একসট্ঠিম পৰিচ্ছেদ

সঙ্খত্থলিপুৰাভিগমনো

১. সুত্ৱা দ্ৱে ভাতৰো অঞ্ঞে, জেট্ঠস্সো পৰতিংসদা;

খিপ্পং সৰট্ঠা আগম্ম, কাৰেসুং অন্তিমং ৱিধিং.

২. অথ কিত্তিসিৰিমেঘো, ৰট্ঠং জেট্ঠস্স ভাতুনো;

অত্তাধীনং কৰিত্ৱান, আমন্তিয কণিট্ঠকং.

৩. দত্ৱা ৰট্ঠদ্ৱযং অঞ্ঞং, ৱত্থুং তত্থেৱ আদিসি;

সো’পি জেট্ঠস্স ভাতুস্স, ৱচনং সম্পটিচ্ছিয.

৪. সমাদায কুমাৰঞ্চ, দেৱিঞ্চ ৰতনাৱলিং;

ধীতৰো দ্ৱে চ গন্তান, মহা নামহুলং পুৰং.

৫. সমগ্গা নিৱসং তত্থ, কুমাৰস্স সিখামহং;

কাৰেত্ৱা পৰিহাৰেন, ৱড্ঢেসি মহতা সদা.

৬. ততো সো দেৱিযা জেট্ঠং-ধীতৰং মিত্তনামিকং;

দাতুকামো সপুত্তস্স, সহামচ্চেহি মন্তযি.

৭. কালিঙ্গন্ৱযসম্ভূতা, পাযেনখলু ভূমিপা;

সামিভাৱং গতা অস্মিং, লঙ্কাদীপম্হী ভূযসো.

৮. কালিঙ্গগোত্ত সম্ভূত, গজবাহুস্স দাতৱে;

গূড়ৰূপেন দেৱী’যং, যদি পেসেয্য ধীতৰং.

৯. ভিয্যো ৱিৱাহসম্বদ্ধো, বলৱা সো ভৱিস্সতি;

ময্হং এসো নিৰালম্বো, পুত্তো হেহীতি সব্বথা.

১০. তস্মা মে সুনূনো এসা, দাতুং যুত্তা কুমাৰিকা;

এৱং সতি ৱতম্হাকং, ৱড্ঢিযে’ৱ সিযা ‘‘ইতি’’.

১১. দেৱীপি সুত্ৱা তং সব্ব-মাদিচ্চন্ৱয মণ্ডনা;

সব্বথা তমনিচ্ছন্তি, ইদমাহ মহীপতিং.

১২. ঘাতেত্ৱা সকলে যক্খে, কুমাৰো ৱিজযৱ্হযো;

লংকাদীপমিমং’কাসি, মনুস্সাৱাসকং সদা.

১৩. ততো পভুতি অম্হাকং, ঘটেসুং ৱিজযন্ৱযং;

কালিঙ্গৱংসজেহেৱ, সম্বন্ধং কত্ৱ পুব্বকং.

১৪. অঞ্ঞভূপাল সম্বন্ধো, সুতপুব্বো পিনত্থিনো;

সোমৱংস সমুম্ভূতে, ঠপেত্ৱা ধৰণিস্সৰে.

১৫. তুয্হং জাতোতি অম্হাকং, সম্বন্ধো সো কথং সিযা;

অৰিযন্ৱয সম্ভূত, কুমাৰেন সহামুনা.

১৬. এৱং সো দেৱিযা তায, নেকসো ৱাৰযন্তিযা;

পসয্হসক পুত্থস্স, তং কুমাৰিমদাপযি.

১৭. সো অনেকগুণোদাৰ- ভৰিযানুগতো ততো;

ৰঞ্জযন্তো জনে সব্বে, জনকসন্তিকে ৱসি.

১৮. একৱীসতিং ৱস্সানি, ৰজ্জং ৱিক্কম বাহুসো;

অনুভোত্ৱা যথাকম্মং, কাযভেদা গতো পৰং.

