পঞ্চপঞ্ঞাসতিম পৰিচ্ছেদ

ৰোহণাৰাতি ৱিজযোনাম

১. লোকনামো চমূনাথো, মক্খকুদ্ৰূসৱাসিকো;

সচ্চপটিঞ্ঞো ধীতিমা, চোড়দপ্পৱিঘাতনো.

২. অভিভূয জনে পত্ৱা, ৰজ্জং ৰোহণমণ্ডলে;

ৱসী কাজৰগামম্হি, চাৰিত্তৱিধিকোৱিদো.

৩. অহু তদা কিত্তিনামো, ৰাজপুত্তো মহব্বলো;

তস্স ৱংসাদিসম্পত্তী, নুপুব্বেন পৱুচ্চতে.

৪. সুতো কস্সপভূপস্স, মাণনামেন ৱিস্সুতো;

আদিপাদো অহু ধীৰো, সদাচাৰৱিভূসিতো.

৫. তস্সা’থ জেট্ঠকো ভাতা, মাণৱম্মো মহামতি;

গোকণ্ণকসমীপট্ঠ-নদীতীৰে নিসীদিয.

৬. কতমন্তুপচাৰো সো, যথাৱিধিমসেসতো;

অক্খমালং গহেত্ৱান, মন্তং জপ্পিতুমাৰভি.

৭. কুমাৰো কিৰ ভত্তগ্গে, পাতুৰাসি সৱাহনো;

সিখণ্ডি মুখতুণ্ডেন, বলিপট্টং ৱিখণ্ডিয.

৮. সচ্ছিদ্দকে নাড়িকেৰ-কপালে ৱিচ্চুনোদকে;

লূখে জলমপস্সন্তো, জপন্তস্স মুখংগতো.

৯. ততো ভাৱিনিং সিদ্ধি, মপেক্খং নযনং সকং;

তস্সোপনেসি, নিব্ভিজ্জ, সোপি তং সহসাপিচি.

১০. কুমাৰো তস্স সন্তুট্ঠো, কুমাৰস্সাভিপত্থিতং;

ৱৰং পদায নভসা, ৰাজমানো গতো ততো.

১১. ভিন্নেকনযনং দিস্ৱা, সচিৱাতং পৰো দিসুং;

ৱৰলাভং পকাসেত্ৱা, সমস্সাসেসি সো জনে.

১২. ততো সো সচিৱাতস্স, সন্তুট্ঠাৰাধযিংসু তং;

অনুৰাধপুৰং পত্ৱা, ভিসেকো কাৰিযো ইতি.

১৩. অত্থো কো মমৰজ্জেন, ৱিকলঙ্গস্স সম্পতি;

তপোকম্মং কৰিস্সামি, পব্বজ্জমুপগম্মহং.

১৪. কণিট্ঠো মাণনামো চ, লঙ্কাৰজ্জং কমাগতং;

পালেতু ইতি সো ৰজ্জং, সম্পত্তং সম্পটিক্খিপি.

১৫. ৱিঞ্ঞাতচিত্তসঞ্চাৰা, সচিৱা তস্স সব্বথা;

ৱত্তুমেতং কণিট্ঠস্স, পেসেসুং পুৰিসে তদা.

১৬. সুত্ৱা তং সীঘমাগম্ম, পস্সিত্ৱা সকভাতৰং;

পতিত্ৱা পাদমূলম্হি, বহুং কন্দিয ৰোদিয.

১৭. জেট্ঠেন ভাতৰা সদ্ধি-মনুৰাধপুৰং গতো;

মকুটং তত্থ ধাৰেসি, জেট্ঠচিত্তানুৱত্তকো.

১৮. ততো’ভযগিৰিং গন্ত্ৱা, পব্বজ্জং সকভাতুনো;

যত যো তত্থ যাচিত্থ, বহুমানপুৰস্সৰং.

