একূনপঞ্ঞাসতিম পৰিচ্ছেদ

ৰাজদ্ৱযদীপনো

১. এৱং তস্মিং মতে তস্স, কাতব্বং সাধুকাৰিয;

মহাদীপাদো সেনৱ্হো, আদায বলৱাহনং.

২. আগম্ম নগৰং ৰাজা, অহোসি ধৰণী তলে;

আদিকপ্পম্হি ৰাজূনং, দস্সন্তো চৰিযং পিয.

৩. সদ্ধো মহাধনো সূৰো, মুত্তচাগী নিৰালযো;

যাচযোগো মহাভোগো, সম্পন্নবলৱাহনো.

৪. কিত্তিযা’মলভূতায, তথা তেজো গুণেন চ;

সন্নিপাতংৱ সো চন্দ-সূৰিযানং নিদস্সযি.

৫. অসঙ্কিণ্ণ গুণাকিণ্ণো, সুৱিচিণ্ণ গুণাগুণো;

নিত্থিণ্ণপাপো নিব্বিণ্ণ-সংসাৰো সাৰদস্সনো.

৬. ভৰিযা তস্স যা আসি, সঙ্ঘাতং সো ভিসেচযি;

মহেসীভাৱে দত্ৱান, পৰিহাৰং যথাভতং.

৭. মহিন্দং নাম সপ্পঞ্ঞং, কণিট্ঠং ভাতৰং সকং;

দত্ৱা দক্খিণভাগং সো, ওপৰজ্জে’ভিসেচযি.

৮. অন্তেপুৰে’পৰজ্ঝিত্ৱা, সো ৰঞ্ঞা অৱধাৰিতে;

সপুত্তদাৰো ৱুট্ঠায, অঞ্ঞাতো মলযং অগা.

৯. উপ্পজ্জিত্থ তদা পুত্তো, ৰঞ্ঞো সঙ্ঘায দেৱিযা;

দস্সেন্তো’ৱ পনাদস্স, কুমাৰ ৰূপমত্তনো.

১০. ৰাজা তং জাতমত্তং’ৱ, দিস্ৱা সন্থুট্ঠমানুসো;

সিদ্ধত্থং লুম্বিনীজাতং, ৰাজা সুদ্ধোদনো ৱিয.

১১. ধঞ্ঞপুঞ্ঞগুণূপেতো, ঠপেত্ৱা দীপমেককং;

জম্বুদীপে’পি কসিণে, ৰজ্জযোগ্গোতি মে সুতো.

১২. নামদান দিনেযেৱ, পৰিহাৰেন সব্বসো;

ওপৰজ্জে ভিসিঞ্চিত্ৱা, দক্খিণং দেসমস্স’দা.

১৩. যুৱৰাজাপি মলযে, ৱসন্তো’ৱ মহীপতিং;

আৰাধেত্ৱা উপাযেন, অনুঞ্ঞতো সভাতৰা.

১৪. নিকাযত্তয ৱা সীহি, সদ্ধিং ভিক্খূহি আগতো;

দিস্ৱা ৰাজানমেত্থেৱ, সন্ধীং’কাসি অকুপ্পিযং.

১৫. যা তস্স যুৱৰাজস্স, ভৰিযা তিস্সা নামিকা;

ৰাজিনী সা ৱিজাযিত্থ, ধীতৰং সঙ্ঘনামিকং.

১৬. কিত্তিনামা’পৰাযা চ, ভৰিযা সাপি খো পন;

ৱিজাযি পুত্তে চত্তাৰো, তথা একঞ্চ ধীতৰং.

১৭. তদা ৰাজাপি চিন্তেত্ৱা, এৱং সতি কণিট্ঠকো;

নিস্সঙ্কো মযি হোতীতি, সম্মা মন্তীহি মন্তিয.

১৮. ধীতৰং যুৱৰাজস্স, সুৰূপিং ৰূপনামিকং;

কস্সপস্স’ত্ত পুত্তস্স, ৱিৱাহং কাৰযি বুধো.

