সত্তপঞ্ঞাসতিম পৰিচ্ছেদ

সংগহকৰণোনাম

১. লঙ্কাৰক্খায সচিৱে, বলিনো যোধসম্মতে;

পটিপাটিং সমুদ্দিস্স, সমন্তা সন্নিযোজযি.

২. অভিসেকমঙ্গলত্থায, পাসাদাদিমনেকতং;

কিচ্চং সম্পাদনীযন্তি, সচিৱং সন্নিযোজিয.

৩. ৱন্দনীযে’ভিৱন্দন্তো, পদেসেনেককেতহিং;

নেত্ৱা মাসত্তযং গঞ্ছি, পুলত্থিনগৰং পুন.

৪. ৱিস্সুতো আদিমলয-নামেন বলনাযকো;

উজুপচ্চত্থিকো হুত্ৱা, মহীপালস্স সব্বসো.

৫. গঙ্গা মত্থযু’পাগঞ্ছি, বলং সব্বং সমাদিয;

অন্দূতি ৱিস্সুতং মন্দ-পঞ্ঞো গামং পুৰন্তিকে.

৬. লংকিস্সৰো তহিং গন্ত্ৱা, উদ্ধৰিত্ৱা তমুদ্ধতং;

পুলত্থিনগৰং গঞ্ছি, ৱসে ৱত্তিয তং বলং.

৭. যুৱৰাজপদংযেৱ, সিতো সন্তো লিখাপযি;

সো সত্তৰসৱস্সানি, সপ্পঞ্ঞো নৰসত্তমো.

৮. ততো’নুৰাধনগৰ-মভিগম্ম যথাৱিধিং;

অনুভোত্ৱা ৱিধানঞ্ঞূ, অভিসেকমহুস্সৱং.

৯. অট্ঠিতো পাপধম্মেসু, সুট্ঠিতো সেট্ঠকম্মনি;

সো অট্ঠাৰসমং ৱস্সং, লিখাপযি সুসণ্ঠিতো.

১০. ততো আগম্ম নিৱসি, পুলত্থিনগৰে ৱৰে;

সো সিৰীসঙ্ঘবোধী’তি, নামধেয্যেন ৱিস্সুতো.

১১. অনুজং সো ৱীৰবাহু-মোপৰজ্জে নিৱেসিয;

দত্ৱান দক্খিণং দেসং, তং সঙ্গণ্হি যথাৱিধিং.

১২. কণিট্ঠস্সাথ ভাতুস্স, জযবাহুস্স ভূভুজো;

আদিপাদপদং দত্ৱা, ৰট্ঠং চা’দাসি ৰোহণং.

১৩. ঠানন্তৰানি সব্বেস-মমচ্চানং যথাৰহং;

দত্ৱা ৰজ্জে যথাঞাযং, কৰং যোজেসি গণ্হিতুং.

১৪. চিৰস্সং পৰিহীনং সো, দযাৱাসো মহীপতি;

পৱত্তেসি যথাধম্মং, ঠিতধম্মো ৱিনিচ্ছযং.

১৫. এৱং সমুদ্ধটানেক, ৰিপুকণ্টকসঞ্চযে;

নিচ্চং ৰজ্জং পসাসেন্তে, লঙ্কংসম্মানৰিস্সৰে.

১৬. ছত্তগ্গাহকনাথো চ, ধম্মগেহকনাযকো;

তথেৱ সেট্ঠিনাথো চ, ইচ্চেতে ভাতৰো তযো.

১৭. ৰঞ্ঞো ৱিৰোধিতং যাতা, ফলাতা জম্পুদীপকং;

লঙ্কং ৱীসতিমে ৱস্সে, একেনূনে সমোতৰুং.

১৮. তে সব্বে ৰোহণং ৰট্ঠং, সব্বং মলযমণ্ডলং;

সব্বং দক্খিণপস্সঞ্চ, সহসা পৰিৱত্তযুং.

১৯. নিপুণো ৰোহণং গন্ত্ৱা, তথা মলযমণ্ডলং;

নিঘাতেন্তো বহূ তত্থ, তত্থ পচ্চত্থিকে জনে.

২০. সম্মাৱুপসমেত্ৱা তং, ঠপেত্ৱা সচিৱে তহিং;

দক্খিণো দক্খিণং দেসং, সযং গন্ত্ৱা মহব্বলো.

২১. পেসেত্ৱা সমণীভাতু-ৱংসজং সচিৱং তদা;

গাহেত্ৱা সমৰেঘোৰে, ৱীৰো তে সকৱেৰিনো.

২২. সমাৰোপিযসূলম্হি, লঙ্কং ৱিগতকণ্টকং;

কাৰেত্ৱান নিৰাতঙ্কং, পুলত্থিপুৰমাগমি.

২৩. ৱসন্তী চোড়ৱিসযে, জগতিপালৰাজিনী;

চোড়হত্থা পমুঞ্চিত্ৱা, সদ্ধিং ধীতু কুমাৰিযা.

২৪. লীলাৱত্যাভিধানায, নাৱামাৰুয্হ ৱেগসা;

লংকাদীপম্হি ওতিণ্ণা, পস্সি লংকিস্সৰং তদা.

২৫. সুত্ৱা ৱংসক্কমং তস্সা, সো ঞত্ৱা সুদ্ধৱংসতং;

লীলাৱতিং মহিসিত্তে, অভিসিঞ্চি নৰিস্সৰো.

২৬. সা তং পটিচ্চ ৰাজানং, মহেসী ধীতৰং লভি;

নামং যসোধৰাতি’স্সা, অকাসি ধৰণী পতি.

