তিৱঞ্ঞাসতিম পচ্ছেদ

লংকাৱিলোপোনাম

১. মহিন্দো তং কণিট্ঠো সো, ৰাজপুত্তো তদচ্চযে;

উস্সাপিয সেতচ্ছত্ত-মনুৰাধপুৰে ৱৰে.

২. সেন সেনানীনা’নীত দেসন্তৰজনা কুলে;

তত্থ ৱাসমকপ্পেসি, কিচ্ছেন দসৱচ্ছৰে.

৩. অপেতনীতি মগ্গস্স, মুদুভূতস্স সব্বসো;

উপ্পাদভাগং নাদংসু, তস্স জানপদা তদা.

৪. অচ্চন্তং খীণচিত্তো সো, ৱস্সম্হি দসমে ৱিভূ;

ৱুত্তিদানেন নাসক্খি, সঙ্গহেতুং সকং বলং.

৫. অলদ্ধ ৱুত্তিনো সব্বে, কেৰড়া সহিতা ততো;

ন ৱুত্তিদানং নো যাৱ, হোতি মাতাৱ ভুঞ্জতু.

৬. ইতি ৰাজঘৰদ্ৱাৰে, সাহসেকৰসা ভুসং;

চাপহতা নিসীদিংসু, সন্নদ্ধছুৰিকাযুধা.

৭. হত্থসাৰং সমাদায, তে ৱিৱঞ্চিয ভূপতি;

উম্মগ্গতো ৱিনিগ্গম্ম, তুৰিতো ৰোহণং অগা.

৮. সীদুপব্বতগামম্হি, খন্ধৱাৰং নিবন্ধিয;

ভাতু জাযম্ম হেসিত্তে, ঠপেত্ৱা সো তহিং ৱসী.

৯. ন চিৰস্সেৱ তস্সায, মতা যসমহীপতি;

মহেসিত্তে নিৱেসেসি, সকভাতুস্স ধীতৰং.

১০. দেৱিযা তায সঞ্জাতে, সুতে কস্সপনামকে;

অজ্ঝাৱুত্তং ৱিহাযা’থ, খন্ধাৱাৰং মহীমতি.

১১. কাৰযিত্ৱান নগৰং, কপ্পগল্লকগামকে;

অধিপচ্চং পৱত্তেন্তো, ৰোহণে সুচিৰং ৱসী.

১২. ততো সেসেসু ঠানেসু, কেৰড়া সীহড়া তদা;

কণ্ণাটা চ যথাকাম-মাধিপচ্চং পৱত্তযুং.

১৩. অথস্স ৱাণিজো একো, পৰতীৰং ইধাগতো;

গন্ত্ৱা পৱত্তিং লংকায, চোড়ৰঞ্ঞো নিৱেদযি.

১৪. সোতং সুণিত্ৱা পেসেসি, লংকাগহণমানসো;

বলং মহন্তং বলৱা, তং খিপ্পং লংকমোতৰি.

১৫. পট্ঠাযো তিণ্ণঠানম্হা, ৱিহেঠেন্তং বহূ জনে;

অনুক্কমেন তং চোড়-বলং ৰোহণমজ্ঝগা.

১৬. ছত্তিংসে ৰাজিনো ৱস্সে, মহেসিং ৰতনানি চ;

মকুটঞ্চ কমাযাতং, সব্বমাভৰণং তথা.

১৭. অমূলিকঞ্চৱজিৰ-ৱলযং দেৱদত্তিযং;

অচ্ছেজ্জচ্ছুৰিকং ছিন্ন-পট্টিকা ধাতুকঞ্চ তে.

১৮. পৱিট্ঠং ৱনদুগ্গম্হি, ভযাতঞ্চ মহীপতিং;

জীৱগ্গাহমগণ্হিংসু, সন্ধিলেসম্পদস্সিয.

১৯. মহীপালং ধনং তঞ্চ, সব্বং হত্থগতং ততো;

পেসযিংসু লহুং চোড়-মহীপালস্স সন্তিকং.

২০. নিকাযত্তিতযে ধাতু-গব্ভে লংকাতলে খিলে;

মহাৰহে সুৱণ্ণাদি-পটিবিম্বে চ’নপ্পকে.

২১. ভিন্দিত্ৱা সহসা সব্বে, ৱিহাৰে চ তহিং তহিং;

যথো জোহাৰিনো যক্খা, লঙ্কাযং সাৰমগ্গহুং.

২২. তে চোড়া ৰাজৰট্ঠং তং, পুলত্থিপুৰনিস্সিতা;

ৰক্খপাসাণকণ্ডৱ্হ, ঠানাৱধিমভুঞ্জিসুং.

২৩. তং কুমাৰকমাদায, কস্সপং ৰট্ঠৱাসিনো;

ৱড্ঢেন্তি চোড়ভযতো, গোপযন্তা সুসাদৰা.

২৪. চোড়ৰাজা কুমাৰং তং, সুত্ৱা দ্ৱাদসৱস্সিকং;

গহণত্থায পেসেসি, মহামচ্চে মহাবলে.

২৫. ঊনং পঞ্চসহস্সেন, যোধলক্খং সমাদিয;

সব্বং তে ৰোহণং দেসং, সঙ্খোভেসু মিতো ততো.

২৬. কিত্তিনামো’থ সচিৱো, মক্খকুদ্ৰূসৱাসিকো;

মুদ্ধনামো তথামচ্চো, মাৰগল্লকৱাসিকো.

২৭. উভোপি তে মহাৱীৰা, যুদ্ধোপাযৱিচক্খণা;

চোড়সেনং ৱিনাসেতু-মচ্চন্তকতনিচ্ছযা.

২৮. পলুট্ঠগিৰিনামম্হি, ঠানে দুগ্গে নিৱেসিয;

কত্ৱা ছমাসং সঙ্গামং, হনিংসু দমিড়ে বহূং.

২৯. হতাৱসিট্ঠা চোড়াতা, ৰণে তস্মিং ভযদ্দিতা;

পলাযিত্ৱা যথাপুব্বং, পুলত্তিপুৰমাৱসুং.

৩০. কুমাৰো জযিতো দিস্ৱা, উভো তে সচিৱে তদা;

হট্ঠতুট্ঠো ‘‘ৱৰং তাতা, গণ্হথা’’তি স চব্ৰৱী.

৩১. বুদ্ধো পৱেণিগামং সো, ৱৰং যাচিত্থ কিত্তিকো;

সঙ্ঘিকং গহিতং ভাগং, ৱিস্সজ্জেতুং ৱৰং ৱৰি.

৩২. ৰাজপুত্তৱৰালদ্ধ-ৱৰা’মচ্চৱৰা তদা;

নিদ্দৰা সাদৰা ৱীৰা, পাদে ৱন্দিংসু তস্স তে.

৩৩. ৰাজা দ্ৱাদসৱস্সানি, ৱসিত্ৱা চোড়মণ্ডলে;

অট্ঠতালীসৱস্সম্হি, মহিন্দো সো দিৱংগতো.

৩৪. পমাদ দোসানগতেন এৱং,

লদ্ধা’পি ভোগাননথিৰা ভৱন্তি;

ইচ্চপ্পমংদং হিতমাসসানো,

নিচ্চং সুৱিঞ্ঞূসুসমা চৰেয্য.

সুজনপ্পসাদসংৱেগত্থায কতে মহাৱংসে

লংকাৱিলোপো নাম

তিপঞ্ঞাসতিমো পৰিচ্ছেদো.