দ্ৱিসট্ঠিমপৰিচ্ছেদ

পৰমণ্ডলাভিগমনো

১. অত্তনাভিমতস্সা’সু, জাতদেসস্স পত্তিযা;

সম্পুণ্ণমনসঙ্কপ্পো, দুস্সঙ্কপৱিৱজ্জিতো.

২. ৱজিৰূপমোৰুপঞ্ঞা, বলেন গুৰুসন্তিকে;

লহুং বহুঞ্চ গণ্হন্তো, সিপ্পজাতমনেক কং.

৩. জিনাগমেসু নেকেসু, কোটিল্লা দীসু নীতিসু;

সদ্দসত্থে চ কাৱেয্যে, সনিঘণ্ডুক কেটুভে.

৪. নচ্চগীতেসু সত্থেসু, হত্থিসিপ্পাদিকেসু চ;

ধনু খগ্গাদিনেকেসু, সত্থেসু চ ৱিসেসতো.

৫. পাৰপ্পত্তো ৱিনীতত্তো, পিতু ৰঞ্ঞো সমাচৰি;

অধিপ্পাযানুকুলং’ৱ, সদা ভত্তিপুৰস্সৰো.

৬. তদা সদা দৰাচাৰ-গুণাৰাধিতমানসো;

পিযেন ৱিয মিত্তেন, তেন সদ্ধিং মহীপতি.

৭. উয্যানজলকীড়াদি-সুখং নানপ্পকাৰকং;

অনুভোত্ৱা সদেসস্মিং, সঞ্চৰন্তো তহিং তহিং.

৮. একদাসঙ্খসেনাধি-পতিনা দড়্হভত্তিনা;

সৰট্ঠসীমা ৰক্খায, যো জিতেন বলীযসা.

৯. অজ্ঝাৱুত্থস্স চ বলত্থ-লিনমস্স চ সন্তিকং;

গামসা’গঞ্ছি সুত্ৱান, তমত্থং ধজিনীপতি.

১০. গামং তং সাধুকং সজ্জু, সজ্জাপেত্ৱা সপুত্তকং;

পচ্চুগ্গন্ত্ৱা মহীপালং, পণমিত্ৱা ঠিতো তদা.

১১. পিতা পুত্তো উভো তস্স, সম্ভাসিয পিযং ৱচো;

নেকধা’ৰাধিতা তেন, তং গামং সমুপাগগুং.

১২. তহিং কতিচি ভূপালো, ৱাসৰে ৱীতিনামিয;

সেনাপতিং সমাহূয, ইদং ৱচনং মব্ৰৱি.

১৩. পুত্তো মে দানিৱযসি, ঠিতো’ পনযনাৰহে;

তস্সোপনযনং কাতুং, মহোপকৰণং লহুং.

১৪. সজ্জেতব্বন্তি তং সুত্ৱা, সোপি সেনাধিনাযকো;

সব্বুপকৰণং খিপ্পং, মঙ্গলত্থং সুসজ্জযি.

১৫. সুগন্ধ দীপপুপ্ফাদি-ৱত্থূহি দিৱসত্তযং;

পুব্বকাৰং কৰিত্ৱান, মহন্তং ৰতনত্তযে.

১৬. ৱেদিকাচাৰদক্খেহি, দ্ৱিজেহি পুথুৱীপতি;

সম্পভাৱানু ৰূপংৱ, মঙ্গলং তং সমাপিয.

১৭. পৰক্কমকুমাৰেন, তেন সদ্ধিং সমাৰভি;

ৱসন্তকীড়ং মহতিং, সামচ্চো কীড়িতুং তদা.

১৮. ৰাজা কিত্তি সিৰীমেঘো-ৰোহণে ৱসতো তদা;

সিৰীৱল্লভনামস্স, সভাতু মৰণম্পি চ.

১৯. মাণভৰণনামস্স, ৰজ্জলাভঞ্চ দেৱিযা;

মিত্তায পটিলাভঞ্চ, সিৰীৱল্লভসূনু নো.

২০. ৰোহণাগতদূতেহি, সুণিত্ৱা সকভাতুনো;

কালক্ৰিযায সঞ্জাত-সোকৱেগং সুদুস্সহং.

২১. মিত্তাযতনযুপ্পত্তি পৱত্তিং সৱণেন তং;

ৱিনেয্য ৱিৰতো তম্হা, ৱসন্তসমযুস্সৱা.

২২. নিৱত্তেত্ৱান তত্থেৱ, সেনানিং সঙ্খনামকং;

পুত্তেন সহ সো সঙ্খ-ত্থলি নামং পুৰং গমি.