২৭. মেৰুকন্দৰৰট্ঠেন, সদ্ধিং ৰাজা সধীতৰং;

ৱীৰৱম্মস্স পাদাসি, সা লভি ধীতৰো দুৱে.

২৮. সমাননামিকা জেট্ঠা, সা মাতা মহিযা অহু;

সুগলা নামিকা আসি, তাসু দ্ৱীসু কণিট্ঠিকা.

২৯. কালিঙ্গধৰণীপাল-ৱংসজং চাৰুদস্সনং;

তিলোকসুন্দৰং নাম, সুকুমাৰং কুমাৰিকং.

৩০. কালিঙ্গৰট্ঠতো ৰাজা, আণাপেত্ৱা চিৰট্ঠিতিং;

নিজৱংসস্স ইচ্ছন্তো, মহেসিত্তে’ভি সেচযি.

৩১. সুভদ্দা চ সুমিত্তা চ, লোকনাথৱ্হযাপি চ;

ৰতনাৱলী ৰূপৱতী, ইতিমা পঞ্চ ধীতৰো.

৩২. পুত্তং ৱিক্কমবাহুঞ্চ, সা লভী ধঞ্ঞলক্খণং;

সম্পত্তা সা পজৱুদ্ধিং, হৰন্তি ৰাজিনো মতং.

৩৩. ইত্থাগাৰেসু সেসেসু, ৱীতা সমকুলঙ্গনা;

গব্ভো জাতুমহীপালং, তং পটিচ্চ ন সণ্ঠহি.

৩৪. অথেকদিৱসং ৰাজা, অমচ্চগণমজ্ঝগো;

পিলোকিযঠিভা সব্বা, ধীতৰো পটিপাটিযা.

৩৫. ধীতু নৱমৱসেসানং, ঠপেত্ৱা ৰতনাৱলিং;

ধঞ্ঞলক্খণসম্পন্ন-পুত্তস্সুপ্পত্তিসুচকং.

৩৬. লক্খণং লক্খণঞ্ঞূ সো, অপস্সং পেমচেগৱা;

ৰতনাৱলিমাহূয, তস্সা মুদ্ধনি চুম্বিয.

৩৭. তেজোগুণেহি চাগেহি, ধিযা সূৰত্তনেন চ;

ভূতে চ ভাৱিনো চেৱ, সব্বে ভূপে’তিসাযিনো.

৩৮. নিচ্চং লঙ্কং নিৰাসঙ্ক-মেকচ্ছত্তকমেৱ চ;

পৱিধাতুং সমত্থস্স, সম্মাসাসনতাযিনো.

৩৯. সোভনানেকৱত্তস্স, ইমিস্সা কুচ্ছিহেস্সতি;

পুত্তস্সুপ্পত্তিঠানন্তি, মুদুতো সো সমব্ৰৱি.

৪০. যাৱন্তস্সাপিখোচোড়-মহীপালস্স নেকসো;

কুলাভিমানী ৰাজা সো, অদত্ৱান কণীযসিং.

৪১. আণাপেত্ৱা পণ্ডুৰাজং, ৱিসুদ্ধত্ৱযসম্ভৱং;

অনুজং ৰাজিনিং ৱস্স, মিত্তৱ্হযমদাসিসো.

৪২. সামাণভৰণং কিত্তি, সিৰী মেঘাভিধানকং;

সিৰিৱল্লভনামঞ্চ, জনেসি তনযে তযো.

৪৩. সুভদ্দ ৱীৰবাহুস্স, সুমিত্তং জযবাহুনো;

মহতা পৰিহাৰেন, পাদাসি ধৰণী পতি.

৪৪. অদাসি মাণাভৰণে, ধীতৰং ৰতনাৱলিং;

লোকনাথৱ্হযং কিত্তি সিৰিমেঘস্স’দাসিসো.

৪৫. ৰূপত্যভিধানায, ধীতুযো পৰতাযহি;

সৰীৰিৱল্লভসাদা, সুগলৱ্হ কুমাৰিকং.

৪৬. মধুকণ্ণৱভীমৰাজ, বলক্কাৰ সনামকে;

মহেসী বন্ধৱেৰাজ-পুত্তে সীহপুৰাগতে.

৪৭. পস্সিত্ৱান পহীপালো, তদা সঞ্জাতপীতিকো;

তেসং পাদাসি পচ্চেকং, ৱুত্তিং সো অনুৰূপকং.

৪৮. তে সব্বে লদ্ধসক্কাৰ সম্মানাধৰণীপতিং;

আৰাধযন্তা সসতং, নিৱসিংসু যথাৰুচিং.

৪৯. এতেসং ৰাজপুত্তানং, সুন্দৰিৱ্হং কণিট্ঠকং;

অদা ৱিক্কমবাহুস্স, নিজৱংসঠিতট্ঠিকো.

৫০. ভিয্যো ৱিক্কমবাহুস্স, ততো লীলাৱতিং সতিং;

সহ ভোগেন পাদাসি, তদা বন্ধু হিতেৰতো.

৫১. ৱিধায এৱং সজনে জনিন্দো;

নিস্সেসতো ভোগসমপ্পিতো;

দযাপৰো ঞাতিজনাতমত্থং;

সমাচৰী নীতিপথানুৰূপং.

সুজনপ্পসাদসংৱেগত্থায কতে মহাৱংসে

সংগহকৰণো নাম

সত্তপঞ্ঞাসতিমো পৰিচ্ছেদো