ছপঞ্ঞাসতিম পৰিচ্ছেদ

অনুৰাধপুৰাভিগমনো

১. যুৱৰাজপদে তস্স, ঠিতস্সা’থ নযঞ্ঞুনো;

অহূ ৱিজযবাহূতি, নামং সব্বত্থ পাকটং.

২. মহাঞ্ঞণো নিজাণায, তত্থ ভেৰিং চৰাৱিয;

ঠপেন্তো সচিৱে’নেকে, পতিৰূপে পদন্তৰে.

৩. চোড়ানং মদ্দনত্থায, ৰাজৰট্ঠাধিৱাসিনং;

চতুৰো চতুৰোপাযে, যো জযং তত্থ সো ৱসী.

৪. চোড়ৰাজা সুণিত্ৱা তং, পুড়ত্থিনগৰে ঠিতং;

সেনাপতিম পেসেসি, দত্ৱান বলৱাহনং.

৫. সেনিন্দং কাজৰগ্গাম-সমীপং সমুপাগতং;

দুপ্পসয্হং ৱিদিত্ৱান, গিৰিদুগ্গমগা ততো.

৬. সেনিন্দো কাজৰগ্গামং, ৱিলুম্পিত্ৱান ৱেগসা;

তত্থ ৱত্থুমসক্কোন্তো, সদেসং পুন ৰাগমি.

৭. ততো মহাদিপাদো’পি, আগম্ম মলযা লহুং;

মহতা বলকাযেন, সিপ্পত্থলকমাৱসি.

৮. ৰাজা ৰামঞ্ঞৱিসযে, ৰাজিনো সন্তিকং জনে;

পেসেসি বহুকেসাৰং, ধনজাতঞ্চ’নপ্পকং.

৯. ৱিচিত্তৱত্থকপ্পূৰ-চন্দনাদীহি ৱত্থূহি;

পৰিপুণ্ণা চ নাৱাযো, নেকাতিত্থে সমোসটা.

১০. ধনজা তেহি নেকেহি, কৰোন্তো ভটসঙ্গহং;

ততো তম্বলগামম্হি, নিৱসিত্থ মহব্বলো.

১১. অঞ্ঞমঞ্ঞৱিৰুদ্ধত্তা, ৰাজাৰট্ঠাধিৱাসিনো;

উপগ্গম্ম জনা সব্বে, কৰং নো দেন্তি সব্বসো.

১২. ৱিপক্খাচোড়ৰাজস্স, ভিন্দন্তা’ণং মদুদ্ধতা;

আযুত্তকে ৱিহিংসেন্তো, যথাকামং চৰন্তি চ.

১৩. তং সুত্ৱা চোড়ভূপালো, সম্পকোপৱসীকতো;

সেনং মহন্তিং দত্ৱান, পেসেসি সচিৱং নিজং.

১৪. মহাতিত্থে’ৱহিণ্ণো সো, তত্থ তত্থ বহূজনে;

ঘাতেন্তো সৱসে কত্ৱা, ৰাজাৰট্ঠাধিৱাসিনো.

১৫. অনুক্কমেন গন্ত্ৱান, খৰাণো ৰোহণং তদা;

অজ্ঝোত্থৰি সসেনো স, ভিন্নো ৱেলোৱসাগৰো.

১৬. ৰঞ্ঞো পচ্চত্থিকা হুত্ৱা, ৰৱিদেৱচলৱ্হযা;

উভো দমিড়সেনিন্দ-ৱসং যাতা মহব্বলা.

১৭. মহাপক্খবলোপেতে, তে পস্সিয চমূপতি;

ৰোহণং সকলং খিপ্পং, মঞ্ঞিত্থ সকহত্থগং.

১৮. একাদসম্হি সো ৱস্সে, ৰাজা চোড়াভিভূতিযা;

পলুট্ঠপব্বতে দুগ্গং, পৱিধায তহিং ৱসী.

১৯. চোড়সেনা তদাসেলং, সমন্তা সম্পৰিক্খিপি;

তত্থো’ভযেসং সেনান-মহূ ভিংসনকং ৰণং.

২০. ৰঞ্ঞো ভটা ৱিনাসেত্ৱা, সব্বং তং দমিড়ং বলং;

পলাযন্তং মহাচোড়-সামন্তঞ্চানুবন্ধিয.

