দ্ৱিপঞ্ঞাসতিম পৰিচ্ছেদ

তিৰাজকোনাম

১. ততো লঙ্কাভিসেকং সো, পত্ৱা সেনো কমাগতং;

মহিন্দস্সাদিপাদস্স, যুৱৰাজপদং অদা.

২. পঞ্ঞো মহাকৱী ব্যত্তো, মজ্ঝত্তো মিত্তসত্তুসু;

যুত্তো দযায মেত্তায, ৰাজা সো সব্বদা অহু.

৩. কালং দেৱো’নতিক্কম্ম, সম্মা ধাৰাভিৱস্সতি;

ৰট্ঠে তস্মিং ৱসন্তা’সুং, সুখিতা নিব্ভযা সদা.

৪. সুত্তন্তং লোহপাসাদে, নিসিন্নো ৱণ্ণযী তদা;

নিকাযত্তযৱাসীহি, ৰাজা সো পৰিৱাৰিতো.

৫. দাঠধাতুকৰণ্ডং সো, নানাৰতনভূসিতং;

অকা চতুৱিহাৰেসু, ধাতুপূজা চ’নেকধা.

৬. পৰিৱেণং সিত্থগামং, কাৰেত্ৱা ৱুত্থমত্তনা;

লোকং পুত্তংৱ পালেত্ৱা, তিৱস্সেন দিৱঙ্গতো.

৭. যুৱৰাজা মহিন্দো সো, ৰাজাসি তদনন্তৰং;

মহাপুঞ্ঞো মহাতেজো, মহাসেনো মহাযসো.

৮. একচ্ছত্তং অকা লঙ্কং, ঘাতেত্ৱা চোৰুপদ্দৱং;

অকংসু তমুপট্ঠানং, নিচ্চমণ্ডলনাযকং.

৯. ৱিজ্জমানেপি লঙ্কাযং, খত্তিযানং নৰাধিপো;

কালিঙ্গচক্কৱত্তিস্স, ৱংসে জাতং কুমাৰিকং.

১০. আণাপেত্ৱান তং অগ্গ-মহেসিং অত্তনো অকা;

তস্সা পুত্তা দুৱে জাতা, ধীতা একা মনোৰমা.

১১. আদিপাদে অকা পুত্তে, ধীতৰং চোপৰাজিনিং;

ইতি সীহড়ৱংসঞ্চ, পট্ঠপেসি সভূপতি.

১২. বলকাযং ইমং দেসং, মদ্দনত্থায ৱল্লভো;

পেসেসি নাগদীপং সো, সুত্ৱা তং ভূপতি ইধ.

১৩. বলং দত্ৱান সেনৱ্হ-ৰাজসেনাপতিং তদা;

ৱল্লভস্স বলেনে’স, যুজ্ঝিতুং তত্থ পেসযি.

১৪. গন্ত্ৱা সেনাপতী তত্থ, বলেনে’তস্স ৰাজিনো;

যুজ্ঝিত্ৱা তং ৱিনাসেত্ৱা, গণ্হি সো যুদ্ধমণ্ডলে.

১৫. অসক্কেন্তো ইমং জেতুং, ৰাজা নং ৱল্লভাদযো;

ৰাজানো মিত্তসম্বন্ধং, লংকিন্দেন অকংসু তে.

১৬. ইচ্ছেৱং ৰাজিনো তেজো, জম্বুদীপমৱত্থৰি;

পত্থৰিত্ৱান লংকাযং, উল্লঙ্ঘিত্ৱান সাগৰং.

১৭. সদ্ধম্মং কথাযন্তানং, কত্ৱা সম্মা ন মুত্তমং;

ধম্মং সুত্ৱান সো ৰাজা, পসন্নো বুদ্ধসাসনে.

১৮. ৰাজা সো সন্নিপাতেত্ৱা, পংসুকূলিকভিক্খৱো;

যাচিত্ৱা অত্তনো গেহং, আণাপেত্ৱান সাধুকং.

১৯. আসনং পঞ্ঞপেত্ৱান, নিসীদাপিয ভোজনং;

দাপেসি ৱিপুলং সুদ্ধং, সদা একদিনে ৱিয.

২০. অনেকব্যঞ্জনং ৰাজা-ৰঞ্ঞকানং তপস্সিনং;

পেসেসি ভোজনং সুদ্ধং, মহগ্ঘং ৱিপুলং সদা.

২১. ৱেজ্জেৱ পেসযিত্ৱান, ৱিলানানং তপস্সিনং;

সন্তিকং সো দযাৱাসো, তিকিচ্ছাপেসি নিচ্চসো.

২২. গুড়ানি ঘনপাকানি, লসুণানং ৰসানি চ;

তম্বুলমুখৱাসঞ্চ, পচ্ছভত্তে অদা সদা.

২৩. পত্তেসু পূৰযিত্ৱান, লসুণং মৰিচম্পি চ;

পিপ্ফলিসঙ্গীৱেৰানি, গুড়ানি তিফলানি চ.

২৪. ঘতং তেলং মধুঞ্চায, পাপুৰত্থৰণানি চ;

পংসুকূলিকভিক্খূনং, পচ্চেকং সব্বদা অদা.

