পঞ্ঞাসতিম পৰিচ্ছেদ

দ্ৱিৰাজকোনাম

১. ততো ৰজ্জে পতিট্ঠায, কস্সপো দক্খিণং দিসং;

অদা কস্সপনামস্স, যুৱৰাজস্স ধীমতো.

২. অগ্গাভিসেকং দাপেসি, যুৱৰাজস্স ধীতুযা;

ৰাজকঞ্ঞায তিস্সায, ভৰিযাযে’ৱ অত্তনো.

৩. যাচকানঞ্চ সিপ্পীনং, আগতানং ততো ততো;

দানং দণ্ডিস্সৰং নাম, সদা দাপেসি ভূপতি.

৪. আদিপাদো মহিন্দো সো,

ৱসন্তো ৰোহণে তদা;

গহেতুং ৰাজিনোৰট্ঠ-

মাদায বলমাগতো.

৫. তং সুত্ৱা কুপিতো ৰাজা, বলং পেসেসি অত্তনো;

যুজ্ঝিত্ৱা তং পৰাজেসি, মহিন্দো সো মহাভটো.

৬. ততো ৰাজা নিৱত্তেতুং, পিতৰং তস্স পেসযি;

কস্সপং যুৱৰাজং তং, সো গন্ত্ৱা পুত্তসন্তিকং.

৭. নানাধম্মকথোপেতং, ৱত্ৱা যুত্তিমনেকধা;

সঙ্ঘামতো নিৱত্তেত্ৱা, পুত্তং সো পুনৰাগমি.

৮. আদিপাদো তু সো পচ্ছা, ঘাতেত্ৱা মণ্ডলাধিপে;

কুদ্ধেজনপদে দিস্ৱা, অগমাসি পুৰন্তিকং.

৯. ভিক্খুসঙ্ঘো তমানেত্ৱা, দস্সেসি ৱসুধাধিপং;

দত্ৱা সো ধীতৰং তস্সা, পেসেসি পুন ৰোহণং.

১০. নীহৰিত্ৱান দুস্সীলে, নিকাযত্তযৱাসীসু;

গাহাপেসি নৱে ভিক্খূ, আৱাসে তত্থ তত্থ সো.

১১. দ্ৱযাভিসেকজাতেন, আদিপাদেন সুনুনা;

মহাৱিহাৰে বোধিম্হি, পংসুং ৱড্ঢেসি পূজযং.

১২. অকাসি চ নিকাযেসু, তীসু বিম্বে সিলামযে;

সোৱণ্ণযে ৰংসিজালে, ছত্তং চূড়ামণিং তথা.

১৩. অভযগিৰিৱিহাৰম্হি, পাসাদং সকনামকং;

কত্ৱা তত্থ নিৱাসেত্ৱা, ভিক্খু গামমদাপযি.

১৪. মহিযঙ্গণৱিহাৰস্মিং, গামং সো চেতিযস্স’দা;

সৱত্থং পটিমাভত্তং, সব্বভিক্খূন দাপযি.

১৫. থলে জলে চ সত্তানং, অদাসি অভযং তদা;

চাৰিত্তপুব্বৰাজূনং, পৰিপালেসি সব্বদা.

১৬. তস্স সেনাপতি সেনো, ইলঙ্গোৰাজৱংসজো;

থেৰিযানং অকা’ৱাসং; থূপাৰামস্স পচ্ছতো.

১৭. ধম্মাৰুচিকভিক্খূনং, ধম্মাৰামমকাৰযি;

তথা সাগলিকানঞ্চ, কস্সপসেননামকং.

১৮. হদযুণ্হাভিধানং সো, কত্ৱা চেতিযপব্বতে;

পৰিৱেণং অদাধম্ম-ৰুচিকানঞ্চ ভিক্খূনং.

১৯. আৰামিকানং ভিক্খূনং, আৰামেসু তহিং তহিং;

একমেকং কুটিং কত্ৱা, দাপেসি চ চমূপতি.

২০. ৰত্তমালগিৰিস্মিং সো, কত্ৱা ৰম্মং তৰং সুভং;

কুচিং অদা সাসনস্স, সামিকানং তপস্সিনং.

২১. মহাৱিহাৰে কাৰেত্ৱা, পৱিৱেণং ৱৰং অদা;

পংসুকূলিকভিক্খূনং, সমুদ্দগিৰিনামকং.

২২. ৱাসং অৰঞ্ঞে কাৰেত্ৱা, অত্তনো ৱংসনামকং;

মহাৱিহাৰে ভিক্খূনং, ৱনে নিৱাসতং অদা.

২৩. ৱিহাৰেসূ চ জিণ্ণেসু, নৱকম্মমকাৰযি;

দাপেসি অগ্গলং সব্ব-ভিক্খূনং জিণ্ণচীৱৰে.

২৪. তিস্সাৰামং কৰিত্ৱান, ভিক্খূনীনমুপস্সযং;

মৰিচৱট্টিমহাবোধি, পৰিহাৰে নিৱেসযি.