২৩. পৰক্কমকুমাৰেন, তেন সদ্ধিং তহিং সুখং;

ৱসতো তস্স ভূপস্স, ৱস্সমেকমতিক্কমি.

২৪. মাণাভৰণভূপস্স, দেৱী চাপি পভাৱতী;

লভিত্থ দুতিযা কিত্তি-সিৰী মেঘৱ্হযং সুতং.

২৫. সুণিত্ৱা তঞ্চ সো অম্হং, ৱংসো জাতো মহা’’ইতি;

অহু কিত্তিসিৰীমেঘো, তদা অত্তমনো ভুসং.

২৬. লংকাদীপোপভোগেক-হেতুনা মহতা সতা;

অসাধাৰণভূভেন, চোদিতো পুঞ্ঞকম্মুনা.

২৭. কুমাৰো সো’থ পিতৰা, পিযমিত্তে ৱিযত্তনি;

কৰিযমানং সস্নেহং, মহন্তং চো’পলালনং.

২৮. সচিৱানমনেকেসং, ভযভত্তী পুৰস্সৰং;

ক্ৰিযমানমুপট্ঠানং, ন মঞ্ঞন্তো তিণাযপি.

২৯. লংকাদীপমিমং সব্ব মেকচ্ছত্তো পসোভিতং;

খিপ্পং কাৰেতুকামো সো, সযং ইতি ৱিচিন্তযি.

৩০. কেস অক্খক গীৱট্ঠি-দাঠা পত্তান মেৱ চ;

পদচেত্য মহাবোধি-সাখানঞ্চাপি সত্থুনো.

৩১. চতুৰাসীতিসহস্সানং, ধম্মক্খন্ধান মেৱ চ;

সম্মাসম্বুদ্ধকপ্পানং, আধাৰত্তা চ নিচ্চসো.

৩২. আকৰত্তা চ নেকেসং, মণিমুত্তাদিৱত্থূনং;

সম্মতোপি ৱিসিট্ঠোতি, দীপোনাতি মহা অযং.

৩৩. তযো মে পিতৰো ভূপা, মাতুলোপি চ সব্বথা;

একচ্ছত্তেন ৱত্তেতু, মসমত্থা ৱিভজ্জি’মং.

৩৪. ভুঞ্জন্তা এত্তকেনেৱ, কতকিচ্চা মযং ইতি;

মঞ্ঞন্তা ৱিগতচ্ছন্দা’ভিসেকম্হি কুলোচিতে.

৩৫. ৰট্ঠেসকে সকেযেৱ, ইস্সেৰং সম্পৱত্তযুং;

কসিকম্মাদিকং গাম-ভোজকা ৱিয নিস্সিতা.

৩৬. তেসু কিত্তিসিৰি মেঘং, পেত্তেয্যং মে ঠপেত্ৱ তে;

অগমংসু যথাকম্মং, সেসা ভূপতযো তযো.

৩৭. মচ্চানং পৰমং আযু, ৱতে’দানি পৰিত্তকং;

বালাযুৱানো ৱুদ্ধা চ, ইমে সত্তা’নুপুব্বসো.

৩৮. পাপুণিস্সন্তি মৰণ-মীতি’যং নিযমোপি চ;

ন হেৱ অস্মিং লোকস্মিং, সংৱিজ্জতি কদাচিপি.

৩৯. তস্মা সৰীৰকে অস্মিং, ভঙ্গুৰে সাৰৱজ্জিতে;

হীড়িতে সাৰদস্সীহি, অপেক্খং হিত্ৱা সব্বথা.

৪০. পিহনিযে যসোদেহে, চিৰট্ঠাযিম্হি সব্বদা;

অম্হাদিসেহি কত্তব্বো, ৰাজপুত্তেহি আদৰো.

৪১. উম্মগ্গজাতকাদীসু, চাৰিত্তঞ্চাপি ভূমিসু;

ৱিহিতং বোধিসত্তেন, ৱীৰভাৱাদিনিস্সিতং.

৪২. ৰামাযণভাৰতাদি-লোকিযাসু কথাসুপি;

ৰামস্স ৱিক্কমঞ্চেৱ, তস্স ৰাৱণঘাতিনো.

৪৩. দুযোধনাদিৰাজানো, হন্ত্ৱাযুদ্ধে পৱত্তিতং;

ৱিক্কমাতি সযঞ্চেৱ, পঞ্চন্নং পণ্ডুসূনূনং.

৪৪. ইতিহাসকথাযঞ্চ, দেৱাসুৰৰণে পুৰা;

দুস্সন্তাদিমহীপেহি, কতঞ্চ চৰিতব্ভূতং.

