সট্ঠিম পৰিচ্ছেদ

কুমাৰোদযো

১. ৰোহণে নিৱসিত্থা’ৱ, জযবাহুমহীপতি;

মিত্তাৱ্হা ৰাজিনী চেৱ, তদা কালমকংসু তে.

২. সিৰীৱল্লভজাযা’থ, জনেসি সুগলা দুৱে;

মাণভৰণকং পুত্তং, পুত্তিং লীলাৱতিম্পি চ.

৩. মাণাভৰণভূপাল-দেৱী’পি ৰতনাৱলী;

মিত্তং পভাৱতিঞ্চাপি, অলভী ধীতৰো দুৱে.

৪. পস্সন্তস্স উভো তাযো, ধীতৰো ৱীৰবাহুনো;

তদা মহাদিপাদস্স, এৱং আসি ৱিতক্কিতং.

৫. লোকাভিসম্মতে সব্ব-ভূপালন্ৱযমুদ্ধনি;

ৱিসুদ্ধে সোমৱংসম্হি, অভিজাতা মযং পন.

৬. পিহনীযতৰাকাৰা, সব্বসত্তিসমুন্নতা;

নানাৱিজ্জাসু নিপুণা, হত্থিঅস্সাদিসুক্খমা.

৭. তথা পেকাকিনা ৱে’তে, তযো ৱিক্কমবাহুনা;

পৰাজযং পৰিভৱং, পাপিতা বহুসো ৰণে.

৮. সূনুনো সুসমত্থস্স, ৱিসোধেতু মিমং মলং;

ন দিস্সতে পাতুভাৱো, অহো নো অপ্পপুঞ্ঞতা.

৯. জনৱাদকিলিট্ঠেন, ৰাজত্তেনাপি কিং মম;

ইদানি ৱিসযাসঙ্গং, হিত্ৱা কল্যাণকম্মসু.

১০. অপ্পমত্তস্স সততং, নেতব্বা ৱাসৰা’ইতি;

নিয্যাতেত্ৱা অমচ্চানং, সব্বং ৰজ্জৱিচাৰণং.

১১. তহিং সত্ত’ট্ঠমাসঞ্হি, ৱসং ৰত্তিযমেকদা;

দেৱৰাজঘৰেসেয্যং, কপ্পেসি সীলসংযতো.

১২. ততো পচ্চূসকালম্হি, দেৱপুত্তং মহিদ্ধিকং;

ৱিচিত্তৱত্থাভৰণং, গন্ধমালাৱিভূসিতং.

১৩. উড়াৰতৰৰূপেন, দেহোভাসেন অত্তনো;

ওভাসেন্তং অসেসা’সা, সূৰিযঞ্চ ন ভুগ্গতং.

১৪. ৱদন্তং সুপিনে এৱং, অদক্খি দৰণীপতি;

পসীদস্সু মহাভাগ, পিতোভৱ মহিপতি.

১৫. ধঞ্ঞলক্খণসম্পন্নো, ইচ্ছিতত্থস্সসাধকো;

ৱিনীতো লোককুহৰ-ব্যাপিতেজো পৰক্কমো.

১৬. আণবলযসোকিত্তি-ভাসুৰো সগ্গুণাকৰো;

লোকসাসনসংৱুদ্ধি-কৰো পুত্তৱৰো তৱ.

১৭. লব্ভীস্সতে মহাৰাজ, ন চিৰস্সেৱ সম্পতি;

পুত্তদাৰাধিৱুত্থং তং, পুৰং খিপ্পং পযাহীতি.

১৮. পবুজ্ঝিত্ৱান সঞ্জাত-পীতিৱেগোথ ৰত্তিযা;

ৱিভাতায ততোপোঙ্খ-গামং গঞ্ছিনৰুত্তমো.

১৯. যথা দিট্ঠপ্পকাৰন্তং, কথেসি সুপিনং সুভং;

মহেসী পমুখানং সো, অমচ্চানং মহীপতি.

২০. সদ্ধিং মহেসিযা তত্থ, পত্থেন্তো পুত্তমুত্তমং;

চিন্তোন্তো দানসীলাদিং, সুভং নানপ্পকাৰকং.

২১. অথেকদিৱসংকালে, পচ্চূসে সুপিনে পন;

সব্বলক্খণসম্পন্নং, সব্বসেতং মনোহৰং.

২২. দন্তীপোতৱৰং দন্তং, কণ্ণে গণিযপেমতো;

পৱিসন্তমিৱত্তানং, সেয্যাগব্ভং মহেসিযা.

২৩. সম্পস্সিয পবুজ্ঝিত্ৱা, উট্ঠায সযনাৱৰা;

সঞ্জাতপীতিপামোজ্জ-ৱেগপীণিতমানসো.

