একপঞ্ঞাসতিম পৰিচ্ছেদ

পঞ্চৰাজকো নাম

১. যুৱৰাজা তদা হুত্ৱা, ৰাজা দপ্পুড়নামকো;

ঠপেসি ওপৰজ্জম্হি, আদিপদং সনামকং.

২. মৰিচৱট্টিৱিহাৰস্স, গামং দত্ৱা ততো পুৰে;

চাৰিত্তং পুব্বৰাজূনং, ৰক্খিত্ৱান মহিং ইমং.

৩. অভুত্ৱা দীঘকালঞ্হি, পুব্বকম্মেন অত্তনো;

ৰাজা সো সত্তমে মাসে, পৱিট্ঠো পচ্চুনো মুখং.

৪. উপৰাজা অহুৰাজা, দপ্পুড়ো তদনন্তৰং;

উদযস্সাদিপাদস্স, যুৱৰাজপদং অদা.

৫. তদা চোড়ভযা পণ্ডু-ৰাজং জনপদং সকং;

চজিত্ৱা নাৱমাৰুয্হ, মহাতিত্থমুপাগমি.

৬. আণাপেত্ৱান তং ৰাজা, দিস্ৱা সন্তুট্ঠমানসো;

মহাভোগং অদা তস্স, নিৱাসেসি পুৰা বহি.

৭. চোড়ৰাজেন যুজ্ঝিত্ৱা, গহেত্ৱা পট্টনদ্ৱযং;

পণ্ডুৰাজস্স দম্মীতি, সন্নদ্ধে লঙ্কৰাজিনি.

৮. কেনা’পি কৰণীযেন, খত্তিযা দীপৱাসিনো;

অকংসু ৱিগ্গহং ঘোৰং, পাপকম্মেন পণ্ডুনো.

৯. পণ্ডুৰাজে’ত্থ ৱাসেন, কম্মং নত্থীতি চিন্তিয;

ঠপেত্ৱা মকুটাদীনি, গতো কেৰড়সন্তিকং.

১০. ৱিগ্গহে নিট্ঠিতে ৰাজা, মহামেঘৱনে তদা;

মহাবোধিঘৰস্সা’দা, গামং নগৰসন্তিকে.

১১. আৱাসং ৰক্খকো নাম, তস্স সেনাপতী অকা;

থূপাৰামসমীপম্হি, ইড়ঙ্গো ৰাজনামকং.

১২. কতং তং পুব্বৰাজেহি, ৰাজা সো পৰিপালিয;

পত্তো দ্ৱাদসমং ৱস্সং, যথাকম্মমুপাগমি.

১৩. উদযো যুৱৰাজা’সি, লংকাৱাসীনমিস্সৰো;

সেননামাদিপাদং সো, ওপৰজ্জে’ভিসেচযি.

১৪. ৰঞ্ঞো ভীতা তদামচ্চা, পৱিসিংসু তপোৱনং;

ৰাজোপৰাজা গন্ত্ৱান, তেসং সীসানি ছেদযুং.

১৫. তেন কম্মেন নিব্বিন্না, যতযো তন্নিৱাসিনো;

হিত্ৱা জনপদং ৰঞ্ঞো, তদাগচ্ছিংসু ৰোহণং.

১৬. তদা জানপদা চেৱ, নাগৰা চ বলানি চ;

কুপিতা চণ্ডুৱাতেন, সাগৰো ৱিয কম্পিতো.

১৭. ৰতনপাসাদমাৰুয্হ, ৱিহাৰে অভযুত্তৰে;

সন্তাসেত্ৱান ৰাজানং, দস্সেত্ৱান ৱিভীসিকং.

১৮. উপত্থম্ভকমচ্চানং, ৱিগ্গহস্স তপোৱনে;

তদা সীসানি ছিন্দিত্ৱা, কৱাতেন নিপাতযুং.

১৯. তং সুত্ৱা যুৱৰাজা চ, আদিপাদো চ তং সখা;

উল্লঙ্ঘিত্ৱান পাকাৰং, সীঘং গচ্ছিংসু ৰোহণং.

২০. বলকাযোনুবন্ধিত্ৱা, যাৱ কণ্হনদীতটা;

অলাভেন চ নাৱানং, তিণ্ণত্তা তেসমাগমি.

২১. ৰাজপুত্তাগতা তত্থ, ৱনে অভযভেদিনো;

যতীনং পুৰতো তেসং, নিপজ্জিত্ৱা উৰেন তে.

২২. অল্লৱত্থা’ল্লকেসা চ, পৰিদেৱিত্থ’নেকধা;

কন্দীত্ৱা ৰোদনং কত্ৱা, খমাপেসুং তপস্সিনো.

২৩. খন্তিমেত্তানুভাৱেন, তেসং সাসনসামিনং;

পুঞ্ঞোদযো অহু তেসং, উভিন্নং দীপসামিনং.

২৪. যুৱৰাজবলঞ্চেৱ, নিকাযত্তযৱাসিনো;

গমিংসু তেসমানেতুং, সন্তিভূতে মহাবলে.

২৫. ৰাজপুত্তা উভো ব্যত্তা, পণ্ডিতা পংসুকূলিনো;

যাচিত্ৱা তেসমাদায, অগমংসু সকং পুৰং.

২৬. ভিক্খূনং পুৰতো মগ্গং, ৰাজাগন্তা খমাপযি;

আদায তে ৱনং তেসং, নেত্ৱা ৰাজঘৰং গতো.