১৯. ততো তে যতযো তস্স, পব্বজ্জমুপসম্পদং;

অকংসু ৱিকলঙ্গস্স, সিক্খাপদনিৰাদৰা.

২০. পৰিৱেণমুত্তৰোড়-মুড়াৰং তস্স কাৰিয;

কত্ৱা তং পৰিৱেণস্স, সামিকং ধৰণী পতি.

২১. ভিক্খূনং ছসতং তত্থ, ৱিধায তদধীনকং;

পৰিহাৰে অদা তস্স, পেস্সৱগ্গে চ পঞ্চ সো.

২২. সমপ্পেসি চ সো নানা-সিপ্পকম্মৱিচক্খণে;

জনে চাকা তদাযত্তে, সো দাঠাধাতুৰক্খিযে.

২৩. তস্সেৱাদকৰা’হেসুং, ভিক্খূ’ভযগিৰিম্হি তে;

ৰাজা চ লোকং পালেসি, সম্মা তস্সানুসিট্ঠিযা.

২৪. জনা তব্বংসজা কেচি, তং ৰজ্জনিৰপেক্খকা;

নিৱসিংসু যথাকামং, মহাসামি পদংসিতা.

২৫. এতস্স মাণৱম্মস্স, ৰঞ্ঞো ধম্মনযঞ্ঞুনো;

অগ্গবোধিকুমাৰাদি-পুত্তনত্তুক্কমাগতে.

২৬. ৱংসে ৱিসুদ্ধে জাতস্স, ভূপালন্ৱযমুদ্ধনি;

সমাসোড়সকঙ্কাযং, সম্মা ৰজ্জানুসাসিনো.

২৭. মহীপস্স মহিন্দস্স, দুৱে মাকুলধীতৰো;

দেৱলা লোকিকা চাতি, নামতো ৱিস্সুতা সুভা.

২৮. এতাসু দ্ৱীসু ধীতাসু, লোকিকা মাতুলত্তজং;

পটিচ্চ ৰাজতনযং, সুভং কস্সপনামকং.

২৯. সা মোগ্গল্লান লোকৱ্হে, পুত্তে দ্ৱে লভি সোভনে;

তেসু জেট্ঠসুতো লোক-সাসনাধাৰকোৱিদো.

৩০. মহাসামীতি পঞ্ঞাতো, সঙ্ঘুপাসনপালযো;

নেকসাৰগুণাৱাসো, ৱাসং কপ্পেসি ৰোহণে.

৩১. দাঠোপতিস্স ৰাজস্স, নত্তা সুগতসাসনে;

পব্বজ্জূপগতো সদ্ধো, ধুতৱা সীলসংৱুতো.

৩২. পহিতত্তো ৱিচিত্তোসো, পন্তসেনাসনে ৱসী;

গুণং সব্বত্থ ৱণ্ণেসুং, তস্মিং দেৱা পসীদিয.

৩৩. গুণং সুণিত্ৱা লংকিন্দো, তদা সব্বত্থ পত্থটং;

উপসঙ্কম্ম তং নত্ৱা, কাতুমত্তানুসাসনং.

৩৪. আৰাধযমনিচ্ছন্তং, যাচিত্ৱান পুনপ্পুনং;

আনীয ৱাসযিত্ৱা তং, পাসাদে সাধুকাৰিতে.

৩৫. যতিস্সৰস্স ৱসতো, কত্থ ৰাজাগুণপ্পিযো;

তস্সানুসিট্ঠিমগ্গট্ঠো, লোকং ধম্মেন পালযি.

৩৬. উদ্দিস্সাৰাধনং সম্মা, লংকিন্দেন কতং তদা;

সেলন্তৰাভিনিক্খম্ম, যতিন্দো সো দযানুগো.

৩৭. যতো ভিক্খূ সমূহেত্ৱা, ৱাসং কপ্পেসি যত্থ সো;

সেলন্তৰসমূহো’তি, ৱিক্খ্যাতিং সো ততো গতো.