২৪. তাযং ৱেলাযমেদাসু-সেয্যাগব্ভং মহেসিযা;

পৱিস্সসুপিনং তস্সা, যথাদিট্ঠং পকাসযী.

২৫. অহম্পি তাদিসং হত্থি-পোতকং সযনং মম;

পদক্খিণং কৰিত্ৱান, ঠিতং সোণ্ডে সমাদিয.

২৬. আকড্ঢিত্ৱান সযনং, সমাৰোপিয পেমতো;

আলিঙ্গিং সুপিনম্হীতি, দেৱী চাপি তমব্ৰৱী.

২৭. উভো তে অঞ্ঞমঞ্ঞস্স, দিট্ঠমেৱং পকাসিয;

উট্ঠাপেসুং পহট্ঠাৱ, ৱীতনিদ্দাৰুণং তদা.

২৮. ততো পাতো উপট্ঠাতু, মুপযাতং পুৰোহিতং;

নেমিত্তকে চ পুচ্ছিংসু, সুনিত্ৱা তে পমোদিতা.

২৯. ন চিৰস্সেৱ পুত্তস্স, ধঞ্ঞলক্খণসালিনো;

উপ্পত্তিযা অৱস্সং’ৱ, ভৱংতব্বন্তি কিত্তযুং.

৩০. তং সুণিত্ৱা অমচ্চা চ, তথা নগৰৱাসিনো;

অৱিন্দিংসু জনিন্দো চ, সব্বেপীতি মহুস্সৱং.

৩১. ততো পট্ঠায সোত্থানং, পত্থযং পত্থিৱোভুসং;

ভিক্খুসঙ্ঘেন বহুসো, ভণাপেসি পৰিত্তকং.

৩২. মণিমুত্তাদিকং চিত্তং, মহগ্ঘমনুৱাসৰং;

পৰিচ্চজি দানমুখে, যাচকানমনেকসো.

৩৩. পুৰোহিতাদিৱিপ্পেহি, ৱেদৱেদঙ্গৱিঞ্ঞূহি;

ৱত্তাপেসি চ হোমাদি-ৱিধানং সোত্থি সম্মতং.

৩৪. সুৱিনট্ঠে ৱিহাৰে চ, ধাতুগব্ভে চ ৱাপিযো;

জিণ্ণা চ পটিসঙ্খত্তুং, যোজযী ৰাজকপ্পিকে.

৩৫. দিনং নযন্তে কল্যাণ-কম্মেনে’ৱং নৰিস্সৰে;

ন চিৰং সণ্ঠহি গব্ভ-ৱৰো কুচ্ছিম্হি দেৱিযা.

৩৬. ততোৱগম্ম তং হট্ঠ-পহট্ঠো সো নৰিস্সৰো;

মহন্তং দেৱিযা গব্ভ-পৰিহাৰমদাপযি.

৩৭. পৰিপক্কগব্ভা দেৱী, কমেন জনযীসুকং;

সমযে ভদ্দনক্খত্ত-মুহুত্তেনভিলক্খিতে.

৩৮. সুপ্পসন্না অসেসা চ, দিসাযো তংখণে অহু;

সমীৰণে চ ৱাসিংসু, সুগন্ধিমুদুসীতলা.

৩৯. দন্তীনং কোঞ্চনাদেন, হযানং হেসিতেন চ;

ৰাজঙ্গণং তদাজাতং, মহাকোলাহলা কূলং.

৪০. অচ্ছেৰাতিসযে এৱং, পাতুভূতে অনেকধা;

দিস্ৱা তং ৱিম্হযপ্পত্তো, মাণভৰণভূপতি.

৪১. সুত্ৱা নিজস্স পুত্তস্স, তদা সঞ্জাতসাসনং;

অমতেনাভিসিত্তোৱ, পীতিপুণ্ণমনোৰথো.

৪২. মোচাপেত্ৱা তদা কাৰা-ঘৰে বদ্ধে বহূজনে;

দানং উড়াৰং সমণ-ব্ৰাহ্মণানং পদাপযি.

৪৩. অমচ্চপমুখা চাপি, জনাপুৰনিৱাসিনো;

কদলীতোৰণাদীহি, ৰাজধানী মনেকধা.

৪৪. অলঙ্কৰিত্ৱা সকলং, সুমণ্ডিতপসাধিতা;

ছণং মহন্তং ৱত্তেসুং, কতিপাহং মনোৰমং.

৪৫. ৱেদে ৱুত্তৱিধানেন, জাতকম্মাদিকং ৱিধিং;

সব্বং সমাপযিত্ৱান, কুমাৰস্সা’ৱনীপতি.

৪৬. পুৰোহিতাদযো ৱিপ্পে, ততো লক্খণপাঠকে;

আণাপেত্ৱান সক্কাৰ-সম্মানৱিধিপুব্বকং.