২৫. অনুৰাধপুৰে চেৱ, পুলত্থিনগৰেপি চ;

উপসগ্গৰোগনাসায, ৱেজ্জসালাপি কাৰযি.

২৬. অত্তনা কতৱাসনং, ভোগগামে চ দাপযি;

তথাৰামিকগামে চ, পটিমাভৰণঞ্চ সো.

২৭. ভেসজ্জগেহং কাৰেসি, নগৰে তত্থ তত্থ সো;

পংসুকূলিকভিক্খূনং, ভত্তং ৱত্থঞ্চ দাপযি.

২৮. খন্ধীকতে অমোচেসি, তিৰচ্ছানগতে বহূ;

কপণানঞ্চ দাপেসি, মহাদানং চমূপতি.

২৯. ৱিচিত্তং ব্যঞ্জনং ভত্তং, যাগুং ৱিৱিধখজ্জকং;

কত্ৱা সূকৰৰূপঞ্চ, গুড়ং ভিক্খূনং দাপযি.

৩০. এৱামাদীনি পুঞ্ঞানি, কত্ৱা সেনায নাযকো;

সেনো কিত্তিন্দুপাদেহি, সব্বা ওভাসযী দিসা.

৩১. তস্সেৱ ঞাতকো কত্ৱা, নাযকো ৰক্খসৱ্হযো;

সৱাৰকম্হি গামম্হি, ৱিহাৰং সুমনোহৰং.

৩২. মহাৱিহাৰৱাসীনং, সাৰানং পটিপত্তিযা;

ভিক্খূনং সো অদা সাধু, ঠপেত্ৱা ৱত্তমুত্তমং.

৩৩. সেনো নাম মহালেখো, মহালেখকপব্বতং;

মহাৱিহাৰে কাৰেসি, ভিক্খূনং ৱাসমুত্তমং.

৩৪. চোড়ৰাজাভিধানো, চ, অমচ্চো তস্স ৰাজিনো;

পৰিৱেণং অকাৰম্মং, নট্ঠং তং সুপ্পতিট্ঠিতং.

৩৫. ৰাজা তীসু নিকাযেসু, ৰূপকম্মমনোৰমং;

মণ্ডপানি ৱিচিত্তানি, ৱেজযন্তো পমানি চ.

৩৬. কাৰেত্ৱা ধাতুপূজাযো, কত্ৱা জনমনোহৰা;

যথা কম্মং গতো ঠত্ৱা, ৱস্সানি দসসত্ত চ.

৩৭. দ্ৱযাভিসেকসঞ্জাতো, যুৱৰাজাথ কস্সপো;

আসি লদ্ধাভিসেকো সো, লংকাৰজ্জেকমাগতে.

৩৮. সদ্ধো আগতমগ্গোৱ, সাভিঞ্ঞো ৱিয পঞ্ঞৱা;

ৱত্তা সো মৰমন্তিৱ, চাগৱা ধনদো ৱিয.

৩৯. বহুস্সুতো ধম্মকথী, সব্বসিপ্পৱিসাৰদো;

যুত্তাযুত্তৱিচাৰায, নিপুণো নযকোৱিদো.

৪০. অচলো ইন্দলীলো’ৱ, ঠিতো সুগতসাসনে;

পৰপ্পৱাদিৱাতেহি, সব্বেহি’পি অকম্পিযো.

৪১. মাযাসাঠেয্যমানাদি, পাপানঞ্চ অগোচৰো;

গুণানং আকৰো সব্ব-ৰতনানং ৱসাগৰো.

৪২. ভূমিচন্দো নৰিন্দো সো, ৱংসে জাতস্স অত্তনো;

দপ্পুড়স্সাদীপাদস্স, যুৱৰাজপদং অদা.

৪৩. ৰজ্জং দসহি ধম্মেহি, চতুসঙ্গহৱত্থূহি;

কৰোন্তো পৰিপালেসি, লোকং নেত্তংৱ অত্তনো.

৪৪. সো ধেত্ৱা সাসনং সব্বং, ধম্মকম্মেন সত্থুনো;

গহেত্ৱা নৱকে ভিক্খূ, অকাসা’ৱাসপূৰণং.

৪৫. দুট্ঠগামণিৰাজেন, কতং মৰিচৱট্টিকং;

নট্ঠং ৱিহাৰং কাৰেত্ৱা, নানাআৱাস ভূসিতং.

৪৬. থেৰৱংসজভিক্খূনং, অদা কত্ৱা মহামহং;

তেসং পঞ্চসতানঞ্চ, ভোগগামে চ দাপযি.

৪৭. তত্থ সো তুসিতে ৰম্মে, দেৱসঙ্ঘপুৰক্খতং;

মেত্তেয্যং লোকনাথং তং, দেসেন্তং ধম্মমুত্তমং.

৪৮. দস্সেন্তো ৱিয লোকস্স, ৱিহাৰে সব্বসজ্জিতে;

নিসিন্নো মণ্ডপে ৰম্মে, নানাৰতনভূসিতে.

৪৯. নগৰেহি চ সব্বেহি, ভিক্খূহি পৰিৱাৰিতো;

বুদ্ধলিলায লংকিন্দো, অভিধম্ম মভাসযি.