১৯. ততো গজভুজো ঠিতং, সম্পন্নবলৱাহনং;

ৰজ্জং হত্থগতং কত্ৱা, পুলত্তিনগৰে ৱসী.

২০. ততো কিত্তিসিৰীমেঘ, সিৰীৱল্লভ ভূমিপা;

ৱুত্তন্ত মেতং ৱিঞ্ঞায, এৱং সমনুচিন্তযুং.

২১. তস্স ৱিক্কম বাহুস্স, ৱুদ্ধভাৱেন নেকধা;

মূলৰজ্জাধিপচ্চং তং, অম্মং নিন্দাকৰং ন হি.

২২. তদত্থজস্স বালস্স, মূলৰজ্জং পসাসনো;

উপেক্খণং পনম্হাকং, নেৱানুচ্ছৱিকং ৱত.

২৩. তে সোযাৱ সৰজ্জম্হি, বদ্ধমূলো ভৱিস্সতি;

পসয্হ তাৱ তং ৰজ্জং, ৱট্টতি গণ্হিতুং ইতি.

২৪. ৱেলক্কাৰ বলং সব্বং, ভিন্দিংসু ধন দানতো;

ঠপেত্ৱা সেৱকে কেচি, তস্সব্ভন্তৰিকে তদা.

২৫. গজবাহু মহীপালে, ৱিৰত্তা ৰট্ঠৱাসিনো;

উভিন্নং ৰাজূনং দূতে, পেসযুং নেকসো ততো.

২৬. ৰজ্জং সাধেত্ৱা দস্সাম, একীভূতা মযং পন;

উপত্থম্ভকভাৱো’ৱ, কাতব্বো কেৱলং ইতি.

২৭. ততো দ্ৱে ভাতুকা সেনং, সকং সন্নয্হ ৱেগসা;

উভতো মুখতো তস্স, ৰট্ঠমজ্ঝমুপাগমুং.

২৮. পহিণিংসু চ তে দূতে, ততো গজবোহুৱ্হযো;

ভূমিপালো নিজামচ্চে, সন্নিপাতিয মন্তযি.

২৯. ৱেড়ক্কাৰবলং সব্ব-মুজুপচ্চত্তিকং অহু;

ৰাজানো দ্ৱে চ নো ৰট্ঠং, সঙ্গামত্থমুপাগতা.

৩০. পঠমং তেসু পক্খস্স, একস্স বলিনো ভুসং;

মুখভঙ্গে কতে খিপ্পং, ততো অঞ্ঞে সুসাধিযা.

৩১. ইতি নিচ্ছিয সেনঙ্গং, সব্বমাদায অত্তনো;

সিৰিৱল্লভৰাজাভি-মুখং যুদ্ধা’যুপাগমি.

৩২. সিৰিৱল্লভৰাজাপি, সঙ্গাম মহিভিংসনং;

পাতো পট্ঠায সাযন্হ-কালং যাৱ পৱত্তযং.

৩৩. অসক্কুণন্তো’ভিভৱং, ৱিধাতুং তস্স কঞ্চিপি;

ততোৱ সো নিৱত্তিত্ৱা, সকং ৰট্ঠং গতো লহুং.

৩৪. গজবাহুস্সগোকণ্ণ-সচিৱেন পৰাজিতো;

অগা ৰট্ঠং সকং কিত্তি-সিৰিমেঘো’পি ভূপতি.

৩৫. গজবাহুনৰিন্দোপি, সঙ্গামে তম্হি কিঞ্চিপি;

পৰিহানিমসম্পত্তো, পুনা’গম্ম পুৰন্তিকং.

৩৬. বলনাথে ৱিনিগ্গয্হ, সাপৰাধে বহূ বলী;

ৰট্ঠং ৱূপসমেত্ৱান, পাৱেক্খি নগৰং সকং.