২৫. চীৱৰাদীনি সব্বানি, পৰিক্খাৰানি ভূপতি;

কাৰাপেত্ৱান দাপেসি, ভিক্খূনং পংসুকুলিনং.

২৬. ৰাজা মহাৱিহাৰস্মিং, একেকস্স হি ভিক্খুনো;

পচ্চেকং নৱৱত্থানি, চীৱৰত্থায দাপযি.

২৭. নিকাযত্তযৱাসীনং, ভিক্খূনং লাভৱাসিনং;

তুলাভাৰমদা দ্ৱীসু, ৱাৰেসু সমহীপতি.

২৮. ৰাজা সো নাগতেভোগং,

ৰাজানো সঙ্ঘভোগতো;

ন গণ্হন্তূনি পাসাণে,

লিখাপেত্ৱা নিধাপযি.

২৯. কথাপেত্ৱান বুদ্ধস্স, সৰণানি গুণেনৱ;

অনাথেহি চ তেসঞ্চ, ভত্তৱত্থানি দাপযি.

৩০. দানসালং কৰিত্ৱান, হত্থিসালকভূমিযং;

যাচকানং অদা দানং, তেসঞ্চ সযনাসনং.

৩১. ৱেজ্জসালাসু সব্বাসু, ভেসজ্জং মঞ্চকঞ্চ সো;

চোৰানং বন্ধনাগাৰে, নিচ্চং ভত্তানি দাপযি.

৩২. ৱানৰানং ৱৰহানং, মিগানং সুনখান চ;

ভত্তং পূৱঞ্চ দাপেসি, দযাৱাসো যথিচ্ছকং.

৩৩. ৰাজা চতুৱিহাৰেসু, কত্ৱা সো ৱীহিৰাসযো;

যথিচ্ছিতেন গণ্হন্তু, অনাথা ইতি দাপযি.

৩৪. নানাপূজাহি পূজেত্ৱা, কত্ৱা মঙ্গলমুত্তমং;

কথাপেসি চ ভিক্খূহি, ব্যত্তেহি ৱিনযং তদা.

৩৫. থেৰেন ধম্মমিত্তেন-সিত্থগামকৱাসিনা;

পূজযিত্ৱান কাৰেসি, অভিধম্মস্স ৱণ্ণনং.

৩৬. দাঠানাগা’ভিধানেন, থেৰেনা’ৰঞ্ঞৱাসিনা;

লংকালংকাৰভূতেন, অভিধম্মং কথাপযি.

৩৭. পট্টকঞ্চুকপূজাহি, হেমমালিকচেতিযং;

নচ্চগীতেহি গন্ধেহি, পুপ্ফেহি ৱিৱিধেহি চ.

৩৮. দীপমালাহি ধূপেহি, পূজযিত্ৱান’নেকধা;

তস্স ৱত্থানি ভাজেত্ৱা, ভিক্খূনং দাপযী সযং.

৩৯. সদা সো অত্তনো ৰজ্জে, উয্যানেসু তহিংতহিং;

আণাপেত্ৱান পুপ্ফানি, পূজেসি ৰতনত্তযং.

৪০. পাসাদং চন্দনং নাম, কাতুং মৰিচৱট্টিযং;

অকাৰম্ভঞ্চ ভিক্খূনং ভোগগামে চ দাপযি.

৪১. কেসধাতুং নিধাপেত্ৱা, কৰণ্ডং ৰতনেহি সো;

কাৰযিত্ৱান পূজেসি, ঠপেত্ৱা তত্থ ভূপতি.

৪২. সোণ্ণৰজতপট্টেহি, থূপাৰামম্হি চেতিযং;

ছাদাপেত্ৱা যথাৰজ্জং, পূজং কাৰেসি ভূপতি.

৪৩. তস্মিং ধাতুঘৰে ৰাজা, সোণ্ণদ্ৱাৰমকাৰযি;

পজ্জলন্তং সিনেৰুংৱ, ৰংসীহি সূৰিযস্স সো.

৪৪. ঝাপিতং চোড়ৰাজস্স, বলেন পদলঞ্ছনে;

চতুন্নং চেতিযানং সো, ৰমনীযং ঘৰং অকা.

৪৫. ঝাতং নগৰমজ্ঝম্হি, দাঠাধাতুঘৰং অকা;

ধম্মসঙ্গণীগেহঞ্চ, মহাপাড়িঞ্চ ভূপতি.

৪৬. তম্বূলমণ্ডপং কত্ৱা, তত্থ সুঙ্কং মহীপতি;

ভিক্খূনং থেৰৱংসে সো, ভেসজ্জত্থায দাপযি.

৪৭. উপস্সযং কৰিত্ৱান, মহামঙ্গলনামকং;

থেৰৱংসম্হি জাতানং, ভিক্খুনীনং অদাপযি.

৪৮. মাতুলোদযৰাজেন, আৰদ্ধং সাধুনা তদা;

নিট্ঠাপেসি মহীপালো, পাসাদং মণিনামকং.