৪৭. নিযোজেসি কুমাৰস্স, লক্খণানং পটিগ্গহে;

সাধকং সকলং তস্স, যত্থপাদাদিলক্খণং.

৪৮. উপধাৰিয মহামচ্চ-গণমজ্ঝগতস্স তে;

ৰাজিনো দেৱিযা চাপি, পকাসেসুং পমোদিতা.

৪৯. লঙ্কাদীপং ঠপেত্ৱান, জম্বুদীপতলম্পি চ;

একচ্ছত্তঙ্কিতং কত্ৱা-নুভোত্তুং নিপুণো ইতি.

৫০. তে সন্তপ্পিয ভোগেহি, ভিয্যো পুচ্ছিত্থ সাদৰং;

সন্দিস্সমানং যংকিঞ্চি, অৰিট্ঠং অত্থি নত্থী’তি.

৫১. দীঘাযুকো কুমাৰো’যং, কিঞ্চি পঞ্ঞাযতে ৱত;

জনকাৰিট্ঠযোগো’তি, তে মহীপতিনো’ব্ৰৱুং.

৫২. তস্সাৰিজনসম্মদ্দি-পতাপভুজযো গতো;

সো পৰক্কমবাহূ’তি, অন্ৱত্থনামমগ্গহী.

৫৩. কণ্ণৱে ধমহঞ্চেৱ, অন্নুপাসনমঙ্গলং;

কাৰাপিয ৱিধানঞ্ঞূ, যথাৱিধিমসেসতো.

৫৪. ৰঞ্ঞো ৱিক্কমবাহুস্স, সপুত্তুপ্পত্তিসাসনং;

ৱত্তুং সদূতে পেসেসি, পুলত্থিনগৰং তদা.

৫৫. তেহিসো ভাগিনেয্যস্স, মহাভাগত্তনম্পি চ;

জনকাৰিট্ঠযোগঞ্চ, সুত্ৱা ৱিক্কমবাহুসো.

৫৬. ধঞ্ঞং ৱিজযৰাজাদি-ৰাজমালায নাযকং;

মণিংৱ ভাসুৰং ময্হং, ভাগিনেয্যং জনেসিসো.

৫৭. হানি যাকাচিসততং, যথা তস্স ন হেস্সতি;

তথা মমন্তিকেযেৱ, কুমাৰো এত্থ ৱড্ঢতং.

৫৮. অলদ্ধং লভিতুং লাভং, লদ্ধঞ্চ পৰিৰক্খিতুং;

সব্বথা ন সমত্থোযং, পুত্তো গজবাহু মম.

৫৯. সূৰভাৱাদিযুত্তো’পি, মহিন্দৱ্হপৰোসুতো;

নিহীনো মাতুগোত্তেন, ন ৰজ্জস্স ৰহো মম.

৬০. ঠিতস্স ৱিক্কজাতেন, নেকসো সঞ্চিতেন মে;

ৰজ্জস্স ভাগিনেয্যো’ৱ, কামং ভাগী ভৱিস্সতি.

৬১. ইতিপেসেসি দূতে সো, আনেতুং তং কুমাৰকং;

কুমাৰা ভৰণং দত্ৱা, সেসং সাৰঞ্চুপাযনং.

৬২. সব্বং দূতমুখা সুত্ৱা, ৱীৰবাহু মহীপতি;

তস্সেতং ৱচনং যুত্তং, ৱুত্তং মেহিত বুদ্ধিযা.

৬৩. তথাপি চ নিজাৰিট্ঠ-পটিকাৰত্থমীদিসং;

ওৰসং পুত্তৰতনং, পেসেতুং না’নুৰূপকং.

৬৪. কিঞ্চ তত্থ কুমাৰম্হি, নীতে ৱিক্কম বাহুনো;

পক্খো লদ্ধমহাৱাহ-বলো ৱিয হুতাসনো.

৬৫. অচ্চুন্নতেন মহতা, তেজসা সঞ্জলিস্সতি;

হানিৰেৱ ৱতম্হাকং, মহতী হেস্সতে ভুসং.

৬৬. ইতি হত্থে গতানং সো, দূতানং থনযং সকং;

অপেসেত্ৱা ৱিসজ্জেসি, পসাদিয মনেন সো.

৬৭. সপুত্তদাৰেহি সমগ্গৱাসং,

নৰাদিনাথো নিৱসং তহিংসো;

তিব্বেন ফুট্ঠো মহতাগদেন,

ৰজ্জেন সদ্ধিং ৱিজহিত্থ দেসং.

সুজনপ্পসাদসংৱে গত্থায কতে মহাৱংসে

কুমাৰোদযো নাম

সট্ঠিমো পৰিচ্ছেদো.