৩৭. ৰট্ঠে সকে সকেযেৱ, ততো পভূতি ভূমিপা;

অঞ্ঞোঞ্ঞমিত্তে সম্বন্ধং, ৱিধায ৱিহৰিংসু তে.

৩৮. ততো পৰক্কমভুজো, ধৰণী পালনন্দনো;

মেধাৱীনেকসিপ্পেসু, সিক্খমানো সুসাধুকং.

৩৯. ৱিচাৰক্খমপঞ্ঞত্তা, কিচ্চা কিচ্চেসু নেকসো;

অচ্চুড়াৰাসযত্তা চ, মহাভাগত্তনেন চ.

৪০. অত্তনো মাতুভগিনী, সহৱাস সুখম্হি চ;

অলগ্গমানসোনেক, বলাকীড়াৰসেসু চ.

৪১. সূৰভাৱাদিসংযুত্তা, ৰাজপুত্তা তু মাদিসা;

পচ্চন্তে ঈদিসে দেসে, কথং নাম ৱসিস্সৰে.

৪২. জাতদেসঞ্চ মে দানি, যুৱৰাজপভোগিযং;

গমিস্সামীতি নিগ্গঞ্ছি, তম্হা পৰিজনত্থিতো.

৪৩. কমেন সন্তিকং সঙ্খ-নাযকত্থলিসঞ্ঞিনো;

গামস্সাগা অহিং কিত্তি-সিৰিমেঘো নিসম্ম তং.

৪৪. অভাৱা ৰজ্জ দাযাদ-সমানস্স’ত্ৰজস্স মে;

একাকী’হন্তি যো চিত্ত-সন্তাপো সন্ততং গতো.

৪৫. জেট্ঠংৱ ভাতৰং ময্হং, তং দেহপটিবিম্বকং;

দট্ঠুং মে সত্ততং পুঞ্ঞং, মহন্তমুদিতংতিচ.

৪৬. পামুজ্জৱেগৱসগো, নগৰং তং মনোহৰং;

অলঙ্কাৰা পযিত্ৱান, তোৰণাদীহি নেকধা.

৪৭. গন্ত্ৱা পটিপথংযেৱ, বলোঘপৰিৱাৰিতো;

নৰিন্দো তিথিনক্খত্ত-ৱিসেসে সুভসম্মতে.

৪৮. অনঞ্ঞসাধাৰণতং, সম্পত্তেহি গুণেহি চ;

লক্খণেহি চ সব্বেহি, কল্যাণেযি সুসংযুতং.

৪৯. দিস্ৱা কুমাৰং সন্তুট্ঠো, আলিঙ্গিত্ৱান পেমতো;

উৰে কত্ৱান চুম্বিত্ৱা, মত্থকম্হি পুনপ্পুনং.

৫০. জনস্স বলতো তস্স, পস্সতো লোচনেহি সো;

সন্তোস অস্সুধাৰাযো, ৱস্সাপেন্তো নিৰন্তৰং.

৫১. মনুঞ্ঞমেক মাৰুয্হ, ৱাহনং সহ সূনুনা;

ভেৰিনি দেন পূৰেন্তো, দিসা দস সমন্ততো.

৫২. পৱিসিত্ৱা পুৰং তত্থ, অলঙ্কাৰে মনোৰমে;

দস্সযন্তো সপুত্তস্স, পাৱিসি ৰাজমন্দিৰং.

৫৩. লদ্ধা ততো কঞ্চুকী-সুপকাৰ,

ৱগাদিনেকে পৰিচাৰকে সো;

নানাগুণা ৰাধিতমানসস্স,

ৱসীসকাসে পিতুনো সুখেন.

সুজনপ্পসাদসংৱেগত্থায কতে মহাৱংসে

সঙ্খত্থলিপুৰাভিগমনো নাম

একসট্ঠিমো পৰিচ্ছেদো.