৪৫. উম্মূলিতৱতো তস্স, নন্দৱংসনৰিস্সৰে;

চাৰক্কদ্ৱিজসেট্ঠস্স, সুত্ৱা বুদ্ধিবলম্পি চ.

৪৬. সব্বা নেতানি লোকম্হি, যাৱজ্জদিৱসা ভুৱি;

তেসং অসন্নিধানেপি, সুপ্পসিদ্ধিং গতানি হি.

৪৭. সুলদ্ধং জীৱিতং তেসং, অসাধাৰণমীদিসং;

চৰিতাতিসযং কত্তুং, সমত্থা হোন্তি যে ভুৱি.

৪৮. জাযিত্ৱা খত্তৱংসম্হি, খত্তৱীৰৱৰোধিতং;

যদিহং ন কৰিস্সামি, মোঘা মে জাতি হেস্সতি.

৪৯. তেসমব্ভধিকা কাল-সম্পদাযেৱ কেৱলং;

মযা তে অধিকা কিন্তু, পঞ্ঞাদীহীতি চিন্তিয.

৫০. পিতুৰাজা চ মে’দানি, পচ্ছিমে ৱযসিট্ঠিতো;

যদিদং পেত্তিকং ৰজ্জং, মম হত্থগতব্ভৱে.

৫১. ৰাজলক্খিৱ সো পেত-চেতসো মে পমাদতো;

যথিচ্ছিতঞ্চে ন ভৱে, মহতী জানি মে ভুসং.

৫২. এত্থেৱ নিৱসন্তো’হং, চৰাপিয সকে ৱৰে;

পৰমণ্ডলৱুত্তন্তং, জানেয্যং যদি তত্তনো.

৫৩. ৰন্ধং পচ্চত্থিকানন্তু, পকাসেতুং ৰথাতথং;

অধিপ্পাযানুৰূপং মে, সমত্থা ৱা ন ৱাচৰা.

৫৪. যে কেচি’ধ জনা সন্তি, সব্বে তে মম সম্মুখা;

বলীযত্তং’ৱ সত্তূনং, কথযন্তি অনেকসো.

৫৫. পচ্চেকৰট্ঠসামীহি, পিতুভূপেহি তিহিপি;

একীভূয কৰিত্ৱান, সত্তক্খত্তুং মহাহৱং.

৫৬. সাধেতুং দুক্কৰং ৰট্ঠং, ভৱতে কাকিনা কথং;

সিসুনা গণ্হিতুং সক্কা, খুদ্দৰজ্জো পভোগিনা.

৫৭. সুকৰং মূলভূতস্স, তস্স ৰজ্জস্স সাধনং;

ইতি দুচ্চিন্তংতং তুয্হং, দূৰে তব্বমিদং’’ইতি.

৫৮. কণ্ণে তত্থসলাকাযো, পৱেসেন্তা’ৱ নেকসো;

মহন্তত্তং কথেন্তে’ৱং, বহুধা পৰমণ্ডলে.

৫৯. অজাননং যথাভূতং, ৱদন্তানং কুবুদ্ধিনং;

সব্বমেতং ৱচো জাতু, সদ্ধাতব্বং সিযা ন হি.

৬০. লেসেনেকেন গন্ত্ৱান, খিপ্পং’ৱ পৰমণ্ডলং;

সৰূপং তত্থ উস্সামি, অহমেৱেতি চিন্তযি.

৬১. যদি মে পীতুভূপালো, ৱিঞ্ঞাযেতং ৱিতক্কিতং;

অভিজাতস্স পুত্তস্স, ৱংসজোতিকৰস্স মে.

৬২. গতস্স সত্থু ৱিসয-মনত্থোপি সিযা ইতি;

অনুকম্পাধিযা ময্হং, গমনং ৱাৰযিস্সতি.

৬৩. মনোৰথস্স সংসিদ্ধি, সব্বথা মেন হেস্সতি;

তস্মা নিগুড়ৰূপেন, গমনং ভদ্দকং ইতি.

৬৪. লদ্ধান ৰত্তিযম থেকদিনং খণঞ্ঞূ,

সো তাদিসং খণমখীণতৰোৰূপাযো;

জানাতি নো সকপিতাগমনং তথাতং,

গেহা’ভিনিক্খমিতথা চতুৰো কুমাৰো.

সুজনপ্পসাদসংৱেগত্থায কতে মহাৱংসে

পৰমণ্ডলাভিগমনো নাম

দ্ৱিসট্ঠিমো পৰিচ্ছেদো.