১৯. দক্খিণং দেসমস্সেৱ, কণিট্ঠস্স সদাপযি;

ৰাজপুত্তস্স পাদাপি, পচ্চেকং ভোগমত্তনো.

২০. ৰজ্জম্হি সব্বং তস্সেৱ, পৰিভোগায দাপযি;

কেৱলন্তু ৱিচাৰেসি, দীপং দীপ হিতাৱহো.

২১. তেসং সংৱাসমন্ৱায, উভিন্নং পুঞ্ঞকম্মিনং;

ধঞ্ঞপুঞ্ঞগুণূপেতা, ৱিজাতা পুত্তধীতৰো.

২২. কত্ৱা সব্বোপহাৰেন, দাঠাধাতু মহামহং;

আৰুয্হ ৱৰপাসাদং, ৰতনৱ্হং মহীপতি.

২৩. তদা সোৱণ্ণযস্সাপি, সম্বুদ্ধস্স পুৰা ঠিতং;

সুঞ্ঞং পিট্ঠং সযং দিস্ৱা, কস্মা এৱন্তি সংৱদি.

২৪. ততো অমচ্চা আহংসু, নাজানাসি মহীপতি;

মহাপিতুনৰিন্দস্স, কালে তৱ নৰিস্সৰং.

২৫. পণ্ডুৰাজা ইধাগম্ম, দীপমেতং ৱিনাসিয;

সব্বং সাৰগতং দীপে, সমাদায গতো ইতি.

২৬. তং সুত্ৱা লজ্জিতো ৰাজা, সযং ৱিয পৰাজিতো;

তদহেৱ নিযোজেসি, অমচ্চে বলসঙ্গহে.

২৭. তদা’ৱ কিৰ আগঞ্ছি, পণ্ডুৰাজকুমাৰকো;

পৰিভূতো সৰাজেন, ৰজ্জত্থং কত নিচ্ছযো.

২৮. ৰাজা দিস্ৱা’তি সন্তুট্ঠো, কত্তব্বং তস্স কাৰিয;

মহাতিত্থ মুপাগম্ম, পট্টনং সেমত্ৰসো.

২৯. মহন্তং বলকাযঞ্চ, তস্সোপকৰণানি চ;

অনুনং পটিযাদেত্ৱা, দেৱসেনংৱ সজ্জিতং.

৩০. পণ্ডুৰাজকুমাৰেন, সদ্ধিং সেনাপতি সকং;

গন্ত্ৱা তং পণ্ডুৰাজানং, হন্ত্ৱানিকমিতো পুৰা.

৩১. ৰতনং সব্বমাদায, দত্ৱা ৰজ্জং ইমস্স চ;

ন চিৰেনেৱ এহীতী, উয্যোজেসি মহাযসো.

৩২. সোপি এৱং কৰোমীতি, পটিস্সুত্ৱা মহীপতিং;

ৱিন্দিত্ৱা বলমাদায, নামমাৰুয্হ তং খণে.

৩৩. পৰতীৰং ততো গন্ত্ৱা, সংৱুড়হ বলৱাহনো;

ৱিনাসযন্তো পচ্চন্তং, ৱাৰেসি মধুৰং পুৰং.

৩৪. দ্ৱাৰানি পিদহিত্ৱান, পচ্ছিন্দিত্থ গতাগতং;

ততো অগ্গিং খিপাপেসি, গোপুৰট্টাল কোট্ঠকে.

৩৫. এৱং সীহড়সেনায, পৱিট্ঠায সকং পুৰং;

সব্বং ৱিলুম্পমানায, সেনঙ্গং ঘাতযন্তিযা.

৩৬. পণ্ডুৰাজা নিসম্মেতং, সমাদায সকং বলং;

ৱেগসা তং সমাগম্ম, যুদ্ধং কাতুং সমাৰভি.

৩৭. অসম্পুণ্ণ বলত্তা সো, ৱিদ্ধো সল্লেন ভূপতি;

হত্থিক্খন্ধগতোযেৱ, ৱিহায পুৰমত্তনো.

