অট্ঠপঞ্ঞাসতিম পৰিচ্ছেদ

লোকসাসন সংগহকৰণো

১. ৱিচিনিত্ৱা কুলীনে সো, জনে সব্বে সমাদিয;

সকাৰক্খায যোজেসি, যথাচাৰং মহীপতি.

২. উচ্চং পুলত্থিনগৰে, পাকাৰং কাৰযী থিৰং;

নেকগোপুৰসংযুত্তং, যুধাকম্মসুৰঞ্জিতং.

৩. সমন্তাযতৱিত্থিণ্ণ-গম্ভীৰপৰিখাযুতং;

উচ্চপত্থণ্ডিলোপেতং, দুপ্পধংসমৰাতিহি.

৪. উপসম্পদকম্মস্স, গণপূৰকভিক্খূনং;

অপ্পহোনেকভাৱেন, সাসনঠিতিমানসো.

৫. অনুৰুদ্ধনৰিন্দস্স, সহাযস্সাথ সন্তিকং;

ৰামঞ্ঞৱিসযং দূতে, পেসেত্ৱা সহপাভতে.

৬. ততো আণাপযিত্ৱান, পিটকত্তযপাৰগে;

সো সীলাদিগুণাৱাসে, ভিক্খৱো থেৰসম্মতে.

৭. তে উড়াৰাহি পূজাহি, পূজযিত্ৱা নৰিস্সৰো;

পব্বজ্জা উপসম্পত্তি, কাৰযিত্ৱা অনেকসো.

৮. পিটকত্তযঞ্চ বহুসো, কথাপেত্ৱা সৱণ্ণনং;

লঙ্কাযো’সক্কমানং সো, জোতযী জিনসাসনং.

৯. পুতত্থিনগৰস্সন্তো, পদেসস্মিং তহিং তহিং;

ৱিহাৰে কাৰযিত্ৱান, বহুকে সুমনোহৰে.

১০. ভিক্খৱো তত্থ ৱাসেত্ৱা, নিকাযত্তযৱাসিনো;

পচ্চযেহি উড়াৰেহি, সন্তপ্পেসি চতূহিপি.

১১. ফলিকত্থম্ভকচাৰু-পাকাৰপৰিখাযুতং;

পঞ্চভূমকপাসাদ-পৱৰে নো’পসোভিতং.

১২. সমসন্তা ৱাসপন্তীহি, সুভাহি সুৱিৰাজিতং;

নিৰকিণ্ণমসম্বাধ ৱৰভাসুৰ গোপুৰং.

১৩. ৱিহাৰং কাৰযিত্ৱান, ৱত্থুত্তযপৰাযনো;

নিকাযত্তযৱাসিস্স, ভিক্খুসঙ্ঘস্স’দাসিসো.

১৪. সঙ্ঘস্স পাকৱট্টত্থং, ৰট্ঠং দত্ৱা’ড়িসাৰকং;

সকলং সন্নিৱাসীহি, নেত্তিকেহি সহেৱ সো.

১৫. নেকসতানিভিক্খূনং, ৱাসযিত্ৱান তত্থ সো;

সততং সম্পৱত্তেসি, উড়াৰং চতুপচ্চযং.

১৬. দাট্ঠাধাতুঘৰংচাৰু, কাৰযিত্ৱা মহাৰহং;

দাঠাধাতুস্স নিচ্চং সো, মহামহমকাৰযি.

১৭. গণসঙ্গণিকা’পেতো, পোত্থকং ধম্মসঙ্গণিং;

পৰিৱত্তেসি সোপাতো, সুন্দৰে ধম্মমন্দিৰে.

১৮. নচ্চাদিগন্ধমালাদি-নেকপূজম্পৱত্তিয;

সীৰেন সদ্ধাসম্বন্ধো, সম্বুদ্ধমভিৱন্দতি.

