একূনসট্ঠিম পৰিচ্ছেদ

চতুৰাজচৰিয নিদ্দেসো

১. তদাৰঞ্ঞো নুজামিত্তা, তস্স পুত্তা তযো’পি চ;

মহামচ্চা চযতযো, তথা যতনৱাসিনো.

২. তব্বেতে আদিপাদস্স, ৰোহণে ৱসতো সতো;

অনাৰোচাপযিত্ৱান, ভূপালমতসাসনং.

৩. সম্ভূযমন্তযিত্ৱান, সমানচ্ছন্দতং গতা;

অদংসু যুৱৰাজস্স, লঙ্কাৰজ্জাভিসেচনং.

৪. ওপৰজ্জে নিৱেসেসুং, মানভৰণনামকং;

কুমাৰং পুব্বচাৰিত্ত-মগ্গং লঙ্ঘিত্থ তে’খিলা.

৫. তযো’থ ভাতৰো সব্বে, তে মাণভৰণাদযো;

জযবাহুমহীপাল-সহিতা সহসা তদা.

৬. মুত্তামণিপ্পভূতিকং, ৰতনং সাৰসম্মতং;

সব্বং হত্থগতং কত্ৱা, ৱাহনঞ্চ গজাদিকং.

৭. সকলং বলমাদায, পুলত্থিনগৰা তদা;

খিপ্পং তং ৱিক্কমভুজং, গণ্হিসামা’তি নিক্খমুং.

৮. সুত্ৱা পৱত্তিং সকলং, ইমং ৱিক্কমবাহুসো;

তা তস্সন্তিমসক্কাৰং, ৱিধাতুং হন্দনো লভিং.

৯. ইদানি খিপ্পং গন্ত্ৱান, পুলত্থিনগৰং তহিং,

তা তস্সাড়াহনট্ঠান দস্সনে নেৱ সো অহং.

১০. সোকভাৰং ৱিনোদেস্সং, মম চেতো গতং ইতি;

কতদড়্হ ৱৱত্থানো, ৱিনিগ্গম্ম ততো পুৰা.

১১. পুলত্থিপুৰমাগচ্ছং, আদিপাদো’তি সাসসো;

সত্তট্ঠসতসঙ্খেন, বলেন পৰিৱাৰিতো.

১২. অন্তৰালপথেযেৱ, গুত্তহালকমণ্ডলে;

গামে পন সমুক্কৱ্হে, দিস্ৱা সেনঙ্গমাগতং.

১৩. মহন্তং যুদ্ধসন্নদ্ধং, একৱীৰো ভযাতিকো;

যুজ্ঝিত্ৱা তে পলাপেসি, খণেনেৱ দিসোদিসং.

১৪. তযো তে ভাতৰো তত্থ, সম্পত্তাৱ জযা ততো;

অভিমানুদ্ধতা খিপ্পং, অন্নয্হ বলৱাহনং.

১৫. আদিপাদকজম্বূতি, ৱিস্সুতম্হি পদেসকে;

সঙ্গামেসুং পৰাজেসি, ভিয্যো যুজ্ঝিত্থ সো তযো.

১৬. ততিযং কটগামস্মিং, কাড়ৱাপ্যং চতুত্থকং;

পঞ্চমং উদ্ধটদ্ৱাৰে, ছট্ঠংসো পঙ্কৱেলকে.

১৭. তেহি যুদ্ধং কৰিত্ৱান, গহীতৱিজযো সদা;

পুলত্থিপুৰমাগঞ্চি, সহামচ্চ পৰিজ্জনো.

১৮. সচিন্তিতক্কমেনেৱ, পস্সিত্ৱাড়াহনং পিতু;

ৱিদূৰিতমহাসেকো, লদ্ধস্সাসো পুৰেৱসং.

১৯. দুক্খে সহায ভূতান-মত্তনো সো যথাৰহং;

অমচ্চানমদা সব্ব-ভোগে ঠানন্তৰে হি সো.