২১. গহেত্ৱান সিৰং তস্স, গামস্মিং তম্বৱিট্ঠিকে

সদ্ধিং ৱাহনযানেহি, সাৰভূতধনেহি চ.

২২. তহিং তং সকলং ভণ্ডং, নেত্ৱা ৰঞ্ঞো পদস্সিয;

পুড়ত্থিনগৰং গন্তুং, কালো ইতি সমব্ৰৱুং.

২৩. মহীপালোপি তং সুত্ৱা, সচিৱানং ৱচো তদা;

মহতা বলকাযেন, পুলত্থিনগৰং গতো.

২৪. পৱত্তিমেতং সকলং, সুত্ৱা চোড়নৰিস্সৰো;

তিব্বকোপৱসংযাতো, ভূপালগহণত্থিকো.

২৫. সামং খিপ্পং সমাগম্ম, ৱীৰো সাগৰপট্টনং;

ভিয্যোপি মহতিং সেনং, লংকাদীপমপেসযী.

২৬. তং ৱিজানিয ভূমিন্দো, সেনিন্দং পেসযী সকং;

বলং মহন্তং দত্ৱান, চোড়সেনায যুজ্ঝিতুং.

২৭. গচ্ছমানো চমূনাথো, সো’নুৰাধপুৰন্তিকে;

সদ্ধিং দমিড়সেনায, ৱত্তেসি তুমুলং ৰণং.

২৮. পতিংসু তস্মিং সঙ্গামে, ভূপালস্স নৰা বহূ;

ভিয্যোপি দমিড়াযত্তা, জাতা তং ৰট্ঠৱাসিনো.

২৯. ৱিহায ধৰণীপালো, পুলত্থিনগৰং তদা;

ৱিল্লিকাবাণকং ৰট্ঠং, সম্পাপুণিয ৱেগসা.

৩০. নিহচ্চামচ্চযুগলং, তং ৰট্ঠাধিট্ঠিতং তদা;

তহিং ৱাসমকপ্পেসি, সভটে সন্নিপাতযং.

৩১. অত্তানমনুবন্ধন্তং, সুত্ৱা চোড়চমূপতিং;

গন্ত্ৱা ৱাতগিৰিং নাম, সমযঞ্ঞূ সিলুচ্চযং.

৩২. উপচ্চকায সেলস্স, তত্থ দুগ্গং নিৱেসিয;

ৰণং কৰোন্তো তেমাসং, দমিড়ে পটিবাহযি.

৩৩. কেসধাতুকনাথস্স, মাৰিতস্স পুৰাৰণে;

ভাতা কণিট্ঠো সম্পত্ত, মহাপক্খবলো তদা.

৩৪. মাৰণং সকভাতুস্স, সৰন্তো ৰুট্ঠমানসো;

সকলং পৰিৱত্তেসি, গুত্তহালকমণ্ডলং.

৩৫. অথো লংকিস্সৰো তত্থ, খিপ্পং গন্ত্ৱা মহব্বলো;

ঠানে মচ্চুত্থলে নাম, খন্ধাৱাৰং নিবন্ধিয.

৩৬. খদিৰঙ্গণিদুগ্গম্হা, পলাপেত্ৱান তং ৰণে;

ঠানা কুবুলগল্লা চ, যুজ্ঝন্তো তং পলাপযি.

৩৭. ৱিহায পুত্তদাৰাদি-সব্বং নেকধনং বলং;

পলাযমানো সো ৰট্ঠং, চোড়াযত্ত মগালহুং.

৩৮. তদা নৰিস্সৰো তত, তস্স সব্বং সমাদিয;

গন্ত্ৱা তম্বলগামম্হি, নৱং দুগ্গং নিৱেসিয.

৩৯. অনুক্কমেন গন্ত্ৱান, মহানাগহুলৱ্হযে;

পুৰেৱসী সুসজ্জেন্তো, বলং চোড়েহি যুজ্ঝিতুং.

৪০. ততো ৰাজা সমৱ্হায, সচীৱে দ্ৱে মহব্বলে;

পেসেসি দিক্খিণং পস্সং, ৱসং নেতুং তহিং জনে.

৪১. সম্পেসেসি মহামচ্চ-যুগলং কক্খলং ৱিভূ;

চোড়দপ্পৱিনাসায, ততো ৱেলা মহাপথে.

