নৱম পৰিচ্ছেদ

অভযাভিসেকো

১. মহেসী জনযী পুত্তে, দস একঞ্চ ধীতৰং;

সব্বজেট্ঠো’ভযো নাম, চিত্তানাম কনিট্ঠিকা.

২. পস্সিত্ৱা তং ৱিযাকংসু, ব্ৰাহ্মণা মন্তপাৰগা;

‘‘ৰজ্জহেতু সুতো অস্সা, ঘাতযিস্সতি মাতুলে’’.

৩. ঘাতেস্সামি কনিট্ঠিন্তি, নিচ্ছিতে ভাতৰা’ভযো;

ৱাৰেসি কালে ৱাসেসুং, গেহং তং একথুণিকে.

৪. ৰঞ্ঞো চ সিৰিগব্ভেন, তস্স দ্ৱাৰমকাৰযুং;

অন্তো ঠপেসুং একঞ্চ, দাসিং নৰসতং বহি.

৫. ৰূপেনু’ম্মাদযী নৰে, দিট্ঠমত্তাৱ সাযতো;

ততো উম্মাদচিত্তা’তি, নামং সোপপদং লভি.

৬. সুত্ৱান লংকাগমনং, ভদ্দকচ্চানদেৱিযা;

মাতৰা চোদিতা পুত্তা, ঠপেত্ৱে’কঞ্চ আগমুং.

৭. দিস্ৱান তে পণ্ডুৱাসু-দেৱং লঙ্কিন্দমাগতা;

দিস্ৱান তং কনিট্ঠিঞ্চ, ৰোদিত্ৱা সহ তায চ.

৮. ৰঞ্ঞা সুকতসক্কাৰা, ৰঞ্ঞো’নুঞ্ঞায চাৰিকং;

চৰিংসু লংকাদীপম্হি, নিৱসুঞ্চ যথাৰুচিং.

৯. ৰামেন ৱুসিতঠানং, ৰামগোণন্তি ৱুচ্চতি;

উৰুৱেলা’নুৰাধানং, নিৱাসা চ তথা তথা.

১০. তথা ৱিজিতদীঘাযু-ৰোহণানং নিৱাসকা;

ৱিজিতগামো দীঘাযু-ৰোহণন্তি চ ৱুচ্চতি.

১১. কাৰেসি অনুৰাধো সো, ৱাপিং দক্খিণতো ততো;

কাৰাপেত্ৱা ৰাজগেহং, তত্থ ৱাসমকপ্পযী.

১২. মহাৰাজা পণ্ডুৱাসু-দেৱো জট্ঠসুতং সকং;

অভযং উপৰজ্জম্হি, কালে সমভিসেচযি.

১৩. দীঘাযুস্স কুমাৰস্স, তনযো দীঘগামণি;

সুত্ৱা উম্মাদচিত্তং তং, তস্সং জাতকুতূহলো.

১৪. গহেত্ৱা’পতিস্স গামং, তং অপস্সি মনুজাধিপং;

অদা সহোপৰাজেন, ৰাজুপট্ঠানমস্সসো.

১৫. গৱক্খাভিমুখট্ঠানে, তং উপেচ্চ ঠিতং তুসা;

দিস্ৱান গামিণিং চিত্তা, ৰত্তচিত্তা’হ দাসিকং.

১৬. ‘‘কো এসো’’তি ততো সুত্ৱা,

মাতুলস্স সুতোইতি;

দাসিং তত্থ নিযোজেসি,

সদ্ধিংকত্ৱান সো ততো.

১৭. গৱক্খম্হি ডসাপেত্ৱা, ৰত্তিং কক্কটযন্তকং;

আৰুয্হ ছিন্দযিত্ৱান, কৱাটং তেন পাৱিসি.

১৮. তায সদ্ধিং ৱসিত্ৱান, পচ্চূসেযেৱ নিক্খমি;

এৱং নিচ্চং ৱসী তত্থ, ছিদ্দাভাৱা অপাকটো.

১৯. সা তেন অগ্গহী গব্ভং, গব্ভে পৰিণতে ততো;

মাতু আৰোচযী দাসী, মাতা পুচ্ছিয ধীতৰং.

২০. ৰঞ্ঞো আৰোচযী ৰাজা, অমন্তেত্ৱা সুতে’ব্ৰহ্মা;

পোসিযোসো’পি অম্হেহি, দেৱ তস্সেৱ তং ইতি.

২১. পুত্তো চে মাৰযিস্সাম, ত’ন্তি তস্স অদংসু তং;

সা সূতিকালসম্পত্তে, সূতি গেহঞ্চ পাৱিসিং.

২২. সঙ্কিত্ৱা গোপকং চিত্তং, কালৱেলঞ্চ দাসকং;

তস্মিং কম্মে নিস্সাযা’তি, গামণি পৰিচাৰকে.

২৩. তে পটিঞ্ঞং অদেন্তে তে, ৰাজপুত্তা অঘাতযুং;

যক্খা হুত্ৱান ৰক্খিংসু, উভো গব্ভে কুমাৰকং.

২৪. অঞ্ঞং উপৱিজঞ্ঞং সা, সল্লক্খা পেসি দাসিযা;

চিত্তা সা জনযী পুত্তং, সা ইত্থি পন ধীতৰং.

২৫. চিত্তং সহস্সং দাপেত্ৱা, তস্সা পুত্তং সকম্পি চ;

আণাপেত্ৱা ধীতৰং তং, নিপজ্জাপেসি সন্তিকে.

২৬. ধীতা লদ্ধা’তি সুত্ৱান, তুট্ঠা ৰাজসুতা অহুং;

মাতা চ মাতুমাতা চ, উভো পন কুমাৰকং.

২৭. মাতামহস্স নামঞ্চ, জেট্ঠস্স মাতুলস্স চ;

একং কত্ৱা তমকৰুং, পণ্ডুকাভযনামকং.

২৮. লংকা পালো পণ্ডুৱাসু-দেৱো ৰজ্জমকাৰযি;

তিংস ৱস্সম্হি জাতম্হি, মতো সো পণ্ডুকাভযে.

২৯. তস্মিং মতস্মিং মনুজাধিপস্মিং,

সব্বে সমাগম্ম নৰিন্দপুত্তা;

তস্সাভযস্সাভযদস্স ভাতু,

ৰাজাভিসেকং অকৰুং উড়াৰাতি.

সুজনপ্পসাদ সংৱেগত্থায কতে মহাৱংসে

অভযাভিসেকো নাম

নৱমো পৰিচ্ছেদো.