৩৮. ততো পট্ঠায ৱাসেত্ৱা, ৰত্তিযং দেৱপল্লিযং;

দেৱতানুমতং ভিক্খুং, মূলঠানে ঠপেন্তি হি.

৩৯. মূলত্তমাৱসন্তানং, যতীনমনুসাসনা;

লংকিস্সৰা পৱত্তন্তি, পালেন্তা লোকসাসনং.

৪০. তস্স দাঠোপতিস্সস্স, ৱংসজং ৰাজপুত্তকং;

বোধিং পটিচ্চ তব্বংসা, বুদ্ধনামা কুমাৰিকা.

৪১. অলত্থ লোকিতং নাম, ধীতৰং ৱৰলক্খণং;

কালেন সা পদিন্না’সি, মোগ্গল্লানস্স ধীমতো.

৪২. সা তং পটিচ্চ কিত্তিঞ্চ, মিত্তং নাম কুমাৰিকং;

মহিন্দং ৰক্খিতং চাপি, লতিত্থ চতুৰো পজা.

৪৩. অহু জেট্ঠসুতো ধীৰো, ৱীৰো তেৰসৱস্সিকো;

কতহত্থো ৱিসেসেন, ধনুসিপ্পম্হি সো ততো.

৪৪. কথং লঙ্কং গহেস্সামি, দূৰেত্ৱা’ৰাতি কণ্টকং;

ইতি চিন্তাপৰোগামে, মূলসালৱ্হযে ৱসী.

৪৫. একো মহাবলো ৱীৰো, বুদ্ধৰাজোতি ৱিস্সুতো;

ৱিলোমৱত্তী হুত্ৱান, লোকসেনানিনো তদা.

৪৬. পলাতো চুণ্ণসালৱ্হং, খিপ্পং জনপদং তহিং;

কিত্তাদিকে জনে নেকে, ৱসে ৱত্তিয সব্বথা.

৪৭. সদ্ধিং বন্ধূহি সঙ্গাম-সূৰেহি বহুকেহি সো;

মলযাচলপাদেসু, ৱসী দুপ্পসহো তদা.

৪৮. তস্স’ন্তিকমুপাগম্ম, সংৱচ্ছৰিকনাযকো;

সঙ্ঘো নাম কুমাৰস্স, সৰূপং সাধুৱং ব্ৰৱি.

৪৯. মহাসামিস্স তনযো, জেট্ঠো কিত্তি সনামকো;

ধঞ্ঞলক্খণসম্পন্নো, সম্পন্নমতিৱিক্কমো.

৫০. জম্বুদীপেপি তং ৰজ্জং, কত্তুমেকাতপত্তকং;

সমত্থোতি ৱিচিন্তেপি, লঙ্কাদীপম্হি কা কথা.

৫১. তস্স সো ৱচনং সুত্ৱা, সেৱিতব্বো কুমাৰকো;

ইতি নিচ্ছিয পেসেসি, কুমাৰস্স’ন্তিকং জনে.

৫২. সুণিত্ৱা সো ৱচো তেসং, নিৱত্তনভযা ৱিভূ;

অজানহং পিতুন্নং সো, ৱীৰো ধনুসহাযকো.

৫৩. গেহা নিক্খম্ম পস্সন্তো, সুনিমিত্তানিনেকধা;

অগালহুং সৰীৱগ্গ-পিট্ঠিগামং মহামতি.

৫৪. তহিং সো নিৱসং ৱীৰো, পেসযিত্ৱা সসেৱকে;

ৱিপক্খাধিট্ঠিতং জেসি, বোধিৱালৱ্হগামকং.

৫৫. ততো’ভিমানী সেনানী, সেনং সো তত্থ পেসযি;

সা পৰিক্খিপতং গামং, সঙ্গামায সমাৰভী.