১৯. জম্বুদীপাগতে চাগ, সূৰো সো ভুৱিৰিসূৰযো;

তপ্পেসি ধনদানেন, দানিযেনেক সো ৱিভূ.

২০. সদ্ধম্মকথিকানং সো, পূজা কত্ৱান নেকসো;

দেসাপেসিচ সদ্ধম্মং, সদাধম্মগুণে ৰতো.

২১. তিক্খত্তুং সো তুলাভাৰ-দানং দিনেসু দাপযি;

উপোসথং ৱোপৱসি, সুৱিসুদ্ধমুপোসথে.

২২. অদা দণ্ডিস্সৰং দান-মনুসংৱচ্ছৰং ৱিভূ;

পিটকত্তযং লিখাপেত্ৱা, ভিক্খুসঙ্ঘস্স দাপযি.

২৩. মহগ্ঘমণিমুত্তাদি-ৰতনানি সপেসিয;

জম্বুদীপে মহাবোধিং-নেকক্খত্তুম পূজযি.

২৪. কণ্ণাটভূমিপালেন, চোড়ৰঞ্ঞা চ পেসিতা;

দূতামহন্তমাদায, পণ্ণাকাৰমিধাগতা.

২৫. অদ্দসংসু মহীপালং, ততো সো তুট্ঠমানসো;

তেসং উভিন্নং দূতানং, কত্তব্বং সাধুকাৰিয.

২৬. তেসু আদো’ৱ কণ্ণাট-দূতেহি সহ পেসিয;

দূতে সকীযে কণ্ণাট-নিকটং সাৰপাভতে.

২৭. অত্তনো ৱিসযং পত্তে, চোড়ো সীহড় দূতকে;

সহসা কণ্ণনাসাসু, পাপযিংসু ৱিৰূপতং.

২৮. সম্পত্তৱিপ্পকাৰাকে, ইধাগন্ত্ৱান ৰাজিনো;

কথযিংসু তদা সব্বং, চোড়েন কতমত্তনি.

২৯. উদ্দিপিতাভিমানো সো, সকলামচ্চমজ্ঝগো;

অৱ্হায দমিড়ে দূতে, ইতি চোড়স্স সন্দিসি.

৩০. সেনং ৱিনা’ৱ একস্মিং, দীপে মজ্ঝে মহণ্ণৱে;

বাহাবলপৰিক্খাৱা, হোতুনো দ্ৱন্দযুদ্ধতো.

৩১. বলং সন্নয্হ সকলং, ৰজ্জে তুয্হং মমা’থ ৱা;

তৱা’ভিমত দোসম্হি, সঙ্গামো ৱা কৰীযতং.

৩২. মযা ৱুত্তক্কমেনেৱ, ৱত্তব্বো ৱো জনাধিপো;

ইতি ৱত্ৱান তে দূতে, ইত্থলঙ্কাৰ মণ্ডিতে.

৩৩. ৱিস্সজ্জিয লহুংচোড়-মহীপালস্স সন্তিকং;

ততো সেনঙ্গমাদায, অনুৰাধ পুৰং গমি.

৩৪. মত্তিকাৱাটতিত্থে চ, মহাতিত্থে চ পেসযী;

চোড়ৰট্ঠং’ৱ গন্ত্ৱান, যুজ্ঝিতুং দ্ৱে চমূপতি.

৩৫. সজ্জন্তেসু চমূপেসু, নাৱাপাথেয্যকানি চ;

যুদ্ধত্থায বলং চোড়-ৰট্ঠপেসনকাৰণা.

৩৬. তদা তিংসতিমে ৱস্সে, ৱেড়ক্কাৰসনামকা;

বলকাযা তহিংগন্তু-মনিচ্ছন্তা ৱিৰোধিনো.

৩৭. মাৰেত্ৱান উভো সেনা-নাথে মত্তগজাৱিয;

সমন্ততো ৱিলুম্পিংসু, পুলত্থিপুৰমুদ্ধতা.