৩৮. পলাযিত্ৱা গতঠানে, জীৱিতং নিজমেস্সজি;

ভৰিযাৱ’স্স তেনাসি, সম্পত্তা জীৱিতক্খযং.

৩৯. ততো সীহড়সেনাসা, পৱিট্ঠা নিব্ভযা পুৰং;

তত্থ সব্বং ৱিলুম্পিত্থ, দেৱা’সিৰপুৰং যথা.

৪০. সেনাপতি ততো ৰাজ-গেহে ভত্তং সমেক্খিয;

দীপানিতমিমম্হা চ, তত্ৰট্ঠঞ্চ মহাৰহং.

৪১. সাৰং সব্বংসমাদায, দেসে চ নগৰে ঠিতং;

কত্ৱা ইস্সৰিযং তত্থ, ৱসেৱত্তিয অত্তনো.

৪২. পণ্ডুৰাজ কুমাৰং তু, তত্থ ৰজ্জে’ভি সিঞ্চিয;

কাৰেত্ৱা পৰিহাৰঞ্চ, দেসং তস্স সমপ্পিয.

৪৩. যথাৰুচিং গহেত্ৱান, হত্থিঅস্সে নৰে’পি চ;

তত্থ তত্থ যথা কামং, ৱসন্তো অকুতো ভযো.

৪৪. সমুদ্দ তটমাগম্ম, ঠত্ৱা তত্থ যথাসুখং;

কীড়ন্তো ৱিয নাৱং সো, সমাৰুয্হ ৱিসাৰদো.

৪৫. মহাতিত্থ মুপাগম্ম, ৱন্দিত্ৱা ধৰণী পতিং;

তং সাসনং নিৱেদেত্ৱা, সাৰং দস্সেসি আহটং.

৪৬. ৰাজা সাধূতি ৱত্ৱান, কাৰেত্ৱা তস্স সঙ্গহং;

সদ্ধিং সেনায আগন্ত্ৱা, পকট্ঠায সকং পুৰং.

৪৭. জযপানং পিৱিত্ৱান, কত্ৱা ৱিজযমঙ্গলং;

মহাধাগং পৱত্তেত্ৱা, যাচকানং যথা ৰুচিং.

৪৮. সব্বং পাকতিকং কাসি, সাৰং দীপে নিৰালযো;

সোৱণ্ণ পটিমাযো চ, যথাঠানে ঠপাপযি.

৪৯. সুঞ্ঞং ৰতনপাসাদে, পিট্ঠং পূৰেসি সত্থুনো;

কাসি ৰক্খপিধানেন, নিব্ভযং ধৰণীতলং.

৫০. ততো পট্ঠায দীপংসো, অৰীনং দুপ্পধংসিযং;

কত্ৱা ৱড্ঢেসি ভোগেহি, উত্তৰাদিকুৰুং পিয.

৫১. খিন্না পুব্বস্স ৰাজস্স, কালে দীপম্হি পাণিনো;

নিব্বুতা তং সমাগম্ম, ঘম্মা ৱিয ৱলাহকা.

৫২. তস্স ৱীসতিমে ৱস্সে, ৱিহাৰে অভযুত্তৰে;

নিক্খমিত্ৱা গতা হেসুং, পংসুকূলিক ভিক্খৱো.

৫৩. যুৱৰাজা মহিন্দো সো, ধুমৰাজস্স সত্থুনো;

কাৰাপযি ঘৰং ৰম্মং, দস্সনেয্যং মনোৰমং.

৫৪. বোধিগেহং কৰোন্তো তং, দিস্ৱা ৱড্ঢকীনো তদা;

ৱংসেন সাখং আহচ্চ, ভিজ্জন্তং ৱৰবোধিযা.

৫৫. কিন্তু কাতব্বমেত্থাতি, যুৱৰাজং নিৱেদযুং;

সো তং তং মুপসংকম্ম, মহাপূজায পূজিয.

৫৬. সচে সত্থা, হিতত্থায, সম্ভূতো সব্বপাণিনং;

লদ্ধুং পুঞ্ঞস্স’নগ্ঘস্স, ঘৰস্স কৰণেতি’ধ.

