দিট্ঠিকেহি সামঞ্ঞফলেহি অভিক্কন্ততৰঞ্চ

পণীততৰঞ্চ. এৱং খো ভন্তে ভগৱা ৰঞ্ঞো মাগধস্স অজাতসত্তুস্স ৱেদেহিপুত্তস্স পঠমং সন্দিট্ঠিকং সামঞ্ঞফলং পুৰিমেহি সন্দিট্ঠিকেহি সামঞ্ঞফলেহি অভিক্কন্ততৰঞ্চ পণীততৰঞ্চ দেসেসি.

সাধু সাধু আৱুসো, সাধু খো আৱুসো যং ভিক্খু এৱং স্ৱাখাতে বুদ্ধসাসনসঙ্খাতে ধম্মৱিনযে পব্বজিত্ৱা এৱং পঠমং ঝানং

উপসম্পজ্জ ৱিৱেকজেন পীতিসুখেন অত্তনো কাযং অভিসন্দেয্য পৰিসন্দেয্য পৰিপূৰেয্য.

পুচ্ছা – কথঞ্চাৱুসো ভগৱা দুতিযঞ্চ ততিযঞ্চ চতুত্থঞ্চ সন্দিট্ঠিকং সামঞ্ঞফলং দেসেসি, পুৰিমেহি সন্দিট্ঠিকেহি সামঞ্ঞফলেহি অভিক্কন্ততৰঞ্চ পণীততৰঞ্চ.