৩৮. পুত্তেহি তীহি সহিতং, ৰাজিনো চ কণীযসিং;

গণিত্ৱা সহসা ৰাজ-পাসাদং চাপি ঝাপযুং.

৩৯. ৰাজা নিক্খম্ম খিপ্পং সো, গন্ত্ৱা দক্খিণপস্সকং;

সেলে ৱাতগিৰিৱ্হস্মিং, সাৰং ভণ্ডং ঠপাপিয.

৪০. ৱীৰবাহুপৰাজেন, সীহৱিক্কমসালিনা;

মহতা চ বলোঘেন, সমন্তা পৰিৱাৰিতো.

৪১. পুলত্থিপুৰমাগম্ম, ৱত্তেন্তো দাৰুণং ৰণং;

পলাপেসি খণেনেৱ, বলকাযে সমাগতে.

৪২. মাৰিতান চমূপান-মট্ঠিসঙ্ঘাটধিট্ঠিতং;

পৰিক্খিপিত্ৱা চিতকং, ৱেৰিভূতে বলাধিপে.

৪৩. বন্ধযিত্ৱান খাণুম্হি, পচ্ছা বাহং সুবন্ধনং;

পৰিতো ৱিপ্ফুৰন্তীহি, অগ্গিজালাহি ঝাপযি.

৪৪. ঘাতেত্ৱা তত্থ মানীতং, গামানি ধৰণীপতি;

অকাসি লঙ্কাৱসুধং, সব্বথা ৱীতকণ্টকং.

৪৫. যুজ্ঝিতুং সহ চোড়েন, ৰাজা অত্তকতাৱধিং;

অনতিক্কম্ম সো পঞ্চ-চত্তালীসম্হি ৱচ্ছৰে.

৪৬. সন্নদ্ধং বলমাদায, গন্ত্ৱা সাগৰপট্টনং;

তস্সাভিগমনং পস্সং, কঞ্চিকালং তহিং ৱসং.

৪৭. অনাগতত্তা চোড়স্স, তস্স দূতে ৱিস্সজ্জিয;

পুনাগন্ত্ৱা ৱসীৰাজা, পুলত্থিনগৰে চিৰং.

৪৮. মহাহেড়ি সৰেহৰু, মহাদত্তিকনামিকা;

কটুন্নৰূপণ্ডৱাপী, কল্লগল্লিক নামিকা.

৪৯. এৰণ্ডেগল্লৱাপী চ, দীঘৱত্থুকৱাপিকা;

মণ্ডৱাটকৱাপী, চ, কিত্তগ্গবোধিপব্বতা.

৫০. ৱলাহস্স মহাদাৰু, গল্লকুম্ভীলসোব্ভকা;

পত্তপাসাণৱাপী চ, ৱাপী চ কাণনামিকা.

৫১. এতা চঞ্ঞা চ সো ছিন্ন-মৰিযাদা ৱাপিযো বহূ;

বন্ধাপেসি সদাদীন-সত্তে বদ্ধ হিতাসযো.

৫২. ভূমিন্দো কন্দৰা-গঙ্গা-নদীসু চ তহিং তহিং;

সুভিক্খং কাৰযী ৰট্ঠং, বন্ধেত্ৱা’ৱৰণানি সো.

৫৩. ৱিহাৰা’ভযচাৰিত্ত-ভেদিনিং মহিসংসক;

পৰিহাৰে সব্বসোচ্ছিজ্জ-গাহযিত্ৱা গলম্হি তং.

৫৪. পুৰম্ভা বহি কাৰেত্ৱা, মহাসঙ্ঘং খমাপিয;

পকাসেসি চ লোকস্স, সঙ্ঘগাৰৱমত্তনো.

৫৬. মহাগামে নিকাযানং, তিতযে চোড়নাসিতে;

ধাতুগব্ভে চ বন্ধেসি, থূপাৰামদ্ৱযে’পি চ.

