১৭. ঝানপচ্চযো

সত্ত ঝানঙ্গানি ঝানপচ্চযো, ৱিতক্কো ৱিচাৰো পীতি সোমনস্সং দোমনস্সং উপেক্খা একগ্গতা. তেহি সহজাতা পঞ্চৱিঞ্ঞাণৱজ্জিতা চিত্তচেতসিকধম্মা চ ৰূপধম্মা চ তস্স পচ্চযুপ্পন্না.

কেনট্ঠেন ঝানন্তি. উপনিজ্ঝাযনট্ঠেন ঝানং. উপনিজ্ঝায নট্ঠেনাতি চ মনসা আৰম্মণং উপগন্ত্ৱা নিজ্ঝাযনট্ঠেন পেক্খনট্ঠেন. যথা হি ইস্সাসো দূৰে ঠত্ৱা খুদ্দকে লক্খমণ্ডলে সৰং পৱেসেন্তো হত্থেহি সৰং উজুকঞ্চ নিচ্চলঞ্চ কত্ৱা মণ্ডলঞ্চ ৱিভূতং কত্ৱা চক্খুনা নিজ্ঝাযন্তো পৱেসেতি. এৱমেৱ ইমেহি অঙ্গেহি চিত্তং উজুকঞ্চ নিচ্চলঞ্চ কত্ৱা আৰম্মণঞ্চ ৱিভূতং কত্ৱা নিজ্ঝাযন্তো পুগ্গলো উপনিজ্ঝাযতীতি ৱুচ্চতি. এৱং উপনিজ্ঝাযিত্ৱা যংকিঞ্চি কাযকম্মং ৱা ৱচীকম্মং ৱা মনোকম্মং ৱা কৰোন্তো অৱিৰজ্ঝমানো কৰোতি.

তত্থ কাযকম্মং নাম অভিক্কমপ্পটিক্কমাদিকং ৱুচ্চতি. ৱচীকম্মং নাম অক্খৰৱণ্ণপৰিপুণ্ণং ৱচীভেদকৰণং ৱুচ্চতি. মনোকম্মং নাম যংকিঞ্চি মনসা আৰম্মণৱিভাৱনং ৱুচ্চতি. দানকম্মং ৱা পাণাতিপাত কম্মং ৱা অনুৰূপেহি ঝানঙ্গেহি ৱিনা দুব্বলেন চিত্তেন কাতুং ন সক্কা হোতি. এস নযো সেসেসু কুসলাকুসল কম্মেসূতি.

অযঞ্চ অত্থো ৱিতক্কাদীনং ঝানঙ্গধম্মানং ৱিসুং ৱিসুং সভাৱ লক্খণেহি দীপেতব্বো. সম্পযুত্তধম্মে আৰম্মণাভিনিৰোপন লক্খণো ৱিতক্কো, সো চিত্তং আৰম্মণে দড়্হং নিযোজেতি. আৰম্মণানুমজ্জনলক্খণো ৱিচাৰো, সো চিত্তং আৰম্মণে দড়্হং সংযোজেতি. আৰম্মণসম্পিযাযনলক্খণাপীতি, সা চিত্তং আৰম্মণে পৰিতুট্ঠং কৰোতি. তিস্সোপি ৱেদনা আৰম্মণৰসানু ভৱনলক্খণা, তাপি চিত্তং আৰম্মণে ইট্ঠানিট্ঠমজ্ঝত্তৰসানুভৱন কিচ্চেন দড়্হপ্পটিবদ্ধং কৰোন্তি. সমাধানলক্খণা একগ্গতা, সাপি চিত্তং আৰম্মণে নিচ্চলং কত্ৱা ঠপেতীতি. ঝানপচ্চযদীপনা নিট্ঠিতা.