২০. ভটানঞ্চাপি সব্বেসং, সহাযাতানমত্তনো;

অনুৰূপমদা ৱুত্তিং, সৰং দুক্খসহাযতং.

২১. মাণাভৰণভূপোপি, সদ্ধিং সেসেহি ভাতূহি;

কৰিত্ৱা ৰোহণং পস্সং, ৰোহণঞ্চ সহত্থগং.

২২. ততো কিত্তিসিৰীমেঘে, সদ্ৱাদসসহস্সকং;

ৰট্ঠং দত্ৱান ৱসিতুং, তহিংযেৱ সমাদিসি.

২৩. আণত্তো ভাতৰাকিত্তি-সিৰীমেঘো জনাধিপো;

গন্ত্ৱা ৱসি পুৰেতত্থ, মহানাগহুলৱ্হযে.

২৪. সিৰীৱল্লভনামস্স, কুমাৰস্সাপি চাদিসি;

দেসমট্ঠসহস্সৱ্হং, দত্ৱান ৱসিতুং তহিং.

২৫. তথেৱ সোপি গন্ত্ৱান, উদ্ধনদ্ৱাৰনামকং;

গামং কত্ৱা ৰাজদানিং, ৱসন্তো অনুসাসিতং.

২৬. সযঞ্চ সহসেনায, গন্ত্ৱা দক্খিণপস্সকং;

ৱীৰবাহূতি পঞ্ঞাতো, পুঙ্খগামং সমাৱসি.

২৭. মাতা চ তিণ্ণং ভাতূনং, জযবাহু চ ভূমিপো;

নিৱসিংসু তদা কিত্তি-সিৰিমেঘস্স সন্তিকে.

২৮. ততো সংৱচ্ছৰে’তীতে, তে মাণভৰণাদযো;

তেনত্তনি কতং যুদ্ধে, সব্বং ৱিক্কমবাহুনা.

২৯. দুৰাৰোহং মহন্তং তং, পৰাজযতৰাভৱং;

অনুস্সৰন্তবহুসো, অভিমানসমুন্নতা.

৩০. মুদ্ধাভিসিত্তৰাজূন-মেকাকীৰাজৰট্ঠকং;

ৱিনাযমভিসেকেন, কথং নামানুভোস্সতি.

৩১. ইতি ইস্সা পৰত্তঞ্চ, যাতা সঙ্গয্হসাৱকে;

ভিয্যো সম্ভূযসঙ্গাম-কৰণত্থায নিক্খমুং.

৩২. সুত্ৱা তমত্থং দূতেহি, সো ৱিক্কমভুজোপি চ;

অগা তেসংৱ ৱিসযং, মহাসেনাপুৰক্খতো.

৩৩. দেসে দক্খিণকে বোধি-সেনপব্বতগামকে;

যুজ্ঝিত্ৱা তে পৰাজেসি, তযো ৱিক্কমবাহুসো.

৩৪. ৰিপৱো দানি মে সব্বে, উম্মূলেস্সামহং ইতি;

পলাযন্তে নুবন্ধিত্থ, পদানুপদিকং’ৱ তে.

৩৫. তে চ দুগ্গং পলাযিংসু, পঞ্চযোজনৰট্ঠকে;

খিপ্পং পাৱেক্খি কল্যাণিং, সো’পি তে গহণত্থিকো.

৩৬. ৱীৰো অৰিযদেসিযো, ৱীৰদেৱোতি পাকটো;

পড়ন্দীপিস্সৰো একো, ভূসং সহসিকো তদা.

৩৭. সদ্ধিং সূৰেহি যোধেহি, মহাতিত্থম্হি ওতৰি;

কাতুং হত্থগহং সক্কা, লংকাদীপন্তি চিন্তিয.