৫৭. মাতুযা’ড়াহণঠানে, তথেৱ পিতুনোপি চ;

অকা পঞ্চ মহাৱাসে, তথা বুদলৱিট্ঠিযং.

৫৮. পণ্ডৱাপী চ পাঠীনো, ৰক্খচেতিযপব্বতো;

তথেৱ মণ্ডলগিৰি-মধুত্থলৱিহাৰকো.

৫৯. উৰুৱেলৱ্হযো দেৱ-নগৰে চ ৱিহাৰকো;

মহিযঙ্গণৱিহাৰো চ, সীতলগ্গামলেণকং.

৬০. জম্বুকোলৱিহাৰো চ, তথেৱ গিৰিকণ্ডকো;

কুৰুন্দিযৱিহাৰো চ, জম্বুকোলকলেণকং.

৬১. ভল্লাতকৱিহাৰো চ, তথেৱ পৰগামকো;

কাসগল্লৱ্হযো চন্দ-গিৰিৱ্হয ৱিহাৰকো.

৬২. ৱেলগামৱিহাৰো চ, মহাসেনৱ্হগামকো;

ৱিহাৰো চা’নুৰাধম্হি, পুৰে বোধিঘৰং তথা.

৬৩. ইচ্চেৱমাদযোনেকে, ৱিহাৰে চ বহূ ৱিভূ;

পটিসঙ্খৰিজিণ্ণে সো, গামে চা’দা ৱিসুং ৱিসুং.

৬৪. সমন্তকূট সেলত্থং, মুনিন্দপদলঞ্জনং;

পণমত্থায গচ্ছন্তা, মনুস্সা দুগ্গমঞ্জসে.

৬৫. সব্বে মা কিলমন্তূ’তি, দানৱট্টায দাপযি;

সালিক্খেত্তাদিসম্পন্নং, গিলীমলযনামকং.

৬৬. কদলীগামমগ্গে চ, হূৱৰড়ঞ্জসে তথা;

গামে দত্ৱান পচ্চেকং, সালাযো চাপি কাৰযি.

৬৭. অনাগতে তং ভূপালা, মা গণ্হন্তূ’তি লেখিয;

অক্খৰানি সিলাথম্ভে, পতিট্ঠাপেসি ভূমিপো.

৬৮. গামং অন্তৰৱিট্ঠিঞ্চ, তথা সঙ্ঘাটগামকং;

সিৰিমণ্ডগলাৰামঞ্চ, অদাসো লাভৱাসিনং.

৬৯. ৱনজীৱকভিক্খূন-মদা সো চতুপচ্চযে;

বন্ধূনম্পি চ সো তেসং, ভোগগামে পদাপযি.

৭০. পাৱাৰগ্গিকপল্লানি, ৱিৱিধে ওসধেপি চ;

সীতে উতুম্হি বহুসো, ভিক্খুসঙ্ঘস্স দাপযি.

৭১. অদা সব্বপৰিক্খাৰে, পৰিক্খাৰে তথাত্থ সো;

নেকৱাৰেসু সক্কচ্চং, ভিক্খুসঙ্ঘস্স বুদ্ধিমা.

৭২. সঙ্ঘস্স পাকৱট্টত্থং, ভিক্খূনং লাভৱাসিনং;

ৱেয্যাৱচ্চকৰানঞ্চ, পূজেতুং চেতিযাদিকং.

৭৩. পদিন্না পুব্বৰাজূহি, যে গামা ৰোহণে বহূ;

তেপি সব্বে অনূনে সো, যথাপুব্বং ঠপেসি চ.

৭৪. অদাসি পিঠসপ্পীন-মুসভে বলিনো বহি;

ভত্তং চা’দাসি সো কাক সোণাদীনং দযাপৰো.

৭৫. অদাসিনেকতা ৱেয্য-কাৰকানং মহাকৱী;

সদ্ধিং পৱেণিগামেহি, ৱিত্তজাতমনপ্পকং.