৪৯. পৰিৱেণানি চত্তাৰি, তস্মিং জেতৱনে তদা;

কাৰাপযিংসু চত্তাৰো, অমচ্চা তস্স ৰাজিনো.

৫০. ৰঞ্ঞো কিত্তিসমাদেৱী, কিত্তিনামা মনোৰমা;

পৰিৱেণং অকাৰামং, থূপাৰামস্স পচ্ছতো.

৫১. সা তস্মিং পৰিৱেণে চ, অকা কপ্পাসগামকে;

চীৱৰচেতিযে চেৱ, তিস্সো পোক্খৰণী সুচি.

৫২. দ্ৱাদসৰতনাযামং, ধজং সোণ্ণমযঞ্চ সা;

পূজেসি পুঞ্ঞসম্ভাৰং, হেমমালিক চেতিযে.

৫৩. গিহীনং ৱজ্জসালঞ্চ, পুত্তো তস্সা পুৰেঅকা;

গুণৱাসক্কসেনানী, ভিক্খূনঞ্চ পুৰাবহি.

৫৪. ৰাজা চতুৱিহাৰেসু, দিব্বপাসাদসন্নিভে;

মণ্ডপে কাৰযিত্ৱান, ধাতুপূজা অনেকধা.

৫৫. ৱস্সমেকমতিক্কম্ম, কাৰাপেত্ৱা মহীপতি;

চাৰিত্তং পুব্বৰাজূনং, পৰিপালেসি সাধুকং.

৫৬. এৱমাদীনি পুঞ্ঞানি, উড়াৰানি অনেকধা;

কত্ৱা সোড়সমে ৱস্সে, ৰাজা সো তিদিৱং গতো.

৫৭. জাতো পটিচ্চ তং ৰাজং, সেনা দ্ৱাদসৱস্সিকো;

কালিঙ্গদেৱিযা পুত্তো, পত্তৰজ্জো তদা অহু.

৫৮. উদযস্স কনিট্ঠস্স, যুৱৰাজপদং অদা;

পিতু সেনাপতি সেনো, তস্স সেনাপতি অহু.

৫৯. পচ্চন্তং বলমাদায, গতে সেনাপতিম্হি সো;

মাতৰা সহ ৱত্তন্তং, কণিট্ঠং তস্স ভাতৰং.

৬০. মাৰাপেত্ৱা মহামল্লং, অকা সেনাপতিং তদা;

অমচ্চং উদযং নাম, সকং ৱচনকাৰকং.

৬১. তং সুত্ৱা কুপিতো হুত্ৱা, সেনো সেনাপতি তদা;

বলমাদায আগঞ্ছি, গণ্হিস্সামীতি সত্তৱো.

৬২. সুত্ৱান তং মহীপালো, কতৱন্তং ৱাচমত্তনো;

ৰক্খামি তং অমচ্চন্তি, গতো নিক্খম্ম ৰোহণং.

৬৩. তস্স মাযা নিৱত্তিত্ৱা, যুৱৰাজঞ্চ ৰাজিনিং;

আদায কুপিতা তেন আণাপেসি চমূপতিং.

৬৪. তায সো সঙ্গহীতোৱ, দমিড়ে সন্নিপাতিয;

দত্ৱা জনপদং তেসং, পুটত্থিনগৰে ৱসী.

৬৫. যুজ্ঝিতুং তেন সো ৰাজা, বলং পেসেসি ৰোহণা;

সেনাপতি ৱিনাসেসি, সব্বং তং ৰাজিনো বলং.

৬৬. দমিড়া তে জনপদং, পীড়েত্ৱা ৰক্খসা ৱিয;

ৱিলুম্পিত্ৱান গণ্হন্তি, নৰানং সন্তকং তদা.

৬৭. খিত্তা মনুস্সা গন্ত্ৱান, ৰোহণং ৰাজসন্তিকং;

নিৱেদেসুং পৱত্তিং তং, মন্তেত্ৱা সচীৱেহি সো.

৬৮. ৰক্খিতুং সাসনং ৰট্ঠং, তম্পহায চমূপতিং;

সন্ধিং কত্ৱান সেনেন, পুড়ত্থিনগৰং অগা.

৬৯. মহেসিং অত্তজং কত্ৱা, পালেতুং ৱংসমত্তনো;

পুত্তং উপ্পাদযিত্ৱান, কস্সপং নাম উত্তমং.

৭০. ৱসন্তে তত্থ লংকিন্দে, অহিতা ৱল্লভা জনা;

অলভন্তা সুৰং পাতু-মাৰিযা তস্স সন্তিকে.

৭১. মজ্জপানে গুণং ৱত্ৱা, পাযেসুং তং মহীপতিং;

পিৱিত্ৱা মজ্জপানং সো, মত্তব্যাড়ো অহু তদা.

৭২. আহাৰানং খযং পত্ৱা, চজিত্ৱা দুল্লভং পদং;

মতো সো দসমে ৱস্সে, তৰুণোযেৱ ভূপতি.

৭৩. ইতো ৱিদিত্ৱা খলুপাপমিত্ত-

ৱিধেয্যভাৱং পৰিহানি হেতুং;