৩৮. সো ৱিক্কমভুজো সুত্ৱা, পৱত্তিং ভূভুজো তদা;

যাৱতা নাত্ৰ লংকাযং, লদ্ধোগাহো ভৱিস্সতি.

৩৯. তাৱ উম্মূলনীযোতি, কল্যাণিম্হা ৱিনিগ্গতো;

মহাতিত্থম্হি মন্নাৰ-নামকং গামকং গতো.

৪০. কত্ৱান ৱীৰদেৱো’পি, সঙ্গামং তেন ৰাজিনা;

অনীকঙ্গাদযো ৰাজ-পুত্তে দ্ৱে ভাতৰোপি চ.

৪১. সেনাধিনাযকঞ্চেৱ, কিত্তিনামপ্পকাসিতং;

ঘাতেত্ৱা সহসা ৱীৰ-সম্মতে চ বহূজনে.

৪২. গাহেত্ৱা জীৱগ্গাহংসো, ৰক্খকঞ্চ চমূপতিং;

সবলং তং পৰাজেত্ৱা, অনুবন্ধি পদাপদং.

৪৩. পলাযমানো সো ভীতো, আগন্ত্ৱান নিজং পুৰং;

হত্থসাৰং সমাদায, কোট্ঠসাৰং গতো লহুং.

৪৪. পচ্ছতো পচ্ছতো ৱীৰ-দেৱো তমনুবন্ধিয;

আগন্ত্ৱান পুৰেৱাসং, কতিপাহং ৱিধাযসো.

৪৫. গণ্হিতুং ৱিক্কমভুজং, তত্থেৱ তুৰিতং অগা;

পেসযিত্ৱা সকং সোপি, মহন্তং সকলং বলং.

৪৬. যুজ্ঝাপেত্ৱান ঘাতেত্ৱা, গামে অন্তৰৱিট্ঠিকে;

মহাকদ্দমদুগ্গম্হি, ৱীৰদেৱং মহব্বলো.

৪৭. অভিসেকং ৱিনাযেৱ, পুলত্থি নগৰে ৱসং;

অকাসি ৰাজৰট্ঠস্স, পসাসনৱিধিং ৱিভূ.

৪৮. অপনীযৰণে ছন্দং, ভাতৰোপি তযো ততো;

আৱসিংসু যথাপুব্বং, গন্ত্ৱা ৰট্ঠং সকং সকং.

৪৯. চতুৰোপি মহীপালা, যতমানা চিৰং তহিং;

একচ্ছত্তঙ্কিতং কাতুং, নেৱ সক্খিংসু সব্বসো.

৫০. অনিসম্মকাৰিভাৱেন, কুলীনে পৰিহাপযুং;

ঠপেসুঞ্চ মহন্তত্তে, হীনে সাভিমতে জনে.

৫১. ৱড্ঢিতংনেকধা সম্মা, ৰঞ্ঞা ৱিজযবাহুনা;

সাসনঞ্চ তথালোকং, হাপযিংসু সুবুদ্ধিনো.

৫২. কুলীনানং মনুস্সান-মভাৱেপি চ তাদিসে;

দোসে ৱিত্তং তদাযত্তং, পসয্হাৱহৰিংসু চ.

৫৩. পীড়েতুং সকলং লোক-মুদ্ধৰন্তাধিকং বলিং;

উচ্ছূৱ উচ্ছুযন্তেতে, খীণকো সাধনেসিনো.

৫৪. উদ্ধৰিত্ৱান বুদ্ধাদি-সন্তকে ভোগগামকে;

সো ৱিক্কমভুজো ৰাজা, সেৱকেসু সমপ্পযী.

৫৫. পুলত্থিনগৰে নেক-ৱিহাৰে ধাতুমণ্ডিতে;

সোৱ দেসন্তৰীযানং, ভটানং ৱসিতুং অদা.

৫৬. সদ্ধেহি পত্তধাতুস্স, দাঠাধাতুৱৰস্স চ;

পূজনত্থায দিন্নানি, মণিমুত্তাদিকানি চ.

