অট্ঠম পৰিচ্ছেদ

পণ্ডুৱাসুদেৱাভিসেকো

১. ৱিজযো সো মহাৰাজা, ৱস্সে অন্তিমকে ঠিতো;

ইতি চিন্তযি ‘‘ৱুদ্ধো’হং, ন চ ৱিজ্জতি মে সুতো.

২. কিচ্ছেন ৱাসিতং ৰট্ঠং, নস্সেয্য মম অচ্চযে;

আণাপেয্যং ৰজ্জহেতু-সুমিত্তং ভাতৰং মম.

৩. অথা’মচ্চেহি মন্তেত্ৱা, লেখং তত্থ ৱিসজ্জযি;

লেখং দত্ৱান ৱিজযো, ন চিৰেন দিৱঙ্গতো.

৪. তস্মিং মতে অমচ্চা তে, পেক্খন্তা খত্তিযাগমং;

উপতিস্সগামে ঠত্ৱান, ৰট্ঠং সমুনুসাসিসুং.

৫. মতে ৱিজযৰাজম্হি, খত্তিযাগমনা পুৰা;

একং ৱস্সং অযং লংকা-দীপো আসি অৰাজকো.

৬. তস্মিং সীহপুৰে তস্স, সীহবাহুস্স ৰাজিনো;

অচ্চযেন সুমিত্তো সো, ৰাজা তস্স সুতো অহু.

৭. তস্স পুত্তা তযো আসুং, মদ্দৰাজস্স ধীতুযা;

দূতা সীহপুৰং গন্ত্ৱা, ৰঞ্ঞো লেখং অদংসু তে.

৮. লেখং সুত্ৱান সো ৰাজা, পুত্তে আমন্তযী তযো;

অহং মহল্লকো তাতা, একো তুম্হেসু গচ্ছতু.

৯. লংকং নেকগুণং কন্তং, মম ভাতুস্স সন্তকং;

তস্স’চ্চ যেন তত্থেৱ, ৰজ্জং কাৰেতু সোভনং.

১০. কণিট্ঠকো পণ্ডুৱাসু-দেৱো ৰাজকুমাৰকো;

‘‘গমিস্সামীতি চিন্তেত্ৱা, ঞত্ৱা সোত্থি গতম্পি চ.

১১. পিতৰা সমনুঞ্ঞাতো, দ্ৱত্তিংসামচ্চ দাৰকে;

আদায আৰুহী নাৱং, পৰিব্বাজকলিঙ্গৱা.

১২. মহাকন্দৰনজ্জা তে, মুখদ্ৱাৰম্হি ওতৰং;

তে পৰিব্বাজকে দিস্ৱা, জনো সক্কৰি সাধুকং.

১৩. পুচ্ছিত্ৱা নগৰং এত্থ, উপযন্তং কমেন তে;

উপতিস্স গামং সম্পত্তা, দেৱতা পৰিপালিতা.

১৪. অমচ্চা’নুমতো’মচ্চো, পুচ্ছি নেমিত্তকা তহিং;

খত্তিযা’গমনং তস্স, সো ব্যাকাসি পৰংপি চ.

১৫. সত্তমে দীৱসেযেৱ, আগমিস্সতি খত্তিযো;

বুদ্ধসাসন মেতস্স, ৱংসজো’ৱ ঠপেস্সতি.

১৬. সত্তমে দিৱসেযেৱ, তে পৰিব্বাজকে তহিং;

পত্তে দিস্ৱান পুচ্ছিত্ৱা, অমচ্চা তে ৱিজানিয.

১৭. তং পণ্ণুৱাসুদেৱং তে, লংকাৰজ্জেন অপ্পযুং;

মহেসিযা অভাৱাসো, ন তাৱ অভিসেচযি.

১৮. অমিতোদনসক্কস্স, পণ্ডুসক্কো সুতো অহু;

ঞত্ৱা ৱিনাসং সক্যানং, সো আদায সকং জনং.

১৯. গন্ত্ৱা অঞ্ঞাপদেসেন, গঙ্গাপাৰং তহিং পুৰং;

মাপেত্ৱা তত্থ কাৰেসি, ৰজ্জং তস্স সুতে লভি.

২০. ধীতা কণিট্ঠিতা আসি, ভদ্দকচ্চান নামিকা;

সব্বলক্খণসম্পন্না, সুৰূপা অভিপত্থিতা.

২১. তদত্থং সত্তৰাজানো, পণ্ণাকাৰে মহাৰহে;

পেসেসুং ৰাজিনো তস্স, ভীতো ৰাজূহি সো পন.

২২. ঞত্ৱান সোত্থিগমনং, অভিসেকফলম্পি চ;

সহদ্ৱত্তিংস ইত্থীহি, নাৱং আৰোপিযা’সুতং.

২৩. গঙ্গায খিপি গণ্হাতু, পহু মে ধীতৰং ইতি;

গহেতুং তে ন সক্খিংসু, নাৱাসাপন সীঘগা.

২৪. দুতিযে দিৱসেযেৱ, গোণাগামক পট্টনং;

পত্তাপব্বজিতা কাৰা, সব্বা তা তত্থ ওতৰুং.

২৫. পুচ্ছিত্ৱা নগৰং এত্থ, তা কমেনোপযন্তিযো;

উপতিস্সগামং সম্পত্তা, দেৱতা পৰিপালিতা.

২৬. নেমিত্তকস্স ৱচনং, সুত্ৱা তত্থা’গতা তু তা;

দিস্ৱা অমচ্চো পুচ্ছিত্ৱা, ঞত্ৱা ৰঞ্ঞো সমপ্পযি.

২৭. তং পণ্ডুৱাসুদেৱং তে, অমচ্চা সুদ্ধবুদ্ধিনো;

ৰজ্জে সমভিসিঞ্চিংসু, পুণ্ণসব্বমনোৰথং.

২৮. সুভদ্দকচ্চান মনোমৰূপিনিং;

মহেসীভাৱে অভিসিঞ্চিয’ত্তনো;

সহগতা তায পদাসি অত্তনা;

সহাগতানং ৱসি ভূমিপো সুখন্তী.

সুজনপ্পসাদ সংৱেগত্থায কতে মহাৱংসে

পণ্ডুৱাসুদেৱাভিসেকো নাম

অট্ঠমো পৰিচ্ছেদো.