৫৭. সাখা গচ্ছং তু উদ্ধংৱ, কাতুং সক্কা যথাঘৰং;

এৱমাৰাধযিত্ৱান, ৱন্দিত্ৱা সঙ্ঘৰং গতো.

৫৮. তদা সাখা দুমিন্দস্স, ৰত্তিযং উদ্ধমুগ্গমি;

ততো কম্মকৰা সব্বং, আৰোচেসুং সসামিনো.

৫৯. যুৱৰাজা’তি সন্তুট্ঠো, ভাতুৰঞ্ঞো নিৱেদিয;

মহাপূজায পূজেসি, ৱিস্সজ্জিয বহুধনং.

৬০. তথা মহিন্দসেনৱ্হং, পৰিৱেণঞ্চ কাৰিয;

সঙ্ঘস্সা’দা সভোগং সো, পুঞ্ঞা পুঞ্ঞানিচাচীনি.

৬১. অদা সপৰিসং ভত্তং, ৱত্থং ছত্তমুপাহনং;

তথা গমিযভত্তঞ্চ, নহানঞ্চ সভত্তকং.

৬২. এৱং খুদ্দানু খুদ্দানি, কত্ৱা পুঞ্ঞানি সো ৱিভূ;

ৰঞ্ঞো তেত্তিংসৱস্সম্হি, যথাকম্মমুপাগমি.

৬৩. অথ ৰাজা মতেতস্মিং, কণিট্ঠমুদযং সকং;

তস্স ঠানে ঠপেত্ৱান, সব্বং তস্সেৱ তস্সদা.

৬৪. তুলাভাৰস্স দানেন, দীনানাথে সতপ্পযি;

ধম্মকম্মেন সোধেসি, নিকাযত্তযমেকতো.

৬৫. সোণ্ণথালীসহস্সং সো, মুত্তাহি পৰিপূৰিয;

ঠপেত্ৱা মণিমেকেকং, তস্সোপৰি মহাৰহং.

৬৬. ব্ৰাহ্মণানং সহস্সস্স, সুদ্ধে ৰতনভাজনে;

ভোজেত্ৱা খীৰপাযাসং, দাপেত্ৱা হেমসুত্তকং.

৬৭. তথা নৱেহি ৱত্থেহি, অচ্ছাদেত্ৱা যথাৰুচিং;

সন্তপ্পেসি মহন্তেন, পৰিহাৰেন পুঞ্ঞৱা.

৬৮. ভিক্খূনং দীপৱাসীনং, অদাসি চ তিচীৱৰং;

অদা সব্বাসমিত্থীনং, ৱত্থঞ্চ সুমনোহৰং.

৬৯. কাৰেত্ৱা লোহপাসাদং, ৱেজযন্তসৰিক্খকং;

ৱড্ঢেসি পটিমং তত্থ, সুৱণ্ণঘটকোট্টিমং.

৭০. সুত্ৱা উপোসথাগাৰ-ভাৱং সব্ব মহেসীনং;

তুচ্ছো যং নেৱ হোতূতি, ৱাসং সঙ্ঘস্স তং অকা.

৭১. ভোগগামে চ তস্সদা, ৰক্খকে চ নিযোজযি;

ভিক্খূ দ্ৱত্তিংসমত্তাহি, ৱসন্তূতি নিযামযি.

৭২. গঙ্গায মৰিযাদং সো, কাৰেসি মণিমেখলং;

তোযনিদ্ধমনঞ্চাকা, মণিহীৰকৱাপিযা.

৭৩. কট্ঠুন্তনগৰে চেৱ, কাণৱাপিংচ বন্ধযি;

ৱেজ্জসালঞ্চ কাৰেসি, চেতিযম্হি গিৰিম্হি সো.

৭৪. বুদ্ধগামৱিহাৰঞ্চ, ৱিহাৰং মহিযঙ্গণং;

কূটতিস্স ৱিহাৰঞ্চ, ভোগগামে ন ৱড্ঢযি.