৪২. পেসিতা দক্খিণং পস্সং, অমচ্চা’মে মহব্বলা;

মুহুন্নৰুগ্গমদুগ্গং, বদড়ত্থলমেৱ চ.

৪৩. ৱাপীনগৰদুগ্গঞ্চ, বুদ্ধগামকমেৱ চ;

তিলগুল্লং মহাগল্লং, মণ্ডগল্লকমেৱ চ.

৪৪. অনুৰাধপুৰঞ্চাতি, গহেত্ৱান কমেন তে;

ৱত্তেন্তা সৱসে ৰট্ঠং, মহাতিত্থমুপাগতা.

৪৫. পেসিতা সচিৱাদ্ৱেতু, ততো ৱেলা মহাপথে;

ৱিলুম্পন্তা ছগামাদি-খন্ধাৱাৰে তহিং তহিং.

৪৬. পুলত্থিনগৰাসন্নং, কমেনা’গম্ম পেসযুং;

দূতে ৰাজন্তিকখিপ্প-মাগন্তুং ৱট্টতীতিহ.

৪৭. দিসাসা দ্ৱীসু যানেহি, সচিৱেহি পৱত্তিতং;

ৱিক্কমাতি সযং সুত্ৱা, কালঞ্ঞূ সো মহীপহি.

৪৮. সীঘং সন্নয্হ সেনঙ্গং, সমগ্গং ৱিদিকোৱিদো;

উম্মূলনাযচোড়ানং, পুৰাতম্হা’ভিনিক্খমি.

৪৯. গচ্ছং গঙ্গায মহিয-ঙ্গণথূপন্তিকে ৱিভূ;

সেনানিৱেসং কাৰেত্ৱা কঞ্চিকালং তহিং ৱসী.

৫০. কমেনাগম্ম ঠানঞ্ঞূ, পুড়ত্থিনগৰন্তিকে;

বন্ধাপেসি মহাৱীৰো, খন্ধাৱাৰং থিৰং ৱৰং.

৫১. তত্থ তত্থ ঠিতা সূৰা, চোড়া যে কক্খলা’খিলা;

পুলত্থিনগৰে যুদ্ধং, কাতুং সন্নিপতিংসু তে.

৫২. নিক্খম্ম নগৰা গন্ত্ৱা, চোড়া বহি মহাৰণং;

কত্ৱা পৰাজিতা ভীতা, পৱিস্স নগৰং সকং.

৫৩. গুত্তা সেসপুৰদ্ৱাৰা, গোপুৰট্টালনিস্সিতা;

মহাহৱং বহুস্সাহা, পৱত্তেসুং ভযাৱহং.

৫৪. দিযড্ঢমাসং যুজ্ঝন্তি, নগৰং তমুপৰুন্ধিয;

সাধেতুং নেৱসা’সক্খি, ভূপালস্স মহাচমূ.

৫৫. মহাৰঞ্ঞো মহাৱীৰা, মহাসূৰা মহব্বলা;

মহাভটা মহামানা, ৰৱিদেৱচলাদযো.

৫৬. উল্লঙ্ঘিত্ৱান পাকাৰং, পৱিস্স সহসা পুৰং;

খণেন দমিড়ে সব্বে, মূলঘচ্চমঘাতযুং.

৫৭. এৱং লদ্ধজযো ৰাজা, তদা ৱিজযবাহুসো;

চৰাপেসি নিজাণায, ভেৰিং ভূৰিমতিপুৰে.

৫৮. তং সুত্ৱা সকসেনায, ৱিনাসং চোড়ভূপতি;

সীহড়া বলৱন্তোতি, ভিয্যো সেনং ন পাহিণি.

৫৯. ৱীৰো অসেসনিহতুদ্ধট চোড়সেট্ঠো;

ৱিঞ্ঞূ সুসাধুট্ঠপিতাখিলৰাজৰট্ঠো;

ইট্ঠন্নুৰাধপুৰসেট্ঠমতীৱ হট্ঠো;

ৱস্সম্হি পঞ্চদসমে গমি ৰাজসেট্ঠো.

সুজনপ্পসাদসংৱেগত্থায কতে মহাৱংসে

অনুৰাধপুৰাভিগমনো নাম

ছপ্পঞ্ঞাসতিমো পৰিচ্ছেদো