৫০. সোণ্ণপট্টে লিখাপেত্ৱা-ভিধম্মপিটকং তদা;

ধম্মসঙ্গণিকং পোত্থং, নানাৰতন ভূসিতং.

৫১. কত্ৱা নগৰমজ্ঝম্হি, কাৰেত্ৱা হেমমুত্তমং;

তং তত্থ ঠপযিত্ৱান, পৰিহাৰমদাপযি.

৫২. সক্কসেনাপতিট্ঠানং, দত্ৱা পুত্তস্স অত্তনো;

পৰিহাৰে নিযোজেসি, তত্থ তং ধম্মপোত্থকে.

৫৩. অনুসংৱচ্ছৰং ৰাজা, পুৰং দেৱপুৰী ৱিয;

ৱিভূসিতায সেনায, সজ্জেত্ৱা পৰিৱাৰিতো.

৫৪. দেৱৰাজাৱ সোভন্তো, সব্বাভৰণভূসিতো;

হত্থিখণ্ডে নিসীদিত্ৱা, চৰন্তো পুৰৱীথিযং.

৫৫. মহতা পৰিহাৰেন, নেত্ৱা তং ধম্মসঙ্গহং;

অত্তনা কাৰিতং ৰম্মং, ৱিহাৰং সব্বসজ্জিতং.

৫৬. তত্থ ধাতুগতে ৰম্মে, নানাৰতনভূসিতে;

মণ্ডপে ধাতুপিঠস্মিং, পতিট্ঠাপিয পূজযি.

৫৭. গন্থাকৰপৰিৱেণং, মহামেঘৱনে অকা;

নগৰে ৱজ্জসালা চ, তেসং গামে চ দাপযি.

৫৮. ভণ্ডিকপৰিৱেণঞ্চ, সিলামেঘঞ্চ পব্বতং;

কত্ৱা’ভযগিৰিস্মিং সো, তেসং গামমদাপযি.

৫৯. জোতিৱনৱিহাৰস্মিং, ৰাজা লঙ্কায নাযকো;

ভত্তগ্গস্স অদা গামং, তথা’ভযগিৰিম্হি চ.

৬০. দক্খিণগিৰিনামস্স, ৱিহাৰস্স চ দাপযি;

গামং কতঞ্ঞুভাৱেন, ৰাজা পৰমধম্মিকো.

৬১. সক্কসেনাপতি ৰম্মং, পৰিৱেণং সুমাপিয;

অদাসি সহগামেহি, থেৰিযানং সনামিকং.

৬২. ভৰিযা ৱজিৰা তস্স, তেসংযেৱ অদাপযি;

পৰিৱেণং কৰিত্ৱান, সগামং সকনামকং.

৬৩. উপস্সযং কৰিত্ৱান, সা এৱ পদলঞ্ছনে;

ভিক্খূনীনং অদা থেৰ-ৱংসে সব্বত্থ পূজিতে.

৬৪. সক্কসেনাপতি মাতা, দেৱা’ৰঞ্ঞক ভিক্খূনং;

থেৰৱংসপ্পদীপানং, অকা’ৱাসং সনামকং.

৬৫. সা এৱ পটিবিম্বস্স, সত্থু মৰিচৱট্টিযং;

চূড়ামণিং পাদজলং, অকা ছত্তঞ্চ চীৱৰং.

৬৬. ৰাজা ৰাজালযেযেৱ, ৰাজৱংসং সনামকং;

অকাসি পাড়িকং নাম, পাসাদং সুমনো হৰং.

৬৭. পূজেসি ৰাজিনী নাম, ৰাজিনো ভৰিযা’পৰা;

পট্টকঞ্চুকপূজায, হেমমালিক চেতিযং.

৬৮. তস্সা পুত্তোসি সিদ্ধত্থো, নাম ইস্সৰিযে ঠিতো;

সুতো মলযৰাজাতি, ৰূপেন মকৰদ্ধজো.

৬৯. ৰাজা তস্মিং মতে কত্ৱা, সালং ভিক্খুনমুত্তমং;

দানৱট্টং পট্ঠপেত্ৱা, তস্স পত্তিমদা তদা.

৭০. এৱং ধম্মেন কাৰেন্তে, ৰজ্জং লঙ্কাদীপে তদা;

চোড়ৰাজেন যুজ্ঝিত্ৱা, পণ্ডুৰাজা পৰাজিতো.

৭১. পণ্ণাকাৰানি নেকানি, বলং সন্ধায পেসযি;

ৰাজালংকিস্সৰো সদ্ধিং, মন্তেত্ৱা সচিৱেহি সো.

৭২. সন্নয্হ বলকাযং সো, সক্কসেনাপতিং সকং;

বলস্স নাযকং কত্ৱা, মহাযিত্থমুপাগমি.

৭৩. ৱিজযং পুব্বৰাজূনং, ৱত্ৱা ৱেলাতটে ঠিতো;

উস্সাহং জনযিত্ৱান, নাৱং আৰোপযী বলং.