২৭. ততো পট্ঠায চাৰিত্থং, পালেত্ৱা পুব্বৰাজুনং;

ৰাজা সো ততিযে ৱস্সে, যথাকম্মমুপাগমি.

২৮. লংকাভিসেকং পত্ৱান, সেনো সো মতিমা ততো;

উদযং আদিপাদং তং, যুৱৰাজং অকা সখং.

২৯. কহাপণসহস্সং সো, দুগ্গতানং উপোসথে;

হোতু’পোসথিকো দত্ৱা, যাৱজীৱং নৰাধিপো.

৩০. পটিমা ভত্তৱত্থানি, ভিক্খূনং ধৰণী পতি;

অদা দণ্ডিস্সৰং দানং, যাচকানঞ্চ সিপ্পীনং.

৩১. ঠানে কত্থচি সিপ্পীনং, পাসাদেসু মনোহৰে;

কাৰেত্ৱা ভোগগামে চ, অদাপেসি মহামতি.

৩২. কহাপণসহস্সং ৱা, দত্ৱা পঞ্চসতানি ৱা;

লঙ্কাযং জিণ্ণকাৱাসে, নৱকম্মমকাৰযী.

৩৩. চত্তালীসসহস্সানি, অভযুত্তৰচেতিযে;

সিলাপত্থৰণত্থায, দাপেসি চ মহীপতি.

৩৪. মহাৱাপীসু লংকাযং, জিণ্ণনিদ্ধমনে অকা;

নৱকম্মঞ্চ মৰিযাদং, থিযং পাসাণপংসুনা.

৩৫. অকা ৰাজঘৰে ৰম্মং, মালাগেহং মহাৰহং;

ঠপিতং পুনৰাজূহি, দানং সম্মাপৱত্তযি.

৩৬. কতং মলযৰাজেন, অমচ্চেন’গ্গ বোধিনা;

পৰিৱেণং নাগসালং, দিস্ৱা গাম মদা তদা.

৩৭. কত্ৱা চতুৱিহাৰেসু, ৰূপকম্মানি সাধুকং;

মণ্ডপানি চ ৰম্মানি, ধাতুপূজং অকা সদা.

৩৮. এৱমাদীনি পুঞ্ঞানি, অনেকানি অনেকধা;

কত্ৱা সো নৱমে ৱস্সে, যথাকম্মমুপাগমি.

৩৯. লংকাভিসেকং পত্ৱান, যুৱৰাজোদযো ততো;

সেননামাদিপাদং সো, ওপৰজ্জে’ভি সেচযি.

৪০. নিদ্দালু মজ্জপো আসি, ৰাজা পাপেন জন্তুনং;

চোড়ো পমত্ততং তস্স, সুত্ৱা সন্তুট্ঠমানসো.

৪১. পণ্ডুদেসাতিসেকং সো, পত্তুকা মেত্থ পেসযি;

মকুটাদীনমত্থায, ঠপিতানংৱ পণ্ডুনা.

৪২. তানি নাদাসি সো ৰাজা, তেন চোড়ো মহব্বলো;

বলং সন্নয্হ পেসেসি, বলক্কাৰেন গণ্হিতুং.

৪৩. তদা সেনাপতি এত্থ, পচ্চন্তে কুপিতে গতো;

আণাপেত্ৱান তং ৰাজা, যুজ্ঝনত্থায পেসযি.

৪৪. হতো সেনাপতি তত্থ, যুজ্ঝি ন ৰণে মতো;

ককূটাদীনি আদায, ৰাজা সো ৰোহণং অগা.

৪৫. গন্ত্ৱা চোড়বলং তত্থ, অলভিত্ৱা পৱেসনং;

নিৱত্তিত্ৱা সকং ৰট্ঠং, অগমাসি ইধতা ভযা.

৪৬. ততো সেনাপতিট্ঠানে, ৱিদুৰগ্গং তু নাযকং;

ঠপেসি ৰাজা লংকিন্দো, তেজৱন্তং মহামতিং.

৪৭. পচ্চন্তং চোড়ৰাজস্স, ঘাতেত্ৱা সো চমূপতি;

আণাপেসি ইতো নীতং, দস্সেত্ৱান ৱিভীসিতং.

৪৮. ততো দাপেসি সো সব্ব-পৰিক্খাৰং মহাৰহং;

পংসুকূলিকভিক্খূনং, সব্বেসং দীপৱাসিনং.

৪৯. মহাৱিহাৰে লংকিন্দো, পটিবিম্বস্স সত্থুনো;

জলন্তং মণিৰংসীহি, অকা চূড়ামণিং তদা.

৫০. ওৰোধা ৱিদুৰা তস্স, পাদজালেন পূজযি;

মণীহি পজ্জলন্তেহি, পটিমং তং সিলামযং.

৫১. ঝাপিতং চোড়ৰাজস্স, বলেন মণিনামকং;

পাসাদং কাতুমাৰদ্ধো, চুতো ৱস্সম্হি অট্ঠমে.

৫২. পঞ্চেতে ৱসুধাধিপা ৱসুমহিং একাতপত্তঙ্কিতং;

ভুত্ৱা নিগ্গহসঙ্গহেহি সকলং লোকং ৱসে ৱত্তিয;

যা তা মচ্চুৱসং সপুত্তৱণিতা সামচ্চমিত্তানুগা;

ইচ্চেৱং সততং সৰন্তু সুজনা হাতুং পমাদং মদং.

সুজনপ্পসাদসংৱেগত্থায কতে মহাৱংসে

পঞ্চৰাজকো নাম

একপঞ্ঞাসতিমো পৰিচ্ছেদো.