৫৭. চন্দনাগৰুকপ্পুৰং, সুৱণ্ণাদিমযা বহূ;

পটিমাযো চ অচ্ছিজ্জ, যথাকামং ৱযং নযী.

৫৮. সাসনস্স চ লোকস্স, ক্ৰিযমানমুপদ্দৱং;

পস্সন্তা বহুসো তস্মিং, তদা নিব্বন্নমানসা.

৫৯. অট্ঠমূলৱিহাৰেসু, যতযো গৰুসম্মতা;

পংসুকূলিকভিক্খূ চ, কোট্ঠাসদ্ৱযনিস্সিতা.

৬০. এৱং তিত্থিযতুল্যানং, সাসনোপদ্দৱং বহুং;

কৰোন্তানং সকা সম্ভা-পযাতং পৱৰং ইতি.

৬১. দাঠাধাতুৱৰং পত্ত-ধাতুমাদায ৰোহণং;

গন্ত্ৱা ৱাসমকপ্পেসুং, ফাসুঠানে তহিং তহিং.

৬২. তথেৱ ফাসুঠানেসু, ৱিপ্পকিণ্ণা তহিং তহিং;

তে কুলীনা নিলীনা’ৱ, হুত্ৱা ৱাসমকপ্পযুং.

৬৩. পক্খদ্ৱযমহীপাল-গয্হাসীমা সুঠাপিতা;

সামন্তা অঞ্ঞমঞ্ঞেহি, কৰোন্তো বহুসো ৰণং.

৬৪. সুসমিদ্ধেসু নেকেসু, গামেসু নিগমেসু চ;

অগ্গিং দেন্তা তড়াকে চ, ছিন্দন্তা জলপূৰিতে.

৬৫. নাসেন্তা সব্বথা সব্ব-মাতিকাৱৰণানি চ;

ছিন্দন্তা নাড়িকেৰাদি, সো পকাৰে চ ভূৰুহে.

৬৬. যথা পোৰাণকগ্গাম-ঠানন্তিপি ন ঞাযতে;

ৱিনাসেসুং তথা ৰট্ঠং, অঞ্ঞমঞ্ঞৱিৰোধিনো.

৬৭. তে চ ভূমি পতীগাম-ৱিলোপং পত্থমোসনং;

কাৰেন্তা নিজচাৰেহি, আচৰুং লোকুপদ্দৱং.

৬৮. কুলীনানং মনুস্সানং, দাসকম্মকৰাপি চ;

সসামিনো’তি ৱত্তন্তা, নিস্সঙ্কা ৱীতভীতিকা.

৬৯. হুত্ৱা যুধীযা ৰাজূনং, অব্ভন্তৰপৱত্তিনো;

বলৱন্ততৰা জাতা, লদ্ধঠানন্তৰা তদা.

৭০. জনা সমন্তকূটাদি-নেকদুগ্গনিৱাসিনো;

অদেন্তা ভূমিপালানং, পুব্বপট্ঠপিতং কৰং.

৭১. ৰাজাণমগণেন্তা তে, গতা দামৰিকত্তনং;

সকং সকং’ৱ ৱিসয-মাৱসিংসু সমুদ্ধতা.

৭২. অনত্থে নিচিতা নাম, পৰিৱত্তন্তি সব্বতা;

ইতি ৱত্তব্ব তংযেৱ, যাতং লঙ্কাতলং তদা.

৭৩. এৱং গামকভোজকা ৱিয ভুসংতেজো ৱিহীনা সদা;

অচ্চন্তং ব্যসনাতি সত্তহদযা ৰাজাভিমানুজ্ঝিতা.

৭৪. নিচ্চং অত্তপৰত্থসিদ্ধিৱিধুৰাসঙ্গা ৱিহীনাসযা;

সব্বে তে ৱিহৰিংসু ভূমিপতযো চাৰিত্তমগ্গাতিগা.