৫৬. কুমাৰো তেহি যুজ্ঝন্তো, সুভটো পটুৱিক্কমো;

দিসাসু ৱিকিৰীসব্বে, তুলং চণ্ডোৱ মাড়ুতো.

৫৭. চুণ্ণসালং জনপদং, গন্ত্ৱা ঠানৱিদূ তদা;

তহিং ৱসং ৱসেকাসি, সব্বং মলযমণ্ডলং.

৫৮. তদাপি সেনং সেনিন্দো, পেসেত্ৱা অসকিং সকং;

অভিভূতিমসক্কোন্তো, কাতুং দুম্মনতং গতো.

৫৯. মক্খকুদ্ৰুসৱাসিস্স, সচিপস্সাথ কিত্তিনো;

সুতো মহব্বলো দেৱ-মল্লোতি ৱিদিতো তদা.

৬০. সহিতো বন্ধুমিত্তেহি, বহূ ৰোহণৱাসিনো;

সমাদাযা’ভিগন্ত্ৱান, কুমাৰং পস্সি সাদৰো.

৬১. বন্ধিয ছুৰিকং ছেকো, সো পন্নৰসৱস্সিকো;

আদিপাদপদং তত্থ, সম্পাপুণি মহাযসো.

৬২. ততো হিৰঞ্ঞমলয, মুপাগম্ম মহব্বলো;

তহিং ৰেমুণসেলম্হি, খন্ধাৱাৰং নিবন্ধযি.

৬৩. তত্থাপি সেনং পেসেত্ৱা, সঙ্গামেন্তো চমূপতি;

অলদ্ধৱিজযো ছন্দং, পুনযুদ্ধে জহিততো.

৬৪. লোকনামো চমূনাথো, লোকং হিত্ৱা সকং তদা;

অহু ৱস্সম্হি ছট্ঠেসো, পৰলোকপৰাযনো.

৬৫. তদা কস্সপনামেকো, কেসধাতুকনাযকো;

জনে’ভিভূযৱত্তেসি, নীজাণং ৰোহণে তদা.

৬৬. সুত্ৱা তং চোড়সামন্তো, পুড়ত্থিনগৰা তদা;

নিক্খম্ম যুদ্ধসনদ্ধো, গন্ত্ৱা কাজৰগামকং.

৬৭. কেসাধাতু ততো যুদ্ধে, ভিন্দিত্ৱা দমিড়ং বলং;

ৰক্খপাসাণসীমাযং, ঠপেত্ৱা ৰক্খিযে জনে.

৬৮. পটিলদ্ধজযুদ্দামো, মহাসেনা পুৰক্খতো;

পুনৰাগম্ম পাৱেক্খি, ৱীৰো কাজৰগামকং.

৬৯. তদাদিপাদো সুত্ৱান, সব্বং সুত্থীৰধাতুকো;

কেসধাতুং নিঘাতেতুং, বলং সন্নয্হি ৱেগসা.

৭০. পৱত্তিং তং সুণিত্ৱা সো, সাভিমানো ভুসংততো;

সমত্তং বলমাদায, সিপ্পত্থলকমাগমা.

৭১. পঞ্চযোজনৰট্ঠাদি-ৱাসিকেসু বহূজনে;

সমাদায সমাসন্নে, ৰাজপুত্তে সুদুজ্জযে.

৭২. ৱিৰত্ততঞ্চ সো ঞত্ৱা, বহুন্নং ৰট্ঠৱাসিনং;

দুক্কৰং এত্থ যুদ্ধন্তি, গতো সো খদিৰঙ্গণিং.

৭৩. মহাসেনায ভূপাল সুতো সোড়সৱস্সীকো;

খিপ্পং ৱাপেক্খি সো ৱীত-দৰো কাজৰগামকং.

৭৪. ছম্মাসমনুভোত্ৱান, ৰোহণং ৰুট্ঠমানসো;

কেসধাতুকনাথোপি, সঙ্গামত্থায তত্থগা.