চতুপঞ্ঞাসতিম পৰিচ্ছেদ

ছ ৰাজকোনাম

১. কত্ৱা ৱিক্কম্ম বাহূ’তি, নাম ভূপালসূনুতো;

তস্সাণায পৱত্তিংসু, সাদৰং সীহড়া খিলা.

২. সো ৰাজা দমিড়ে হন্তুং, ধনং সঞ্চিয’নেকাধা;

সঙ্গহং সেৱকানঞ্চ, কুৰুমানো যথোচিতং.

৩. অলঙ্কাৰকিৰীটানি, ছত্তসীহাসনানি চ;

কাৰযিত্ৱা’ভিসেকত্থং, সচিৱেহা’ভিযাচিতো.

৪. ন যাৱ ৰাজৰট্ঠস্স, গহণং হোতি তাৱ মে;

ছত্তুস্সাপনকম্মেন, কিং তেনা’তি ৱিৱাৰিয.

৫. সতং নৰসহস্সানং, সঙ্কলেত্ৱা মহব্বলো;

সঙ্গামাৰব্ভ কালম্হি, ৱাতৰোগাভিপীড়িতো.

৬. যুজ্ঝিতুং সমযো নেতি, দ্ৱাদসে ৱচ্ছৰে লহুং;

উপেচ্চ দেৱনগৰং, গঞ্ছিদেৱসহব্যতং.

৭. কিত্তিনামো চ সচিৱো, সেনাপচ্চমধিট্ঠিতো;

ৰজ্জত্থিকো দিনানট্ঠ, নিজাণং সম্পৱত্তযি.

৮. ঘাতেত্ৱা তং মহালান-কিত্তিনামো মহব্বলো;

পত্ৱা’ভিসেকং ভুঞ্জন্তো, দেসং তং ৰোহণৱ্হযং.

৯. সংৱচ্ছৰম্হি ততিযে, চোড়যুদ্ধে পৰাজিতো;

সহত্থেন সকং সীসং, ছিন্দিত্ৱা সহসা মৰি.

১০. তদাপিতে কিৰীটাদি-ধনসাৰং সমাদিয;

পেসেসুং দমিড়া চোড়-মহীপালস্স সন্তিকং.

১১. ভযা সৰট্ঠং হিত্ৱা’থ, দুট্ঠদেসে ৱসং তদা;

একো ৱিক্কমপণ্ডূতি, ৱিস্সুতো পত্থিৱত্তজো.

১২. ৱিঞ্ঞাতলঙ্কাৱুত্তন্তো, দেসমাগম্ম ৰোহণং;

কাড়তিত্থে ৱসং ৱস্স-মেকং ৰজ্জমকাৰযি.

১৩. ৰামন্ৱযসমুব্ভূতো, তদাযুজ্ঝ পুৰাগতো;

জগতী পালনামেন, ৱিস্সুতো ভূভুজত্তজো.

১৪. ৰণে ৱিক্কমপণ্ডুতং, ঘাতাপেত্ৱা মহব্বলো;

ততো চত্তাৰি ৱস্সানি, ৰজ্জং কাৰেসি ৰোহণে.

১৫. তম্পি চোড়াৰণে হন্ত্ৱা, মহেসিং ধীতৰা সহ;

ৱিত্তসাৰঞ্চ সাকলং, চোড়ৰট্ঠমপেসযুং.

১৬. ৰাজা পৰক্কমো নাম, পণ্ডুৰাজসুতো ততো;

অকা ৱস্সদ্ৱযং চোড়া, ঘাতেসুং তম্পি যুজ্ঝিয.

১৭. ইমে ভুসং লোভবলাভিভূতা,

গতা অসেসা ৱিৱসা ৱিনাসং;

ইচ্চেৱমঞ্ঞায সদা সপঞ্ঞো,

তণ্হক্খযেযেৱ ৰতিং কৰেয্য.

সুজনপ্পসাদসংৱেগত্থায কতে মহাৱংসে

ছ ৰাজকো নাম

চতুপঞ্ঞাসতিমো পৰিচ্ছেদো.